‘അഷ്ടഗൃഹത്തിലാഢ്യ’നായ ഇഎംഎസ് എങ്ങനെ വിപ്ലവകാരിയായി?

മലപ്പുറം പെരിന്തൽമണ്ണയിലെ ഒരു ആഢ്യ ബ്രാഹ്മണ കുടുംബത്തിലാണ് ഇഎംഎസ് ജനിച്ചത്. ബ്രാഹ്മണരിലെ ജാതിവ്യവസ്ഥയെക്കുറിച്ച് കാര്യമായ ചർച്ചകൾ നമ്മുടെ സമൂഹത്തിൽ പതിവില്ലാത്തതാണ്. ബ്രാഹ്മണസമുദായം അക്കാലത്ത് എത്രകണ്ട് ജീർണിതമായ ബ്രാഹ്മണ്യത്തിന്റെ രൂക്ഷഗന്ധത്തെ പൊതുസമൂഹത്തിലേക്ക് വമിച്ചിരുന്നുവോ അത്രതന്നെ സ്വസമുദായത്തിലേക്കും വമിപ്പിച്ചിരുന്നു. ബ്രാഹ്മണസമുദായത്തിനകത്തും സവർണരും ദളിതരുമുണ്ടായിരുന്നെന്ന് ചുരുക്കം. ഇഎംഎസ് ആദ്യം നടത്തിയ പോരാട്ടം സ്വസമുദായത്തിലെ കടുത്ത ജാതിവ്യവസ്ഥയ്ക്കും, സ്ത്രീവിരോധത്തിനുമെല്ലാം എതിരായിരുന്നു.

ബ്രാഹ്മണ ജാതികൾ



അതേസമയം മറ്റുള്ള ജാതികളിലെന്ന പോലെ മലയാള ബ്രാഹ്മണരിലും അനേകം അവാന്തര വിഭാഗങ്ങൾ ഉണ്ടായിരുന്നുവെന്നും ഇവർക്കിടയിലും കടുത്ത ജാതിവ്യവസ്ഥ നിലനിന്നിരുന്നുവെന്നും ചരിത്രം പറയുന്നുണ്ട്. കേരളത്തിലെത്തിയ ബ്രാഹ്മണര്‍ ഇവിടെ സ്ഥാപിച്ച ജാതിവ്യവസ്ഥയില്‍ ജാതികളും ഉപജാതികളുമായി 64 എണ്ണം ഉണ്ടായിരുന്നുവെന്ന് ചരിത്രഗ്രന്ഥങ്ങളിൽ കാണാം. ഇതിൽ ബ്രാഹ്മണർ (വിപ്രന്മാർ) – 8, ന്യൂനജാതി ബ്രാഹ്മണർ- 2, അന്തരാളജാതി- 12, ശൂദ്രൻ -18, ശില്പി- 6, പതിതൻ- 1, താണജാതി-8 എന്നിങ്ങനെയായിരുന്നു ആ തരംതിരിവ്. ഇതിൽ വിപ്രൻമാർ എന്നതിൽ തമ്പ്രാക്കൾ, അഷ്ടഗൃഹത്തിലാഢ്യർ, വിശിഷ്ടബ്രാഹ്മണർ (അക്കിത്തിരി, അടിതിരി, ചോമാതിരി, ഭട്ടതിരി മുതലായവർ), സാമാന്യബ്രാഹ്മണർ, ജാതിമാത്രന്മാർ, സാങ്കേതികന്മാർ (പോറ്റിമാർ, എമ്പ്രാന്മാർ), ശാപഗ്രസ്തന്മാർ, പാപിഷ്ഠന്മാർ (പന്നിയൂർ ഗ്രാമക്കാർ, ഗ്രാമണികൾ മുതലായവർ) എന്നീ ഉപജാതികളാണ് ഉൾപ്പെട്ടിരുന്നത്. പന്നിയൂർ ഗ്രാമക്കാരെ ശുകപുരം ഗ്രാമക്കാർ ബ്രാഹ്മണരായി അംഗീകരിക്കാൻ പോലും കൂട്ടാക്കിയിരുന്നില്ല. പന്നിയൂരുകാരെ ആഢ്യബ്രാഹ്മണർ കുറഞ്ഞവരായി കണക്കുകൂട്ടി.

എളയതുമാർ, മൂത്തത് എന്നറിയപ്പെട്ടിരുന്നവരായിരുന്നു ന്യൂനജാതി (കുറഞ്ഞ ജാതി) ബ്രാഹ്മണരായി പരിഗണിച്ചിരുന്നത്. ഇവരുടെ ഇടയിൽ നിലനിന്നിരുന്ന ജാതിവ്യവസ്ഥയിലെ മറ്റൊരു വിഭാഗമാണ് അന്തരാളര്‍ അഥവാ അമ്പലവാസികള്‍. അവരുടെ സ്ഥാനം ക്ഷത്രിയര്‍ക്ക് താഴെ നായന്മാര്‍ക്ക് മുകളിലാണ്. അടികൾ, പുഷ്പകൻ, പൂപ്പള്ളി, പിഷാരടി, വാര്യർ, ചാക്യാർ, നമ്പിയാർ, തീയാട്ടുണ്ണി, പിടാരന്മാർ, കുരുക്കൾ, നാട്ടുപ്പട്ടൻ (പട്ടരുണ്ണി), പൊതുവാൾ എന്നിവരായിരുന്നു അന്തരളാജാതികളായി അറിയപ്പെട്ടിരുന്നത്. ക്ഷേത്രങ്ങളുമായി ബന്ധപ്പെട്ട ജോലികളായിരുന്നു ഇവരുടേത്.

‘അഷ്ടഗൃഹത്തിലാഢ്യ’നായ ഇഎംഎസ്



അഷ്ടഗൃഹത്തിൽ ആഢ്യന്മാരാണ് കേരളത്തിലെ നമ്പൂതിരിപ്പാട് എന്ന ജാതിക്കുള്ളിൽ വരുന്നത്. ബ്രാഹ്മണർക്കിടയിലെ ജാതി വ്യവസ്ഥയിൽ രണ്ടാംസ്ഥാനത്ത് നിൽക്കുന്ന ഇവർ വേദങ്ങൾ പഠിച്ചവരായിരുന്നതിനാൽ ക്ഷേത്രങ്ങളുമായി ബന്ധപ്പെട്ട് ജീവിച്ചിരുന്നവരാണെന്ന് കാണാം. മാത്രമല്ല കേരളത്തിലെ തന്നെ മറ്റു ബ്രാഹ്മണരേക്കാൾ അതിവിശിഷ്ടരാണ്‌ തങ്ങൾ എന്നാണ് ഇവർ വിശ്വസിച്ചു പോന്നിരുന്നത്. വി. ടി. ഭട്ടതിരിപ്പാട്, ഇ. എം. എസ്., കുഴൂർ ഭട്ടതിരി എംപി ഭട്ടതിരിപ്പാട് തുടങ്ങിയവരൊക്കെയും നമ്പൂതിരി സമുദായത്തിൽ നവോത്ഥാനത്തിന്റെ പാത തെളിയിച്ചവരായിരുന്നുവെന്ന് പ്രത്യേകം പറയേണ്ടതില്ലല്ലോ.

അഗ്നിഹോത്രം, ഭട്ടവൃത്തി, സന്ന്യാസം, അന്യദ്വിജന്മാരെക്കൊണ്ട് യാഗം ചെയ്യിക്കൽ ഇങ്ങനെയുള്ള ജോലികൾ ചെയ്തിരുന്നവരാണ് വിശിഷ്ടബ്രാഹ്മണർ. കൂടാതെ സാമാന്യബ്രാഹ്മണർ, ജാതിമാത്രന്മാർ, സാങ്കേതികന്മാർ, ശാപഗ്രസ്തന്മാർ, പാപിഷ്ഠന്മാർ തുടങ്ങി ഓരോ ജാതികൾക്കും അവരവരുടേതായ കുലത്തൊഴിൽ ഉണ്ടായിരുന്നു. ബ്രാഹ്മണരിലെ ഈ ഉപജാതികൾക്കിടയിലും ജോലിയുടെയും മറ്റും ഭാഗമായി അയിത്തം നിലനിന്നിരുന്നു. മാത്രമല്ല ഒരു ജാതി ചെയ്യുന്ന തൊഴിലിൽ മറ്റുള്ളവർ ഏർപ്പെട്ടിരുന്നില്ല. ഇതിൽ തന്നെ ശാപഗ്രസ്തൻമാരെ കുറിച്ച് പറഞ്ഞിരിക്കുന്നത് പരശുരാമനെ പരീക്ഷിക്കാൻ മുതിർന്നതിനാൽ പരശുരാമനാലും മറ്റ് ആചാര്യന്മാരാലും ശപിക്കപ്പെട്ട വിഭാഗമായിട്ടാണ്. പക്ഷേ ഇവരെയും സാമാന്യമായി നമ്പൂരിമാർ എന്നാണ് പറയുന്നത്.

അതേസമയം പാപിഷ്ഠന്മാരെ വീണ്ടും അഞ്ച് ഉപജാതികളായി തിരിച്ചിട്ടുണ്ട്. പരശുരാമനോട് ദാനം വാങ്ങിച്ച ഊരിലെ ‘പരിഷമുസ്സെന്മാർ, പെരുമാളെ നിഗ്രഹിക്കാൻ അനുവാദം കൊടുത്ത ഗ്രാമണികൾ, വരാഹമൂർത്തിയെക്കളഞ്ഞ പന്നിയൂർ ഗ്രാമക്കാർ, ശൂദ്രപൗരോഹിത്യം വഹിച്ച ഇളയതന്മാർ, ബ്രാഹ്മണരുടെ അനുവാദപ്രകാരം പെരുമാളിനെ വധിച്ച നമ്പിടികൾ എന്നിവരാണ് പാപിഷ്ടരിൽ വരുന്നതെന്ന് ചില ചരിത്രപുസ്തകങ്ങളിലും പറയുന്നുണ്ട്. മാത്രമല്ല ഏതൊക്കെ കർമ്മങ്ങൾ ചെയ്താൽ ഭ്രഷ്ടു സംഭവിക്കുമെന്നു വേദശാസ്ര്തത്തിൽ പറഞ്ഞിട്ടുണ്ടെന്നും ആ കർമ്മങ്ങൾ ചെയ്യുന്നവരെയും പാപിഷ്ഠന്മാർ എന്ന ഉപജാതിയിൽ പെടുത്തിയിട്ടുണ്ട്.

ജാതിവ്യവസ്ഥ ഉണ്ടാക്കി സമൂഹത്തിന്റെ മേൽത്തട്ടിൽ സ്ഥാനം നേടിയ ബ്രാഹ്മണർ പക്ഷേ സ്വജാതിക്കുള്ളിലും ജാതി വ്യവസ്ഥയെ പരിപാലിച്ചു പോരുന്നവരായിരുന്നുവെന്നാണ് ഇവർക്കിടയിലെ അവാന്തരവിഭാഗങ്ങളെക്കുറിച്ചുള്ള വിവരങ്ങൾ പറയാതെ പറയുന്നത്. സമൂഹത്തിൽ ജാതിനിയമങ്ങള്‍ കര്‍ശനമായി പാലിക്കപ്പെടുന്നതില്‍ ബദ്ധശ്രദ്ധരായിരുന്ന ഇവർ സ്വജാതിയിലും അത് കൃത്യമായി നിറവേറ്റിപ്പോന്നു. അതേ സമയം ഭൂമിയുടെ ഉടമസ്ഥത സംബന്ധിച്ച വിഷയത്തിൽ ബ്രാഹ്മണർക്ക് തൊട്ടുതാഴെയായിരുന്ന നായൻമാർക്ക് കേരളത്തിലെ ബ്രാഹ്മണൻമാരുമായി കൂടുതൽ ദൃഢമായ ബന്ധം ഉണ്ടായിരുന്നു. അത് സംബന്ധം വഴിയായിരുന്നു എന്ന് ചരിത്രം പറയുന്നുണ്ട്. ജാതിവ്യത്യാസംകൊണ്ട് സാമൂഹികമായി അകല്‍ച്ചയും ശൈഥില്യവും സംഭവിക്കേണ്ട സ്ഥാനത്താണ് ഇവർക്കിടയിൽ ബന്ധം ഉണ്ടായിരുന്നത്.