തമിഴ്നാട് രണ്ടായി മുറിക്കണം; കോയമ്പത്തൂ‍ര്‍ ആസ്ഥാനമാക്കി സംസ്ഥാനം വേണമെന്ന് ബിജെപി; എഡിഎംകെ നേതാവ് പാർട്ടി വിട്ടു

ചെന്നൈ: തമിഴ്നാട് രണ്ടായി വിഭജിക്കാൻ നീക്കം നടക്കുന്നുവെന്ന വാർത്ത പുറത്തു വന്നതിനു പിന്നാലെ തമിഴ്നാട്ടിൽ വ്യാപക പ്രതിഷേധം. വാർത്ത റിപ്പോർട്ട് ചെയ്ത പത്രങ്ങൾ കത്തിച്ചാണ് തമിഴ് സംഘടനകൾ പ്രതിഷേധിച്ചത്. പ്രതിഷേധം ശക്തമാകുന്നതിനിടെ എഐഎഡിഎംകെ നേതാവും മുൻ മന്ത്രിയുമായ ടി വെങ്കിടാചലവും അനുയായികളും ഡിഎംകെയിൽ ചേർന്നു.



കോയമ്പത്തൂർ, തിരുപ്പൂർ, ഈറോഡ്, നീലഗിരി അടക്കമുള്ള പ്രദേശങ്ങളെ കേന്ദ്രഭരണ പ്രദേശമാക്കി മാറ്റുമെന്നാണ് റിപ്പോർട്ട്. ബിജെപി ഘടകവും എഐഎഡിഎംകെ നേതാക്കളും സമീപകാലത്ത് നടത്തിയ ചില പ്രസ്താവനകൾ പുതിയ നീക്കങ്ങൾ ശരിവെക്കുന്ന തരത്തിലുള്ളതാണ്. ബിജെപി തമിഴ്നാട് അധ്യക്ഷനായി കഴിഞ്ഞ ദിവസം ചുമതലയേറ്റ കർണാടക മുൻ ഐപിഎസ് ഓഫീസറായ കെ അണ്ണാമലൈ കൊങ്കുനാട്ടുകാരനാണ്. മന്ത്രിസ്ഥാനം ലഭിച്ച എൽ മുരുഗനും കൊങ്കുനാട്ടുകാരനാണ്. കൊങ്കുനാട്ടിലെ മന്ത്രിയെന്നാണ് ബിജെപി അദ്ദേഹത്തെ വിശേഷിപ്പിക്കുന്നത്.

കൊങ്കുനാട് കേന്ദ്രഭരണ പ്രദേശമാകുമോ? തമിഴ്നാടിനെ വിഭജിക്കാൻ കേന്ദ്ര നീക്കമെന്ന് റിപ്പോർട്ട്

കോയമ്പത്തൂർ ആസ്ഥാനമാക്കി സംസ്ഥാനം വേണമെന്ന് ബിജെപി തമിഴ്നാട് ഉപാധ്യക്ഷൻ കാരു നാഗരാജൻ ആവശ്യപ്പെട്ടിരുന്നു. കോയമ്പത്തൂരും ചെന്നൈയും ആസ്ഥാനമാക്കി സംസ്ഥാനം രൂപീകരിക്കണമെന്നാണ് ആവശ്യം. കൊങ്കുനാട് എന്ന പേരിൽ സംസ്ഥാനം രൂപീകരിക്കണമെന്നാണ് ആവശ്യം. തമിഴ്നാടിനെ വിഭജിക്കേണ്ടത് ആവശ്യമാണെന്നും നാഗരാജൻ പറഞ്ഞു.

കൊങ്കു മേഖലയിൽ എഐഎഡിഎംകെക്ക് ശക്തമായ സ്വാധീനമാണുള്ളത്. നിലവിൽ പത്ത് ലോക്സഭ, 61 നിയമസഭാ മണ്ഡലങ്ങളാണ് ഇവിടെയുള്ളത്. സമീപ പ്രദേശങ്ങളിലെ ചില പ്രദേശങ്ങൾക്കൂടി ഉൾപ്പെടുത്തി 90 നിയമസഭാ മണ്ഡലങ്ങളുള്ള കേന്ദ്രഭരണ പ്രദേശം രൂപീകരിക്കാൻ നീക്കം നടക്കുന്നുവെന്നാണ് റിപ്പോർട്ട്. 2024 ലോക്സഭാ തെരഞ്ഞെടുപ്പാണ് ലക്ഷ്യമെന്നും റിപ്പോർട്ടിൽ പറയുന്നു.