എടപ്പാടി എങ്ങനെയാണ് അണ്ണാ ഡിഎംകെയെ കൈപ്പിടിയിലൊതുക്കിയത്? പനീർസെൽവത്തിന് ഇനി എന്താണ് മാർഗ്ഗം?

എം.ജി.ആര്‍. മാളികയില്‍ പാര്‍ട്ടി തിരഞ്ഞെടുപ്പ് കമിഷണര്‍മാരായ എന്‍.ആര്‍. വിശ്വനാഥനും പൊള്ളാച്ചി വി ജയരാമനും ചൊവ്വാഴ്ച ആറാമത് ജനറല്‍ സെക്രട്ടറിയായി എടപ്പാടിയെ തിരഞ്ഞെടുത്തു കൊണ്ടുള്ള കത്ത് കൈമാറി. 2024-ലെ തിരഞ്ഞെടുപ്പ് പടിവാതിക്കലോളം എത്തിയതിനാല്‍ അടങ്ങിയിരിക്കാന്‍ എന്തായാലും ‘അമ്മ’യുടെ വിശ്വസ്തനായ പനീര്‍ ശെല്‍വത്തിന് സാധിക്കില്ല. മൂന്നുവട്ടം മുഖ്യമന്ത്രിസ്ഥാനം കൈപ്പിടിയിലായ പനീര്‍ശെല്‍വത്തിന് ഒരിക്കല്‍പ്പോലും ടേം പൂര്‍ത്തിയാക്കാന്‍ സാധിച്ചിരുന്നില്ല. അടുത്ത തിരഞ്ഞെടുപ്പില്‍ പാര്‍ട്ടി വിജയിച്ചാല്‍ മുഖ്യമന്ത്രി കസേരയില്‍ അഞ്ചുവര്‍ഷം പൂര്‍ത്തിയാക്കാന്‍ ശെല്‍വത്തിന് മോഹമുണ്ട്. പാര്‍ട്ടി പിളര്‍ത്തി തന്റെ പക്ഷത്തുള്ളവരെ കൂട്ടി പുതിയ കക്ഷി രൂപവത്കരിക്കാന്‍ നിലവില്‍ പനീര്‍ശെല്‍വത്തിന് ധൈര്യമില്ലാത്തത് കൊണ്ടാകാം എ.ഐ.എ.ഡി.എം.കെ.യില്‍ തന്നെ തുടരാനുള്ള വഴികള്‍ അന്വേഷിക്കുന്നത്. ഹൈക്കോടതി വിധിക്കെതിരേ ഡിവിഷന്‍ ബെഞ്ചിന് അപ്പീല്‍ നല്‍കാനുള്ള ഒരുക്കത്തിലാണ് പനീര്‍ശെല്‍വവും ശെല്‍വത്തെ പിന്തുണയ്ക്കുന്ന പി.എച്ച്. മനോജ് പാണ്ഡ്യനും ആര്‍. വൈത്ത്യലിംഗവും ജെ.സി.ഡി. പ്രഭാകറും.

പനീര്‍ ശെല്‍വം ഒരു കരുനീക്കിയാല്‍ നാലു നീക്കം മുന്‍ക്കൂട്ടി കാണാന്‍ ശേഷിയുള്ള രാഷ്ട്രീയ നേതാവാണ് എടപ്പാടി പളനി സ്വാമി. എ.ഐ.എ.ഡി.എം.കെ.യുടെ എല്ലാമായ ജയലളിതയുമായി ഏറ്റവും അടുത്ത് നിന്ന എല്ലാവരെയും ‘വെട്ടിനിരത്തി’ (ശശികല, ടി.ടി.വി. ദിനകരന്‍, ഇപ്പോള്‍ പനീര്‍ ശെല്‍വം) മുന്നോട്ട് നീങ്ങുന്ന എടപ്പാടിയുടെ അടുത്ത നീക്കം എന്താണെന്ന് പ്രവചിക്കുക അത്ര എളുപ്പമല്ല. വരാനിരിക്കുന്ന തിരഞ്ഞെടുപ്പില്‍ പാര്‍ട്ടി വിജയിക്കുകയാണെങ്കില്‍ മുഖ്യമന്ത്രി സ്ഥാനം അവകാശപ്പെടാന്‍ മറ്റൊരു നേതാവ് എന്നത് എടപ്പാടി ആഗ്രഹിക്കുന്നില്ല. വര്‍ഷങ്ങള്‍ കാത്തിരുന്നും നീക്കങ്ങള്‍ നടത്തിയും നേടിയതാണ് പാര്‍ട്ടിയിലെ ഉന്നത പദവിയും. ജയലളിതയുടെ കാലത്ത് അധികമെവിടെയും ശ്രദ്ധിക്കപ്പെടാതെ ശശികലയുടെയും മറ്റും നിഴലില്‍ കഴിഞ്ഞിരുന്ന എടപ്പാടിയുടെ സമയം തെളിഞ്ഞത് പനീര്‍ശെല്‍വവും ശശികലയും ഉടക്കിയപ്പോഴാണ്. അതിന് ശേഷം എ.ഐ.എ.ഡി.എം.കെ.യില്‍ എല്ലാം എടപ്പാടി വിചാരിച്ചത് പോലെ തന്നെയാണ് നടന്നിട്ടുള്ളത്. വിചാരിച്ചത് പോലെ പാര്‍ട്ടിയിലെ ഉന്നത പദവി നേടുകയും ഭീഷണിയാകാന്‍ സാധ്യതയുള്ളവരെ ഒഴിവാക്കുകയും ചെയ്തു. ഇനി അടുത്തത് എന്തായിരിക്കും എടപ്പാടിയുടെ മനസ്സില്‍? തിരഞ്ഞെടുപ്പില്‍ പാര്‍ട്ടി വിജയിച്ചാല്‍ മുഖ്യമന്ത്രി സ്ഥാനത്തേക്ക് എടപ്പാടിയുടേതല്ലാതെ മറ്റൊരു പേര് ഇനി ഉയര്‍ന്ന് വരില്ല. അതുമാത്രമാണോ എടപ്പാടിയുടെ ലക്ഷ്യം?

പാര്‍ട്ടിയും പിളര്‍പ്പും



ഭിന്നതയും പിളര്‍പ്പും ലയനവും ആള്‍ ഇന്ത്യാ അണ്ണാ ദ്രാവിഡ മുന്നേറ്റ കഴകത്തിന് പുത്തന്‍ അനുഭവമല്ല. എ.ഐ.എ.ഡി.എം.കെ. എന്ന പാര്‍ട്ടി ഉണ്ടാകുന്നത് തന്നെ ഒരു ഭിന്നപ്പില്‍ നിന്നാണ്. ഡി.എം.കെ. (ദ്രാവിഡ മുന്നേറ്റ കഴകം)യില്‍ ട്രഷറര്‍ സ്ഥാനം ആവശ്യപ്പെട്ടപ്പോള്‍ എം. കരുണാനിധി പുറത്താക്കിയതാണ് എ.ഐ.എ.ഡി.എം.കെ. എന്ന പാര്‍ട്ടിയുടെ ജനനത്തിലേക്ക് എം.ജി.ആറിനെ നയിച്ചത്. ഡി.എം.കെ.യും എ.ഐ.എ.ഡി.എം.കെ.യും തമ്മിലുള്ള ദ്വന്ദയുദ്ധത്തില്‍ തമിഴ് രാഷ്ട്രീയത്തില്‍ മറ്റു പാര്‍ട്ടികള്‍ കാഴ്ചകാരായി. എം.ജി.ആറിന്റെ മരണം പാര്‍ട്ടിയെ ആദ്യത്തെ ഭിന്നിപ്പിലേക്ക് നയിച്ചു. എം.ജി.ആറിന്റെ ഭാര്യ ജാനകി രാമചന്ദ്രനും പാര്‍ട്ടിയിലെ ശക്തികേന്ദ്രമായ ജയലളിതയും തമ്മിലുണ്ടായ അധികാര പോരാട്ടം എ.ഐ.എ.ഡി.എം.കെ.യെ പ്രതിസന്ധിയിലാക്കി. 1988-ല്‍ വെറും 24 ദിവസം മുഖ്യമന്ത്രിയായ ജാനകിക്ക് ജയലളിതയുടെ മുന്നില്‍ പിടിച്ച് നില്‍ക്കാനായില്ല. മുഖ്യമന്ത്രി സ്ഥാനത്ത് നിന്നും പാര്‍ട്ടിയില്‍ നിന്നും അവര്‍ പടിയിറങ്ങി.

എ.ഐ.എ.ഡി.എം.കെയുടെ അമരത്തേക്ക് ജയലളിത കടന്നുവന്നു. പിന്നീട് മരിക്കുവോളം പാര്‍ട്ടി എന്നാല്‍ ജയലളിത ആയിരുന്നു. ആദ്യം പാര്‍ട്ടിക്കും പിന്നീട് തമിഴ് മക്കള്‍ക്കും അവര്‍ അമ്മയായി. ജയലളിതയുടെ മരണം പാര്‍ട്ടിയെ ഇനി ആരു നയിക്കുമെന്ന ചോദ്യത്തിലേക്ക് ഒരിക്കല്‍ കൂടി കൊണ്ടെത്തിച്ചു. പാര്‍ട്ടിയുടെ ചോദ്യം ചെയ്യപ്പെടാത്ത നേതാവാകുകയെന്നത് ജയലളിതയുടെ പിന്‍പറ്റി നടന്ന എല്ലാവരുടെയും മോഹമാണ്. തിരഞ്ഞെടുപ്പിന് ഇനി ഒരു വര്‍ഷം കഷ്ടി, മുഖ്യമന്ത്രിക്കസേരയും എല്ലാവരുടെയും നോട്ടത്തിലുണ്ട്. കോടതിയുത്തരവിനെ തുടര്‍ന്ന് ഭരണത്തില്‍ നിന്ന് ജയലളിതയ്ക്ക് വിട്ടുനില്‍ക്കേണ്ടി വന്ന രണ്ടുവട്ടവും ഏറ്റവും വിശ്വസ്തനായി ഒ. പനീര്‍ ശെല്‍വം അവര്‍ക്ക് വേണ്ടി മുഖ്യമന്ത്രിയായി. 2016 ഡിസംബര്‍ അഞ്ചിന് ജയലളിത മരിച്ചപ്പോള്‍ പകരം ആര് മുഖ്യമന്ത്രിയാകണമെന്ന കാര്യത്തില്‍ പാര്‍ട്ടി രണ്ടാമതൊന്ന് ആലോചിച്ചില്ല. പാര്‍ട്ടി തീരുമാനത്തില്‍ ജയലളിതയ്ക്ക് പകരം ഒരിക്കല്‍ കൂടി മുഖ്യമന്ത്രിയായ ശെല്‍വത്തിന് ഒഴിവാക്കി മുന്നോട്ട് വരാനുള്ള വ്യഗ്രതയില്‍ ശശികല ആവനാഴിയില്‍ നിന്ന് പുറത്തെടുത്തതാണ് എടപ്പാടി കറുപ്പ പളനി സ്വാമി എന്ന ഇപിഎസിനെ. ഒടുവില്‍ രാഷ്ട്രീയത്തില്‍ ശശികലയുടെ അന്തകനായി മാറി ഇ.പി.എസ്. ഇ.പി.എസിന്റെ ഓരോ നീക്കവും വ്യക്തമായി കണക്കു കൂട്ടികൊണ്ടുതന്നെയാണ്.

ഒറ്റയ്ക്ക് വഴിവെട്ടുന്ന ഇ.പി.എസ്.



ജയലളിത എന്ന വ്യക്തിത്വത്തിനുള്ളില്‍ ഒതുങ്ങിയിരുന്ന പാര്‍ട്ടിയാണ് എ.ഐ.എ.ഡി.എം.കെ. പാര്‍ട്ടി എന്നാല്‍ അവര്‍ മാത്രമായിരുന്നു. അവരെക്കൂടാതെ പാര്‍ട്ടിക്ക് പുറത്ത് ശ്രദ്ധിക്കപ്പെട്ട വ്യക്തി ഉറ്റതോഴി വി.കെ. ശശികലയും. 2017-ന് മുമ്പ് എടപ്പാടി കറുപ്പ പളനിസ്വാമി എന്ന പേര് പാര്‍ട്ടിക്ക് അകത്തുപോലും എത്ര പരിചിതമാണെന്ന് സംശയം തോന്നും. എ.ഐ.എ.ഡി.എം.കെ. തമിഴ്‌നാട് ഭരിക്കുമ്പോള്‍ അധികം ശ്രദ്ധിക്കപ്പെടാത്ത മന്ത്രി. ജയലളിതയുടെ മന്ത്രിസഭയില്‍ ഹൈവേ, പൊതുപ്രവൃത്തി, ചെറുകിട തുറമുഖ വിഭാഗം മന്ത്രിയായി നാലാം സ്ഥാനത്തിരുന്ന നേതാവായിരുന്നു ഇ.പി.എസ്.

ജയലളിതയുടെ വിയോഗമാണ് സാധാരണ മന്ത്രി സ്ഥാനത്ത് തുടരേണ്ടിയിരുന്ന ഇ.പി.എസിന്റെ തലവര ഒരു തരത്തില്‍ മാറ്റിവരച്ചത്. 2016-ല്‍ ജയലളിതയുടെ മരണത്തിന് പിന്നാലെ തമിഴ് രാഷ്ട്രീയത്തില്‍ എല്ലാം നാടകീയമായിരുന്നു. എക്കാലത്തെയും ജയയുടെ വിശ്വസ്തനായിരുന്ന ഒ. പനീര്‍ശെല്‍വത്തിനെ പാര്‍ട്ടിയില്‍ നിന്നുതന്നെ ഒഴിവാക്കി മുഖ്യമന്ത്രിയാകാനുള്ള നീക്കം നടത്തുകയായിരുന്നു ശശികല. പാര്‍ട്ടിയില്‍ നിന്ന് രാജിവെക്കേണ്ടി വന്ന പനീര്‍ശെല്‍വം മറീന ബീച്ചില്‍ ജയലളിതയെ അടക്കം ചെയ്ത ഇടത്ത് മൗനാചരണം നടത്തി. തൊട്ടടുത്ത ദിവസമാണ് അനധികൃത സ്വത്ത് സമ്പാദന കേസില്‍ സുപ്രീം കോടതി ശശികലയ്ക്ക് നാലുവര്‍ഷം ജയില്‍ ശിക്ഷയും പത്ത് വര്‍ഷം തിരഞ്ഞെടുപ്പില്‍ മത്സരിക്കുന്നത് വിലക്കിയും ഉത്തരവിടുന്നത്.

ജയലളിതയുടെ മരണം സംഭവിച്ച് രണ്ടുമാസമാകുമ്പോള്‍, 2017 ഫെബ്രുവരി 14-ന്, പാര്‍ട്ടിയില്‍ പുതിയ സംഭവവികാസങ്ങള്‍ അരങ്ങേറി. അന്നേ ദിവസം കാഞ്ചിപുരത്തെ കൂവത്തൂര്‍ എന്ന ഗ്രാമത്തിലെ ഒരു റിസോര്‍ട്ടില്‍ തന്റെ പക്ഷത്തുള്ള 120 എം.എല്‍.എമാരെ കൂട്ടി എ.ഐ.എ.ഡി.എം.കെ.യുടെ ജനറല്‍ സെക്രട്ടറിയും അടുത്ത മുഖ്യമന്ത്രിയുമാകാനുള്ള ഒരുക്കത്തിലായിരുന്നു ശശികല. തുടക്കത്തില്‍ പനീര്‍ ശെല്‍വത്തിനെ അനുകൂലിച്ചവര്‍ പോലും ആ റിസോര്‍ട്ടില്‍ ശശികലയോടൊപ്പം കൂടി. എന്നാല്‍ അപ്രതീക്ഷിതമായി വന്ന സുപ്രീംകോടതി വിധി എല്ലാ പദ്ധതികളും തകിടം മറിച്ചു. പലരും കരുതുന്നത് പോലെ മറ്റു വഴികളില്ലാത്തത് കൊണ്ടായിരുന്നില്ല ജയിലിലേക്ക് പോകുന്ന ശശികല ഇ.പി.എസിന് താത്കാലിക ചുമതല നല്‍കിയത്. ഇ.പി.എസിന്റെ ഭാഗ്യമെന്ന് പലരും കരുതി. എന്നെങ്കിലും വിധി മാറിമറിയുമെന്ന പ്രതീക്ഷയില്‍ ഇ.പി.എസ്. നാലുവര്‍ഷങ്ങള്‍ക്ക് മുമ്പേ കരുനീക്കങ്ങള്‍ നടത്തിയതായി എടപ്പാടിയെ അറിയുന്നവര്‍ രഹസ്യമായി പറയുന്നു.

തമിഴ്‌നാട് മുഖ്യമന്ത്രിയായി സ്ഥാനമേറ്റ ഇ.പി.എസിന് വെറുതേയിരിക്കാന്‍ നേരമില്ലായിരുന്നു. ഇന്ന് ശശികലയെയും പനീര്‍ശെല്‍വത്തെയും ടി.ടി.വി. ദിനകരനെയും പുറന്തള്ളി പാര്‍ട്ടിയുടെ ഏക നേതാവായി ഇ.പി.എസ്. വളര്‍ന്നു കഴിഞ്ഞു. എം.ജി.ആര്‍, വി.ആര്‍. നെടുന്‍ചേഴിയന്‍, പി.എസ്. ഷണ്‍മുഖം, എസ്. രാഘവനന്ദം, ജയലളിത എന്നിവര്‍ക്ക് ശേഷം എ.ഐ.എ.ഡി.എം.കെയുടെ ആറാമാത്തെ ജനറല്‍ സെക്രട്ടറിയായി ഇ.പി.എസ്. ഒറ്റരാത്രി കൊണ്ട് സംഭവിച്ചതല്ല ഇതൊന്നും.

പാര്‍ട്ടിയിലെ ഭൂരിപക്ഷം എം.എല്‍.എ.മാരെ തന്റെ പക്ഷത്തേക്ക് കൊണ്ടുവരികയും മുതിര്‍ന്ന അംഗങ്ങളുടെ വിശ്വാസം നേടിയെടുക്കുകയും മാത്രമല്ല, പാര്‍ട്ടിയില്‍ തന്റെ എതിരാളികളെ ഒഴിവാക്കാന്‍ നിയമസംഘങ്ങളെ പോലും നിയോഗിക്കാന്‍ ഇ.പി.എസിന് സാധിച്ചു. വെറും ആറുവര്‍ഷത്തിനുള്ളിലാണ് ഇതെല്ലാം സാധിച്ചത്. പനീര്‍ശെല്‍വം പക്ഷത്തുള്ളവരെ പോലും തന്റെ വിരുതില്‍ സ്വന്തം പാളയത്തിലേക്ക് എടപ്പാടി എത്തിച്ചു. പനീര്‍ ശെല്‍വത്തെയും പക്ഷത്തെയും വരുതിയിലാക്കി പാര്‍ട്ടിയില്‍ ലയിപ്പിക്കാന്‍ 2017-ല്‍ ശെല്‍വം പറഞ്ഞ എല്ലാ ആവശ്യങ്ങളും ഇ.പി.എസ്. സാധിച്ചു കൊടുത്തിരുന്നു. പാര്‍ട്ടിയില്‍ നിന്ന് ശശികലയെ പുറത്താക്കിയതും ജയലളിതയുടെ മരണം അന്വേഷിക്കാന്‍ കമിഷനെ നിയോഗിച്ചതും പനീര്‍ശെല്‍വം ആവശ്യപ്പെട്ടതിന്റെ അടിസ്ഥാനത്തിലായിരുന്നു. തന്റെ മന്ത്രിസഭയില്‍ ശെല്‍വത്തിനെ ഉപമുഖ്യമന്ത്രിയുമാക്കാനും ഇ.പി.എസ്. മുന്നില്‍ നിന്നു. തന്നെ മുന്‍പന്തിയിലേക്ക് കൊണ്ടുവന്ന ശശികലയെ പാര്‍ട്ടിയിലേക്ക് തിരിച്ചെടുക്കാതെ എടപ്പാടി പതിയെ പുതിയ കരുനീക്കങ്ങള്‍ക്ക് തുടക്കമിട്ടു.

ആദ്യഘട്ടത്തില്‍ പാര്‍ട്ടിയുടെ ജില്ലാ സെക്രട്ടറിമാരുമായി ഉണ്ടാക്കിയെടുത്ത അടുപ്പം കാരണം ശശികല വിഷയത്തില്‍ എല്ലാവരും എടപ്പാടിക്കൊപ്പം നിന്നു. ഭരണം മുഴുവന്‍ തന്റെ കൈപിടിയില്‍ നിയന്ത്രിക്കുന്ന പനീര്‍ശെല്‍വത്തിന്റെ ജയലളിതാ പാവസര്‍ക്കാരിനെ കണ്ടിട്ടുള്ള എം.എല്‍.എ.മാര്‍ക്ക് എടപ്പാടിയുടെ സൗഹൃദശൈലി ബോധിച്ചു. മുന്‍മുഖ്യന്ത്രിയും ജയലളിതയുടെ മുഖ്യശത്രുവുമായ കരുണാനിധിയെ പുകഴ്ത്തിയത് പോലുള്ള പിഴവുകൾ പാർട്ടി പ്രവർത്തകരിൽ അതൃപ്തിയുണ്ടാക്കിയിരുന്നു. സ്വന്തം താത്പര്യങ്ങള്‍ക്കനുസരിച്ച് മാത്രം പ്രവര്‍ത്തിക്കുകയായിരുന്നു പനീര്‍ശെല്‍വം. ഇതെല്ലാം പാര്‍ട്ടിയില്‍ നിന്ന് അദ്ദേഹത്തെ പടികടത്താന്‍ എടപ്പാടിക്ക് ഗുണമായി.

പാര്‍ട്ടിക്ക് വിരുദ്ധമായി പ്രവര്‍ത്തിക്കാത്ത നേതാവെന്നും തീരുമാനങ്ങള്‍ എടുക്കുന്നതില്‍ പ്രാപ്തനെന്നും അണികള്‍ക്കിടയിലും അതിനിടയില്‍ എടപ്പാടി പേരെടുത്തു. എടപ്പാടിയുടെ വളര്‍ച്ചയ്ക്ക് മുന്നില്‍ പിടിച്ചുനില്‍ക്കാന്‍ സാധ്യതയില്ലെന്ന് ഉറപ്പാക്കിയ ശശികലയുടെ അനന്തിരവന്‍ ടി.ടി.വി. ദിനകരന്‍ അമ്മ മക്കള്‍ മുന്നേറ്റ കഴകം എന്ന പുതിയ പാര്‍ട്ടിയുണ്ടാക്കി രാഷ്ട്രീയത്തില്‍ മറ്റൊരു പാതയിലാണ്. 2663, ജനറല്‍ കൗണ്‍സില്‍ അംഗങ്ങളും, എം.എല്‍.എമാരും എം.പിമാരും ഇന്ന് എടപ്പാടിയെന്ന നേതാവിനെ വിശ്വസിക്കുന്നു, പിന്താങ്ങുന്നു. ഇ.പി.എസ്. എന്ന രാഷ്ട്രീയകരുനീക്കത്തിന്റെ ശക്തി ഒ.പി.എസ്. (ഒ. പനീര്‍ ശെല്‍വം) അറിഞ്ഞത് കഴിഞ്ഞ ജൂണിലാണ്. നേതൃത്വവിഷയം വീണ്ടും പൊന്തിവന്നപ്പോള്‍ നടത്തിയ യോഗത്തില്‍ ചിന്തിക്കാന്‍ പോലും സമയം നല്‍കാതെ ഒ.പി.എസിനെതിരേ പാര്‍ട്ടിയുടെ ജില്ലാസെക്രട്ടറിമാരെ തിരിക്കാന്‍ എടപ്പാടിക്ക് കഴിഞ്ഞു. ജൂലൈ 11-ലെ ജനറല്‍ കൗണ്‍സില്‍ യോഗത്തില്‍ ഒ.പി.എസിനെയും രണ്ടു എം.എല്‍.എമാരെയും പാര്‍ട്ടിയില്‍ നിന്ന് പുറത്താക്കുകയും ചെയ്തു. 2023-ല്‍ നടന്ന ഈറോഡ് ഈസ്റ്റ് ഉപതിരഞ്ഞെടുപ്പില്‍ എ.ഐ.എ.ഡി.എം.കെ. പരാജയപ്പെട്ടപ്പോഴും എടപ്പാടിയെ കുറ്റപ്പെടുത്താന്‍ പാര്‍ട്ടി തയ്യാറായില്ല. അത്രത്തോളം പാര്‍ട്ടിയിലും അണികളിലും വേരിറക്കാന്‍ എടപ്പാടിക്ക് സാധിച്ചു. എടപ്പാടി അല്ലാതെ മറ്റൊരു നേതാവ് എന്നത് കുറച്ച് കാലത്തേക്കെങ്കിലും പാര്‍ട്ടിയുടെ മനസിലില്ല എന്ന വ്യക്തം.

പൊഴിയുമോ പനീര്‍ശെല്‍വം



‘അമ്മയുടെ’ വിശ്വസ്തനായിരുന്നു എന്നും പനീര്‍ശെല്‍വം. 2001-ല്‍ ജയലളിതയെ തിരഞ്ഞെടുപ്പില്‍ മത്സരിക്കുന്ന വിലക്കിക്കൊണ്ട് സുപ്രീം കോടതി വിധി വന്നപ്പോള്‍ അവര്‍ ജയിച്ചു വരുന്നതുവരെ സര്‍ക്കാര്‍ രൂപവത്കരിച്ച് പനീര്‍ശെല്‍വം എന്ന വിശ്വസ്തന്‍ കാത്തിരുന്നു. 2014-ല്‍ അനധികൃത സ്വത്ത് സമ്പാദന കേസില്‍ അവര്‍ അറസ്റ്റിലായപ്പോഴും അവരുടെ മടങ്ങി വരവുവരെ വീണ്ടും താത്കാലിക മുഖ്യമന്ത്രിയായി. ഒടുവില്‍ ജയലളിത മരിച്ചപ്പോഴും പാര്‍ട്ടി ശെല്‍വത്തെ താത്കാലിക മുഖ്യമന്ത്രിയാക്കി. എന്നും ജയലളിതയുടെ കീഴില്‍ കഴിഞ്ഞിരുന്ന ശെല്‍വത്തിന് ഇന്ന് പാര്‍ട്ടിയില്‍ സ്ഥാനമില്ല. ഇനി ശെല്‍വത്തിന് മുന്നില്‍ അധികം വഴികളില്ല. ഒന്നുകില്‍ ഇ.പി.എസിനെതിരേ നിയമയുദ്ധം തുടരുക. എന്നാല്‍ പാര്‍ട്ടിയിലെ അണികള്‍ക്കിടയിലും എം.എല്‍.എ., എം.പി.മാര്‍ക്കിടയിലും വലിയ സ്വാധീനമുള്ള ഇ.പി.എസിനെ പുറത്താക്കുക എളുപ്പമല്ലാത്തത് കൊണ്ട് ഒരു പക്ഷേ വീണ്ടും പരാജയം ഏറ്റുവാങ്ങാം. അല്ലെങ്കില്‍ തമിഴ് രാഷ്ട്രീയത്തില്‍ പുതിയൊരു പാര്‍ട്ടി തുടങ്ങി ഒറ്റയ്ക്ക് പൊരുതാം. ഒരുകാലത്ത് കൂടെ നിന്നവര്‍ പോലും ഇ.പി.എസ്. പക്ഷത്തു പോയത് കൊണ്ട് പാര്‍ട്ടി തുടങ്ങിയാല്‍ എത്രത്തോളം വിജയിക്കും എന്ന കാര്യത്തില്‍ സംശയമാണ്. മൂന്നാമതൊരു വഴി ശശികലയ്ക്കും ടി.ടി.വി. ദിനകരനും ഒപ്പം ചേര്‍ന്ന് കൂട്ടുകക്ഷിയാകുക എന്നതാണ്. തേവര്‍ വിഭാഗത്തില്‍ ഉള്‍പ്പെടുന്ന ശശികലയും ശെല്‍വവും ഒന്നിച്ചാല്‍ തമിഴ്‌നാടിന്റെ തെക്കന്‍ ജില്ലകളില്‍ വോട്ട് ഭിന്നിപ്പിക്കാന്‍ സാധിക്കും. എന്നാല്‍ മുന്‍കാല ചരിത്രം നോക്കിയാല്‍ അതിനുള്ള സാധ്യതയും മങ്ങിയാണ് നില്‍ക്കുന്നത്.

പനീര്‍ശെല്‍വം തിരഞ്ഞെടുക്കാന്‍ സാധ്യതയുള്ള അവസാന വഴിയായിരിക്കും ബി.ജെ.പി.യില്‍ ചേരുക എന്നത്. എന്നാല്‍ 2024-ലെ തിരഞ്ഞെടുപ്പില്‍ എ.ഐ.എ.ഡി.എം.കെയുമായി സഖ്യത്തിലാകാന്‍ ശ്രമിക്കുന്ന ബി.ജെ.പി. പനീര്‍ശെല്‍വത്തിനെ എത്രത്തോളം സ്വാഗതം ചെയ്യുന്നുവെന്നത് കണ്ടറിയണം. എന്തായാലും ഇ.പി.എസ്. വിരിച്ച വലയില്‍ കുടുങ്ങിയ പനീര്‍ശെല്‍വത്തിന് രാഷ്ട്രീയത്തില്‍ മുന്നോട്ടുള്ളത് കഠിനമായ പാതയിലാണ്. ആര് വന്നാലും പോയാലും പാര്‍ട്ടിയില്‍ തന്റെ സ്ഥാനം പ്രതിഷ്ഠിച്ചു നിര്‍ത്താനുള്ള വഴികള്‍ എടപ്പാടിയും നോക്കും.