മുതിർന്ന കോൺഗ്രസ് നേതാവായ എകെ ആന്റണിയുടെ മകൻ അനിൽ ആന്റണി കോൺഗ്രസ് വിട്ട് ബിജെപിയിലേക്ക് കൂടണഞ്ഞതാണ് കേരളത്തിലെ പ്രധാന ചർച്ചാവിഷയം. ആന്റണിയുടെ മകൻ എന്നതിൽക്കവിഞ്ഞ കാര്യമായ അഡ്രസ്സൊന്നുമില്ലാത്ത അനിലിന്റെ ബിജെപിയിലേക്കുള്ള പോക്ക്, ആന്ധ്രയിൽ ആന പാറിയ കഥ കേട്ടാൽ എത്രയോ ചെറിയതാണെന്ന് തോന്നാം. ആന്ധ്രപ്രദേശിലെ മുതിർന്ന കോൺഗ്രസ് നേതാവും അവിഭക്ത ആന്ധ്രപ്രദേശിന്റെ അവസാനത്തെ മുഖ്യമന്ത്രിയുമായ കിരൺകുമാർ റെഡ്ഢിയാണ് ഏറ്റവും ഒടുവിലായി ഇന്ന് താമരയുടെ തണലിലേക്ക് അഭയം പ്രാപിച്ചത്. കോൺഗ്രസിൽ നിന്നും ബിജെപിയിലേക്കുള്ള കൂടുമാറ്റം ആവർത്തനങ്ങളാണെങ്കിലും കിരൺ കുമാർ റെഡ്ഢിയുടെ പുതിയ രാഷ്ട്രീയ തീരുമാനം ആന്ധ്രപ്രദേശിലെ കോൺഗ്രസിന്റെ നില കൂടുതൽ പരുങ്ങലിലാക്കുന്നതിന് വഴി വച്ചേക്കും.
കേന്ദ്രമന്ത്രി പ്രഹ്ലാദ് ജോഷിയുടെ സാന്നിധ്യത്തിലാണ് കിരൺ കുമാർ റെഡ്ഢി കാവി പുതച്ച് തന്റെ പുതിയ തീരുമാനം വിളംബരം ചെയ്തത്. ബിജെപിയുടെ രൂപീകരണ വാർഷിക ആഘോഷങ്ങൾ നടന്നു കൊണ്ടിരിക്കുന്ന വേളയിലാണ് കിരൺകുമാർ റെഡ്ഢി ഈ തീരുമാനം കൈക്കൊണ്ടത്. പ്രധാനമന്ത്രി നരേന്ദ്രമോദിയെ പുകഴ്ത്താനും പ്രതിപക്ഷത്തിനെതിരെ ആഞ്ഞടിക്കാനും റെഡ്ഢി ഈ അവസരത്തിൽ മറന്നു പോയില്ല. “എന്റെ രാജാവ് വളരെ ബുദ്ധിമാനാണ്. അവൻ സ്വന്തമായി ചിന്തിക്കില്ല. ആരുടെയും ഉപദേശം ചെവി കൊള്ളുകയുമില്ല” എന്ന പഴഞ്ചൊല്ല് രാഹുൽ ഗാന്ധിയെ ലാക്കാക്കി പരാമർശിച്ചു കൊണ്ടാണ് കിരൺ കുമാർ റെഡ്ഢി തന്റെ രാഷ്ട്രീയമാറ്റത്തെ ന്യായീകരിക്കുന്നത്. കോൺഗ്രസിൽ നിന്ന് ഒരുകാലത്തും പുറത്തു പോകേണ്ടി വരുമെന്ന് കരുതിയിരുന്നില്ലെന്നും ഈ അവസരത്തിൽ കിരൺകുമാർ റെഡ്ഢി പ്രതികരിച്ചു. ആറു പതിറ്റാണ്ട് നീണ്ട കോൺഗ്രസിനോടൊപ്പമുള്ള ദീർഘമായ യാത്രക്കാണ് കിരൺ കുമാർ റെഡ്ഢി ഇന്ന് തിരശ്ശീലയിട്ടത്.
കോൺഗ്രസിനെ അതിരൂക്ഷമായ ഭാഷയിലാണ് അദ്ദേഹം വിമർശിച്ചത്. ഒരാളെ നിയന്ത്രിക്കാൻ കോൺഗ്രസിനുള്ളിൽ ധാരാളം ആൾക്കാരുണ്ട്. പക്ഷേ ഉത്തരവാദിത്വമേറ്റെടുത്ത് കഠിനാധ്വാനം ചെയ്യാൻ കോൺഗ്രസിൽ ആരുമില്ല എന്നദ്ദേഹം പറഞ്ഞു. ആന്ധ്രപ്രദേശിൽ മാത്രമല്ല എല്ലാ സംസ്ഥാനങ്ങളിലും കോൺഗ്രസ് തകർന്നടിഞ്ഞു കൊണ്ടിരിക്കുകയാണെന്നും ഹൈക്കമാന്റിന്റെ തീരുമാനങ്ങളെല്ലാം ഏകപക്ഷീയം മാത്രമാണെന്നും അദ്ദേഹം പ്രതികരിച്ചു. സംസ്ഥാനങ്ങളുമായി കോൺഗ്രസിൽ കൂടിയാലോചനകളില്ല എന്നും കിരൺ കുമാർ റെഡ്ഢി പറഞ്ഞുവെക്കുമ്പോൾ ലോക്സഭാ തെരഞ്ഞെടുപ്പിന് ഒരുങ്ങുന്ന കോൺഗ്രസിന്റെ ഉള്ളുലയ്ക്കുന്ന സംഭവമായി ഈ കൂടുമാറ്റം മാറുകയാണ്.
രാഷ്ട്രീയത്തിൽ സജീവമാവുന്നതോടൊപ്പം ക്രിക്കറ്റിനെ അഗാധമായി സ്നേഹിച്ച വ്യക്തി കൂടിയായിരുന്നു കിരൺ കുമാർ റെഡ്ഢി. രാഷ്ട്രീയത്തിലെ കോൺഗ്രസിനോടൊപ്പമുള്ള ദീർഘമായ ഇന്നിംഗ്സിന് പരിസ്സമാപ്തിയിട്ട് ബിജെപിയുമായി കൂടിച്ചേർന്ന് രണ്ടാമിന്നിങ്സ് ആരംഭിക്കുകയാണ് മുൻ ആന്ധ്ര മുഖ്യമന്ത്രി. അവിഭക്ത ആന്ധ്രപ്രദേശിന്റെ പതിനാറാമത്തെ മുഖ്യമന്ത്രിയായിരുന്നു കിരൺ കുമാർ റെഡ്ഢി. നാലുതവണ കോൺഗ്രസിന്റെ നിയമസഭാ സാമാജികൻ. വൈ എസ് രാജശേഖര റെഡ്ഢിയുടെ ഹെലികോപ്റ്റർ അപകടമരണത്തിനുശേഷം അല്പകാലം ആന്ധ്ര ഭരിച്ചത് കെ റോസ്സയ്യ ആയിരുന്നു. തുടർന്ന് 2019 നവംബർ 25ന് കിരൺ കുമാർ റെഡ്ഢി ആന്ധ്ര മുഖ്യമന്ത്രി പദത്തിലെത്തി. 2014 മാർച്ച് ഒന്നുവരെ അദ്ദേഹം ആ കസേരയിൽ തുടർന്നു. ആന്ധ്രപ്രദേശിനെ വിഭജിച്ച് തെലുങ്കാന, ആന്ധ്രപ്രദേശ് എന്നീ രണ്ട് സംസ്ഥാനങ്ങൾ ആക്കാനുള്ള കേന്ദ്രസർക്കാറിന്റെ തീരുമാനത്തിൽ പ്രതിഷേധിച്ച് കൊണ്ട് അദ്ദേഹം രാജി വെക്കുകയായിരുന്നു.
കോൺഗ്രസ് തന്നെ നേതൃത്വം നൽകുന്ന യുപിഎ സർക്കാരിൽ നിന്നും ആന്ധ്രപ്രദേശ് വിഭജിക്കാനുള്ള തീരുമാനം ഉണ്ടാവുമെന്ന് ഒരിക്കൽ പോലും കിരൺ കുമാർ റെഡ്ഢി കരുതിയിരുന്നില്ല. 2014ൽ മുഖ്യമന്ത്രി പദവും എംഎൽഎ പദവും ഒപ്പം കോൺഗ്രസിന്റെ പ്രാഥമികാംഗത്വവും കിരൺ കുമാർ റെഡ്ഢി രാജിവച്ചു. 2014 ഫെബ്രുവരി 19നായിരുന്നു കേന്ദ്രസർക്കാർ ആന്ധ്രപ്രദേശിനെ വിഭജിക്കാനുള്ള തീരുമാനം കൈക്കൊണ്ടത്. കോൺഗ്രസിൽ നിന്ന് പുറത്തുപോയി ‘ജയ് സമൈക്യ ആന്ധ്ര പാർട്ടി’ രൂപീകരിച്ച കിരൺ കുമാർ റെഡ്ഡി രാഷ്ട്രീയ പ്രവർത്തനം തുടർന്നുപോന്നു.
ആന്ധ്ര വിഭജനത്തിനെതിരെയുള്ള രാഷ്ട്രീയ നിലപാടുകളായിരുന്നു റെഡ്ഢിയുടെ പാർട്ടിയുടെ അജണ്ട തീരുമാനിച്ചത്. തെലുങ്കരുടെ ആത്മാഭിമാനത്തിനേറ്റ തിരിച്ചടിയായാണ് വിഭജനതീരുമാനത്തെ കിരൺ കുമാർ കണ്ടത്. എങ്കിലും പുതിയ പാർട്ടി രൂപീകരിച്ചുള്ള പ്രവർത്തനങ്ങൾ ആന്ധ്രയുടെ മണ്ണിൽ പച്ചപിടിച്ചില്ല. തുടർന്നുവന്ന തെരഞ്ഞെടുപ്പിൽ മത്സരിച്ചെങ്കിലും പരാജയമായിരുന്നു ഫലം. 2018ൽ കിരൺകുമാർ റെഡ്ഢി തന്റെ പാർട്ടി പിരിച്ചുവിട്ടു. രാഹുൽ ഗാന്ധി ഉൾപ്പെടെ കോൺഗ്രസിന്റെ മുതിർന്ന നേതാക്കളുമായി നടത്തിയ സമവായ ചർച്ചയെ തുടർന്ന് അതേവർഷം കോൺഗ്രസിനുള്ളിലേക്ക് കിരൺകുമാർ റെഡ്ഢിക്ക് വാതിലുകൾ തുറക്കപ്പെട്ടു. 2018 ആഗസ്റ്റോടെ റെഡ്ഢി കോൺഗ്രസിൽ തിരികെ എത്തി.
ഉയർന്ന പദവിയാണ് കിരൺകുമാർ റെഡ്ഢി തന്റെ തിരിച്ചുവരവിൽ പ്രതീക്ഷിച്ചത്. അതൊന്നും തന്നെ അവിടെ നടന്നില്ല. 2022 മെയ് മാസത്തിൽ നടന്ന ഉദയ്പൂർ ചിന്തൻ ശിബിരിൽ പങ്കെടുക്കാൻ റെഡ്ഢിക്ക് അവസരം ലഭിച്ചു. എന്നാൽ അതേവർഷം നവംബറിൽ എഐസിസി അധ്യക്ഷൻ മല്ലികാർജുൻ ഖാർഗെ മറ്റൊരു തീരുമാനം കൈക്കൊണ്ടു. ഗിഡ്ഗു രുദ്ര രാജുവിനെ ആന്ധ്ര പിസിസിയുടെ അധ്യക്ഷനായി നിയമിച്ചു. ഇതോടു കൂടി കോൺഗ്രസിനുള്ളിലെ തന്റെ ജീവിതം അടഞ്ഞുകഴിഞ്ഞുവെന്ന് കിരൺ കുമാർ റെഡ്ഢി കരുതി.
കോൺഗ്രസ് ചരിത്രത്തിലെ ഏറ്റവും വലിയ വെല്ലുവിളികളാണ് ആന്ധ്രപ്രദേശിൽ നേരിടുന്നത്. 2009 ലെ ലോക്സഭാ തെരഞ്ഞെടുപ്പിൽ ആന്ധ്രപ്രദേശിൽ നിന്ന് മാത്രം കോൺഗ്രസിന് 33 സീറ്റുകൾ ലഭിച്ചിരുന്നു. ആന്ധ്രയിലെ ആകെ സീറ്റുകൾ അന്ന് 42 ആയിരുന്നു. 2004 അധികാരത്തിലെത്തിയ യുപിഎ സർക്കാരിന്റെ 2009ലെ അധികാരത്തുടർച്ചയ്ക്ക് ഏറ്റവും പിന്തുണ നൽകിയ സംസ്ഥാനങ്ങളിലൊന്നായി ആന്ധ്ര അന്ന് മാറി. 2009ലെ വൈ എസ് രാജശേഖര റെഡ്ഡിയുടെ അപകടമരണം ആന്ധ്രയിലെ കോൺഗ്രസിന്റെ തകർച്ചയ്ക്ക് ആക്കം കൂട്ടി. പക്ഷേ അത് തിരിച്ചറിയാൻ കോൺഗ്രസിന്റെ മുതിർന്ന നേതാക്കൾക്ക് സാധിച്ചില്ല. അതോടൊപ്പം ആന്ധ്രപ്രദേശിനെ വിഭജിക്കാനുള്ള തീരുമാനവുമായി കോൺഗ്രസിന്റെ ദേശീയനേതൃത്വം മുന്നോട്ടു പോയി. ആന്ധ്ര വിഭജനത്തെ തുടക്കംമുതൽ ശക്തമായി എതിർത്ത നേതാവായിരുന്നു കിരൺ കുമാർ റെഡ്ഢി. വിഭജന തീരുമാനം കോൺഗ്രസിന്റെ കുഴിതോണ്ടുന്ന തീരുമാനം തന്നെയായിരുന്നു. 2014 ഇലക്ഷനിൽ കോൺഗ്രസ് വിഭജിത ആന്ധ്രയിൽ ഒറ്റ സീറ്റിൽ പോലും വിജയിച്ചില്ല. 2019ലും സ്ഥിതി മറിച്ചായിരുന്നില്ല.
സഹോദര സംസ്ഥാനമായ തെലുങ്കാനയിൽ മൂന്ന് ലോക്സഭാ സീറ്റിലും ആറ് നിയമസഭാ സീറ്റിലുമായി കോൺഗ്രസ് ഒതുങ്ങി. കോൺഗ്രസിന്റെ പ്രധാന സംസ്ഥാന നേതാക്കളെല്ലാം വൈ എസ് രാജശേഖര റെഡ്ഡിയുടെ മകൻ ജഗന്മോഹൻ റെഡ്ഡിയുടെ പാർട്ടിയോടൊപ്പം പോയി. കിരൺ കുമാർ റെഡ്ഡിയുടെ ആന്ധ്ര വിഭജനത്തിനെതിരെയുള്ള എതിർപ്പായിരുന്നു ശരിയെന്ന് പിന്നീട് കോൺഗ്രസിന് ബോധ്യം വന്നു. പക്ഷേ അപ്പോഴേക്കും സമയം ഏറെ വൈകിയിരുന്നു. അതൊരു മനുഷ്യസഹജമായ തെറ്റാണെന്നാണ് കോൺഗ്രസിന്റെ സംസ്ഥാന നേതാവ് ചിന്താമോഹൻ പറയുന്നത്. 2024 ഓടെ കേന്ദ്രത്തിലും സംസ്ഥാനത്തും കോൺഗ്രസ് തിരിച്ചു വരുമെന്നും, വിഭജനത്തിനു ശേഷമുള്ള 9 വർഷങ്ങൾ ആന്ധ്രയെ സംബന്ധിച്ചിടത്തോളം ഇരുണ്ട യുഗമാണെന്നും ജനങ്ങൾ ഇപ്പോൾ കോൺഗ്രസിന്റെ ഇന്നലെകളിലെ നല്ല നാളുകളെക്കുറിച്ച് ഓർക്കുകയാണെന്നും അദ്ദേഹം കഴിഞ്ഞ ദിവസം പ്രതികരിച്ചു. ആ പ്രതികരണത്തിന്റെ അലിയോലികൾ അവസാനിക്കുന്നതിനു മുമ്പാണ് കിരൺ കുമാർ റെഡ്ഡി ബിജെപി കൂടാരത്തിലേക്ക് ചേക്കേറുന്നത്. ഭാരത് ജോഡോ യാത്രയുടെ പ്രതികരണങ്ങൾ കോൺഗ്രസ് തെരഞ്ഞെടുപ്പിൽ പ്രതീക്ഷിക്കുന്ന സംസ്ഥാനങ്ങളിൽ ഒന്നാണ് ആന്ധ്രപ്രദേശ്. അതിനു തൊട്ടുമുമ്പ് കിരൺ കുമാർ റെഡ്ഡിയുടെ ബിജെപിയിലേക്കുള്ള കൂടുമാറ്റം തെലുങ്ക് ഭൂരിപക്ഷ മേഖലയിൽ കോൺഗ്രസിന്റെ പ്രതീക്ഷകൾക്കു മേലുള്ള തീമഴ തന്നെയാവും.
