കോഴി മൃഗമാണെന്ന് വാദിച്ച് ജയിച്ചാലുള്ള സാമ്പത്തികനേട്ടം എന്ത്?
കോഴി മൃഗമാണെന്ന് ഗുജറാത്ത് ഹൈക്കോടതി വിധിച്ചാല്‍ എന്താണ് സംഭവിക്കുക? ഇതുകൊണ്ട് എന്ത് പ്രശ്‌നമാണുള്ളത്? കോഴിയിറച്ചി വാങ്ങാന്‍ കോഴിയിറച്ചിക്കടകളിലേക്ക് പോകുന്നവരെ സംബന്ധിച്ച് ഇതുകൊണ്ടുണ്ടാകാന്‍ പോകുന്ന മാറ്റത്തെക്കുറിച്ച് അറിവുണ്ടാകണം എന്നില്ല. എന്നാല്‍ ഇത് ബാധിക്കാന്‍ പോകുന്നത് സാധാരണക്കാരായ ഇന്ത്യന്‍ ഗ്രാമീണരെയാണ്. കോടിക്കണക്കിന് വരുന്ന ഇന്ത്യന്‍ ഗ്രാമീണര്‍ വീടുകളില്‍ കോഴികളെ വളര്‍ത്തുന്നവരും കോഴിയെ വീടുകളില്‍ വെച്ച് തന്നെ കൊല്ലുന്നവരുമാണ്. അവരെയാണ് ഇത് ബാധിക്കുക. അനൗപചാരികമായ ഒരു സമ്പദ്ഘടനയുടെ ഭാഗമാണിത്. ഒരാൾ കോഴിയെ വളർത്തുന്നതും അവയുടെ മുട്ട കഴിക്കുന്നതും, ഇറച്ചിയാക്കിക്കഴിക്കുന്നതുമൊന്നും സർക്കാർ അറിയുന്നില്ല. നമ്മൾ വീട്ടിലെ അടുക്കളയിൽ വളർത്തുന്ന ചീര പോലെയാണത് നിലവിൽ. ഈ അടുക്കളക്കൃഷിയെ നികുതി വ്യവസ്ഥയിലേക്ക് കൊണ്ടുവന്നാലോ? രാജ്യത്ത് അനൗപചാരികമായ വ്യവസ്ഥകളൊന്നും വേണ്ട എന്നതാണ് കേന്ദ്രത്തിന്റെ നയമെന്നു പറഞ്ഞാൽ അതിശയോക്തിയില്ല.
നിലവില്‍ വീടുകളില്‍ വെച്ച് നടക്കുന്ന അറവുകള്‍ ഔദ്യോഗിക മേഖലയുടെ ഭാഗമല്ല. എന്നാല്‍ ആ അറവുകൾ ബിസിനസ് സ്ഥാപനങ്ങളിലേക്ക് മാറുന്നതോടെ അവയുടെ രൂപം മാറും. അവയും രാജ്യത്തെ നികുതി വ്യവസ്ഥയ്ക്ക് കീഴിലേക്ക് വരും. ഗുജറാത്ത് സര്‍ക്കാര്‍ വിചിത്രമെന്ന് തോന്നുന്ന ഈ വാദവുമായി കോടതിയെ സമീപിച്ചിരിക്കുന്നതിന്റെ ലക്ഷ്യം ഇപ്പോൾ മനസ്സിലായിക്കാണുമല്ലോ?
എന്താണ് അനൗപചാരിക സമ്പദ്‌വ്യവസ്ഥ?
പണം സമ്പാദിക്കുമ്പോഴും നികുതി നല്‍കാത്തതും ആളുകള്‍ക്ക് ജോലി നല്‍കുന്നതും എന്നാല്‍ തൊഴില്‍ നിയമങ്ങള്‍ പാലിക്കാത്തതും, ബിസിനസ്സ് നടത്തുന്നതിന് ലൈസന്‍സ് ആവശ്യമില്ലാത്തതുമായ എല്ലാ സംരംഭങ്ങളും അനൗപചാരിക സമ്പദ്‌വ്യവസ്ഥയുടെ ഭാഗമാണ്. എന്നാല്‍ ഈ മേഖലയെ ഔപചാരികമാക്കി മാറ്റാനുള്ള ശ്രമങ്ങളാണ് രാജ്യത്ത് നടക്കുന്നത്. ഔപചാരിക മേഖലയില്‍ പ്രവര്‍ത്തിക്കുന്നവര്‍ക്ക് നികുതി അടക്കേണ്ടതായുണ്ട്. എന്നാല്‍ അനൗപചാരിക മേഖലയില്‍ തൊഴില്‍ എടുക്കുന്നവരെ സംബന്ധിച്ച് ആദായ നികുതി അടക്കേണ്ട ആവശ്യം വരുന്നില്ല. എന്നാല്‍ ഇവയെക്കൂടി ഔപചാരിക മേഖലയിലേക്ക് മാറ്റുന്നതോടെ നികുതിയിനത്തില്‍ സര്‍ക്കാരിന് വരുമാനം ലഭിക്കും.
ഇന്ത്യയിലെ തൊഴിലാളികളുടെ 93 ശതമാനവും അനൗപചാരിക സമ്പദ് വ്യവസ്ഥയുടെ ഭാഗമാണ് (NSSO 2014). എന്നാല്‍ അനൗപചാരിക മേഖലയില്‍ തൊഴിലെടുക്കുന്നവരുടെ എണ്ണം വര്‍ധിക്കുന്നത് ആദായ നികുതിയിനത്തില്‍ സര്‍ക്കാരിന് ലഭിക്കേണ്ട തുകയില്‍ വലിയ ഇടിവാണുണ്ടാക്കുക. ഉയര്‍ന്ന തലത്തിലുള്ള ഔപചാരികവല്‍ക്കരണത്തിലൂടെ നികുതി, ജിഡിപി അനുപാതം ഗണ്യമായി വര്‍ധിക്കും. അനൗപചാരിക സമ്പദ് വ്യവസ്ഥയെ ഔപചാരികമാക്കുന്നതിന്റെ ഉദ്ദേശ്യം സര്‍ക്കാരിന്റെ വരുമാനം വര്‍ദ്ധിപ്പിക്കുക എന്നത് തന്നെയാണ്.
ഗവണ്‍മെന്റിന്റെ ഔപചാരികവല്‍ക്കരണ ശ്രമങ്ങള്‍ ഒരുപരിധി വരെ വിജയിച്ചുവെന്ന് പറയാം. ധനകാര്യം, ഇന്‍ഷുറന്‍സ്, റിയല്‍ എസ്‌റ്റേറ്റ് (ഒരുപരിധിവരെ) എന്നിവയില്‍ ഏതാണ്ട് 100 ശതമാനം ഔപചാരികവല്‍ക്കരണം സാധ്യമായിട്ടുണ്ട്. കൃഷിയുടെ 20-25 ശതമാനം ഔപചാരികമാക്കപ്പെട്ടു. ഇത് സൂചിപ്പിക്കുന്നത് കാര്‍ഷിക മേഖലയിലെ അനൗപചാരിക വിഹിതം 75 ശതമാനം ആണെന്നാണ്.
അനൗപചാരിക സമ്പദ് വ്യവസ്ഥയെ ഔപചാരികമാക്കാനുള്ള ശ്രമങ്ങള്‍
ജിഎസ്ടി, സമ്പൂര്‍ണ ഡിജിറ്റലൈസേഷനുള്ള ശ്രമം, നോട്ട് നിരോധനം എന്നിവ ഇന്ത്യയുടെ അനൗപചാരിക സമ്പദ് വ്യവസ്ഥയെ പ്രതികൂലമായി ബാധിച്ചിട്ടുണ്ട്. മറ്റൊരു അര്‍ത്ഥത്തില്‍ പറഞ്ഞാല്‍ അനൗപചാരിക സമ്പദ് വ്യവസ്ഥയെ ഔപചാരികമാക്കി മാറ്റാന്‍ കുറെയേറെയെങ്കിലും ഈ മൂന്ന് വര്‍ഷം കൊണ്ട് മോദി ഗവണ്‍മെന്റിന് സാധിച്ചു. ഇന്ത്യയുടെ അനൗപചാരിക സമ്പദ് വ്യവസ്ഥ 52 ശതമാനത്തില്‍ നിന്ന് 15-20 ശതമാനമായി ചുരുങ്ങി. 2021 ഓഗസ്റ്റ് വരെ ഏകദേശം 36.6 ലക്ഷം ജോലികള്‍ ഔപചാരികമാക്കിയതായി എസ്ബിഐ റിപ്പോര്‍ട്ട് ചെയ്യുന്നുണ്ട്.
കോഴി പക്ഷിയാണോ മൃഗമാണോ എന്ന ഗുജറാത്ത് ഹൈക്കോടതിയുടെ ചോദ്യത്തിന് ഗുജറാത്ത് സര്‍ക്കാര്‍ നല്‍കുന്ന ഉത്തരം മൃഗം എന്നാകുന്നതിന്റെ ഉത്തരം ഇത്രയേയുള്ളു, സര്‍ക്കാര്‍ ഖജനാവിലേക്ക് പണമെത്താന്‍ കോഴി മൃഗമാകേണ്ടതായുണ്ട്.
