കൊങ്കുനാട്: ഡിഎംകെ പേടിക്കുന്നത് എന്തിനെന്ന് ബിജെപി; തമിഴ്നാട് വിഭജനത്തിനെതിരെ കോൺഗ്രസും

ചെന്നൈ: തമിഴ്നാടിനെ രണ്ടായി വിഭജിക്കണമെന്ന് ആവശ്യപ്പെട്ടുന്ന പ്രചാരണത്തിനെതിരെ ഡിഎംകെയ്ക്ക് പിന്നാലെ കോൺഗ്രസും രംഗത്ത്. വടക്കുപടിഞ്ഞാറൻ തമിഴ്നാട് കേന്ദ്രീകരിച്ച് കൊങ്കു നാട് എന്ന പേരിൽ പുതിയ കേന്ദ്രഭരണ പ്രദേശം രൂപീകരിക്കുന്നതിൽ എന്തിനാണ് ഡിഎംകെ പേടിക്കുന്നതെന്ന് ബിജെപി ഉപാധ്യക്ഷൻ എൻ നാഗേന്ദ്രൻ ചോദിച്ചു. അതേസമയം, സംസ്ഥാന വിഭജന നീക്കങ്ങള്‍ക്കെതിരെ കൂടുതൽ പാര്‍ട്ടികള്‍ രംഗത്തെത്തി.



വടക്കൻ കേരളത്തോട് അതിര്‍ത്തി പങ്കിടുന്ന തമിഴ്നാടിൻ്റെ ഭാഗങ്ങള്‍ കേന്ദ്രീകരിച്ച് പുതിയ കേന്ദ്രഭരണ പ്രദേശം രൂപീകരിക്കാനുള്ള നീക്കം നടക്കുകയാണെന്നാണ് അഭ്യൂഹങ്ങള്‍. എന്നാൽ ഈ നീക്കത്തെ എന്തിനാണ് ഡിഎംകെ ഭയപ്പെടുന്നതെന്നാണ് ബിജെപി തമിഴ്നാട് ഉപാധ്യക്ഷൻ എൻ നാഗേന്ദ്രൻ്റെ ചോദ്യം. മേഖലയിൽ മാറ്റം വേണമെന്നത് ജനങ്ങളുടെ ആഗ്രഹമാണെന്നും ഇത് നടക്കണമെന്നാണ് ബിജെപിയുടെ നിലപാടെന്നും അദ്ദേഹം വ്യക്തമാക്കി. എന്നാൽ സമൂഹമാധ്യമങ്ങള്‍ വഴി വിഷയത്തിൽ അനാവശ്യ പ്രതികരണങ്ങള്‍ നടത്തരുതെന്ന് ബിജെപി സംസ്ഥാന വക്താവ് എഎൻഎസ് പ്രസാദും വ്യക്തമാക്കിയിട്ടുണ്ട്.

Also Read: ശക്തമായ മഴ തുടരും; ഇന്ന് 11 ജില്ലകളിൽ യെല്ലോ അലേർട്ട്; ഇടുക്കിയിൽ ഓറഞ്ച് അലേർട്ട്

മുൻപും ചില പ്രാദേശിക സംഘടനകള്‍ തമിഴ്നാട് വിഭജനമെന്ന ആവശ്യവുമായി രംഗത്തെത്തിയിരുന്നെങ്കിലും പ്രചാരണത്തിന് അധികം വേരോട്ടമുണ്ടായിരുന്നില്ല. വികസിത സംസ്ഥാനമെന്ന നിലയിൽ തമിഴ്നാട് വിഭജിക്കേണ്ട ആവശ്യമില്ലെന്നായിരുന്നു കഴിഞ്ഞ വര്‍ഷം ബിജെപിയുടെ പ്രതികരണം. എന്നാൽ നിലവിലെ സാഹചര്യത്തിൽ പാര്‍ട്ടിയ്ക്കുള്ളിൽ തന്നെ രണ്ട് അഭിപ്രായങ്ങളുണ്ടെന്നാണ് റിപ്പോര്‍ട്ടുകള്‍. രാഷ്ട്രീയ ലക്ഷ്യം മുൻനിര്‍ത്തി സംസ്ഥാനം വിഭജിക്കാനാണ് ബിജെപി ശ്രമിക്കുന്നതെന്നാണ് പ്രതിപക്ഷ സംഘടനകളുടെ ആരോപണം.

തമിഴ്നാട് വിഭജിക്കാൻ ആരെക്കൊണ്ടും സാധിക്കില്ലെന്നും ഇക്കാര്യം ആരും ആവശ്യപ്പെട്ടിട്ടില്ലെന്നും ഡിഎംകെ നേതാവ് കനിമൊഴി പറഞ്ഞു. തമിഴ്നാട് വിഭജിക്കുന്ന കാര്യം ആരും സ്വപ്നം കണ്ടിട്ടു കൂടിയില്ലന്ന് കനിമൊഴി പറഞ്ഞു. തമിഴ്നാട് വിഭജിക്കാനുള്ള നീക്കം സംബന്ധിച്ച ഒരു തമിഴ് ദിനപത്രത്തിൻ്റെ റിപ്പോര്‍ട്ടിനോടു പ്രതികരിക്കുകയായിരുന്നു അവര്‍. അതേസമയം, ഇത്തരത്തിലുള്ള പ്രചാരണങ്ങള്‍ കേന്ദ്രസര്‍ക്കാരിൻ്റെ പരാജയം മറച്ചു വെക്കാനുള്ള തന്ത്രത്തിൻ്റെ ഭാഗമാണെന്നാണ് കോൺഗ്രസ് നേതാവ് കെഎസ് അഴഗിരിയുടെ പ്രതികരണം. ആസൂത്രിതമായ പദ്ധതിയാണെന്നും എന്നാൽ ബിജെപിയുടെ ഈ പദ്ധതി പാളിപ്പോയെന്നും അഴഗിരി പറഞ്ഞു.

Also Read: സംസ്ഥാനത്ത് ഇന്ന് 7798 പേർക്ക് കൊവിഡ് രോഗബാധ; സ്ഥിരീകരിച്ചത് 100 മരണങ്ങൾ

പ്രധാനമന്ത്രി നരേന്ദ്ര മോദി തന്നെ ബിജെപിയ്ക്കുള്ളിൽ നിന്ന് എതിര്‍പ്പ് നേരിടുന്ന സാഹചര്യത്തിലാണ് ഇത്തരം വിഭജനശ്രമങ്ങളെന്നും അഴഗിരി പറഞ്ഞു. ആന്ധ്രാ പ്രദേശിലേതു പോലെ സംസ്ഥാനം വിഭജിക്കണമെന്ന് തമിഴ്നാട്ടിൽ ആരും ആവശ്യപ്പെട്ടിട്ടില്ല. തെലങ്കാന പ്രദേശം വികസനത്തിൽ പിന്നിലായിരുന്നു. എന്നാൽ കൊങ്കുനാട് പ്രദേശം വികസിതമാണെന്നും ഇത്തരത്തിലുള്ള പ്രദേശം ആരെങ്കിലും വിഭജിക്കുമോ എന്നും അദ്ദേഹം ചോദിച്ചു.