സ്വപ്നത്തിൽ ഭ​ഗവാൻ ശ്രീകൃഷ്ണൻ; വീഡിയോ തെളിവുമായി ലാലു പ്രസാദ് യാദവിന്റെ മകൻ; ഓസ്കാർ ‘മിസ്’ ആയെന്ന് സോഷ്യൽ മീഡിയ

എനിക്ക് നിങ്ങളുടെ വിശ്വ രൂപം ദർശന യോഗം ലഭിച്ചു. എന്ന കുറിപ്പും വീഡിയോക്കൊപ്പം ചേർത്തിട്ടുണ്ട്. ‘വിശ്വരൂപ ദർശനയോഗം, കിരീടം കൊണ്ട് അലങ്കരിച്ച ചക്രായുധത്തോടും ഗദ അടക്കമുള്ള ആയുധങ്ങളുമുള്ള ശോഭയോടെ ഞാൻ എല്ലായിടത്തും നിന്റെ രൂപം കാണുന്നു. എല്ലാ ദിശകളിൽ നിന്നും പുറപ്പെടുന്ന സൂര്യന്റെ പ്രകാശം പോലെയുള്ള ഈ തിളങ്ങുന്ന അഗ്നിയിൽ അങ്ങയുടെ മഹത്വം ദർശിക്കുക പ്രയാസമാണ്.’ എന്നായിരുന്നു ലാലു പ്രസാദ് യാദവിന്റെ മകന്റെ ട്വീറ്റ്.

പുലർച്ചെ 1.30നാണ് തേജ് ഈ വീഡിയോ പോസ്റ്റ് ചെയ്തിരിക്കുന്നത്. ഇതിനോടകം ഈ വീഡിയോ 18 ലക്ഷം ആളുകളാണ് കണ്ടിരിക്കുന്നത്.

ഒരു കട്ടിലിൽ കിടന്നുറങ്ങുന്ന തേജ് പെട്ടന്ന് സ്വപ്നം കാണുന്നതാണ് വീഡിയോയുടെ ഇതിവൃത്തം. ശ്രീകൃഷ്ണന്റെ വീശ്വരൂപം കണ്ടതിന് പിന്നാലെ മന്ത്രി ഞെട്ടിയെഴുന്നേറ്റ് കട്ടിലിൽ തന്നെ ഇരിക്കുന്നതും വീഡിയോയിൽ കാണാൻ സാധിക്കും. ഇയാൾ സ്വപ്നം കാണുന്നതിന്റെ ദൃശ്യങ്ങൾ മഹാഭാരതം സീരിയലിലെ ദൃശ്യങ്ങളാണെന്നതും കൗതുകകരമായ കാര്യമാണ്.

സാധാരണയായി സ്വന്തമായി ശ്രീകൃഷ്ണനെന്നും ബിഹാർ ഉപമുഖ്യമന്ത്രിയും സഹോദരനുമായ തേജസ്വി യാദവിനെ അർജുനനെന്നുമാണ് വിശേഷിപ്പിക്കാറുള്ളത്. അതേസമയം, ഇതാദ്യമായല്ല ഇത്തരത്തിൽ വെളിപാടുകളുമായി മന്ത്രി എത്തുന്നത്.

അന്തരിച്ച സമാജ്‌വാദി പാർട്ടി നേതാവ് മുലായം സിങ് യാദവിനെ സ്വപ്നം കണ്ടതായി ആവകാശവാദം ഉന്നയിച്ച് രംഗത്തുവന്നിരുന്നു. ഇതിന് പിന്നാലെ സമാജ്വാദി പാർട്ടിയുടെ ചിഹ്നമായ സൈക്കിളിലാണ് ഇദ്ദേഹം നിയമസഭയിലേക്ക് എത്തിയത്. ഇത് വലിയ വാർത്തയായിരുന്നു.

Also Read : കള്ള് ഷാപ്പുകള്‍ മൊത്തത്തില്‍ മാറുന്നു; ബാറുകളെ പോലെ കള്ള് ഷാപ്പുകള്‍ക്കും ക്ലാസിഫിക്കേഷന്‍



ആർജെഡി നേതാവിന്റെ വീഡിയോക്ക് സമൂഹമാധ്യമങ്ങളിൽ വലിയതരത്തിലുള്ള പരിഹാസങ്ങളും ഉയർന്നിരുന്നു. ‘തേജു ഭയ്യക്കാണ് ഇത്തവണതത്തെ ഓസ്കർ’, ‘ഇന്നലെ എന്റെ സ്വപ്നത്തിലും ഭഗവാൻ കൃഷ്ണൻ പ്രത്യക്ഷനായി. ബിഹാറിലെ അഴിമതിക്കാരായ നേതാക്കളുടെ കാലം അവസാനിക്കാറായി. അപ്പോൾ ബിഹാറിലെ ജനങ്ങൾക്ക് നല്ലകാലം തുടങ്ങും’. എന്നിങ്ങനെ നീളുന്നു ട്രോൾ ട്വീറ്റുകൾ.

Read Latest National News and Malayalam News