Also Read : പിഎച്ച്ഡിക്കാർ, വിരമിച്ച ഐഎഎസ് ഐപിഎസ് ഉദ്യോഗസ്ഥർ; കന്നഡ മണ്ണ് നിലനിർത്താൻ ബിജെപി തന്ത്രങ്ങൾ ഇങ്ങനെ
സംസ്ഥാനത്തെ ആദ്യ വന്ദേ ഭാരത് എക്സ്പ്രസ് ജയ്പൂരിൽ നിന്നും ഡൽഹി കാന്റിലേക്കാണ് സർവീസ് നടത്തുക. നാളെ മുതൽ വന്ദേ ഭാരത് എക്സ്പ്രസിന്റെ സർവീസുകൾ ആരംഭിക്കും. അജ്മീറിൽ നിന്നും ഡൽഹി കാന്റിലേക്കാണ് പ്രതിദിന സർവീസുകൾ നടക്കുക. ഇതോടെ പ്രധാന നഗരങ്ങൾ തമ്മിലുള്ള യാത്രാസമയം, കുറയുമെന്നുമാണ് റെയിൽ അവകാശപ്പെടുന്നത്.
പുതിയ വന്ദേഭാരത് സർവീസ് അനുസരിച്ച് ജയ്പൂർ, അൽവാർ, ഗുഡ്ഗാവ് എന്നിവിടങ്ങളിൽ സ്റ്റോപ്പുകളുണ്ടാകുമെന്നാണ് ഏറ്റവും ഒടുവിലായി പുറത്തുവന്നിരിക്കുന്ന വിവരം. ഇതോടെ ഡൽഹിയിൽ നിന്നും അജ്മീർ വരെ എത്താൻ ഇനി വെറും അഞ്ച് മണിക്കൂറും 15 മിനിറ്റും മാത്രം മതിയാകും.
നിലവിൽ ശതാബ്ദി എക്സ്പ്രസാണ് ഈ പാതയിലെ ഏറ്റവും വേഗത്തിൽ പോകുന്ന ട്രെയിൻ സർവീസ്. അതേസമയം, ഈ എക്സ്പ്രസ് പോകുന്നതിന് ആറ് മണിക്കൂർ 15 മിനിറ്റാണ് സമയമെടുക്കുന്നത്. ശതാബ്ദി എക്സ്പ്രസിനേക്കാൾ ഒരു മണിക്കൂർ നേരത്തെ വന്ദേ ഭാരത് എക്സ്പ്രസിന് സർവീസ് നടത്താൻ സാധിക്കും.
ഹൈ-റൈസ് ഓവർഹെഡ് ഇലക്ട്രിക് (OHE) ഭൂപ്രദേശത്തുകൂടിയുള്ള ലോകത്തിലെ ആദ്യത്തെ സെമി-ഹൈ-സ്പീഡ് പാസഞ്ചർ ട്രെയിനായിരിക്കും അജ്മീർ – ഡൽഹി കാന്റ് വന്ദേ ഭാരത് എക്സ്പ്രസ്.
രാജസ്ഥാനിലെ പ്രധാന വിനോദസഞ്ചാര കേന്ദ്രങ്ങളായ പുഷ്കർ അജ്മീർ ഷെരിഫ് ദർഗ അടക്കമുള്ള പ്രദേശങ്ങളിലേക്കുള്ള ഗതാഗത സൗകര്യം മെച്ചപ്പെടുത്താനും വന്ദേ ഭാരത് എക്സ്പ്രസുകൾക്ക് സാധിക്കും. അതിന് പുറമെ, ഈ പ്രദേശത്തിന്റെ സാമൂഹിക സാമ്പത്തിക വികസനത്തിനും ഈ സർവീസുകൾ സഹായിക്കുമെന്നാണ് വ്യക്തമാക്കുന്നത്.
ഈ വർഷം ഫ്ലാഗോഫ് ചെയ്യുന്ന നാലാമത്തെ വന്ദേഭാരത് സർവീസാണ് രാജസ്ഥാനിലേത്. ഈ വർഷമാദ്യം ജനുവരിയിൽ സെക്കന്ദരാബാദിൽ നിന്നും വിശാഖപട്ടണത്തേക്കുള്ള ആദ്യ സർവീസ് ഉദ്ഘാടനം ചെയ്തതും പ്രധാനമന്ത്രി നരേന്ദ്രമോദി തന്നെയാണ്. ഇതിന് പിന്നാലെ ഏപ്രിൽ എട്ടിന് ചെന്നൈ കോയമ്പത്തൂർ വന്ദേ ഭാരത് എക്സ്പ്രസും സെക്കന്തരാബാദ് തിരുപ്പതി വന്ദേഭാരത് എക്സ്പ്രസും പ്രധാനമന്ത്രി ഫ്ലാഗോഫ് ചെയ്തു.
Also Read :9 ഡോക്ട‍ർമാ‍ർ, 5 വക്കീലന്മാർ, 8 വനിതകൾ; കർണാടകത്തിൽ 189 സ്ഥാനാർഥികളെ പ്രഖ്യാപിച്ച് ബിജെപി
നിയമസഭാ തെരഞ്ഞെടുപ്പിന് എട്ട് മാസങ്ങൾ മാത്രം അവശേഷിക്കവെ ബിജെപിക്ക് ഈ വികസനപ്രവർ‍ത്തനങ്ങൾ വോട്ടാക്കി മാറ്റാൻ സാധിക്കുമോ എന്നാണ് ഇനി കണ്ടറിയേണ്ടത്.
Read Latest National News and Malayalam News
