എംബസികള്‍ തുറക്കുന്ന കാര്യം ചര്‍ച്ച ചെയ്യും
2016-ല്‍ വിച്ഛേദിച്ച നയതന്ത്രബന്ധം പുനരാരംഭിക്കുമെന്ന് സൗദി അറേബ്യയും ഇറാനും മാര്‍ച്ച് 10 ന് ബെയ്ജിംഗില്‍ വച്ച് സൗദി സഹമന്ത്രിയും ക്യാബിനറ്റ് അംഗവും ദേശീയ സുരക്ഷാ ഉപദേഷ്ടാവുമായ മുസായ്ദ് അല്‍ ഐബാനും ഇറാന്‍ സുപ്രീം നാഷണല്‍ സെക്യൂരിറ്റി കൗണ്‍സില്‍ സെക്രട്ടറി അലി ഷംഖാനിയും ഒപ്പുവച്ച അനുരഞ്ജന കരാറില്‍ പ്രഖ്യാപിച്ചിരുന്നു. ചൈനയുടെ മധ്യസ്ഥതയിലായിരുന്നു അകന്നു നില്‍ക്കുകയായിരുന്ന ഇരു രാജ്യങ്ങളിലും പരസ്പരം സഹകരിച്ച് പ്രവര്‍ത്തിക്കാന്‍ ധാരണയായത്. രണ്ട് മാസത്തിനുള്ളില്‍ അവരുടെ എംബസികളും മിഷനുകളും വീണ്ടും തുറക്കാനുള്ള കരാറും കരാറില്‍ ഉള്‍പ്പെടുന്നു. ഇവ നടപ്പില്‍ വരുത്തുന്നതിന് ആവശ്യമായ തുടര്‍ നടപടികള്‍ സ്വീകരിക്കുന്നതിനു വേണ്ടിയാണ് വിദേശകാര്യമന്ത്രിമാര്‍ ഉഭയ കക്ഷി ചര്‍ച്ചകള്‍ നടത്തുന്നത്.
സിറിയയുമായുള്ള ബന്ധവും പുനസ്ഥാപിക്കാന്‍ സൗദി
അതിനിടെ, സൗദി അറേബ്യയും സിറിയയും നയതന്ത്ര ബന്ധം പുനരാരംഭിക്കാനും ഒരു ദശാബ്ദത്തിലേറെയായി അടഞ്ഞുകിടക്കുന്ന തങ്ങളുടെ എംബസികള്‍ വീണ്ടും തുറക്കാനും സമ്മതിച്ചതായി സര്‍ക്കാര്‍ വൃത്തങ്ങള്‍ അറിയിച്ചു. സൗദി അറേബ്യയും ഇറാനും തമ്മിലുള്ള ബന്ധം പുനരാരംഭിക്കുന്നതിനും എംബസികള്‍ വീണ്ടും തുറക്കുന്നതിനുമുള്ള സുപ്രധാന കരാറിനെത്തുടര്‍ന്നാണ് സൗദിയും സിറിയയും തമ്മിലുള്ള ബന്ധം പുനസ്ഥാപിക്കുന്നതിന് വഴിയൊരുങ്ങിയത്. ഇരു സര്‍ക്കാരുകളും ഏപ്രില്‍ രണ്ടാം പകുതിയില്‍ ‘ഈദ് അല്‍ ഫിത്തറി’ന് ശേഷം എംബസികള്‍ വീണ്ടും തുറക്കാന്‍ തയ്യാറെടുക്കുകയാണെന്ന് സിറിയന്‍ സര്‍ക്കാര്‍ വൃത്തങ്ങളെ ഉദ്ധരിച്ച് റോയിട്ടേഴ്സും റിപ്പോര്‍ട്ട് ചെയ്തു.
സിറിയയെ അറബ് ലീഗിലേക്ക് തിരിച്ചെടുത്തേക്കും
സിറിയന്‍ ഇന്റലിജന്‍സിലെ മുതിർന്ന ഉദ്യോഗസ്ഥനുമായി സൗദി അറേബ്യയില്‍ നടത്തിയ ചര്‍ച്ചയുടെ ഫലമാണ് ഈ തീരുമാനമെന്നാണ് പ്രാദേശിക മാധ്യമങ്ങള്‍ റിപ്പോര്‍ട്ട് ചെയ്തിരിക്കുന്നത്. സൗദി സര്‍ക്കാരിന്റെ കമ്മ്യൂണിക്കേഷന്‍ ഓഫീസും രാജ്യത്തിന്റെ വിദേശകാര്യ മന്ത്രാലയവും സിറിയന്‍ സര്‍ക്കാരും ഈ വാര്‍ത്തകളോട് ഔദ്യോഗികമായി പ്രതികരിച്ചിട്ടില്ല. സൗദിയും ഇറാനും തമ്മിലുള്ള വൈരാഗ്യം സിറിയയിലെ ഏറ്റുമുട്ടല്‍ രൂക്ഷമാക്കാനും സംഘര്‍ഷങ്ങള്‍ക്ക് ആക്കം കൂട്ടാനും ഇടവരുത്തിയിരുന്നു. ഇരു രാജ്യങ്ങളും അനുരഞ്ജന പാതയില്‍ എത്തിയതോടെ അതിന്റെ ഗുണഫലങ്ങള്‍ മേഖലയിലാകെ പ്രകടമാകുമെന്നതിന്റെ തെളിവായാണ് ഇത് ചൂണ്ടിക്കാണിക്കപ്പെടുന്നത്. യമനില്‍ വര്‍ഷങ്ങളായി തുടരുന്ന സംഘര്‍ഷം അവസാനിപ്പിക്കാനും ഇത് വഴിയൊരുക്കിയേക്കും. പുതിയ സാഹചര്യത്തില്‍ ആഭ്യന്തര സംഘര്‍ഷങ്ങളുടെ പശ്ചാത്തലത്തില്‍ 2011ല്‍ അറബ് ലീഗില്‍ നിന്ന് പുറത്താക്കപ്പെട്ട സിറിയയുടെ സസ്‌പെന്‍ഷന്‍ പിന്‍വലിക്കപ്പെടുന്നതിന് വഴിയൊരുങ്ങുമെന്നും പ്രതീക്ഷിക്കപ്പെടുന്നുണ്ട്. അടുത്ത ഏപ്രിലില്‍ സൗദി അറേബ്യയില്‍ നടക്കുമെന്ന് പ്രതീക്ഷിക്കുന്ന അടുത്ത അറബ് ഉച്ചകോടിയില്‍ സിറിയയുടെ സസ്‌പെന്‍ഷന്‍ പിന്‍വലിക്കാന്‍ സിറിയന്‍- സൗദി ചര്‍ച്ചകള്‍ വഴിയൊരുക്കുമെന്നാണ് രാഷ്ട്രീയ നിരീക്ഷകര്‍ കരുതുന്ന
