വേനല്‍ക്കാലത്ത് തടി കുറയ്ക്കാന്‍ കൂവ ഉത്തമം

​വയര്‍ തണുപ്പിയ്ക്കാന്‍​

വേനലില്‍ കഴിയ്ക്കാവുന്ന ഏറ്റവും മികച്ചൊരു ഭക്ഷണ വസ്തുവാണ് ഇത്. കാരണം ശരീരം, വയര്‍ തണുപ്പിയ്ക്കാന്‍ ഏറ്റവും നല്ലതാണിത്. വേനല്‍ക്കാലത്ത് വയറിന് അസ്വസ്ഥതയുണ്ടാകാന്‍ സാധ്യതയേറെയാണ്. ഇതിനുള്ള നല്ലൊരു പരിഹാരമാണ് കൂവപ്പൊടി. ഇത് കുറുക്കി കഴിയ്ക്കാം. ഇതുകൊണ്ട് പ്രത്യേക രീതിയില്‍ പാനീയമുണ്ടാക്കി കുടിയ്ക്കാം.

വയര്‍ തണുപ്പിയ്ക്കാന്‍ ഏറെ നല്ലതാണ്. മലബന്ധം പോലുള്ള പ്രശ്‌നങ്ങള്‍ക്ക് ഇത് നല്ലൊരു മരുന്ന് കൂടിയാണ്. ഇറിട്ടബിള്‍ ബൗള്‍ സിന്‍ഡ്രോം, അതായത് ഭക്ഷണം കഴിച്ചാല്‍ പെട്ടെന്നു തന്നെ ടോയ്‌ലറ്റില്‍ പോകാന്‍ തോന്നലുണ്ടാകുന്ന തരം പ്രശ്‌നങ്ങള്‍ക്കുള്ള നല്ലൊരു മരുന്നാണിത്.

​അയേണ്‍ സമ്പുഷ്ടമാണ്​

വിളര്‍ച്ചയ്ക്കുള്ള നല്ലൊരു പരിഹാരം കൂടിയാണ് കൂവയെന്നത്. ഇത് അയേണ്‍ സമ്പുഷ്ടമാണ്. ഇത് ചുവന്ന രക്താണുക്കളുടെ രൂപവത്കരണത്തിനും കോശങ്ങളുടെ വിഭജനത്തിനും വളർച്ചയ്ക്കും വിളർച്ച ചികിത്സിക്കുന്നതിനും സഹായിക്കുന്നു. കുട്ടികളിലും കുഞ്ഞുങ്ങളിലും രക്തോല്‍പാദനം വര്‍ദ്ധിപ്പിയ്ക്കാന്‍ സഹായിക്കുന്ന പ്രധാനപ്പെട്ടൊരു ഭക്ഷണ വസ്തുവാണിത്.

ഗര്‍ഭിണികള്‍ക്ക് അത്യുത്തമമായ ഈ ഭക്ഷണ വസ്തു ഫോളേറ്റ് സമ്പുഷ്ടം കൂടിയാണ്. ഗര്‍ഭസ്ഥശിശുവിന്റെ ആരോഗ്യത്തിന് ഇതേറെ അത്യാവശ്യവുമാണ്. 100 ഗ്രാം ആരോറൂട്ടില്‍ ദിവസം ശരീരത്തിനു വേണ്ട ഫോളേറ്റിന്റെ 84 ശതമാനവും അടങ്ങിയിട്ടുണ്ടെന്നു വേണം, പറയാന്‍.

​തടി കുറയ്ക്കാന്‍ ​

തടി കുറയ്ക്കാന്‍ സഹായിക്കുന്ന നല്ലൊരു ഭക്ഷണ വസ്തുവാണ് കൂവയെന്നത്.

ഇത് നിങ്ങളുടെ വിശപ്പ് നിയന്ത്രിക്കാനും ശരീരഭാരം കുറയ്ക്കാനും സഹായിക്കുന്നു. പ്രോട്ടീന്റെ നല്ല ഉറവിടം കൂടിയായ കൂവ വയർ നിറച്ച് നിർത്താനും അനാവശ്യമായ വിശപ്പ് നിയന്ത്രിക്കുന്നതിനും കലോറി കുറയ്ക്കുവാനും സഹായിക്കുകയും ചെയ്യുന്നു.

പ്രോട്ടീന്‍ സമ്പുഷ്ടമായ കൂവയുടെ എട്ട് ഔണ്‍സ് ദിവസവും ശരീരത്തിന് വേണ്ട പ്രോട്ടീന്റെ 19 ശതമാനം നല്‍കുന്നുമുണ്ട്. ഗ്ലൂട്ടെന്‍ അലര്‍ജിയുള്ളവരില്‍ ഗോതമ്പിന് പകരം ഉപയോഗിയ്ക്കാവുന്ന ധാന്യമാണ് കൂവയെന്നത്.

​എല്ലിന്റെ ആരോഗ്യത്തിന് ​

കാല്‍സ്യം സമ്പുഷ്ടമായ ഇത് എല്ലിന്റെ ആരോഗ്യത്തിന് മികച്ച ഒന്നാണ്. മസിലിന്റെ ആരോഗ്യത്തിനും ഉറപ്പിനുമെല്ലാം ഇത് മികച്ച ഭക്ഷണവുമാണ്. ശരീരത്തിന്റെ പിഎച്ച്‌ അഥവാ ആസിഡ്,ആല്‍ക്കലി ബാലന്‍സ് നില നിര്‍ത്താന്‍ കൂവ അത്യുത്തമമാണ്.