കിട്ടിയോ? ഇല്ല, ചോദിച്ച് വാങ്ങി! ഇതാണ് മാനനഷ്ടക്കേസില്‍ അയോഗ്യത കല്‍പ്പിക്കപ്പെട്ട രാഹുല്‍ ഗാന്ധിയുടെ നിലവിലെ അവസ്ഥ. ഒരു ദശാബ്ദം മുന്‍പ്, കൃത്യമായി പറഞ്ഞാല്‍ 2013 സപ്തംബര്‍ 27-നാണ് മന്‍മോഹന്‍ സിങ് സര്‍ക്കാര്‍ കൊണ്ടുവന്ന ഓര്‍ഡിനന്‍സ് കോണ്‍ഗ്രസിന്റെ തന്നെ നേതാവായ രാഹുല്‍ ഗാന്ധി പൊതുവേദിയില്‍ കീറിയെറിഞ്ഞത്. കുറ്റവാളികളായ ജനപ്രതിനിധികളെ അയോഗ്യരാക്കാനുള്ള ജനപ്രാതിനിധ്യ നിയമത്തിലെ സെക്ഷന്‍ 8(4) സുപ്രീംകോടതി റദ്ദാക്കിയത് മറികടക്കാന്‍ കൊണ്ടുവന്ന ഓര്‍ഡിനന്‍സ് ആയിരുന്നു രാഹുല്‍ കീറി കാറ്റില്‍പ്പറത്തിയത്. സര്‍ക്കാരിന്റെ ഈ ഓര്‍ഡിനന്‍സ് ശുദ്ധ വിഡ്ഢിത്തമാണെന്നും ശിക്ഷിക്കപ്പെടുന്ന ജനപ്രതിനിധികള്‍ക്ക് മത്സരിക്കാന്‍ അവസരം നല്‍കുന്നത് പൂര്‍ണമായും തെറ്റാണെന്നുമായിരുന്നു രാഹുലിന്റെ നിലപാട്. അന്ന് ആ ഓര്‍ഡിനന്‍സ് പാസാക്കപ്പെട്ടിരുന്നെങ്കില്‍ ഇന്ന് നേരിടുന്ന അയോഗ്യതാ നടപടികളുണ്ടാകില്ലായിരുന്നു. എന്നാല്‍ പ്രതിഷേധങ്ങള്‍ക്ക് പിന്നാലെ യുപിഎ സര്‍ക്കാര്‍ ഓര്‍ഡിനന്‍സ് പിന്‍വലിച്ചു. ഇതോടെ അഴിമതിക്കാരായ രാഷ്ട്രീയക്കാര്‍ ഈ നിയമത്തിന് മുന്നില്‍ കറങ്ങി വീഴുമെന്നാണ് രാഹുല്‍ പ്രതീക്ഷിച്ചത്. പത്ത് വര്‍ഷം കഴിഞ്ഞപ്പോള്‍ ഈ നിയമത്തിന് മുന്നില്‍ കറങ്ങി വീണതാവട്ടെ രാഹുല്‍ തന്നെയും. വാദി പ്രതിയായ അവസ്ഥ രാഹുലിന്റെ കാര്യത്തില്‍ അന്വര്‍ഥം.
രാഹുലിനെ കുടുക്കിയ ജനപ്രാതിനിധ്യ നിയമം?
ഇന്ത്യയിലെ തെരഞ്ഞെടുപ്പു നിയമത്തിന്റെ അടിസ്ഥാനം 1950ലെയും 1951ലെയും ജനപ്രാതിനിധ്യ നിയമങ്ങളാണ്. ഈ നിയമമനുസരിച്ച് ഇന്ത്യയിലെ ഏതെങ്കിലും കോടതിയില്‍നിന്ന് രണ്ടുവര്‍ഷത്തില്‍ കുറയാത്ത തടവ് ശിക്ഷയ്ക്ക് വിധിക്കപ്പെട്ടാല്‍ ജനപ്രതിനിധിയ്ക്ക് ആറ് വര്‍ഷം തെരഞ്ഞെടുപ്പില്‍ സ്ഥാനാര്‍ഥിയാകാന്‍ അവകാശമില്ല. ശിക്ഷ കഴിഞ്ഞ് മോചിതരായാലും അഞ്ചു വര്‍ഷത്തേക്ക് കൂടി അയോഗ്യത നിലനില്‍്ക്കും. ഈ കാലാവധി ചെറുതായെങ്കിലും വര്‍ധിപ്പിക്കുന്ന മറ്റൊരു വസ്തുത എംഎല്‍എ, എംപി അംഗങ്ങളെ ശിക്ഷിച്ചാല്‍ റിവിഷന്‍ കാലാവധി കഴിഞ്ഞു മാത്രമേ ശിക്ഷ പ്രാബല്യത്തില്‍ വരുകയുള്ളൂ എന്നതാണ്.ജനപ്രാതിനിധ്യ നിയമപ്രകാരം രണ്ട് സാഹചര്യങ്ങളിലാണ് എംപി പദവി തെറിക്കുക.
1. ജനപ്രാതിനിധ്യ നിയമത്തിലെ സെക്ഷന്‍ 8(1).
രണ്ട് വിഭാഗങ്ങളോ സമുദായങ്ങളോ തമ്മില്‍ ശത്രുത വളര്‍ത്തല്‍, തിരഞ്ഞെടുപ്പില്‍ അനാവശ്യ സ്വാധീനം ചെലുത്തല്‍, കൈക്കൂലി, ആള്‍മാറാട്ടം എന്നിവ ഉള്‍പ്പെടുന്നതാണ് വകുപ്പ് 8(1).
2. ജനപ്രാതിനിധ്യ നിയമത്തിലെ സെക്ഷന്‍ 8(3)
രാഹുല്‍ ഗാന്ധിയുടെ എംപി പദവിയ്ക്ക് അയോഗ്യത കല്‍പിക്കപ്പെട്ടിരിക്കുന്നത് സെക്ഷന്‍ 8(3) പ്രകാരമാണ്. ജനപ്രാതിനിധ്യ നിയമത്തിലെ സെക്ഷന്‍ 8(1)ല്‍ ഉള്‍പ്പെടാത്ത കുറ്റങ്ങള്‍ക്ക് പാര്‍ലിമെന്റ് അംഗം രണ്ട് വര്‍ഷമോ അതില്‍ കൂടുതലോ കാലത്തേക്ക് ശിക്ഷിക്കപ്പെട്ടാല്‍ അയോഗ്യത കല്‍പ്പിക്കാം എന്നാണ് ഈ വകുപ്പ് പറയുന്നത്. അപകീര്‍ത്തിപരാമര്‍ശവും മാനനഷ്ടവും ഈ വകുപ്പില്‍ ഉള്‍പ്പെടുന്നതാണ്. അപകീര്‍ത്തി പരാമര്‍ശങ്ങള്‍ക്കെതിരായ ഐ പി സി 499, 500 എന്നീ വകുപ്പുകള്‍ പ്രകാരമാണ് മോദി സമുദായത്തെ അപമാനിച്ചെന്ന പരാതിയിലുള്ളത്. രാഹുല്‍ ഗാന്ധിയുടെ വാക്കുകള്‍ അപകീര്‍ത്തിപരമാണെന്ന് പ്രഥമദൃഷ്ട്യാ സൂറത്ത് കോടതി നിരീക്ഷിച്ചിരുന്നു.
രാഹുലിന് ലഭിക്കുക എട്ട് വര്‍ഷം അയോഗ്യത, നടപടി ഇങ്ങനെ?
സൂറത്ത് കോടതിയുടെ വിധിയിന്മേല്‍ അപ്പീലുമായി ഹൈക്കോടതിയെ സമീപിക്കുന്നതിനു മുമ്പായാണ് ലോക്‌സഭാ സെക്രട്ടേറിയറ്റ് രാഹുലിനെ അയോഗ്യനാക്കി നടപടിയെടുത്തിരിക്കുന്നത്. ജനപ്രാതിനിധ്യ നിയമപ്രകാരം രാഹുലിന് വയനാട് ലോക്‌സഭാ മണ്ഡലത്തില്‍നിന്നുള്ള എംപി സ്ഥാനം നഷ്ടമായിരിക്കുകയാണ്. ശിക്ഷ ലഭിക്കുകയാണെങ്കില്‍ അതിന്റെ കാലാവധി കഴിഞ്ഞുള്ള ആറുവര്‍ഷം തിരഞ്ഞെടുപ്പുകളില്‍ മത്സരിക്കുന്നതില്‍ അയോഗ്യതയ്ക്കും സാധ്യതയുണ്ട്. അതോടെ ശിക്ഷാകാലാവധി ഉള്‍പ്പെടെ എട്ടുവര്‍ഷം അയോഗ്യതയും ലഭിക്കും.
എംപി പദവിയിലിരിക്കുന്ന രാഹുല്‍ ഗാന്ധി ക്രിമിനല്‍ക്കേസില്‍ ശിക്ഷിപ്പെട്ടുവെന്നും അയോഗ്യനാക്കണമെന്നും ആവശ്യപ്പെട്ട് രാഷ്ട്രപതിയുടെ അനുമതിയോടെ സ്പീക്കര്‍ ശുപാര്‍ശ ചെയ്തിരുന്നു. സ്പീക്കര്‍ അയോഗ്യത വിജ്ഞാപനത്തില്‍ ഒപ്പുവച്ചതോടെ രാഹുലിന്റെ പദവി റദ്ദ് ചെയ്യപ്പെട്ടത് പ്രാബല്യത്തില്‍ വരികയും ചെയ്തു. ഇനി ഇത് ലോക്‌സഭാ സെക്രട്ടേറിയറ്റ് കേന്ദ്ര തിരഞ്ഞെടുപ്പുകമ്മിഷന് സമര്‍പ്പിക്കും. അതോടെ എം.പി. സീറ്റില്‍ ഒഴിവും രേഖപ്പെടുത്തും. അതോടെ അയോഗ്യത നടപടി പൂര്‍ത്തിയാവും.
രാഹുലിന്റെ വിഷയത്തില്‍ അതിവേഗ നടപടിയാണ് കേന്ദ്രത്തിന്റെ ഭാഗത്ത് നിന്ന് ഉണ്ടായിരിക്കുന്നത് എന്നതും പ്രസക്തമാണ്. മുന്‍പ് കാലിത്തീറ്റ കുംഭകോണക്കേസില്‍ലാലുപ്രസാദ് യാദവിനെ ശിക്ഷിച്ചപ്പോള്‍ അയോഗ്യത നടപടികള്‍ ലോക്‌സഭാ സെക്രട്ടേറിയറ്റ് പൂര്‍ത്തിയാക്കിയത് മൂന്നാഴ്ചയ്ക്കുശേഷമാണ്.
വിനയായ ഓര്‍ഡിനന്‍സ് വിരുദ്ധ നിലപാട്
മാനനഷ്ട കേസിന്റെ വിധിയ്ക്ക് പിന്നാലെ ഏറെ ചര്‍ച്ച ചെയ്യപ്പെടുന്നത് 2013ല്‍ രാഹുല്‍ കീറി വലിച്ചെറിഞ്ഞ ഓര്‍ഡിനന്‍സ് തന്നെയാണ്. പൊതുവേദിയില്‍ വച്ച് ആ ഓര്‍ഡിനന്‍സ് കീറിയെറിഞ്ഞപ്പോള്‍ രാഹൂല്‍ പങ്കുവച്ച് നിലപാട് ഇങ്ങനെയായിരുന്നു: ‘അഴിമതിക്കേസില്‍ ശിക്ഷിക്കപ്പെടുന്ന ജനപ്രതിനിധികളെ അയോഗ്യരാക്കണമെന്നത് മിക്ക പാര്‍ട്ടികളും അംഗീകരിച്ചതാണ്. പിന്നെ എന്തിന് വേണ്ടിയാണ് ഇത്തരമൊരു ഓര്‍ഡിനന്‍സ് കൊണ്ടുവന്നത്, അത് വ്യക്തമല്ല. ഏറ്റവും വലിയ തെറ്റ് സര്‍ക്കാര്‍ ഇത്തരം വിട്ടുവീഴ്ചയ്ക്ക് തയ്യാറാകുന്നതാണ്. പൂര്‍ണാര്‍ത്ഥത്തില്‍ അഴിമതി തുടച്ചുനീക്കണമെന്ന് ലക്ഷ്യമിടുന്നുണ്ടെങ്കില്‍ ഇത്തരം വിട്ടുവീഴ്ചകള്‍ക്ക് നിന്നുകൊടുക്കരുത്. കുറ്റവാളികളായ ജനപ്രതിനിധികളെ മത്സരിപ്പിക്കുന്നത് പൂര്‍ണമായും തെറ്റാണ്. ഇതിനായി ജനപ്രാതിനിധ്യ നിയമം ഭേദഗതി ചെയ്യരുത്.’ രാഹുലിന്റെ ഈ നിലപാട് വന്‍ മാധ്യമശ്രദ്ധ നേടി. ഇന്ത്യന്‍ ജനാധിപത്യത്തിനും മതേതരത്വത്തിനും പ്രതീക്ഷയുടെ നാളുകളെന്ന് വരെ മാധ്യമങ്ങള്‍ എഴുതി.
എന്നാല്‍ ഒരു കാല്‍പ്പനികനായ രാഷ്ട്രീയക്കാരനെന്നാണ് രാജ്യത്തെ എല്ലാ പാര്‍ട്ടികളിലുമുള്ള മുതിര്‍ന്ന നേതാക്കള്‍ അന്ന് രാഹുലിനെ മനസ്സിലാക്കിയത്. സ്വന്തം പാളയത്തിലുണ്ടാക്കിയ ഈ പട ആര്‍ക്കാണ് ഗുണം ചെയ്യുകയെന്ന് മിക്ക നേതാക്കള്‍ക്കും ബോധ്യപ്പെട്ടിരുന്നു.
ഇതിനിടെ ഓര്‍ഡിനന്‍സ് അന്നത്തെ രാഷ്ട്രപതി പ്രണബ് കുമാര്‍ മുഖര്‍ജി മടക്കി അയച്ചു. രാഹുല്‍ ഗാന്ധിയുടെ നിലപാടിന് ലഭിച്ച വലിയ സ്വീകാര്യതയായി അത് മാറി. ലാലു പ്രസാദിനെതിരേ കാലിത്തിറ്റ കുംഭകോണകേസ് വിധി പുറത്ത് വരാനിരിക്കെയായിരുന്നു യുപിഎ ഈ ഓര്‍ഡിനന്‍സ് കൊണ്ട് വന്നത്. ആഭ്യന്തര മന്ത്രി സുശീല്‍ കുമാര്‍ ഷിന്‍ഡെ, പാര്‍ലമെന്ററി കാര്യമന്ത്രി കമല്‍ നാഥ്, നിയമമന്ത്രി കപില്‍ സിബല്‍ എന്നിവര്‍ നേരിട്ടെത്തി ഇത്തരമൊരു ഓര്‍ഡിനന്‍സ് തിടുക്കപ്പെട്ട് കൊണ്ടുവന്നതിലുള്ള വിശദീകരണം നല്‍കണമെന്നും രാഷ്ട്രപതിയുടെ നിര്‍ദേശത്തിലുണ്ടായിരുന്നു. അതോടെ പ്രതിപക്ഷ പാര്‍ട്ടികളും സര്‍ക്കാരിനെതിരേ രംഗത്തെത്തി. അടിയന്തര സാഹചര്യങ്ങളില്‍ ഉപയോഗിക്കേണ്ട ഓര്‍ഡിനന്‍സ് നടപടി ഉപയോഗിച്ചതിനെതിനെ പ്രതിപക്ഷ പാര്‍ട്ടികള്‍ ചോദ്യം ചെയ്തു. ബിജെപിയും സിപിഎമ്മും അടക്കം ഓര്‍ഡിനന്‍സ് തള്ളണമെന്ന് രാഷ്ട്രപതിയോട് അഭ്യര്‍ഥിച്ചു. പിന്നാലെ ഇക്കാര്യം ആവശ്യപ്പെട്ട് എല്‍. കെ. അദ്വാനിയുടെ നേതൃത്വത്തിലുള്ള സംഘം രാഷ്ട്രപതിയെ കാണുകയും ചെയ്തു.
ഇതോടെ മന്‍മോഹന്‍ സിങ് സര്‍ക്കാര്‍ ഓര്‍ഡിനന്‍സ് പിന്‍വലിച്ചു. സ്വന്തം സര്‍ക്കാരിനെതിരേ രാഹുല്‍ നടത്തിയ പ്രതിഷേധം കോണ്‍ഗ്രസിനുള്ളില്‍ തന്നെ പുകഞ്ഞു. 2014-ല്‍ മന്‍മോഹന്‍ സിങ് സര്‍ക്കാര്‍ താഴെ വീഴാന്‍ കാരണം ഓര്‍ഡിനന്‍സ് സംഭവമാണെന്നും ആരോപണം ഉയര്‍ന്നു. ഇത് പരസ്യമായി പറഞ്ഞത് ഗുലാം നബി ആസാദാണ്. 2022-ല്‍ കോണ്‍ഗ്രസ് വിടുന്നവെന്ന് കാണിച്ച് സോണിയ ഗാന്ധിയ്ക്ക് നല്‍കിയ കത്തില്‍ ഇക്കാര്യം അദ്ദേഹം ചൂണ്ടികാട്ടി. രാഹുല്‍ ഗാന്ധിയുടെ പക്വതയില്ലായ്മയുടെ ഏറ്റവും വലിയ ഉദാഹരണമാണ് മാധ്യമങ്ങളുടെ മുന്നില്‍ വച്ച് ഓര്‍ഡിനന്‍സ് കീറിയെറിഞ്ഞത്. അന്നത്തെ പ്രധാനമന്ത്രി മന്‍മോഹന്‍ സിങ് അധ്യക്ഷനായ മന്ത്രിസഭ ഐകകണ്ഠ്യേന പാസാക്കിയ ഓര്‍ഡിനന്‍സ് കോണ്‍ഗ്രസ് കോര്‍ ഗ്രൂപ്പും ചര്‍ച്ച ചെയ്ത് അംഗീകരിച്ചതായിരുന്നു. രാഹുലിന്റെ ബാലിശമായ പെരുമാറ്റം പ്രധാനമന്ത്രിയുടെയും ഇന്ത്യന്‍ സര്‍ക്കാരിന്റെയും അധികാരത്തെ പൂര്‍ണമായും അട്ടിമറിച്ചു. ഈ ഒരൊറ്റ നടപടി മറ്റെന്തിനേക്കാളും 2014-ലെ യുപിഎ സര്‍ക്കാരിന്റെ പരാജയത്തിന് ഗണ്യമായ സംഭാവന നല്‍കി എന്നുമായിരുന്നു ഗുലാം നബിയുടെ വാക്കുകള്‍.
രാഹുലിന് മുന്നിലുള്ള വഴികള്‍
രാഹുലിന്റെ സാന്നിധ്യത്തില്‍ സൂറത്ത് ചീഫ് മജിസ്‌ട്രേറ്റ് എച്ച്എച്ച് വര്‍മ്മയാണ് അപകീര്‍ത്തി കേസില്‍ രണ്ട് വര്‍ഷം ശിക്ഷ വിധിച്ചത്. അപ്പോള്‍ തന്നെ പിഴസംഖ്യയായ 10000 രൂപ കെട്ടിവെച്ച് കേസില്‍ ജാമ്യം നേടി. ഒപ്പം അപ്പീല്‍ നല്‍കാന്‍ 30 ദിവസത്തെ സാവകാശവും. എന്നാല്‍ എംപി പദവിയിലെ അയോഗ്യത ശിക്ഷയ്‌ക്കൊപ്പം തന്നെ പ്രാബല്യത്തില്‍ വന്നു. മുന്‍പ് ശിക്ഷവിധിക്കപ്പെട്ട തിയ്യതി മുതല്‍ മൂന്നുമാസത്തിന് ശേഷമേ അയോഗ്യത നടപ്പാവു എന്നായിരുന്നു ചട്ടം. ജനപ്രാതിനിധ്യ നിയമം സെക്ഷന്‍ 8(4) ആണ് ഈ ആശ്വാസം ഉറപ്പാക്കിയിരുന്നത്. ശിക്ഷിക്കപ്പെട്ട ജനപ്രതിനിധികള്‍ മൂന്നുമാസത്തിനകം മേല്‍ക്കോടതിയില്‍ അപ്പീല്‍ ഫയല്‍ ചെയ്ത് വിധിയ്ക്ക് താല്‍ക്കാലികമായി സ്റ്റേ വാങ്ങി അയോഗ്യത നടപടിയില്‍ നിന്ന് രക്ഷപ്പെടും. എന്നാല്‍, 2013-ലെ ലില്ലി തോമസ്- കേന്ദ്രസര്‍ക്കാര്‍ കേസ് പരിഗണിച്ച സുപ്രീംകോടതി ഭരണഘടന വിരുദ്ധമാണെന്ന് കണ്ട് ഈ വകുപ്പ് റദ്ദാക്കി. അതിനാല്‍ ശിക്ഷാ വിധിക്കെതിരെ പ്രത്യേക സ്റ്റേ ഉത്തരവ് നേടിയാലെ അയോഗ്യത നടപടി തടയപ്പെടൂ.
അതേസമയം, ലക്ഷദ്വീപ് എം പി മുഹമ്മദ് ഫൈസല്‍ അയോഗ്യനാക്കപ്പെട്ട കേസിലെ വിധിയിലാണ് രാഹുല്‍ ഗാന്ധിക്ക് പ്രതീക്ഷിക്കാനുള്ളത്. കൊലപാതക ശ്രമകേസില്‍ രണ്ട് വര്‍ഷം ശിക്ഷിക്കപ്പെട്ട എം പി മുഹമ്മദ് ഫൈസലിന്റെ അംഗത്വം കോടതി തന്നെ റദ്ദ് ചെയ്തിരുന്നു. എം പി മുഹമ്മദ് ഫൈസല്‍ കേരള ഹൈക്കോടതിയെ സമീപിക്കുകയും ഹൈക്കോടതി ഈ വിധി സ്റ്റേ ചെയ്യുകയും ചെയ്തു. അതോടെ എംപി അംഗത്വ അയോഗ്യത റദ്ദാക്കുകയും ചെയ്തു.അതേസമയം, വിധിക്ക് ശേഷവും മുഹമ്മദ് ഫൈസലിനെ എം.പി. സ്ഥാനത്തുനിന്ന് അസാധുവാക്കിയ നടപടി തീര്‍പ്പില്ലാതെ തുടരുന്ന അവസ്ഥയുമുണ്ട്. അദ്ദേഹത്തിന് ഇതുവരെ പാര്‍ലമെന്റില്‍ കയറാനോ സഭയുടെ ഭാഗമാകാനോ കഴിഞ്ഞിട്ടില്ല. അംഗത്വം പുനഃസ്ഥാപിക്കണമെന്നാവശ്യപ്പെട്ട് നിരന്തരം സ്പീക്കറെ സമീപിക്കുന്നുണ്ടെങ്കിലും നടപടിയുണ്ടാകുന്നില്ലെന്നാണ് മുഹമ്മദ് ഫൈസല്‍ പറഞ്ഞത്.
ലില്ലി തോമസ്-ജനപ്രാതിനിധ്യ നിയമത്തിലെ മലയാളി ബന്ധം
നീതി ന്യായ ചരിത്രത്തിലെ നാഴികക്കല്ലുകളില്‍ ഒന്നായി കരുതപ്പെടുന്ന വിധികളിലൊന്നാണ് ക്രിമിനല്‍ കേസുകളില്‍ കുറ്റവാളികളാണെന്ന് കോടതി വിധിച്ച ജനപ്രതിനിധികള്‍ക്ക് അപ്പീല്‍ കാലയളവില്‍ സ്ഥാനത്ത് തുടരാനും തെരഞ്ഞെടുപ്പുകളില്‍ മത്സരിക്കാനും അവകാശം നല്‍കിയിരുന്ന ജനപ്രാതിനിധ്യ നിയമത്തിന്റെ എട്ടാം വകുപ്പിലെ നാലാം ഉപവകുപ്പ് നീക്കം ചെയ്തത്. തുടര്‍ന്നാണ് ശിക്ഷിക്കപ്പെടുന്ന ജനപ്രതിനിധികള്‍ ഉടന്‍ അയോഗ്യരാക്കപ്പെടുമെന്ന സാഹചര്യമുണ്ടായത്. ഇതിന് പിന്നിലുണ്ടായിരുന്നത് മലയാളിയായ സുപ്രിം കോടതിയിലെ ആദ്യ വനിതാ അഡ്വക്കറ്റ് ലില്ലി തോമസിന്റെ ഹര്‍ജിയാണ്. 2005-ലാണ് അഡ്വക്കറ്റ് ലില്ലി തോമസ് കുറ്റവാളികളായ ജനപ്രതിനിധികള്‍ ഹൈക്കോടതിയിലും സുപ്രിംകോടതിയിലുമെത്തി ശിക്ഷവിധിയ്ക്ക് സ്റ്റേ വാങ്ങി നിരന്തരം തിരഞ്ഞെടുപ്പില്‍ മല്‍സരിക്കുന്നത് ശ്രദ്ധയില്‍പ്പെടുത്തി പൊതുതാല്‍പര്യ ഹര്‍ജി ഫയല്‍ ചെയ്യുന്നത്. മൂന്ന് തവണ തിരുത്തല്‍ ഹര്‍ജികള്‍ നല്‍കിയ ശേഷമാണ് ലില്ലി തോമസിന്റെ ഹര്‍ജി സുപ്രിംകോടതി പരിഗണിച്ചത്. 2013ല്‍ ചരിത്രവിധി പ്രസ്താവം ഉണ്ടാവുകയും ചെയ്തു. ഇത് മറികടക്കാനാണ് മന്‍മോഹന്‍സിങ്ങിന്റെ നേതൃത്വത്തിലുള്ള യുപിഎ സര്‍ക്കാര്‍ ഓര്‍ഡിന്‍സിന് നീക്കം നടത്തിയത്.
നാക്കുപിഴ ആവര്‍ത്തിക്കപ്പെടുമ്പോള്‍
ലണ്ടനില്‍ നടത്തിയ വിവാദ പ്രസംഗത്തിന്റെ പേരില്‍ പാര്‍ലമെന്റില്‍ പ്രസംഗിക്കാന്‍ ബിജെപി രാഹുലിനെ അനുവദിക്കാതിരിക്കെയാണ്
സൂറത്ത് കോടതിയുടെ വിധി വരുന്നത്. രാഹുല്‍ മാപ്പ് പറയണമെന്ന ആവശ്യമാണ് സഭയില്‍ ബിജെപി ഉയര്‍ത്തിയിരുന്നത്. അതായത് നാവ് പിഴ ആദ്യമായല്ലെന്ന് സാരം. വിഷയത്തില്‍ ചട്ടം 357 പ്രകാരം വ്യക്തിഗത വിശദീകരണത്തിന് രാഹുല്‍ സ്പീക്കറുടെ അനുമതി തേടിയിരുന്നു. ഇതില്‍ സ്പീക്കര്‍ തീരുമാനമെടുക്കാനിരിക്കെയാണ് വിധി വന്നത്. നേരത്തെയും പ്രധാനമന്ത്രിയുമായി ബന്ധപ്പെട്ട് രാഹുലിന് പണികിട്ടിയിട്ടുണ്ട്. റഫാല്‍ കേസുമായി ബന്ധപ്പെട്ട് പ്രധാനമന്ത്രി നരേന്ദ്ര മോദിയെ ‘കാവല്‍ക്കാരന്‍ കള്ള’നാണെന്ന് (ചൗക്കീദാര്‍ ചോര്‍ ഹേ) വിമര്‍ശിച്ചിരുന്നു. ഇതിൽ കോടതിയെ വലിച്ചിഴച്ചതിന്റെ പേരിൽ രാഹുലിനെതിരെ നീക്കമുണ്ടായി. മാപ്പ് പറഞ്ഞാണ് അന്ന് രാഹുല്‍ കോടതിയിൽ തടിയൂരിയത്. മാപ്പ് അംഗീകരിച്ച കോടതി ഭാവിയില്‍ പ്രസ്താവനകള്‍ നടത്തുമ്പോള്‍ സൂക്ഷിക്കണമെന്ന മുന്നറിയിപ്പും രാഹുലിന് നല്‍കിയിരുന്നു. ഇക്കാര്യം പറഞ്ഞും ശിക്ഷ വിധിക്കവെ സൂറത്ത് കോടതി രാഹുലിനെ കുറ്റപ്പെടുത്തിയിരുന്നു.
അതേസമയം, രാഹുലിന്റെ എംപി സ്ഥാനം റദ്ദ് ചെയ്യാന്‍ ഭരണപക്ഷം നിയമവഴി തേടുന്നത് ആദ്യമായല്ല. മൂന്നാമത്തെ തവണയാണ് രാഹുലിനെതിരേ ജനപ്രാതിനിധ്യ നിയമപ്രകാരം കോടതില്‍ കേസെത്തുന്നത്. അതിലൊരെണ്ണം കേരളത്തില്‍ നിന്നുള്ളതാണ്. വയനാട്ടിലും അമേത്തിയിലും രാഹുലിനെതിരേ മല്‍സരിക്കാന്‍ പോയ സോളാര്‍ കേസിലെ സരിതാ നായരായിരുന്നു പരാതിക്കാരി. ഈ കേസ് അന്ന് തന്നെ കോടതി തള്ളി. രണ്ടാമത്തേത് വിദേശപൗരത്വത്തിനെതിരായ ഹര്‍ജിയാണ്. 2013ല്‍ ഹിന്ദു സംഘടനയ്ക്ക് വേണ്ടി ജയ് ഭഗവാന്‍ ഗോയലും ചന്ദര്‍ പ്രകാശ് ത്യാഗിയുമാണ് രാഹുല്‍ ഗാന്ധിക്ക് ബ്രിട്ടീഷ് പൗരത്വം ഉണ്ടെന്നും ലോക്‌സഭാ തിരഞ്ഞെടുപ്പില്‍ മല്‍സരിക്കുന്നതില്‍ നിന്ന് വിലക്കണമെന്നും ആരോപിച്ച് ഹര്‍ജി നല്‍കിയത്. എന്നാല്‍ ഇതും സുപ്രീംകോടതി തള്ളി. അവസാനം അപകീര്‍ത്തി കേസ് രാഹുലിനെതിരേ നല്‍കിയതും ബിജെപി എംഎല്‍എയാണ്.
