ഹിന്ദു യുവാവ് ഹിന്ദു യുവതിയെ വശീകരിച്ചാലും ലൗ ജിഹാദ് തന്നെ: വ്യാഖ്യാനവുമായി അസം മുഖ്യമന്ത്രി

ഗുവാഹത്തി: കേരളത്തിൽ ഉള്‍പ്പെടെ സംഘപരിവാര്‍ സംഘടനകളും കത്തോലിക്കാ സഭയും ‘ലൗ ജിഹാദ്’ ആരോപണങ്ങള്‍ ശക്തിപ്പെടുത്തുന്നതിനിടെ പുതിയ വ്യാഖ്യാനവുമായി അസം മുഖ്യമന്ത്രി. മുസ്ലീം ഹിന്ദുവിനെ ചതിക്കുന്നതു മാത്രമല്ല ലൗ ജിഹാദെന്ന് മുഖ്യമന്ത്രി പറഞ്ഞു. സംശയാസ്പദമായ മാര്‍ഗങ്ങളിലൂടെ ഒരു ഹിന്ദു യുവാവ് ഹിന്ദു യുവതിയെ വശീകരിച്ച് വിവാഹം ചെയ്താലും അതും ലൗ ജിഹാദിൻ്റെ ഒരു രൂപം തന്നെയാമെന്ന് ബിജെപി നേതാവ് കൂടിയായ ഹിമാന്ത വിശ്വ ശര്‍മ പറഞ്ഞു.



അസം സംസ്ഥാന സര്‍ക്കാര്‍ രണ്ട് മാസം പിന്നിടുന്ന സാഹചര്യത്തിൽ മാതാപിതാക്കളെ കണ്ടപ്പോഴായിരുന്നു അസം മുഖ്യമന്ത്രിയുടെ വാക്കുകള്‍. വിവാഹത്തിനു മുൻപ് വരനും വധുവും തങ്ങളുടെ മതവും വരുമാനമാര്‍ഗങ്ങളും ഔദ്യഗികമായി വെളിപ്പെടുത്തണമെന്ന നിയമം കൊണ്ടുവരുമെന്ന് അസം മുഖ്യമന്ത്രി പറഞ്ഞു. ഇത് എല്ലാ സമുദായങ്ങള്‍ക്കും ബാധകമായിരിക്കുമെന്നും ലൗ ജിഹാദിൻ്റെ പ്രശ്നങ്ങള്‍ അവസാനിപ്പിക്കാനാണ് പുതിയ നിയമ നിര്‍മാണമെന്നും അദ്ദേഹം വിശദീകരിച്ചു.

Also Read: ശക്തമായ മഴ തുടരും; ഇന്ന് 11 ജില്ലകളിൽ യെല്ലോ അലേർട്ട്; ഇടുക്കിയിൽ ഓറഞ്ച് അലേർട്ട്

മുസ്ലീം യുവാക്കള്‍ ഹിന്ദു യുവതികളെ വശീകരിച്ച് വിവാഹം ചെയ്യുകുയും ഇത്തരത്തിൽ മതം മാറ്റാനായി ലൗ ജിഹാദ് എന്ന പേരിൽ ആസൂത്രിത ശ്രമം നടക്കുന്നുണ്ടെന്നുമാണ് തീവ്രഹിന്ദു സംഘടനകളുടെ ആരോപണം. എന്നാൽ രാജ്യത്തെ കോടതികളോ അന്വേഷണ ഏജൻസികളോ ഇത്തരത്തിലുള്ള ശ്രമം നടക്കുന്നതായി കണ്ടെത്തിയിട്ടില്ല. ഇത്തരത്തിലുള്ള പ്രചാരണം വ്യക്തിസ്വാതന്ത്ര്യത്തിനെതിരെയുള്ള കടന്നുകയറ്റമാണെന്നും മുസ്ലീം വിഭാഗത്തെ ലക്ഷ്യമിട്ടുള്ള പ്രചാരണമാണ് നടക്കുന്നതെന്നും പല ആക്ടിവിസ്റ്റുകളും നിയമവിദഗ്ധരും ചൂണ്ടിക്കാണിക്കുന്നുണ്ട്. ഇതിനിടയിലാണ് അസം മുഖ്യമന്ത്രിയുടെ പ്രസ്താവന.

Also Read: ബിജെപി നേതാക്കൾ ട്രോളിയത് സുരേന്ദ്രനെ? നെയ്മറിൻ്റെ കീറിയ നിക്കർ ചൂണ്ടിക്കാട്ടി വചസ്പതിയും ശിവശങ്കറും

ലൗ ജിഹാദ് എന്ന പ്രയോഗം ഉപയോഗിക്കാൻ തനിക്ക് താത്പര്യമില്ലെന്ന് ഹിമാന്ത ബിശ്വ ശര്‍മ വ്യക്തമാക്കി. എന്നാൽ തെറ്റായ മാര്‍ഗങ്ങളിലൂടെയോ വഞ്ചനയിലൂടെയോ ഹിന്ദുക്കളും വിവാഹം ചെയ്യാൻ പാടില്ലെന്നും അദ്ദേഹം വ്യക്തമാക്കി. ഇത്തരത്തിലുള്ള തട്ടിപ്പുകള്‍ക്കെതിരെ സര്‍ക്കാര്‍ നടപടിയെടുക്കുമെന്നും നിയമം മുസ്ലീങ്ങള്‍ക്കെതിരെ ആയിരിക്കില്ല. ഇത്തരത്തിൽ ഒരു പെൺകുട്ടിയോ സ്ത്രീയോ ദുരുപയോഗിക്കപ്പെടാൻ പാടില്ലെന്നും അദ്ദേഹം വ്യക്തമാക്കി.