വന്ദേ ഭാരത് പദ്ധതി ആരംഭിക്കാൻ ആവശ്യമായ അനുമതി നേടിയെടുക്കാൻ കേന്ദ്രസർക്കാരിൽ വലിയ സമ്മർദ്ദം ചെലുത്തേണ്ടി വന്നെന്നും നടപടികൾ ഒട്ടും എളുപ്പമല്ലായിരുന്നെന്നും അദ്ദേഹം അടുത്തിടെ നൽകിയ ഒരു അഭിമുഖത്തിൽ വിശദീകരിച്ചു. ചെന്നൈയിലെ ഇൻ്റഗ്രൽ കോച്ച് ഫാക്ടറിയുടെ ജനറൽ മാനേജറായിരുന്നു സുധാംശു മണിയുടെ മേൽനോട്ടത്തിലായിരുന്നു പുതിയ ട്രെയിനിൻ്റെ പ്രോട്ടോടൈപ്പിൻ്റെ നിർമാണം പൂർത്തിയാക്കിയതും ആവശ്യമായ അനുമതികൾ നേടിയെടുത്തതും. മണിക്കൂറിൽ 160 കിലോമീറ്റർ വരെ വേഗമാർജിക്കാൻ കഴിയുന്ന ട്രെയിൻസെറ്റിന് ട്രെയിൻ 18 എന്നായിരുന്നു കോഡ് നാമം നൽകിയത്.
നെല്‍കര്‍ഷകരുടെ പ്രതീക്ഷകൾ നശിപ്പിച്ച് കാട്ടുപന്നി ആക്രമണം | Rice Farmers
സമാനമായ ഒരു ട്രെയിൻ വിദേശത്തു നിന്ന് ഇറക്കുമതി ചെയ്യാൻ വേണ്ടി വരുന്നതിൻ്റെ മൂന്നിലൊന്ന് ചെലവിലാണ് വന്ദേ ഭാരത് ട്രെയിൻ ഐസിഎഫ് നിർമിച്ചത്. എന്നാൽ റെയിൽവേ മന്ത്രാലയത്തിന് ഇത് നടപ്പാക്കാനാകുമെന്ന് ഒട്ടും വിശ്വാസമില്ലായിരുന്നു എന്ന് ഹിന്ദി മാധ്യമമായ ദൈനിക് ജാഗ്രണിനു നൽകിയ അഭിമുഖത്തിൽ അദ്േദേഹം പറഞ്ഞു. “മൂന്നിലൊന്ന് തുകയ്ക്ക് ലോകോത്തര ട്രെയിൻ നിർമിക്കാമെന്ന ഞങ്ങളുടെ ടീമിൻ്റെ വാഗ്ദാനം മന്ത്രാലയത്തിലെ ഉദ്യോഗസ്ഥർ വിശ്വസിച്ചില്ല. ഇതു വെറും പബ്ലിസിറ്റി സ്റ്റണ്ടാണെന്നാണ് അവർ കരുതിയത്.” മൂന്നിലൊന്ന് ചെലവിൽ തദ്ദേശീയമായി സെമി ഹൈസ്പീഡ് ട്രെയിൻ നിർമിക്കാമെന്ന് ഉറപ്പു നൽകിയെങ്കിലും അന്നത്തെ റെയിൽവേ ബോർഡ് ചെയർമാൻ അംഗീകരിച്ചില്ല. അന്നത്തെ ചെയർമാൻ വിരമിക്കാൻ 14 മാസം മാത്രമായിരുന്നു ബാക്കിയുണ്ടായിരുന്നത്. അതുകൊണ്ട് അനുമതി കിട്ടാനായി ഒരു നുണയും പറയേണ്ടി വന്നു. അനുമതി നൽകിയാൽ അദ്ദേഹം വിരമിക്കുന്നതിനു മുൻപ് ട്രെയിനിൻ്റെ നിർമാണം പൂർത്തിയാക്കാമെന്നും അദ്ദേഹത്തിന് ഉദ്ഘാടനം ചെയ്യാനാകുമെന്നും പറഞ്ഞു. എന്നാൽ അത്രയും കുറഞ്ഞ സമയത്തിനുള്ളിൽ ട്രെയിൻ നിർമാണം തീരില്ലെന്ന് അറിയാമായിരുന്നുവെന്നും അദ്ദേഹം കൂട്ടിച്ചേർത്തു.
‘ദുരിത ഓർമ്മകളില്ല, ചെല്ലാനം പഴയ ചെല്ലാനമല്ല’; 340 കോടിയുടെ ടെട്രാപോഡ് പദ്ധതിയുടെ 92 ശതമാനവും പൂർത്തിയായെന്ന് മന്ത്രി
എന്നാൽ എത്ര പറഞ്ഞിട്ടും അനുമതി ലഭിച്ചില്ല. ഒടുവിൽ ഉദ്യോഗസ്ഥൻ്റെ കാലിൽ വീണെന്നും അനുമതി നൽകാതെ പോകില്ലെന്നു പറഞ്ഞെന്നും സുധാംശു മണി പറഞ്ഞു. അങ്ങനെ ഒടുവിൽ അനുമതി ലഭിച്ചു. ഇതിനു പിന്നാലെ ട്രെയിനിൻ്റെ നിർമാണം അതിവേഗം പൂർത്തിയാക്കാനായി ശ്രമം തുടങ്ങി. വിദേശത്ത് സമാനമായ ട്രെയിൻ നിർമിക്കാൻ മൂന്ന് വർഷമെടുക്കുമെന്നും 18 മാസം കൊണ്ട് നിർമാണം പൂർത്തിയാക്കാനായിരുന്നു ശ്രമമെന്നും സുധാംശു മണി പറഞ്ഞു. ഇതിൻ്റെ സൂചനയായാണ് ട്രെയിൻ 18 എന്ന കോഡ് നാമം നൽകിയത്.
ചെന്നൈ ഐസിഎഫിൽ നിന്ന് വിരമിക്കുന്ന സമയത്തു തന്നെ രണ്ട് വന്ദേ ഭാരത് ട്രെയിനുകൾ തയ്യാറാക്കിയിരുന്നു. വരുന്ന മൂന്നോ നാലോ വർഷത്തിനുള്ളിൽ ഇന്ത്യൻ റെയിൽവേ മുന്നൂറിലധികം വന്ദേ ഭാരത് ട്രെയിനുകൾ പുറത്തിറക്കുമെന്നാണ് അദ്ദേഹം പറയുന്നത്.
കൊച്ചി നഗരത്തിനു പുറത്ത് മൂന്ന് ഗ്രീൻഫീൽഡ് പാതകൾ; നഗരം കിഴക്കോട്ടു വളരും, ജില്ലയുടെ എല്ലാ കോണിലേയ്ക്കും നാലുവരി ഹൈവേ
ചരിത്രം കുറിച്ച വന്ദേ ഭാരത് എക്സ്പ്രസ്
ഇന്ത്യ തദ്ദേശീയമായി നിർമിച്ച ആദ്യ സെമി ഹൈസ്പീഡ് ട്രെയിനാണ് വന്ദേ ഭാരത് എക്സ്പ്രസ്. സാധാരണ ഇന്ത്യൻ ട്രെയിനുകളിൽ നിന്ന് വ്യത്യസ്തമായി കോച്ചുകൾ ചലിപ്പിക്കാൻ പ്രത്യേക എൻജിനില്ല. ഇരുവശത്തും കോക്ക്പിറ്റുകളുള്ള ട്രെയിൻ സഞ്ചരിക്കുന്നത് കോച്ചുകളുടെ അടിഭാഗത്തു ഘടിപ്പിച്ച ട്രാക്ഷൻ മോട്ടറുകളുടെ സഹായത്തോടെയാണ്. ഇതുവഴി പെട്ടെന്നു തന്നെ വേഗമാർജിക്കാനും നിർത്താനും സാധിക്കും. ഓട്ടോമാറ്റിക് വാതിലുകൾ, കാണാൻ ഭംഗിയുള്ള ഇൻ്റീരിയർ, ജിപിഎസ് അധിഷ്ടിത എൽഇഡി ബോർഡുകൾ, സുഖകരമായ സീറ്റുകൾ, മികച്ച പ്രകാശസംവിധാനം തുടങ്ങിയവയും ട്രെയിനിനുണ്ട്. വൈകാതെ വന്ദേ ഭാരത് സ്ലീപ്പർ ട്രെയിനുകളും ഹ്രസ്വദൂര യാത്രകൾക്കുള്ള വന്ദേ മെട്രോയും പുറത്തിറക്കാനുള്ള ഒരുക്കത്തിലാണ് റെയിൽവേ.
