പ്രധാനമന്ത്രി ഉദ്ഘാടനം ചെയ്ത ബെം​ഗളുരു-മൈസൂരു അതിവേ​ഗ പാത വെള്ളത്തിൽ

“വെള്ളക്കെട്ടിൽ പാതി മുങ്ങിയ എന്റെ മാരുതി സ്വിഫ്റ്റ് കാർ ഓഫായിപ്പോയി. പിന്നാലെ വന്ന ലോറി എന്റെ വാഹത്തിൽ ഇടിച്ചു. ആരാണ് ഇതിന് ഉത്തരവാദി? എന്റെ കാർ നന്നാക്കി നൽകാൻ ഞാൻ മുഖ്യമന്ത്രി ബസവരാജ് ബൊമ്മെയോട് അഭ്യർത്ഥിക്കുന്നു. റോഡ് ഉദ്ഘാടനം ചെയ്യുന്നതിനു മുമ്പ് പാത ഉദ്ഘാടനത്തിന് തയ്യാറാണോയെന്ന് പ്രധാനമന്ത്രിയും ബന്ധപ്പെട്ട മന്ത്രാലയങ്ങളും പരിശോധിച്ചിരുന്നോ? വോട്ട് ബാങ്ക് രാഷ്ട്രീയത്തിനു വേണ്ടി നമ്മൾ കഷ്ടപ്പെടുന്നത് എന്തിന്? അവർ ഭീമമായ ടോൾ തുക ആവശ്യപ്പെടുന്നു. എന്താണ് പ്രയോജനം?” യാത്രക്കാരനായ വികാസ് പറഞ്ഞു. എൻഡിടിവിയോടായിരുന്നു വികാസിന്റെ പ്രതികരണം.

“അടിപ്പാതയിൽ വെള്ളം നിറയാൻ തുടങ്ങിയതിനു പിന്നാലെ നിരവധി അപകടങ്ങളാണ് അതിവേഗ പാതയിൽ ഉണ്ടായത്. ആദ്യം എന്റെ വാഹനമായിരുന്നു. തുടർന്ന് എഴ് മുതൽ എട്ട് വരെ വാഹനങ്ങൾ ഉൾപ്പെടുന്ന ബമ്പർ ടു ബമ്പർ അപകടങ്ങളുടെ ഒരു പരമ്പര തന്നെയുണ്ടായി. വെള്ളം ഒഴുക്കി കളയാൻ മാർഗമില്ല. പ്രധാനമന്ത്രിയെങ്ങാനും വരുന്നുണ്ടെന്ന് അറിഞ്ഞാൽ പത്ത് മിനിറ്റിനുള്ള അവർ വെള്ളക്കെട്ട് ഇല്ലാതാക്കും. നമ്മൾ സാധാരണക്കാർ കഷ്ടപ്പെടുന്നത് കണ്ടില്ലേ? ഇതിന്റെയൊക്കെ ഉത്തരവാദികൾ ആരാണ്?” മറ്റൊരു യാത്രക്കാരനായ നാഗരാജു ചോദിച്ചു.

തുറന്നു കൊടുത്തിട്ട് ദിവസങ്ങൾ മാത്രം; ബെംഗളുരു-മൈസൂർ അതിവേഗ പാത പൊളിഞ്ഞു

മാർച്ച് 12നാണ് പ്രധാനമന്ത്രി നരേന്ദ്ര മോദി 118 കി മി ദൈർഘ്യമുള്ള അതിവേഗ പാത ഉദ്ഘാടനം ചെയ്തത്. ഇത് യാത്രാ സമയം 75 മിനിറ്റായി കുറച്ചു. നേരത്തെ മൂന്ന് മണിക്കൂറാണ് വേണ്ടിയിരുന്നത്.

അതേസമയം അതിവേഗ പാതയിൽ ബിഡദിക്ക് സമീപമുള്ള മേൽപ്പാലത്തിൽ കഴിഞ്ഞ ദിവസം വലിയ കുഴി രൂപപ്പെട്ടിരുന്നു. മേൽപ്പാലത്തിന്റെ സ്പാനുകളെ കൂട്ടിയിണക്കുന്ന സ്ഥലത്താണ് റോഡ് പൊട്ടിപ്പൊളിഞ്ഞത്. ഇന്ത്യൻ റോഡ് കോൺഗ്രസ് (ഐആർസി) നിശ്ചയിച്ചിട്ടുള്ള മാനദണ്ഡങ്ങൾ അനുസരിച്ചല്ല പാത നിർമ്മിച്ചിരിക്കുന്നതെന്നാണ് കോൺഗ്രസ് ആരോപിക്കുന്നത്.