ലക്ഷ്യം ദുബായിലെ ഏറ്റവും സ്മാര്‍ട്ട് നഗരമാക്കല്‍
സ്ട്രീറ്റ്-ടാക്‌സികളെ ഇ-ടാക്‌സികളാക്കി മാറ്റാനുള്ള തീരുമാനം ദുബായിയെ ലോകത്തിലെ ഏറ്റവും സ്മാര്‍ട്ടായ നഗരമാക്കി മാറ്റാനുള്ള സര്‍ക്കാരിന്റെ ലക്ഷ്യത്തെ ശക്തിപ്പെടുത്തുന്നുവെന്ന് ആര്‍ടിഎ ഡയറക്ടര്‍ ജനറലും ബോര്‍ഡ് ഓഫ് എക്‌സിക്യൂട്ടീവ് ഡയറക്ടര്‍മാരുടെ ചെയര്‍മാനുമായ മാറ്റര്‍ അല്‍ തായര്‍ പറഞ്ഞു. നഗര ഗതാഗത ആസൂത്രണത്തിലെ ലോകമെമ്പാടുമുള്ള മാറ്റവുമായി ബന്ധപ്പെടുത്തിയാണ് ഈ പദ്ധതി നടപ്പിലാക്കുന്നത്. വ്യക്തിഗത മൊബിലിറ്റി മെച്ചപ്പെടുത്തുക, സ്വകാര്യ കാറുകളെ ആശ്രയിക്കുന്നത് കുറയ്ക്കുക, താമസക്കാര്‍ക്കിടയില്‍ സന്തോഷം വളര്‍ത്തുക, സന്ദര്‍ശകര്‍ക്ക് മികച്ച സേവനങ്ങള്‍ നല്‍കുക, ഉപഭോക്തൃ സംതൃപ്തി വര്‍ദ്ധിപ്പിക്കുക തുടങ്ങിയ ലക്ഷ്യങ്ങള്‍ മുന്‍നിര്‍ത്തിയാണിതെന്നും അദ്ദേഹം പറഞ്ഞു.
കാത്തിരിപ്പ് സമയം 3.5 മിനുട്ടായി കുറയും
‘ടാക്സി സപ്ലൈ- ഡിമാന്‍ഡുമായി പൊരുത്തപ്പെടുത്തുന്നതിനും ഉപഭോക്താക്കള്‍ക്ക് തടസ്സരഹിതവും കാര്യക്ഷമവുമായ ടാക്സി സേവനങ്ങള്‍ നല്‍കുന്നതിനുമുള്ള ഏറ്റവും കാര്യക്ഷമമായ മാര്‍ഗമായി ഇ-ഹെയ്ലിംഗ് ഉയര്‍ന്നുവന്നിട്ടുണ്ടെന്നും അദ്ദേഹം പറഞ്ഞു. ഇ-ഹെയ്ല്‍ ടാക്സി സേവനം ദുബായിലെ ടാക്സി പ്രവര്‍ത്തനങ്ങളുടെ കാര്യക്ഷമത വര്‍ദ്ധിപ്പിക്കുന്നതായാണ് മുന്‍ വര്‍ഷങ്ങളിലെ അനുഭവം. ടാക്‌സികള്‍ക്കു വേണ്ടിയുല്ല കാത്തിരിപ്പ് സമയം 3.5 മിനിറ്റോ അതില്‍ കുറവോ ആക്കി കുറയ്ക്കാന്‍ ഇത് സഹായകമാവും. യാത്രക്കാര്‍ ഇല്ലാതെ വാഹനങ്ങള്‍ ഓടുന്നത് ഒഴിവാക്കാനും അതുവഴി ഇന്ധന ഉപയോഗവും കാര്‍ബണ്‍ ബഹിര്‍ഗമനവും കുറയ്ക്കാനും ഇതു വഴി സാധിക്കും. ഇ ഹെയില്‍ പദ്ധതി ഉപഭോക്തൃ സന്തോഷവും സംതൃപ്തിയും വര്‍ദ്ധിപ്പിക്കുന്നുവെന്നും അദ്ദേഹം കൂട്ടിച്ചേര്‍ത്തു.
105 ദശലക്ഷം ടാക്സി യാത്രകള്‍
സ്ട്രീറ്റ് ടാക്സികളില് നിന്ന് ഇ-ഹെയ്ലിംഗ് സേവനങ്ങളിലേക്കുള്ള മാറ്റം വ്യവസായത്തിന്റെ മുന്‍നിര ആഗോള സമ്പ്രദായങ്ങളുമായി പൊരുത്തപ്പെടുന്നതായും മതാര്‍ അല്‍ തായര്‍ പറഞ്ഞു. ഇതിന് ഉദാഹരണമാണ് സിംഗപ്പൂര്‍. ഇവിടെ ടാക്സി സേവനങ്ങളില്‍ 80 ശതമാനവും ഇ-ഹെയ്ലിംഗിലൂടെയാണ് നടക്കുന്നത്. പ്രവര്‍ത്തന ശൃംഖല, സംഘടനാ ഘടന, സാങ്കേതിക കഴിവുകള്‍ എന്നിവ തിരിച്ചറിയാന്‍ ഇ-ഹെയ്ലിംഗ് കമ്പനിയായ ഹലയുടെ ആസൂത്രണം സുപ്രധാനമാണെന്നും അദ്ദേഹം പറഞ്ഞു. 2019-ല്‍ ഹല അതിന്റെ സേവനം ആരംഭിച്ചതിന് ശേഷം സ്ഥിരമായ വളര്‍ച്ചയാണ് കൈവരിച്ചത്. 2020ല്‍ മൊത്തം ടാക്സി ട്രിപ്പുകളുടെ 11 ശതമാനവും 2021ല്‍ 18 ശതമാനവും ഇ-ഹെയില്‍ കമ്പനിക്കായിരുന്നു. 2022ല്‍ അത് 30 ശതമാനത്തിലെത്തുകയും ചെയ്തതായും അദ്ദേഹം പറഞ്ഞു. കഴിഞ്ഞ വര്‍ഷം ദുബായില്‍ സര്‍വീസ് നടത്തിയ 11,662 ടാക്‌സികള്‍ 105 ദശലക്ഷം യാത്രകള്‍ പൂര്‍ത്തിയാക്കി എന്നത് ശ്രദ്ധേയമാണെന്നും അല്‍ തായര്‍ വിശദീകരിച്ചു.
ടാക്സി ഉപഭോക്താക്കള്‍ക്ക് പ്രയോജനങ്ങളേറെ
ഇ-ഹെയില്‍ സംവിധാനം വഴി തടസ്സമില്ലാത്ത ഇന്‍ ആപ്പ് ഇ- പേയ്മെന്റ്, ഒപ്റ്റിമല്‍ റൂട്ട് സെലക്ഷന്‍, ട്രിപ്പ്-ഷെയറിംഗ് ഓപ്ഷനുകള്‍, ഡ്രൈവറുടെയും വാഹനത്തിന്റെയും വിശദാംശങ്ങള്‍ അറിയാനുള്ള സൗകര്യം, സേവനത്തെയും ഡ്രൈവറെയും റേറ്റുചെയ്യാനുള്ള സംവിധാനം തുടങ്ങിയവയും ഉപഭോക്താക്കള്‍ക്ക് സഹായകമാവും. ഈ സേവനങ്ങള്‍, ബഹുജന ഗതാഗത ഉപയോക്താക്കള്‍ക്ക് അവരുടെ ആത്യന്തിക ലക്ഷ്യസ്ഥാനങ്ങളില്‍ സൗകര്യപ്രദമായി എത്തിച്ചേരാന്‍ പ്രാപ്തരാക്കുന്ന, വൈവിധ്യമാര്‍ന്ന ഗതാഗത മോഡുകള്‍ സമന്വയിപ്പിക്കുന്നതിനും അടിയന്തര സാഹചര്യങ്ങളില്‍ സത്വര പരിഹാരങ്ങള്‍ ലഭ്യമാക്കുന്നതിനുമുള്ള ആര്‍ടിഎയുടെ സംരംഭങ്ങളെ കൂടുതല്‍ പിന്തുണയ്ക്കുന്നതായും അദ്ദേഹം അറിയിച്ചു.
ഇ ഹെയില്‍ ടാക്‌സികള്‍ക്കായി പ്രത്യേക വാഹനങ്ങള്‍
നിര്‍ദ്ദിഷ്ട സംവിധാനങ്ങളും സൂചനാ ബോര്‍ഡുകളുമായി ഇ-ഹെയ്ല്‍ സേവനങ്ങള്‍ മാത്രം വാഗ്ദാനം ചെയ്യുന്നതിനായി ആര്‍ടിഎ ടാക്‌സികളുടെ ഒരു സമര്‍പ്പിത ഫ്‌ലീറ്റ് അനുവദിക്കുമെന്നും അല്‍ തായര്‍ പറഞ്ഞു. കൂടുതല്‍ ഉപയോക്താക്കളെ ആകര്‍ഷിക്കുന്നതിനും ഡ്രൈവര്‍മാര്‍ക്ക് പ്രോത്സാഹന സംരംഭങ്ങള്‍ നടപ്പിലാക്കുന്നതിനും പുതിയ ചാനലുകള്‍ സൃഷ്ടിച്ച് ഇ-ഹെയ്ല്‍ സേവനം പ്രോത്സാഹിപ്പിക്കുന്നതിനുള്ള ഉത്തരവാദിത്തം ഹലയ്ക്കായിരിക്കും. ഇ-ഹെയില്‍ സേവനങ്ങള്‍ ലഭ്യമാകുന്ന സോണുകള്‍ നിശ്ചയിക്കുക, സ്ട്രീറ്റ്-ഹെയ്ല്‍ ടാക്‌സികള്‍ക്കും ഇ-ഹെയ്ല്‍ വാഹനങ്ങള്‍ക്കും പ്രത്യേക പാര്‍ക്കിംഗ് സ്ഥലങ്ങള്‍ അനുവദിക്കുക, ഉയര്‍ന്ന ഡിമാന്‍ഡുള്ള പ്രദേശങ്ങളില്‍ പാര്‍ക്കിംഗ് ലഭ്യത വര്‍ദ്ധിപ്പിക്കുക, ആര്‍ടിഎയുടെയും ഹലയുടെയും സ്മാര്‍ട്ട് ആപ്പുകള്‍ ഈ പാര്‍ക്കിംഗ് സ്ഥലങ്ങളെ കുറിച്ചുള്ള വിവരങ്ങള്‍ ലഭ്യമാക്കുക തുടങ്ങിയവയും പദ്ധതിയില്‍ ഉള്‍പ്പെടും.
ഇ- ടാക്‌സികള്‍ എങ്ങനെ ബുക്ക് ചെയ്യാം?
– ഉപയോക്താക്കള്‍ അവരുടെ മൊബൈലില്‍ Careem ആപ്പ് ഡൗണ്‍ലോഡ് ചെയ്യുകയും ഒരു വ്യക്തിഗത അക്കൗണ്ട് സജ്ജീകരിക്കുകയും വേണം. ലഭ്യമായ ഓപ്ഷനുകളില്‍ നിന്ന് അവര്‍ക്ക് ഹല വാഹനങ്ങള്‍ തിരഞ്ഞെടുക്കാനും അവരുടെ പിക്ക്-അപ്പ് ലൊക്കേഷന്‍ സ്ഥിരീകരിക്കാനും കഴിയും.
– ലക്ഷ്യസ്ഥാനവും തിരഞ്ഞെടുത്ത പേയ്മെന്റ് രീതിയും തിരഞ്ഞെടുത്തു കഴിഞ്ഞാല്‍, ബുക്കിംഗ് അന്തിമമാക്കാന്‍ ഉപയോക്താക്കള്‍ക്ക് ‘Yalla’ ബട്ടണ്‍ ക്ലിക്ക് ചെയ്യാം.
– ഡ്രൈവറെയും ബുക്കിംഗ് വിവരങ്ങളെയും കുറിച്ചുള്ള ഒരു വാചക സന്ദേശം ഉടന്‍ മൊബൈലില്‍ ലഭ്യമാകും.
– 10 സെക്കന്‍ഡിനുള്ളില്‍ ബുക്കിംഗ് പൂര്‍ത്തിയാക്കാന്‍ കഴിയും എന്നതാണ് ഇതിന്റെ പ്രത്യേകതകളിലൊന്ന്. ലഭ്യമായ ഏറ്റവും അടുത്തുള്ള വാഹനം കണ്ടെത്താനും യാത്രാ വിവരങ്ങള്‍ തത്സമയം ആപ്പ് വഴി നിരീക്ഷിക്കാനും കഴിയുമെന്നത് ഉള്‍പ്പെടെ നിരവധി സവിശേഷതകള്‍ ഇ-ഹെയ്ല്‍ സേവനം നല്‍കുന്നുണ്ട്. കൂടാതെ, ഇ-ഹെയ്ല്‍ സിസ്റ്റം വഴി ഉപയോക്തൃ അഭ്യര്‍ത്ഥനകള്‍ ഡ്രൈവര്‍മാര്‍ക്ക് ഓണ്‍ലൈനായി ലഭിക്കുമെന്നതിനാല്‍ അവരെ തേടി നഗരത്തില്‍ കറങ്ങുന്നത് ഒഴിവാക്കാന്‍ സാധിക്കുമെന്നതും ഇതിന്റെ പ്രധാന സവിശേഷതകളിലൊന്നാണ്.
