​കടയില്‍ നിന്നും വാങ്ങുന്ന രീതിയില്‍ ക്രീമി ആയിട്ടുള്ള കട്ട തൈര് വീട്ടില്‍ തയ്യാറാക്കാം​

​തൈരിന്റെ ഗുണം​

തൈര് ആഹാരത്തില്‍ ചേര്‍ക്കുന്നത് കൊണ്ട് നിരവധി ആരോഗ്യ ഗുണങ്ങളാണ് നമുക്ക് ലഭിക്കുന്നത്. നല്ലരീതിയില്‍ ദഹനം നടക്കുന്നതിനും വയറ്റിലെ അസിഡിറ്റി പോലെയുള്ള പ്രശ്‌നങ്ങള്‍ പരിഹരിക്കുന്നതിനും തൈര് നല്ലതാണ്. അതുപോലെ, രോഗപ്രതിരോധശേഷി വര്‍ദ്ധിപ്പിക്കാന്‍ തൈര് നല്ലതാണ്.

തടി കുറയ്ക്കാന്‍ ശ്രമിക്കുന്നവര്‍ക്ക് നല്ലൊരു ഓപ്ഷനാണ് തൈര്, ശരീരം തണുപ്പിക്കുന്നതിനും തൈര് നല്ലതാണ്. അതുപോലെ, തലയില്‍ നിന്നും താരന്‍ നീക്കം ചെയ്യാനും മുഖത്തെ കറുത്തപാടുകള്‍ മാറ്റാനും തൈര് സഹായിക്കുന്നുണ്ട്.

​തൈര് തയ്യാറാക്കാം​

തൈര് തയ്യാറാക്കുന്നതിന് ആദ്യം നല്ല നല്ല കൊഴുപ്പുള്ള പാല്‍ എടുക്കുക. ഇത് നല്ല ചുവട് കട്ടിയുള്ള പാത്രത്തില്‍ ഒഴിച്ച് ഇതിലേയ്ക്ക് രണ്ട് ടേബിള്‍സ്പൂണ്‍ വെള്ളം ചേര്‍ത്ത് നന്നായി തിളപ്പിക്കുക. പാല്‍ ചൂടാക്കുമ്പോള്‍ ഇടയ്ക്ക് ഇളക്കി കൊടുക്കാന്‍ മറക്കരുത്. അല്ലെങ്കില്‍ പാത്രത്തിന്റെ അടിയില്‍ പിടിക്കും.

നന്നായി തിളച്ച് വന്നതിന് ശേഷം ചൂടാറാന്‍ വെക്കുക. ചെറുചൂടുള്ളപ്പോള്‍ കുറച്ച് തൈര് ചേര്‍ത്ത് നന്നായി ഇളക്കി മിക്‌സ് ചെയ്ത് വെക്കണം. അതിന് ശേഷം ഒരു ഗ്ലാസ്സ് പാത്രത്തില്‍ അല്ലെങ്കില്‍ മണ്‍പാത്രത്തില്‍ തൈര് പുരട്ടിയതിന് ശേഷം ഈ പാല്‍ ഒഴിച്ച് തുണികൊണ്ട് വായ്ഭാഗം മൂടി കെട്ടിവെച്ച് അനക്കാതെ വെക്കുക. പിറ്റേ ദിവസത്തേക്ക് നല്ല കട്ടി തൈര് നിങ്ങള്‍ക്ക് ലഭിക്കുന്നതാണ്.

​കട്ട തൈര് ലഭിക്കാത്തതിന് കാരണം​

ചിലര്‍ തൈര് വീട്ടില്‍ തയ്യാറാക്കുമ്പോള്‍ നല്ല കട്ട തൈര് ലഭിക്കാറില്ല. പലപ്പോഴും തൈരിന് മുകളില്‍ വെള്ളം കെട്ടികിടക്കുന്നതോ അല്ലെങ്കില്‍ കുറച്ച് വെള്ളം പോലെ ഇരിക്കുന്ന തൈര് ലഭിക്കുന്നത് കാണാം. ഇത്തരത്തില്‍ തൈര് ലഭിക്കുന്നതിന് കാരണങ്ങള്‍ പലതാണ്.

ചിലപ്പോള്‍ നിങ്ങള്‍ പാല്‍ തിളപ്പിക്കുമ്പോള്‍ അമിതമായി വെള്ളം ചേര്‍ത്താല്‍ ഇത് പാല്‍ തൈര് ആക്കുമ്പോള്‍ കട്ട തൈര് കിട്ടാതിരിക്കുന്നതിന് കാരണമാകുന്നു. അതുപോലെ, ഇത്തരത്തില്‍ ചേര്‍ക്കുന്ന അമിതവെള്ളം തൈരിന്റഎ മുകളില്‍ കെട്ടി കിടക്കുകയും ചെയ്യും.

അതുപോലെ, നല്ല കൊഴുപ്പുള്ള പാല്‍ തൈര് ഉണ്ടാക്കാന്‍ എടുക്കാതിരുന്നാലും ഇത് കട്ട തൈരായി ലഭിക്കുകയില്ല. നിങ്ങള്‍ പാലില്‍ ചേര്‍ക്കുന്ന തൈരും നല്ലതായിരിക്കാന്‍ ശ്രദ്ധിക്കണം. പ്രത്യേകിച്ച്, നല്ല കട്ട തൈര് ചേര്‍ത്താല്‍ നിങ്ങള്‍ തയ്യാറാക്കുന്ന തൈരും നല്ല കട്ടയായി ഇരിക്കും.

​ശ്രദ്ധിക്കേണ്ട കാര്യങ്ങള്‍​

തൈര് തയ്യാറാക്കുമ്പോള്‍ ഒരിക്കലും അലുമിനിയം പാത്രത്തിലോ അതുപോലെ പ്ലാസ്റ്റിക്ക് പാത്രത്തിലോ വെക്കരുത്. ഇത് കെമിക്കല്‍ റിയാക്ഷന്‍ ഉണ്ടാകുന്നതിന് കാരണമാവുകയും ശരീരത്തിന് ദോഷകരമായി ഭവിക്കുകയും ചെയ്യും. ഏറ്റവും നല്ലത് നല്ല മണ്‍പാത്രങ്ങള്‍ ഉപയോഗിക്കുന്നതാണ്.

അതുപോലെ, തൈര് തയ്യാറാക്കാനായി പാല്‍ തയ്യാറാക്കി വെക്കുമ്പോള്‍ മൂടി വെക്കാനും അതുപോലെ, ഒട്ടും അനക്കാതെ വെക്കാനും ശ്രദ്ധിക്കുക. തണുപ്പുള്ള സ്ഥലമാണെങ്കില്‍ ഓവനില്‍ വെക്കുന്നതും അതുപോലെ, കബിളിപ്പുതപ്പ് കൊണ്ട് മൂടി വെക്കുന്നതും നല്ലതാണ്. ചിലര്‍ കാസറോളിലും വെക്കാറുണ്ട്.

Also Read: കറിയില്‍ ഉപ്പ് കൂടിപ്പോയാല്‍ വിഷമിക്കണ്ട ഈ മാര്‍ഗ്ഗങ്ങള്‍ ട്രൈ ചെയ്യൂ!​

​​തൈര് കൊണ്ടുള്ള വിഭവങ്ങള്‍​

​നല്ല കട്ട തൈരില്‍ നിന്നും വെണ്ണ മാറ്റി എടുക്കാവുന്നതാണ്. അതുപോലെ, നിങ്ങള്‍ക്ക് നല്ല മോരും ഇതില്‍ നിന്ന് തയ്യാറാക്കാം. മോര് തയ്യാറാക്കാന്‍ തൈരില്‍ കുറച്ച് വെള്ളം ചേര്‍ത്ത് മിക്‌സിയുടെ ജാറില്‍ അടിച്ച് എടുക്കുക.

ഈ തൈര് ഉപയോഗിച്ച് നിങ്ങള്‍ക്ക് നല്ല മോരു കറിയും അതുപോലെ, പുളിശ്ശേരിയും ഉണ്ടാക്കാവുന്നതാണ്. ലസ്സി ഇഷ്ടമുള്ളവര്‍ക്ക് അതും തയ്യാറാക്കി എടുക്കാവുന്നതാണ്. തൈര് എല്ലായ്‌പ്പോഴും പുറത്ത് വെക്കുന്നത് നല്ല പുളി ലഭിക്കുന്നതിന് സഹായിക്കും.

English Summary: How to Make Thick Curd at Home

​