റിയാദ്: സൗദി അറേബ്യയില്‍ വസിക്കുന്ന സ്വദേശികളും വിദേശികളുമായ മുസ്ലിംകള്‍ക്ക് ഈ വര്‍ഷത്തെ ഹജ്ജ് തീര്‍ഥാടനത്തില്‍ പങ്കെടുക്കുന്നതിന് റമദാന്‍ 10 വരെ രജിസ്റ്റര്‍ ചെയ്യാമെന്ന് സൗദി ഹജ്ജ്, ഉംറ മന്ത്രാലയം അറിയിച്ചു. ഇതിനു മുമ്പ് വാര്‍ഷിക ഹജ്ജ് തീര്‍ഥാടനം നടത്താത്തവരായ സൗദി പൗരന്മാര്‍ക്കും രാജ്യത്ത് താമസിക്കുന്ന വിദേശികള്‍ക്കും റമദാന്‍ 10 വരെ ഹജ്ജിന് അപേക്ഷിക്കാന്‍ കഴിയുമെന്ന് മന്ത്രാലയം ട്വിറ്ററില്‍ അറിയിച്ചു.
നേരത്തേ ഹജ്ജ് ചെയ്തവര്‍ക്കും അപേക്ഷിക്കാന്‍ അവസരം
അതേസമയം, സൗദി അറേബ്യയില്‍ നേരത്തെ ഹജ്ജ് ചെയ്തവര്‍ക്ക് വീണ്ടും ഹജ്ജിന് അപേക്ഷിക്കാന്‍ അവസരം നല്‍കുമെന്ന് ഹജ്ജ് ഉംറ മന്ത്രാലയം വ്യക്തമാക്കി. ഏപ്രില്‍ ഒന്ന് (റമദാന്‍ 10) മുതലാണ് ഈ വിഭാഗത്തില്‍ പെട്ടവര്‍ക്ക് ഹജ്ജിന് അപേക്ഷിക്കാനുള്ള അവസരം നല്‍കുക. റമദാന്‍ 11 മുതല്‍ കഴിഞ്ഞ അഞ്ച് വര്‍ഷമോ അതിന് മുമ്പോ ഹജ്ജ് ചെയ്തവര്‍ക്കും അപേക്ഷിക്കാമെന്നാണ് മന്ത്രാലയം അറിയിച്ചിട്ടുള്ളത്. ടെന്റുകളിലും മറ്റ് താമസ സ്ഥലങ്ങളിലുമുള്ള സൗകര്യത്തിനനുസരിച്ച് മാത്രമേ അപേക്ഷ സ്വീകരിക്കുകയുള്ളൂ. കഴിഞ്ഞ ജനുവരി അഞ്ചു മുതലാണ് സൗദി അറേബ്യയിലുള്ളവര്‍ക്ക് നുസുക് ആപ്ലിക്കേഷന്‍ വഴിയും ഓണ്‍ലൈന്‍ വഴിയും ഹജ്ജിനുള്ള അപേക്ഷ സ്വീകരിച്ചുതുടങ്ങിയത്. സൗദിയില്‍ വെച്ച് ഇതുവരെ ഹജ്ജ് ചെയ്യാത്തവര്‍ക്ക് മാത്രമാണ് അപേക്ഷിക്കാന്‍ അവസരമുണ്ടായിരുന്നത്. https://localhaj.haj.gov.sa എന്ന ലിങ്ക് വഴിയോ നുസിക്ക് ആപ്പ് വഴിയോ ആണ് രജിസ്ട്രേഷന്‍ നടത്തേണ്ടതെന്നും മന്ത്രാലയം വ്യക്തമാക്കി.
കൈക്കൂലി വാങ്ങുന്നതിനിടയില്‍ അഞ്ചലില്‍ താലൂക്ക് സര്‍വേയര്‍ പിടിയിൽ |Bribery
പാക്കേജ് തുകയുടെ അവസാന ഗഡു റമദാന്‍ 10നകം
ഹജ്ജില്‍ പങ്കെടുക്കാന്‍ ആഗ്രഹിക്കുന്ന ആഭ്യന്തര തീര്‍ഥാടകര്‍ക്കായി 3984 റിയാല്‍ മുതല്‍ 11,841 റിയാല്‍ വരെ വിലയുള്ള നാല് പാക്കേജുകള്‍ മന്ത്രാലയം പുറത്തിറക്കിയിരുന്നു. ആഭ്യന്തര തീര്‍ഥാടകര്‍ക്ക് ഈ വര്‍ഷത്തെ ഹജ്ജ് ഫീസ് മൂന്ന് ഗഡുക്കളായി അടയ്ക്കാമെന്നും മന്ത്രാലയം അറിയിച്ചിരുന്നു. നേരത്തേ ഇത് ഒറ്റത്തവണയായി മാത്രമേ അടക്കാന്‍ കഴിയുമായിരുന്നുള്ളൂ. അവസാനത്തെ ഗഡു റമദാന്‍ പത്തിനകം അടയ്ക്കണം. വരാനിരിക്കുന്ന ഹജ്ജ് സീസണില്‍ ലോകമെമ്പാടുമുള്ള തീര്‍ഥാടകരുടെ എണ്ണത്തില്‍ യാതൊരു നിയന്ത്രണവുമില്ലെന്നും മന്ത്രാലയം നേരത്തേ വ്യക്തമാക്കിയിരുന്നു. കൊവിഡിന് മുമ്പ് ഏകദേശം 25 ലക്ഷം മുസ്ലീങ്ങള്‍ പ്രതിവര്‍ഷം ഹജ്ജില്‍ പങ്കെടുക്കാറുണ്ടായിരുന്നു. ഇസ്ലാമിക വിശ്വാസ പ്രകാരം ശാരീരികമായും സാമ്പത്തികമായും ഹജ്ജ് ചെയ്യാന്‍ ശേഷിയുള്ള മുസ്ലിംകള്‍ ജീവിതത്തില്‍ ഒരിക്കലെങ്കിലും ഹജ്ജ് നിര്‍വഹിക്കണം എന്നാണ് നിയമം.
മസ്ജിദുന്നബവിയിലെ 100 ഗേറ്റുകളും തുറക്കും
അതിനിടെ, വിശുദ്ധ റമദാനില്‍ വിശ്വാസികളുടെ സഞ്ചാരം എളുപ്പമാക്കാനും ഇഫ്ത്താര്‍ ഭക്ഷണം ഉള്‍പ്പെടെയുള്ളവ സുഗമമായി അകത്തേക്ക് പ്രവേശിപ്പിക്കുന്നതിനുമായി മദീനയിലെ മസ്ജിദുന്നബിയിലെ മുഴുവന്‍ കവാടങ്ങളും തുറന്നിടുമെന്ന് സുരക്ഷാ കാര്യങ്ങള്‍ക്കുള്ള മസ്ജിദുന്നബവികാര്യ വകുപ്പ് അണ്ടര്‍ സെക്രട്ടറി സൗദ് അല്‍ സഈദി പറഞ്ഞു. പ്രവാചക പള്ളിയില്‍ 100 കവാടങ്ങളാണുള്ളത്. ഇവ മുഴുവന്‍ റമദാനില്‍ തുറന്നിടും. മസ്ജിദുന്നബവിയുടെ ടെറസ്സിലേക്കുള്ള എസ്‌കലേറ്ററുകളും ചുറ്റുമതിലിലെ 70 ഗെയ്റ്റുകളും റമദാനില്‍ തുറന്നിടുമെന്നും അദ്ദേഹം അറിയിച്ചു. മറ്റു വിശ്വാസികള്‍ക്ക് ബുദ്ധിമുട്ടുണ്ടാക്കാത്ത വിധത്തില്‍ മസ്ജിദുന്നബവിയിലേക്ക് ഇഫ്താര്‍ വിഭവങ്ങള്‍ പ്രവേശിപ്പിക്കുന്നതിന് പ്രത്യേക കവാടങ്ങള്‍ നിര്‍ണയിച്ചിട്ടുണ്ട്. ഭക്ഷ്യവസ്തുക്കള്‍ പ്രവേശിപ്പിക്കാന്‍ ഓരോ ഗ്രൂപ്പിനും പ്രത്യേക കവാടങ്ങള്‍ നിര്‍ണയിച്ചിട്ടുണ്ടെന്നും സൗദ് അല്‍ സഈദി പറഞ്ഞു.
ഉംറ തീര്‍ഥാടതര്‍ക്ക് ചൂടില്‍ ആശ്വാസമായി കുടകള്‍
വിശുദ്ധ കഅ്ബാലയത്തോടു ചേര്‍ന്ന തുറസ്സായ മതാഫില്‍ ത്വവാഫ് കര്‍മം നിര്‍വഹിക്കുന്നതിനിടെ കടുത്ത വെയിലില്‍നിന്ന് സംരക്ഷണം നേടാന്‍ തീര്‍ഥാടകര്‍ക്കിടയില്‍ കുടകള്‍ വിതരണം ചെയ്തു. ഹറംകാര്യ വകുപ്പിനു കീഴിലെ സാമൂഹിക, സന്നദ്ധപ്രവര്‍ത്തന വിഭാഗമാണ് തീര്‍ഥാടകര്‍ക്ക് സൗജന്യമായി കുടകള്‍ വിതരണം ചെയ്തത്. മതാഫിനു സമീപം വിവിധ സ്ഥലങ്ങളിലായി പ്രത്യേകം ഒരുക്കിയ കിയോസ്‌ക്കുകളില്‍ വച്ചാണ് ഹറംകാര്യ വകുപ്പ് ജീവനക്കാര്‍ തീര്‍ഥാടകര്‍ക്കിടയില്‍ ആയിരക്കണക്കിന് കുടകള്‍ വിതരണം ചെയ്തരണം ചെയ്തത്. കനത്ത ചൂടില്‍ കഅബയെ പ്രദക്ഷിണം ചെയ്യുന്ന തീര്‍ഥാടകര്‍ക്ക് മികച്ച സൗകര്യങ്ങള്‍ ഉറപ്പുവരുത്തുന്നതിന്റെ ഭാഗമായാണ് നടപടിയെന്നും അധികൃതര്‍ അറിയിച്ചു.
ഖുബാ മസ്ജിദിലേക്ക് പുതിയ ഇമാമിനെ നിയമിച്ചു
മദീനയിലെ ഖുബാ മസ്ജിദില്‍ ഇമാമും ഖതീബുമായി ഡോ. മുഹമ്മദ് ബിന്‍ ബഖീത് അല്‍ഹുജൈലിയെ നിയമിച്ച് ഇസ്ലാമികകാര്യ മന്ത്രി ശൈഖ് ഡോ. അബ്ദുല്ലത്തീഫ് ആലു ശെയ്ഖ് ഉത്തരവിട്ടു. മദീനയിലെ അല്‍ റാനൂനാ അല്‍കബീര്‍ ജുമാമസ്ജിദ് ഇമാമും ഖതീബുമായി സേവനമനുഷ്ഠിച്ചു വരികയായിരുന്നു ഡോ. മുഹമ്മദ് ബിന്‍ ബഖീത് അല്‍ഹുജൈലി. മദീന ഇസ്ലാമിക് യൂനിവേഴ്സിറ്റി ഹദീസ് കോളേജ് പ്രൊഫസറായും ഡോ. മുഹമ്മദ് അല്‍ഹുജൈലി സേവനമനുഷ്ഠിക്കുന്നു. സൗദി അറേബ്യക്കകത്തും വിദേശങ്ങളിലും പ്രബോധന പ്രവര്‍ത്തനങ്ങളിലും ഹജ്, ഉംറ, സിയാറത്ത് ബോധവല്‍ക്കരണ പ്രോഗ്രാമുകളിലും അദ്ദേഹം പങ്കാളിത്തം വഹിച്ചിട്ടുണ്ട്. നിരവധി ഗ്രന്ഥങ്ങളുടെയും ഗവേഷണ പ്രബന്ധങ്ങളുടെയും രചയിതാവ് കൂടിയാണ് ഇദ്ദേഹം.
Read Latest Gulf Newsand Malayalam News
ഒരാഴ്ചയ്ക്കിടെ സൗദിയില്‍ അറസ്റ്റിലായത് 16,471 പേര്‍; നാടുകടത്തിയത് 13000 പ്രവാസികള്‍
