തലമുറകള്‍ ജനിച്ചുജീവിച്ച മണ്ണുവിട്ട് കുടിയിറക്കപ്പെട്ട ഒരുകൂട്ടമാളുകള്‍. യൂക്കാലിപ്‌റ്റസ് മരങ്ങള്‍ വച്ചുപിടിപ്പിക്കാന്‍ സര്‍ക്കാരിന് വിട്ടുകൊടുക്കേണ്ടി വന്ന ഭൂമി തിരികെ ആവശ്യപ്പെട്ട് അവര്‍ സമരം തുടങ്ങി. സമരം അടിച്ചമര്‍ത്താന്‍ പോലീസ് നടത്തിയത് നരനായാട്ടായിരുന്നു. ആദിവാസി വിഭാഗങ്ങള്‍ക്ക് നേരെയുണ്ടായിട്ടുള്ള അതിക്രമങ്ങളെ കുറിച്ച് പറയുമ്പോള്‍ 2003 ഫെബ്രുവരിയില്‍ വയനാട്ടിലെ മുത്തങ്ങയില്‍ നടന്ന സമരവും അന്നത്തെ ആന്റണി സർക്കാരിന്റെ ഭാഗത്തുനിന്നുണ്ടായ നടപടികളും ആരും മറക്കില്ല. കേരള മനസ്സാക്ഷി അത്തരത്തില്‍ ഒരിക്കല്‍ക്കൂടി കുറ്റവിചാരണ നേരിടേണ്ടി വന്നത് അട്ടപ്പാടിയിലെ മധു എന്ന യുവാവിന്റെ മുന്നിലായിരിന്നു. ഭക്ഷണവസ്തുക്കള്‍ മോഷ്ടിച്ചെന്നാരോപിച്ച് ആദിവാസി യുവാവിനെ ആള്‍ക്കൂട്ട വിചാരണ നടത്തി കൊലപ്പെടുത്തിയവര്‍ കുറ്റക്കാരാണെന്ന് കഴിഞ്ഞ ദിവസം കോടതി കണ്ടെത്തി. മധുവിന്റെ ആള്‍ക്കൂട്ട കൊലപാതകത്തിന് ശേഷം കേരളത്തില്‍ ‘ആദിവാസി വിചാരണ’യ്ക്ക് കുറവുണ്ടായിരുന്നില്ല.
കോഴിക്കോട് മെഡിക്കല്‍ കോളേജില്‍ മോഷണക്കുറ്റം ആരോപിച്ച് ഒരിക്കല്‍ കൂടി ഒരു ആദിവാസി യുവാവിന്റെ ജീവനെടുത്തു, പ്രബുദ്ധ കേരളം. കുറ്റാരോപണത്തിലും ആള്‍ക്കൂട്ട വിചാരണയിലും മാനസികമായി തകര്‍ന്ന വയനാട് മേപ്പാടി സ്വദേശി വിശ്വനാഥന്‍ ജീവന്‍ അവസാനിപ്പിക്കാന്‍ തീരുമാനിച്ചു. ന്യൂനപക്ഷങ്ങള്‍ക്ക് നേരെയുള്ള അതിക്രമങ്ങളുടെ കാര്യത്തില്‍ രാജ്യത്തെ ഒരു സംസ്ഥാനവും പിറകിലല്ല. മറ്റൊരു വിഭാഗമായത് കൊണ്ട്, മറ്റൊരു ഭാഷ സംസാരിക്കുന്നത് കൊണ്ട്, മറ്റൊരു സംസ്‌കാരം പിന്തുടരുന്നത് കൊണ്ട്, കാഴ്ചയില്‍ അപരിഷ്‌കൃതരെന്ന് മുദ്രക്കുത്തി, അവജ്ഞയോടെ, സംശയത്തിന്റെ നിഴലില്‍ നിര്‍ത്തപ്പെടുന്ന ഒരു സമൂഹം. ആദിവാസികളെന്നോ ഗോത്രങ്ങളെന്നോ പറഞ്ഞാല്‍ പൊതുസമൂഹം എന്നു പറയപ്പെടുന്ന ഇടത്തില്‍ നിന്ന് പുറത്തേക്കുള്ള വഴിയാണ് പലപ്പോഴും. പ്രത്യേക വംശമായതിന്റെ പേരില്‍ എന്തുകൊണ്ടായിരിക്കാം അവര്‍ ശാരീരികമായും മാനസികമായും ആക്രമിക്കപ്പെടുന്നത്? എന്തുകൊണ്ടായിരിക്കാം അവരെ സമൂഹത്തിന്റെ ഒരു മൂലയിലേക്ക് ഒതുക്കി നിര്‍ത്തുന്നത്?
കണക്കുകള്‍ പരിശോധിക്കുകയാണെങ്കില്‍ കുറച്ച് വര്‍ഷങ്ങളായി ആദിവാസി വിഭാഗങ്ങള്‍ക്ക് നേരെയുള്ള അതിക്രമങ്ങള്‍ വർദ്ധിച്ച വരുന്ന പ്രവണത കാണാം. 2014-ന് ശേഷം രാജ്യത്ത് പട്ടികജാതി വിഭാഗത്തിന് നേരെയുണ്ടായിട്ടുള്ള അതിക്രമങ്ങള്‍ വർദ്ധിച്ചതായി ദേശീയ ക്രൈം റെക്കോര്‍ഡ്‌സ് ബ്യൂറോയുടെ കണക്കുകള്‍ ചൂണ്ടിക്കാട്ടുന്നു. 2014-16 കാലത്തെ കണക്ക് നോക്കിയാല്‍ രാജ്യത്ത് പട്ടികജാതി വിഭാഗത്തിനെതിരേ ഏറ്റവുമധികം അതിക്രമങ്ങള്‍ റിപ്പോര്‍ട്ട് ചെയ്ത സംസ്ഥാനം മധ്യപ്രദേശാണെന്ന് കാണാം. 1823 കേസുകളാണ് രണ്ടു വര്‍ഷത്തിനിടയില്‍ മധ്യപ്രദേശില്‍ റിപ്പോര്‍ട്ട് ചെയ്തത്. തൊട്ടുപിന്നിലുള്ള രാജസ്ഥാനിൽ 1195 കേസുകളാണ് റിപ്പോര്‍ട്ട് ചെയ്തത്. കേരളത്തില്‍ 182 കേസുകളും അതേ വര്‍ഷങ്ങളില്‍ റിപ്പോര്‍ട്ടു ചെയ്തു. ദേശീയ ശരാശരി നോക്കിയാല്‍ 182 കേസുകളാണ് രണ്ടു വര്‍ഷത്തിനിടയില്‍ റിപ്പോര്‍ട്ട് ചെയ്തത്. നാഗാലാന്‍ഡ്, മിസോറാം, ജമ്മു കാശ്മീര്‍ തുടങ്ങി എട്ടു സംസ്ഥാനങ്ങളില്‍ പക്ഷേ, ഒരു കേസ് പോലും റിപ്പോര്‍ട്ട് ചെയ്യപ്പെട്ടില്ല.
അതേസമയം ആദിവാസികള്‍ക്ക് നേരെയുള്ള കുറ്റകൃത്യങ്ങളുടെ നിരക്ക് നോക്കിയാല്‍, അവ മുന്‍വര്‍ഷങ്ങളെ അപേക്ഷിച്ച് പല സംസ്ഥാനങ്ങളിലും വർദ്ധിച്ചതായി കാണാം. മുന്‍വര്‍ഷങ്ങളെ അപേക്ഷിച്ച് ആദിവാസികള്‍ക്ക് നേരെയുണ്ടായ കുറ്റകൃത്യങ്ങള്‍ വർദ്ധിച്ച സംസ്ഥാനങ്ങളില്‍ മുന്‍പന്തിയില്‍ കേരളമാണ് ഉണ്ടായിരുന്നത്. 37.5 ശതമാനമാണ് ആദിവാസികള്‍ക്ക് നേരെയുണ്ടായ കുറ്റകൃത്യങ്ങളിലെ വർദ്ധന. തൊട്ടുപിന്നിലുള്ള ആന്‍ഡമാന്‍ നിക്കോബാര്‍ ദ്വീപുകളുണ്ട്. അവിടെ 21 ശതമാനം വര്‍ദ്ധനയുണ്ടായി. ഉത്തര്‍പ്രദേശ്, ത്രിപുര, മണിപ്പൂര്‍ തുടങ്ങിയ സംസ്ഥാനങ്ങളില്‍ നേരിയ തോതിലുള്ള വർദ്ധനയുണ്ടായപ്പോള്‍ അസം, പഞ്ചാബ് തുടങ്ങി 11 സംസ്ഥാനങ്ങളില്‍ ഒരു കേസ് പോലും റിപ്പോര്‍ട്ട് ചെയ്തില്ല. മറ്റ് കേസുകള്‍ മാറ്റിനിര്‍ത്തിയാല്‍ പട്ടികജാതി വിഭാഗത്തിന് നേരെയുണ്ടായ കുറ്റകൃത്യങ്ങളില്‍ മുന്‍പന്തിയിലുള്ളത് ബലാത്സംഗമാണ്. പട്ടികജാതിക്കുനേരെയുണ്ടായിട്ടുള്ള മുഴുവന്‍ കുറ്റകൃത്യങ്ങളും പരിശോധിച്ചാല്‍ 15.2 ശതമാനമാണ് ബലാത്സംഗ കേസുകളുടെ തോത്. സ്ത്രീകള്‍ക്കു നേരെയുള്ള അതിക്രമങ്ങളും പീഡനങ്ങളും 13 ശതമാനവും വരും.
2020-ലേക്ക് വരുമ്പോള്‍ ആദിവാസി വിഭാഗത്തിന് നേരെയുള്ള അതിക്രമങ്ങള്‍ വീണ്ടും കൂടുകയാണുണ്ടായത്. 2018 മുതല്‍ 2020 വരെയുള്ള കാലത്ത് പട്ടികജാതിക്കു നേരെയുണ്ടായ വിവിധ അതിക്രമങ്ങളില്‍ രാജ്യത്താകമാനം വർദ്ധിച്ചതായി കാണാം. 2018-ല്‍ 6,528 കേസുകളായിരുന്നു റിപ്പോര്‍ട്ട് ചെയ്തതെങ്കില്‍ 2020-ല്‍ കേസുകളുടെ എണ്ണം 8,272 ആയി ഉയര്‍ന്നതായി കാണാം. 2021-ലേക്ക് വരുമ്പോള്‍ കേസുകളുടെ എണ്ണത്തില്‍ 6.4 ശതമാനമാണ് വർദ്ധനയുണ്ടായത്. 2021-ല്‍ മാത്രം 8,802 കേസുകളാണ് റിപ്പോര്‍ട്ട് ചെയ്തത്. അതായത് 50,900 കേസുകള്‍.
ആദിവാസികള്‍ക്ക് നേരെയുള്ള അതിക്രമങ്ങളുടെ കാര്യത്തില്‍ നഗര-ഗ്രാമീണ പ്രദേശങ്ങളില്‍ വലിയ വ്യത്യാസങ്ങള്‍ കാണാന്‍ സാധിക്കില്ലെന്ന് ദേശീയ ക്രൈം റെക്കോര്‍ഡ്‌സ് ബ്യൂറോ പറയുന്നു. ഇത്തവണയും അതിക്രമങ്ങള്‍ നടന്ന സംസ്ഥാനങ്ങളില്‍ ഒന്നാംസ്ഥാനത്ത് മധ്യപ്രദേശാണ്. ഒരുവര്‍ഷത്തില്‍ റിപ്പോര്‍ട്ട് ചെയ്ത കേസുകളുടെ എണ്ണം 2627. മുന്‍വര്‍ഷത്തെ അപേക്ഷിച്ച് 29.8 ശതമാനം വർദ്ധനയുണ്ടായി. രണ്ടാംസ്ഥാനത്തുള്ള രാജസ്ഥാനില്‍ 2121 കേസുകള്‍ റിപ്പോര്‍ട്ട് ചെയ്തു. വർദ്ധന 24 ശതമാനം. മൂന്നാം സ്ഥാനത്തുള്ള ഒഡീഷയില്‍ 676 കേസുകളും റിപ്പോര്‍ട്ട് ചെയ്തു. 7.6 ശതമാനം വർദ്ധന. മഹാരാഷ്ട്ര (628 കേസുകള്‍), തെലങ്കാന (512 കേസുകള്‍) തൊട്ടുപിന്നാലെയുണ്ട്.
ആദിവാസികള്‍ക്ക് നേരെയുള്ള മൊത്തം അതിക്രമങ്ങളില്‍ 15 ശതമാനവും സ്ത്രീകള്‍ക്ക് നേരെയുള്ള ബലാത്സംഗ കേസാണെന്നത് സമൂഹത്തിനെ ഞെട്ടിക്കുന്നു. 1324 കേസുകള്‍. പീഡനം, തട്ടികൊണ്ടുപോകല്‍ തുടങ്ങിയ കുറ്റകൃത്യങ്ങളില്‍ 2364 കേസുകളാണ് റിപ്പോര്‍ട്ട് ചെയ്തത്. റിപ്പോര്‍ട്ട് ചെയ്ത മൊത്തം കേസുകളില്‍ 26.8 ശതമാനം. കേസുകളില്‍ കൊലപാതക കുറ്റം മാത്രം 199 എണ്ണം വരും. 148 കൊലപാതകശ്രമങ്ങള്‍ക്കും കേസെടുത്തിട്ടുണ്ട്. അവയെക്കൂടാതെ, അതിമാരകമായി പരിക്കേല്‍പ്പിച്ചതിന് 114 കേസുകളും റിപ്പോര്‍ട്ടു ചെയ്തു.
മുന്‍കാലങ്ങളെ അപേക്ഷിച്ച് കൂടുതല്‍ ആളുകള്‍ നീതി തേടി നിയമത്തിന് മുന്നിലെത്തുന്നതു കൊണ്ടുകൂടിയാണ് പല സംഭവങ്ങളും പുറത്തറിയുന്നതും കേസുകള്‍ രജിസ്റ്റര്‍ ചെയ്യപ്പെടുന്നതും. ഓരോവര്‍ഷവും ആദിവാസികള്‍ക്ക് നേരെയുള്ള അതിക്രമങ്ങളുടെ എണ്ണം കൂടിവരുമ്പോള്‍ നിയമത്തിന് മുന്നിലെത്തുന്ന എത്ര കേസുകളില്‍ നീതി ലഭ്യമായെന്ന് കൂടി പരിശോധിക്കേണ്ടതാണ്. മുന്‍വര്‍ഷത്തെയും കൂട്ടി 2021-ല്‍ മൊത്തം കേസുകളില്‍ തീര്‍പ്പിനായി കാത്തിരിക്കുന്നത് 12159 എണ്ണമാണ്. ആദിവാസികള്‍ക്ക് നേരെയുള്ള അതിക്രമങ്ങളുടെ പേരില്‍ രജിസ്റ്റര്‍ ചെയ്തത 8825 കേസുകള്‍ പല കാരണങ്ങള്‍ കൊണ്ട് പോലീസ് ഒഴിവാക്കിയിട്ടുണ്ട്. കേസുകളില്‍ പോലീസ് ചാര്‍ജ് ഷീറ്റ് തയ്യാറാക്കുന്നത് കൂടിയതായി കണക്കുകള്‍ സൂചിപ്പിക്കുന്നു. അന്വേഷണം പൂര്‍ത്തിയാക്കി ചാര്‍ജ് ഷീറ്റ് തയ്യാറാക്കുന്നതിന്റെ തോത് മുന്‍വര്‍ഷങ്ങളെ അപേക്ഷിച്ച് 81.4 ശതമാണ് കൂടിയത്. കോടതിയിലെത്തിയ 42512 കേസുകളില്‍ 1947 എണ്ണത്തില്‍ വിധി പ്രസ്താവിച്ചിട്ടുണ്ട്. 2021-ല്‍ രാജ്യത്തെ വിവിധ കോടതികളില്‍ 95.4 ശതമാനം കേസുകളാണ് തീര്‍ച്ചപ്പെടാതെയിരിക്കുന്നത് എന്നത് നീതിവ്യവസ്ഥയില്‍ വിശ്വസിക്കുന്ന പലര്‍ക്കും നിരാശയുണ്ടാക്കാം.
