കുവൈറ്റില്‍ സ്വദേശിവല്‍ക്കരണവും ഫലം കണ്ടില്ല; തൊഴില്‍ മേഖലയില്‍ സ്വദേശികളുടെ നിരക്ക് കുറഞ്ഞു

2022ല്‍ കുവൈറ്റ് പൗരന്‍മാരായ ജീവനക്കാരുടെ എണ്ണം 12,000 വര്‍ദ്ധിച്ച് 481,000 ആയെങ്കിലും, രാജ്യത്തെ മൊത്തം തൊഴിലാളികളുടെ എണ്ണത്തില്‍ കുവൈറ്റ് തൊഴിലാളികളുടെ ശതമാനം കുറഞ്ഞതായാണ് കണക്കുകള്‍ വ്യക്തമാക്കുന്നത്. 2021ല്‍ സ്വദേശി ജീവനക്കാരുടെ തൊഴില്‍ മേഖലയിലെ നിരക്ക് 18 ശതമാനം ആയിരുന്നത് 2022 ഡിസംബറോടെ 16.8 ശതമാനമായി കുറയുകയാണുണ്ടായത്. മൊത്തം തൊഴില്‍ വിപണിയിലെ കുവൈറ്റ് തൊഴിലാളികളില്‍ 79 ശതമാനവും അതായത് ഏകദേശം 381,000 പൗരന്മാരും പൊതുമേഖലാ സ്ഥാപനങ്ങളിലാണ് ജോലി ചെയ്യുന്നത്.

Also Read: ഹജ്ജ്, ഉംറ കേസുകള്‍ വേഗത്തില്‍ തീര്‍പ്പാക്കാന്‍ മക്കയില്‍ പ്രത്യേക കോടതി പ്രവര്‍ത്തനം തുടങ്ങി

2022 അവസാനത്തോടെ കുവൈറ്റിലെ തൊഴില്‍ വിപണിയിലെ മൊത്തം തൊഴിലാളികളുടെ എണ്ണം 2.86 ദശലക്ഷമാണെന്ന് കണക്കുകള്‍ കാണിക്കുന്നു. ഇത് മൊത്തം ജനസംഖ്യയുടെ 60 ശതമാനമാണ്. ഇതില്‍ 32 ശതമാനമാണ് കുവൈറ്റ് പൗരന്‍മാര്‍. 2022 അവസാനത്തോടെ തൊഴിലില്ലാത്ത കുവൈറ്റ് പൗരന്‍മാരുടെ എണ്ണം 26,000 ആയി ഉയര്‍ന്നതായും കണക്കുകള്‍ വ്യക്തമാക്കുന്നു. 2021 അവസാനത്തോടെ ഇത് 25,400 ആയിരുന്നു.

2022 അവസാനത്തോടെ കുവൈറ്റിലെ മൊത്തം ജനസംഖ്യ 4.74 ദശലക്ഷത്തിലെത്തിയതായും പബ്ലിക് അതോറിറ്റി ഫോര്‍ സിവില്‍ ഇന്‍ഫര്‍മേഷന്‍ പുറത്തുവിട്ട കണക്കുകള്‍ വെളിപ്പെടുത്തി. മുന്‍വര്‍ഷത്തെ അപേക്ഷിച്ച് 8 ശതമാനം വളര്‍ച്ചയാണ് ജനസംഖ്യയില്‍ ഉണ്ടായത്. അതേസമയം, കുവൈറ്റ് പൗരന്‍മാരുടെ ജനസംഖ്യ 1.9 ശതമാനം വര്‍ധിച്ച് 1.51 ദശലക്ഷത്തിലെത്തി. സ്വദേശി ജനസംഖ്യ 29,000 കണ്ടാണ് വര്‍ധിച്ചത്. അതേസമയം, കുവൈറ്റ് ഇതര ജനസംഖ്യ 11 ശതമാനം വര്‍ദ്ധിച്ച് 3.22 ദശലക്ഷത്തിലെത്തി. അതനുസരിച്ച്, മൊത്തം ജനസംഖ്യയിലെ കുവൈറ്റ് പൗരന്‍മാരുടെ ശതമാനം 2021 ല്‍ 33.9 ശതമാനം ആയിരുന്നത് കഴിഞ്ഞ വര്‍ഷം 32 ശതമാനമായി കുറഞ്ഞു. ജനസംഖ്യയില്‍ കുവൈറ്റ് സ്ത്രീകളുടെ എണ്ണം പുരുഷന്മാരേക്കാള്‍ കൂടുതലാണെന്നും കണക്കുകള്‍ പറയുന്നു; 773,000 സ്ത്രീകളും 744,000 പുരുഷന്മാരും.

Read Latest Gulf News and Malayalam News