മുടി കൊഴിച്ചിൽ മാറ്റാൻ വീട്ടിൽ തന്നെ പരിഹാരമുണ്ട്, ആയുർവേദം പറയുന്ന വഴികളിതാ

വെളിച്ചെണ്ണയും കറിവേപ്പിലയും

മുടിയുടെ സംരക്ഷണത്തിൽ പൂർവകാലം മുതൽ ഉപയോ​ഗിച്ച് വരുന്നൊരു ഘടകമാണ് വെളിച്ചെണ്ണ. മലയാളികളുടെ വീട്ടിൽ വളരെ സുലഭമായി ലഭിക്കുന്നതാണ് വെളിച്ചെണ്ണ. ഇതിൽ അടങ്ങിയിരിക്കുന്ന ലോറിക ആസിഡ് മുടിയുടെ വേരുകളിലേക്ക് ഇറങ്ങി പ്രോട്ടീൻ കുറവ് പരിഹരിക്കാൻ ശ്രമിക്കുന്നു. മുടി വളർച്ചയെ പ്രോത്സാഹിപ്പിക്കുന്ന ധാരാളം ആൻ്റി ഓക്സിഡൻ്റുകളും അമിനോ ആസിഡുകളും കറിവേപ്പിലയിൽ അടങ്ങിയിട്ടുണ്ട്. ഒരു പാനിൽ കുറച്ച് വെളിച്ചെണ്ണ ചൂടാക്കി ഒരു പിടി നല്ല കറിവേപ്പില ചേർത്ത് തിളപ്പിക്കുക. ഈ മിശ്രിതം തണുത്ത ശേഷം തലയോട്ടിയിലും മുടിയിലും മസാജ് ചെയ്യുക. 30 മിനിറ്റ് വച്ച ശേഷം തലമുടി വീര്യം കുറഞ്ഞ ഷാംപൂ ഉപയോഗിച്ച് കഴുകാവുന്നതാണ്.

​നെല്ലിക്കപ്പൊടി

മുടി വളർച്ചയെ പ്രോത്സാഹിപ്പിക്കുന്നതിന് ഏറ്റവും മികച്ചൊരു പ്രകൃതിദത്ത ഘടകമാണ് നെല്ലിക്ക. ഇത് കഴിക്കുന്നതും മുടിയിൽ ഉപയോഗിക്കുന്ന പാക്കുകളിലും എണ്ണയിലും ഉൾപ്പെടുത്തുന്നതും മുടി അഴകിന് ഏറെ ഗുണം ചെയ്യും. മുടികൊഴിച്ചിൽ തടഞ്ഞ് മുടി വളർച്ച പ്രോത്സാഹിപ്പിക്കാൻ ഏറെ മികച്ചതാണ് നെല്ലിക്കപ്പൊടി. ഇതിന് സഹായിക്കുന്ന ശക്തമായ ആൻ്റി ഓക്സിഡൻ്റുകൾ ഇതിൽ അടങ്ങിയിട്ടുണ്ട്. ഇതിൽ അടങ്ങിയിരിക്കുന്ന വൈറ്റമിൻ സി കൊളാജൻ ഉത്പാദിപ്പിക്കാനും മുടിയുടെ ആരോഗ്യം നിലനിർത്താനും സഹായിക്കുന്നു. നെല്ലിക്കപ്പൊടി വെള്ളത്തിൽ കലർത്തി പേസ്റ്റ് തയാറാക്കി തലയോട്ടിയിലും മുടിയിലും തേച്ച് പിടിപ്പിക്കുക. 30 മിനിറ്റിന് ശേഷം ഇത് കഴുകി കളയാവുന്നതാണ്. ഈ പൊടി വെളിച്ചെണ്ണയിൽ കലർത്തി മുടിയിൽ പുരട്ടുന്നതും ഏറെ ഗുണം ചെയ്യും.

​ഉള്ളി നീര്

മുടി വളർച്ചയെ പ്രോത്സാഹിപ്പിക്കുന്നതിന് നൂറ്റാണ്ടുകളായി ഉപയോഗിക്കുന്ന പ്രകൃതിദത്ത പരിഹാരമാണ് ഉള്ളി നീര്. ഇതിൽ സൾഫർ അടങ്ങിയിട്ടുണ്ട്, ഇത് കൊളാജൻ ഉത്പാദനം വർദ്ധിപ്പിക്കാനും മുടിയെ ശക്തിപ്പെടുത്താനും സഹായിക്കുന്നു. വെളിച്ചെണ്ണയിൽ ഉള്ളി നീര്, ചെമ്പരത്തി, കറിവേപ്പില എന്നിവ കലർത്തി തിളപ്പിച്ച് ഉപയോഗിക്കുന്നത് രോമകൂപങ്ങളെ പോഷിപ്പിക്കാനും മുടി കൊഴിച്ചിൽ കുറയ്ക്കാനും വീണ്ടും മുടി നന്നായി വളരാനും സഹായിക്കുന്നു. ഈ എണ്ണ നിങ്ങളുടെ തലയോട്ടിയിലും മുടിയിലും മസാജ് ചെയ്ത് കുറഞ്ഞത് 30 മിനിറ്റ് നേരത്തേക്ക് വയ്ക്കുക. അതിന് ശേഷം കഴുകി കളയാവുന്നതാണ്.

Also Read: താരനും നരയുമില്ലാതെ മുടി നന്നായി തഴച്ച് വളരാൻ ഒരു എണ്ണക്കൂട്ട്​

ഭൃംഗരാജ് എണ്ണ

മുടി വളർച്ചയെ പ്രോത്സാഹിപ്പിക്കുന്ന ഗുണങ്ങൾക്ക് പേരുകേട്ട ഭൃംഗരാജ് ചെടിയിൽ നിന്നാണ് ഭൃംഗരാജ് എണ്ണ തയാറാക്കുന്നത്. അയൺ, വിറ്റാമിൻ ഇ, മഗ്നീഷ്യം തുടങ്ങിയ പോഷകങ്ങൾ ഇതിൽ അടങ്ങിയിട്ടുണ്ട്, ഇത് രോമകൂപങ്ങളെ പോഷിപ്പിക്കുകയും മുടിയുടെ വേരുകളെ ശക്തിപ്പെടുത്തുകയും ചെയ്യുന്നു. ഈ എണ്ണയിൽ മറ്റ് ആയുർവേദ ഔഷധങ്ങളായ അംല, ബ്രഹ്മി, വേപ്പ് എന്നിവയും അടങ്ങിയിട്ടുണ്ട്, ഇത് തലയോട്ടിയുടെ ചൊറിച്ചിൽ വരൾച്ച എന്നീ പ്രശ്നങ്ങൾ ഇല്ലാതാക്കി മുടി വളർച്ചയെ പ്രോത്സാഹിപ്പിക്കാനും സഹായിക്കുന്നു. ഉറങ്ങുന്നതിന് മുമ്പ് ഈ എണ്ണ തലയോട്ടിയിലും മുടിയിലും മസാജ് ചെയ്ത് പിറ്റേന്ന് രാവിലെ കഴുകിക്കളയുക. തണുപ്പ് തലയിൽ തങ്ങിയാൽ ജലദോഷം വരുമെന്നുള്ളവർ രാത്രിയിൽ എണ്ണ തേച്ച് വച്ച ശേഷം കഴുകി കളയാവുന്നതാണ്.

English Summary: Hair fall remedies

Disclaimer: പൊതു വിവരങ്ങളുടെ അടിസ്ഥാനത്തിലാണ് ലേഖനം തയാറാക്കിയിരിക്കുന്നത്. മുടിയിലും ചർമ്മത്തിലും എന്തെങ്കിലും പരീക്ഷിക്കുന്നതിന് മുൻപ് പാച്ച് ടെസ്റ്റ് ചെയ്യാൻ മറക്കരുത്.

​കൂടുതൽ ബ്യൂട്ടി വാർത്തകൾ വായിക്കാൻ ഇവിടെ ക്ലിക്ക് ചെയ്യുക, ​