‘മാപ്പ് പറയില്ല, ചില്ലിക്കാശ് പോലും നഷ്ടപരിഹാരം നൽകില്ല’; എം വി ഗോവിന്ദന് മറുപടിയുമായി സ്വപ്ന സുരേഷ്

എം വി ഗോവിന്ദന് മറുപടിയുമായി സ്വപ്ന സുരേഷ്.

കൊച്ചി: സിപിഎം സംസ്ഥാന സെക്രട്ടറി എം വി ഗോവിന്ദൻ അയച്ച വക്കീൽ നോട്ടീസിന് മറുപടിയുമായി സ്വർണക്കടത്ത് കേസ് പ്രതി സ്വപ്ന സുരേഷ്. മാപ്പ് പറയില്ലെന്നും ചില്ലിക്കാശ് പോലും നഷ്ടപരിഹാരമായി നൽകാൻ തയ്യാറല്ലെന്നും നാലു പേജു നീണ്ട മറുപടിയിൽ സ്വപ്ന സുരേഷിൻ്റെ അഭിഭാഷകൻ ആർ കൃഷ്ണരാജ് വ്യക്തമാക്കി. എല്ലാ നിയമനടപടിയെയും സ്വാഗതം ചെയ്യുന്നുവെന്നും മറുപടിയിൽ പറയുന്നു. ഒരു കോടി രൂപ നഷ്ടപരിഹാരം ആവശ്യപ്പെട്ടാണ് എം വി ഗോവിന്ദൻ അഭിഭാഷകൻ മുഖേന സ്വപ്നയ്ക്ക് വക്കീൽ നോട്ടീസ് അയച്ചിരുന്നത്. “എന്താണ് നടന്നതെന്നു വ്യക്തമായി മനസിലാക്കാതെയാണ് എം വി ഗോവിന്ദൻ വക്കീൽ നോട്ടീസ് അയച്ചിരിക്കുന്നത്. മാർച്ച് മൂന്നിനു സ്വപ്ന നടത്തിയ ഫേസ്ബുക്ക് ലൈവ് വീണ്ടും കാണാൻ അഭ്യർഥിക്കുന്നു. സ്വർണക്കടത്തുമായി ബന്ധപ്പെട്ട കേസിൽ വിജയ് പിള്ളയിൽനിന്നു ഭീഷണി നേരിട്ടതിനെ തുടർന്നാണ് സ്വപ്ന ലൈവിൽ എത്തിയത്. വിജയ് പിള്ള പറഞ്ഞ കാര്യങ്ങൾ മാത്രമാണ് സ്വപ്ന ലൈവിലൂടെ വ്യക്തമാക്കിയത്.

കണ്ണിന് കുളിർമയേകി കൊവ്വൽ മുണ്ട്യ ക്ഷേത്രത്തിലെ നരയൻ പൂപ്പന്തൽ |Flowers

എം വി ഗോവിന്ദനു വേണ്ടിയാണ് എത്തിയതെന്നാണ് വിജയ് പിള്ള അറിയിച്ചത്. മുഖ്യമന്ത്രിക്കും കുടുംബത്തിനും എതിരായ പോരാട്ടം അവസാനിപ്പിച്ചില്ലെങ്കിൽ ജീവൻ അപകടത്തിലാകുമെന്ന് ഭീഷണിപ്പെടുത്തി. 30 കോടി രൂപ വാഗ്ദാനം ചെയ്യുകയും ചെയ്തു. ഇക്കാര്യങ്ങൾ വെളിപ്പെടുത്തുക മാത്രമാണ് ചെയ്തത്. എം വി ഗോവിന്ദനാണ് വിജയ് പിള്ളയെ അയച്ചതെന്ന് ഒരിടത്തും പറയുന്നില്ല. എം വി ഗോവിന്ദൻ്റെ ദൂതനായാണ് വിജയ് പിള്ള വന്നതെന്നു എവിടെയും പറയുന്നില്ല. വിജയ് പിള്ളയുമായി എം വി ഗോവിന്ദനോ കുടുംബത്തിനോ ബന്ധമുണ്ടെന്നും പറഞ്ഞിട്ടില്ല.

‘ഡീൽ നടന്നുവെന്ന് തെളിഞ്ഞു, ലോകായുക്തയുടെ ശവമടക്ക് മുഖ്യമന്ത്രി നടത്തി’; കെ സുധാകരൻ

ഈ സാഹചര്യത്തിൽ ചില്ലാക്കാശ് നൽകാനോ മാപ്പ് പറയാനോ തയ്യാറല്ല. എല്ലാ നിയമനടപടിയെയും

സ്വാഗതം ചെയ്യുന്നു. നഷ്ടപരിഹാരം ആവശ്യപ്പെട്ട ഒരു കോടി രൂപയുടെ 10 ശതമാനം കോടതി ഫീസായി അടച്ചു കേസ് ഫയൽ ചെയ്യുന്നതിനായി ആകാംക്ഷയോടെ കാത്തിരിക്കുകയാണ്”- സ്വപ്നയുടെ അഭിഭാഷകൻ വ്യക്തമാക്കി.