യാത്രയ്ക്കിടെ വിമാനത്തിന്‍റെ ഡോർ തുറക്കാൻ ശ്രമം, ക്രൂ അംഗങ്ങളെ ഉപദ്രവിച്ചു; യാത്രക്കാരിയെ സീറ്റിൽ കെട്ടിയിട്ടു

വാഷിങ്ടണ്‍: വിമാന യാത്രയ്ക്കിടെ പ്രശ്നങ്ങൾ സൃഷ്ടിച്ചാൽ നിയമനടപടികൾ നേരിടേണ്ടി വരുമെന്ന കാര്യത്തിൽ ആർക്കും സംശയമുണ്ടാകില്ല. സാധാരണഗതിയിൽ വിമാനയാത്ര പൂർത്തിയായ ശേഷം മാത്രമാണ് ഇത്തരം നിയമനടപടികളും ശിക്ഷകളും നേരിടേണ്ടി വരിക. എന്നാൽ അമേരിക്കയിലെ ഒരു യാത്രക്കാരി വിമാനത്തിനുള്ളിൽ പ്രശ്നമുണ്ടാക്കിയപ്പോൾ ജീവനക്കാരിൽ നിന്നാണ് ‘ശിക്ഷ’ ഏറ്റുവാങ്ങേണ്ടി വന്നത്. വിമാനത്തിനുള്ളിൽ ബഹളം ഉണ്ടാക്കിയതിന് യാത്രക്കാരിയെ ജീവനക്കാർ സീറ്റിൽ കെട്ടിയിടുകയാണ് ചെയ്തത്.



ടെക്‌സാസില്‍ നിന്ന് നോര്‍ത്ത് കരോലിനയിലേക്ക് പറക്കുകയായിരുന്ന അമേരിക്കൻ എയർലൈൻസ് വിമാനത്തിലാണ് നാടകീയ സംഭവങ്ങൾ അരങ്ങേറിയത്. യാത്രയ്ക്കിടെ വിമാനത്തിന്‍റെ ഡോർ തുറക്കാൻ ശ്രമിച്ച യുവതിയെ ക്രൂ അംഗങ്ങൾ ചേർന്ന് കെട്ടിയിടുകയായിരുന്നു. സംഭവത്തിന്‍റെ ദൃശ്യങ്ങൾ സോഷ്യൽ മീഡിയയിൽ വ്യാപകമായി പ്രചരിക്കുകയാണ് ഇപ്പോൾ.

ഭൂമിയെ ലക്ഷ്യമാക്കി ഇന്ന് സൗരക്കാറ്റ് വരുന്നു; ജിപിഎസ്, മൊബൈൽ സിഗ്നലുകൾ താറുമാറാകും

മൂന്ന് മണിക്കൂറോളം വൈകിയായിരുന്നു വിമാനം യാത്ര ആരംഭിച്ചത്. യുവതി ഇതിൽ അസ്വസ്ഥതയിലായിരുന്നെന്നാണ് റിപ്പോർട്ടുകൾ. വിമാനം പറന്ന് ഉയർന്ന് അൽപ്പ സമയം കഴിഞ്ഞയുടനെയാണ് നാടകീയ സംഭവങ്ങൾ ആരംഭിച്ചത്. സീറ്റിൽ നിന്നെഴുന്നേറ്റ ഇവർ വാതിൽ ബലമായി തുറക്കാൻ ശ്രമിക്കുകയായിരുന്നു. ക്രൂ അംഗങ്ങളെത്തി ഇവരെ പിന്തരിപ്പിക്കാൻ ശ്രമിച്ചതോടെ യുവതി ഇവർക്ക് നേരെ തിരിയുകയും ചെയ്തു.

വാതിൽ തുറക്കുന്നത് പിന്തിരിപ്പിക്കാൻ ശ്രമിച്ച ജീവനക്കാരെ യാത്രക്കാരി കടിക്കുകയും മാന്തുകയും ചെയ്യുകയായിരുന്നെന്നാണ് ഇംഗ്ലീഷ് വാർത്താ ചാനലായ ടൈംസ് നൗ റിപ്പോർട്ട് ചെയ്യുന്നത്. വിമാനത്തിൽ നിന്ന് ഇറങ്ങണമെന്ന് വിളിച്ച് കൂവിയായിരുന്നു ഇവർ ക്രൂ അംഗങ്ങൾക്ക് നേരെ തിരിഞ്ഞത്.

അഭിമാനമായി സിരിഷ; കാഴ്ചകൾ കണ്ട് അവർ മടങ്ങിയെത്തി, വെർജിൻ ഗലാക്റ്റിക്കിന്റെ ബഹിരാകാശ യാത്ര വിജയം

കാര്യങ്ങൾ കൈവിട്ട് പോകുമെന്ന് വ്യക്തമായതോടെയാണ് ജീവനക്കാർ യാത്രക്കാരിയെ സീറ്റിൽ കെട്ടിയിടാൻ തീരുമാനിച്ചത്. ഇവരെ സീറ്റിലേക്ക് ബലമായി പിടിച്ചിരുത്തിയ ക്രൂ അംഗങ്ങൾ ടേപ്പ് ഉപയോഗിച്ചാണ് കെട്ടിയിട്ടത്. ഇതിന് ശേഷവും ഇവർ ബഹളമുണ്ടാക്കുന്നത് തുടർന്നെന്നാണ് റിപ്പോർട്ട്. ഇവർക്കൊപ്പം വിമാനത്തിലുണ്ടായിരുന്ന മറ്റൊരു യാത്രക്കാരനാണ് ദൃശ്യങ്ങൾ പകർത്തിയതും ടിക് ടോക്കിൽ ഷെയർ ചെയ്തതും.

അതേസമയം ക്രൂ അംഗങ്ങൾ യാത്രക്കാരിയോട് പെരുമാറിയ രീതി ശരിയായില്ലെന്നാണ് സഹയാത്രികർ പറയുന്നത്. ആകെ ഭയന്നിരിക്കുന്ന അവസ്ഥയിലാണ് അവരെ കാണപ്പെട്ടതെന്നും ഇവർ ചൂണ്ടിക്കാട്ടുന്നു.