ഉത്തരേന്ത്യയിൽ മിന്നലേറ്റ് 68 മരണം; 11 പേർ മരിച്ചത് സെൽഫിയെടുക്കുന്നതിനിടെ

ന്യൂഡൽഹി: ഉത്തരേന്ത്യയിലെ വിവിധ സംസ്ഥാനങ്ങളിൽ ഇടിമിന്നലേറ്റ് മരിച്ചത് 68 പേര്‍. യുപിയിൽ മാത്രം 41 പേരാണ് മിന്നലേറ്റു മരിച്ചത്. രാജസ്ഥാനിൽ 20 പേര്‍ മിന്നലേറ്റു മരിച്ചതായും ദേശീയ മാധ്യമങ്ങള്‍ റിപ്പോര്‍ട്ട് ചെയ്തു.



രാജസ്ഥാനിൽ കനത്ത മഴയ്ക്കിടയിലും ജയ്പൂര്‍ അമേര്‍ കൊട്ടാരത്തിലെ വാച്ച് ടവറിൽ സെൽഫിയെടുക്കാൻ കയറിയ 11 പേരാണ് ദുരന്തത്തിനിടയായതെന്ന് പോലീസ് അറിയിച്ചു. പതിനൊന്നോളം പേര്‍ക്ക് പരിക്കേൽക്കുകയും ചെയ്തതായി പോലീസ് കമ്മീഷണര്‍ ആനന്ദ് ശ്രീവാസ്തവ അറിയിച്ചു.

ഞായറാഴ്ച രാജസ്ഥാനിൽ മാത്രം 20 പൈരാണ് മിന്നലേറ്റു മരിച്ചതെന്നും ഇതിൽ ഏഴു പേര്‍ കോട്ട, ധോൽപൂര്‍ ജില്ലകളിൽ നിന്നുള്ള കുട്ടികളാണെന്നും ഇന്ത്യ ടുഡേ റിപ്പോര്‍ട്ട് ചെയ്തു. മധ്യപ്രദേശിലും ഏഴു പേര്‍ മരിച്ചു. സംസ്ഥാനത്ത് 10 പേര്‍ക്ക് പരിക്കേൽക്കുകയും ചെയ്തിട്ടുണ്ട്.

Also Read: രാജ്യത്ത് 37,154 പുതിയ കൊവിഡ് ബാധിതർ കൂടി; കേരളത്തിൽ റിപ്പോർട്ട് ചെയ്തത് 12,220 കേസുകൾ, ആശങ്ക

പ്രാഥമിക വിവരങ്ങള്‍ അനുസരിച്ച് യുപിയിൽ മൊത്തം മരിച്ചത് 41 പേരാണ്. പ്രയാഗ്‍രാജ് അടക്കമുള്ള മേഖലകളിൽ കഴിഞ്ഞ മണിക്കൂറുകളിൽ കനത്ത മഴയാണ് പെയയുന്നത്. കാൺപൂര്‍ ദേഹത്, ഫത്തേപൂര്‍ മേഖലകളിൽ നാലു പേര്‍ വീതവും ഫിറോസാബാദിൽ മുന്നു പേരും മരിച്ചു. കൗശംബിയിൽ നാലു മരണങ്ങള്‍ റിപ്പോര്‍ട്ട് ചെയ്തു. കാൺപൂര്‍ നഗറിൽ രണ്ട് പേരും പ്രതാപ്ഗഡ്, ഹര്‍ദോള്‍, മിര്‍സാപൂര്‍ എന്നിവിടങ്ങളിൽ ഓരോരുത്തരുമാണ് മരിച്ചത്. അപകടത്തിൽപ്പെട്ടവര്‍ക്ക് അടിയന്തരമായി സഹായം ലഭ്യമാക്കണമെന്ന് യുപി മുഖ്യമന്ത്രി യോഗി ആദിത്യനാഥ് നിര്‍ദേശിച്ചു.

Also Read: ‘എന്നെ മത്സരിപ്പിച്ചില്ലെങ്കിൽ ആലപ്പുഴയിൽ ഒരിടത്തും സിപിഎം വിജയിക്കില്ല’: ഫണ്ട് തിരിമറിയടക്കം സുധാകരനെ വെട്ടിലാക്കി കൂടുതൽ ആരോപണങ്ങൾ

രാജസ്ഥാനിൽ ഇടിമിന്നലേറ്റു മരിച്ചുള്ള മരണങ്ങളിൽ പ്രധാനമന്ത്രി നരേന്ദ്ര മോദിയും ദുഖം രേഖപ്പെടുത്തിയിട്ടുണ്ട്. സംഭവം ദുഖകരമാണെന്നും മരിച്ചവരുടെ കുടുംബങ്ങളുടെ ദുഃഖത്തിൽ പങ്കുചേരുന്നുവെന്നും പ്രധാനമന്ത്രി പറഞ്ഞു. മരിച്ചവരുടെ കുടുംബങ്ങള്‍ക്ക് രാജസ്ഥാൻ സര്‍ക്കാര്‍ അഞ്ച് ലക്ഷം രൂപ വീതം നഷ്ടപരിഹാരം പ്രഖ്യാപിച്ചിട്ടുണ്ട്. ഇതിൽ നാലു ലക്ഷം രൂപ അടിയന്തര സഹായ ഫണ്ടിൽ നിന്നും ഒരു ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയിൽ നിന്നുമാണ് കണ്ടെത്തുക.