നീണ്ട 15 വര്‍ഷങ്ങള്‍ ഡല്‍ഹി കോണ്‍ഗ്രസിനൊപ്പമായിരുന്നു. അരവിന്ദ് കെജ്രിവാള്‍ എന്ന സാധാരണക്കാരന്‍ നയിക്കുന്ന ആം ആദ്മി പാര്‍ട്ടി തിരഞ്ഞെടുപ്പില്‍ മത്സരിക്കുന്നത് വരെ. 2015-ലെ നിയമസഭാ തിരഞ്ഞെടുപ്പില്‍ കോണ്‍ഗ്രസിനെ തകര്‍ത്തെറിഞ്ഞ് ആം ആദ്മി ഐതിഹാസികമായി ഡല്‍ഹിയുടെ ഭരണത്തിന് ചുക്കാന്‍ പിടിച്ചു. അതും 70-ല്‍ 67 സീറ്റിന്റെ ഭൂരിപക്ഷത്തോടെ. 2012-ല്‍ മാത്രം പിറവിയെടുത്ത ഒരു പാര്‍ട്ടിക്ക് അത്രയൊക്കെ നേട്ടമുണ്ടാക്കാന്‍ പറ്റുമെന്ന് ഗണിച്ച് പറഞ്ഞാല്‍ പോലും ആരും വിശ്വസിക്കില്ലായിരുന്നു. ആദ്യവട്ടം ഭാഗ്യം അവര്‍ക്കൊപ്പമാണെന്ന് പലരും മുദ്രക്കുത്തി. പാര്‍ട്ടിയില്‍ ജനങ്ങളുടെ വിശ്വാസം തെളിയിച്ചുകൊണ്ട് അടുത്ത തിരഞ്ഞെടുപ്പിലും അവര്‍ വിജയം ആവര്‍ത്തിച്ചു. ഇന്ത്യന്‍ രാഷ്ട്രീയത്തില്‍ പിച്ചവെക്കാന്‍ മാത്രം പ്രായമുള്ള ഒരു പാര്‍ട്ടിയാണ് ഡല്‍ഹിയും പഞ്ചാബും ഇന്ന് ഭരിക്കുന്നത്. എന്നാല്‍ രണ്ട് സംസ്ഥാനങ്ങളിലെ മുഖ്യമന്ത്രിമാരെ വെച്ചുമാത്രം തൃപ്തരല്ല പാര്‍ട്ടി.
ആം ആദ്മി എന്ന പാര്‍ട്ടി സ്ഥാപിതമായത് മുതല്‍ ദേശീയരാഷ്ട്രീയത്തിലേക്ക് കടന്നു വരാനുള്ള ഒരുക്കങ്ങള്‍ അവര്‍ നടത്തിയിരുന്നു. കേന്ദ്രം ഭരിക്കുന്ന ബിജെപിക്കും പ്രധാനമന്ത്രി നരേന്ദ്ര മോദിക്കും ബദലായി ആം ആദ്മിയും ഡല്‍ഹി മുഖ്യമന്ത്രി അരവിന്ദ് കെജ്രിവാളും വരുമെന്ന് പലരും കരുതി. പ്രധാനമന്ത്രിയെയും ബിജെപിയെയും കടന്നാക്രമിച്ചും മറ്റൊരവസരത്തില്‍ അനുകരിച്ചും അതിനായി പലവിധ ശ്രമങ്ങള്‍ അരവിന്ദ് കെജ്രിവാളും നടത്തി. കോണ്‍ഗ്രസിനെ കടത്തിവെട്ടി ദേശീയതലത്തില്‍ ബിജെപിയുടെ എതിരേ നില്‍ക്കണമെന്ന മോഹം പക്ഷേ പാര്‍ട്ടിയുടെ മോഹം മാത്രമായി അവശേഷിക്കുകയാണ്. കാരണം അതിനുള്ള ആദ്യത്തെ ചവിട്ടുപടിയായ ലോകസഭാ സീറ്റെന്നത് പാര്‍ട്ടിക്ക് ഇപ്പോഴും കിട്ടാക്കനിയാണ്.
മുന്‍സിപ്പല്‍ തിരഞ്ഞെടുപ്പിലും നിയമസഭാ തിരഞ്ഞെടുപ്പിലും ഡല്‍ഹി തൂത്തുവാരിയ ആംആദ്മിക്ക് പക്ഷേ തലസ്ഥാനത്ത് നിന്ന് ഒരു ലോകസഭാ സ്ഥാനാര്‍ത്ഥിയെ പോലും നല്‍കാനായില്ല എന്നു പറയുമ്പോള്‍ പാര്‍ട്ടിക്ക് പോലും ഞെട്ടലാണ്. ലോകസഭയില്‍ അംഗസംഖ്യയുണ്ടാക്കാത്തിടത്തോളം കാലം ദേശീയ രാഷ്ട്രീയത്തില്‍ ബിജെപിക്ക് എതിരേ എന്നത് ആം ആദ്മിയുടെയും നേതാവ് അരവിന്ദ് കെജ്രിവാളിന്റെയും ദിവാസ്വപ്‌നം മാത്രമായി അവശേഷിക്കും.
ലോകസഭയില്‍ സീറ്റ് തിരഞ്ഞ് ആപ്പ്
സാധാരണക്കാരന്റെ സ്വന്തം പാര്‍ട്ടിയെന്ന പേരില്‍ വന്ന ആം ആദ്മി തിരഞ്ഞെടുപ്പ് ഗോദയിലേക്ക് വരുന്നത് പാര്‍ട്ടി രൂപവത്കരിച്ചതിന്റെ തൊട്ടടുത്ത വര്‍ഷമാണ്, 2013-ലെ നിയമസഭാ തിരഞ്ഞെടുപ്പില്‍. 28 സീറ്റില്‍ വിജയിച്ച പാര്‍ട്ടിയുടെ നേതാവ് അത്തവണത്തെ തൂക്കുമന്ത്രിസഭയില്‍ മുഖ്യമന്ത്രിയുമായി. രണ്ടുമാസം പോലും തികയ്ക്കാതെ അരവിന്ദ് കെജ്രിവാള്‍ മുഖ്യമന്ത്രിസ്ഥാനം രാജിവെച്ച് പോയപ്പോള്‍ ആം ആദ്മി പാര്‍ട്ടിയുടെ പടയോട്ടം അവസാനിക്കാറായെന്ന് പലരും കണക്കുകൂട്ടി. 2014-ലെ പൊതു തിരഞ്ഞെടുപ്പിലെ പ്രകടനവും അത്തരം കണക്കു കൂട്ടലുകളെ ശരിവെക്കുന്നതായിരുന്നു. പഞ്ചാബില്‍ നിന്ന് നാല് ലോകസഭാ സീറ്റും 25 ശതമാനം വോട്ടും നേടിയതൊഴിച്ചാല്‍ വലിയ ഓളമുണ്ടാക്കാന്‍ ആം ആദ്മിക്ക് പറ്റിയില്ല എന്നതു തന്നെ കാരണം. എന്നാല്‍ 2015-ലെ ഡല്‍ഹി നിയമസഭാ തിരഞ്ഞെടുപ്പ് അക്ഷരാര്‍ഥത്തില്‍ ആം ആദ്മിയുടെ വിജയമായി. പക്ഷേ, ലോകസഭയില്‍ ആം ആദ്മിക്ക് കാര്യങ്ങള്‍ അത്ര എളുപ്പമായിരുന്നില്ല. വലിയ പ്രതീക്ഷയോടെ 2019-ല്‍ ലോക സഭാ തിരഞ്ഞെടുപ്പില്‍ മത്സരിച്ചെങ്കിലും സന്‍ഗ്രൂരില്‍ നിന്ന് ഒരു സീറ്റും വെറും ഏഴുശതമാനം വോട്ടുനേട്ടത്തിലും തൃപ്തി അടയേണ്ടി വന്നു, ആം ആദ്മിക്ക്. ലോകസഭയില്‍ സാന്നിധ്യമെങ്കിലും അറിയിച്ചിരുന്ന ഒരു സീറ്റും കഴിഞ്ഞ ജൂണില്‍ പാര്‍ട്ടിക്ക് നഷ്ടമായി. സന്‍ഗ്രൂര്‍ മണ്ഡലത്തില്‍ കഴിഞ്ഞ ജൂണില്‍ നടന്ന ഉപതിരഞ്ഞെടുപ്പില്‍ ശിരോമണി അകാലിദളി (അമൃത്സര്‍)ന്റെ സിമ്രന്‍ജിത് സിങ് മന്ന് 5,822 വോട്ടുകള്‍ക്ക് ആം ആദ്മിയുടെ ഗുര്‍മെയില്‍ സിങ്ങിനെ പരാജയപ്പെടുത്തി. പഞ്ചാബ് മുഖ്യമന്ത്രിയും ആം ആദ്മി നേതാവുമായ ഭഗവന്ത് മന്നിന്റെ കോട്ടകൂടിയായിരുന്നു സന്‍ഗ്രൂവ്. മന്ന് പഞ്ചാബ് മുഖ്യമന്ത്രിയായതിനെ തുടര്‍ന്നായിരുന്നു മണ്ഡലത്തില്‍ ഉപതിരഞ്ഞെടുപ്പ് നടന്നതും ജനങ്ങള്‍ ആം ആദ്മിയെ കൈവിട്ടതും.
ഭഗവന്ത് മന്നടക്കം നാലു എം.പിമാര്‍ മാത്രമേ ഇതുവരെ ആപ്പില്‍ നിന്ന് ലോകസഭയുടെ പടി ചവിട്ടിയിട്ടുള്ളു. പഞ്ചാബിലെ സന്‍ഗ്രൂർ, ഫത്തേഘര്‍ സാഹിബ്, ഫാരിദ് കോട്ട്, പാട്യാല എന്നീ മണ്ഡലങ്ങളാണ് പാര്‍ട്ടിയെ തുണച്ചത്. 2019-ല്‍ സന്‍ഗ്രൂരില്‍ ഭഗവന്ത് മന്ന് ജയിച്ചതൊഴിച്ചാല്‍ മറ്റ് മണ്ഡലങ്ങള്‍ ഒരു ടേം കൂടി ആപ്പിന് കൊടുക്കാന്‍ തയ്യാറായില്ല. ഉപതിരഞ്ഞെടുപ്പില്‍ ആ മണ്ഡലവും ഇപ്പോള്‍ ആപ്പിന് നഷ്ടമായി. ഇനി വരാനിരിക്കുന്ന പഞ്ചാബിലെ ജലന്ദര്‍ ഉപതിരഞ്ഞെടുപ്പ് ആപ്പിന് നിര്‍ണായകമായിരിക്കും.
ലോകസഭയില്‍ കാര്യങ്ങള്‍ അത്ര സുഖകരമല്ലെങ്കിലും രാജ്യസഭയില്‍ ആം ആദ്മിക്ക് ആശ്വസിക്കാന്‍ വകയുണ്ട്. പഞ്ചാബ്, ഡല്‍ഹി എന്നിവിടങ്ങളില്‍ നിന്ന് 10 എം.പിമാരെ രാജ്യസഭയിലേക്കെത്തിക്കാന്‍ കഴിഞ്ഞത് ആം ആദ്മിയെ സംബന്ധിച്ചിടത്തോളം നേട്ടം തന്നെയാണ്. വരാനിരിക്കുന്ന ലോകസഭാ തിരഞ്ഞെടുപ്പില്‍ ചില സംസ്ഥാനങ്ങളിലെങ്കിലും കാറ്റ് തങ്ങള്‍ക്ക് അനുകൂലമായി വീശുമെന്ന പ്രതീക്ഷയിലാണ് പാര്‍ട്ടി പ്രവര്‍ത്തകരും അരവിന്ദ് കെജ്രിവാളും. 2024-നെ മുന്നില്‍ കണ്ടുകൊണ്ട് ഗുജറാത്ത്, അസം, ഗോവ, ഉത്തരാഖണ്ഡ്, ഹിമാചല്‍ തുടങ്ങിയ സംസ്ഥാനങ്ങളില്‍ പ്രവര്‍ത്തനങ്ങളും തുടങ്ങിക്കഴിഞ്ഞു.
അടുത്തവര്‍ഷം നടക്കാനിരിക്കുന്ന പൊതുതിരഞ്ഞെടുപ്പില്‍ 125 ലോകസഭാ സീറ്റുകളാണ് പാര്‍ട്ടി ലക്ഷ്യംവെക്കുന്നത്. പൊളിറ്റിക്കല്‍ ട്രെന്‍ഡും ജനങ്ങളുടെ പള്‍സും അറിയാനുള്ള നടപടികള്‍ തുടങ്ങിക്കഴിഞ്ഞു. കഴിഞ്ഞ വര്‍ഷം ‘ഇന്ത്യയെ ഒന്നാമതാക്കാം’ എന്ന മുദ്രാവാക്യവുമായി കാമ്പയിന്‍ തുടങ്ങിയതും ഇതിന്റെ അടിസ്ഥാനത്തിലാണ്. ഗുജറാത്ത് അസംബ്ല്‌ളി തിരഞ്ഞെടുപ്പിന് ശേഷം പതിയെ മറ്റു സംസ്ഥാനങ്ങളില്‍ പ്രവര്‍ത്തനങ്ങള്‍ കനപ്പിക്കാമെന്നാണ് പാര്‍ട്ടി തീരുമാനിച്ചത്. അതിനനുസരിച്ച് പ്രവര്‍ത്തനങ്ങള്‍ തുടങ്ങുകയും ചെയ്തിട്ടുണ്ട്. ഡല്‍ഹിയില്‍ രൂപപ്പെട്ട് ഡല്‍ഹി വളര്‍ത്തിയ ഒരു പാര്‍ട്ടിക്ക് മറ്റു സംസ്ഥാനങ്ങളില്‍ രാഷ്ട്രീയ വേരോട്ടത്തിന് സമയമെടുക്കുമെന്ന് നിരീക്ഷിക്കപ്പെടുന്നു. ദേശീയ മുഖമായി വളരാന്‍ ശ്രമിക്കുമ്പോഴും ലോകസഭയിലേക്ക് ആളെ കൊടുക്കാന്‍ ആം ആദ്മിയുടെ തട്ടകമായ ഡല്‍ഹി പോലും തയ്യാറല്ല എന്നത് പാര്‍ട്ടിയെ കുറച്ചൊന്നുമല്ല വിഷമിപ്പിക്കുന്നത്. പാര്‍ട്ടിയുടെ എല്ലാമായ അരവിന്ദ് കെജ്രിവാള്‍ ഭരിക്കുന്ന ഡല്‍ഹിയില്‍ നിന്ന് വരുന്ന തിരഞ്ഞെടുപ്പിലെങ്കിലും ലോകസഭയിലേക്ക് എംപിയെ കൊടുക്കാനുള്ള പ്രവര്‍ത്തനങ്ങള്‍ അംഗങ്ങള്‍ തുടങ്ങിയിട്ടുണ്ട് എന്നു വേണം കരുതാന്‍. പ്രചാരണവേളയില്‍ ഡല്‍ഹിയില്‍ കൂടുതല്‍ ശ്രദ്ധയുണ്ടാകുമെന്ന് നേതാക്കളും സൂചിപ്പിച്ചിട്ടുണ്ട്.
ഡല്‍ഹിയും ചുറ്റിയിരിക്കുന്ന സംസ്ഥാനങ്ങളായ പഞ്ചാബ്, ഉത്തരാഖണ്ഡ്, ഗുജറാത്ത് എന്നിവിടങ്ങളില്‍ മാത്രമായിരുന്നു ഇതുവരെ ആം ആദ്മി കാര്യമായ ശ്രദ്ധ ചെലുത്തിയിരുന്നത്. എന്നാല്‍ ദേശീയരാഷ്ട്രീയത്തില്‍ കാലുറപ്പിക്കണമെങ്കില്‍ ഇത് മാത്രം മതിയാകില്ലെന്ന തിരിച്ചറിവില്‍ നേതാക്കള്‍ എത്തിക്കഴിഞ്ഞു.
പഞ്ചാബില്‍ നേരിട്ട തോല്‍വിക്ക് ശേഷം തന്ത്രങ്ങള്‍ അടിമുടി മാറ്റി പണിതിരിക്കുകയാണ് ആപ്പ്. പ്രധാനമന്ത്രി നരേന്ദ്ര മോദിയുടെ ബിരുദ സര്‍ട്ടിഫിക്കറ്റിനെ ചൊല്ലി ബഹളം വെച്ചിട്ട് മാത്രം കാര്യമില്ലെന്ന് അരവിന്ദ് കെജ്രിവാളിന് അറിയാം. ജി.എസ്.ടി.യും കര്‍ണാടകയിലെ അഴിമതിയും രാഹുല്‍ ഗാന്ധിയുടെ സ്ഥാനം തെറിപ്പിക്കലുമെല്ലാം ബിജെപിക്കെതിരേ ആയുധമാക്കി അരവിന്ദ് കെജ്രിവാള്‍ കഴിഞ്ഞ ദിവസങ്ങളില്‍ മാധ്യമങ്ങള്‍ക്ക് മുന്നില്‍ പ്രത്യക്ഷപ്പെട്ടു. വടക്ക് കിഴക്കന്‍ സംസ്ഥാനങ്ങളില്‍ അരവിന്ദ് കെജ്രിവാള്‍ സന്ദര്‍ശനങ്ങള്‍ നടത്തുന്നതും വെറുതെയല്ല.
അസം തുറക്കുമോ ദേശീയരാഷ്ട്രീയത്തിലേക്കുള്ള വാതില്‍?
അസമില്‍ രാഷ്ട്രീയ റാലി നടത്തികൊണ്ട് ഏപ്രില്‍ ആദ്യവാരം ആം ആദ്മി വടക്ക്-കിഴക്കന്‍ സംസ്ഥാനങ്ങളില്‍ തങ്ങളുടെ സാന്നിധ്യം അറിയിച്ച് തുടങ്ങി. അരവിന്ദ് കെജ്രിവാള്‍ നേരിട്ടെത്തിയാണ് അസമില്‍ പാര്‍ട്ടിയുടെ റാലിക്ക് തുടക്കമിട്ടത്. അസംബ്ലിളി തിരഞ്ഞെടുപ്പ് മൂന്ന് വര്‍ഷം അകലെയാണെങ്കിലും ഇപ്പോഴും പ്രചരണം തുടങ്ങി അസാമിസ് ജനതയുടെ മനസ്സില്‍ ആം ആദ്മിക്ക് സ്ഥാനമുണ്ടാക്കി കൊടുക്കുകയാണ് ഇപ്പോഴത്തെ നീക്കത്തിന് പിന്നില്‍. എന്നാല്‍ ബിജെപിയുടെ കോട്ടയായിരുന്നിട്ട് കൂടി 2022-ല്‍ ആം ആദ്മിയെ ‘ദേശീയ പാര്‍ട്ടി’യാകാന്‍ സഹായിച്ച ഗുജറാത്തിനെയും പാര്‍ട്ടിക്ക് സാന്നിധ്യമുറപ്പിക്കാന്‍ കഴിഞ്ഞിട്ടുള്ള ഗോവ, ഉത്തരാഖണ്ഡ് പോലുള്ള സംസ്ഥാനങ്ങളെയും താൽക്കാലികമായി മാറ്റിനിര്‍ത്തി എന്തുകൊണ്ട് വടക്കു-കിഴക്കന്‍ സംസ്ഥാനങ്ങള്‍ എന്ന് സംശയം ഉയരാം.
ബിജെപിക്ക് നേരെ ദുര്‍ബല പ്രതിപക്ഷമുള്ള സംസ്ഥാനങ്ങളെയാണ് ആംആദ്മി ഇപ്പോള്‍ നോട്ടമിട്ടിരിക്കുന്നത് എന്നതിന് തെളിവാണ് അസമിലേക്കുള്ള പാര്‍ട്ടിയുടെ കടന്നുവരവ്. പ്രാദേശിക പാര്‍ട്ടികളും ഗോത്രങ്ങളും പിടിമുറുക്കിയ വടക്ക്-കിഴക്കന്‍ സംസ്ഥാനങ്ങളില്‍ സീറ്റുറപ്പിക്കാന്‍ ബിജെപിക്കും നന്നായി വിയര്‍ക്കേണ്ടി വരുന്നുണ്ട്. നിലവിലെ സാഹചര്യത്തില്‍ കോണ്‍ഗ്രസും സിപിഎമ്മുമൊന്നും അസം, നാഗാലാന്‍ഡ് പോലുള്ള സംസ്ഥാനങ്ങളില്‍ വലിയ പ്രതീക്ഷവെക്കുന്നില്ല. മുന്നണിയുണ്ടാക്കിയെങ്കില്‍ പോലും കഴിഞ്ഞ തിരഞ്ഞെടുപ്പില്‍ അസമില്‍ കോണ്‍ഗ്രസ് കാര്യമായ മത്സരത്തിന് പോലും നിന്നിരുന്നില്ല. കഴിഞ്ഞ രണ്ട് നിയമസഭാ തിരഞ്ഞെടുപ്പിലും 30 സീറ്റ് പോലും തികയ്ക്കാന്‍ കോണ്‍ഗ്രസിന് സാധിച്ചിരുന്നില്ല. 2016-ലും 2021-ലും സഖ്യമുണ്ടാക്കിയാണ് ബിജെപിക്കും ഭരണത്തിലേറാന്‍ പറ്റിയത്. അസമിലെ മറ്റൊരു പ്രബല കക്ഷിയായ ആള്‍ ഇന്ത്യാ യുണൈറ്റഡ് ഡെമോക്രാറ്റിക് ഫ്രണ്ടിനും ഇതുവരെ 20 സീറ്റില്‍ കൂടുതല്‍ നേടാന്‍ കഴിഞ്ഞിട്ടില്ല. ഭരണം നിലനിര്‍ത്താന്‍ ബിജെപി ബുദ്ധിമുട്ടുകയും ശക്തമായ പ്രതിപക്ഷവുമില്ലാത്ത അസം പോലുള്ള സംസ്ഥാനങ്ങള്‍ ആം ആദ്മി കണ്ണുവെച്ചത് വെറുതേയല്ല.
അസംബ്ലി തിരഞ്ഞെടുപ്പ് മാത്രല്ല, വരാനിരിക്കുന്ന ലോകസഭാ തിരഞ്ഞെടുപ്പും പാര്‍ട്ടിയുടെ മുന്നിലുണ്ട്. ലോകസഭയില്‍ ആളില്ലാത്തത് കൊണ്ട് ബിജെപിക്കെതിരേ മുന്നണിയുണ്ടാക്കാന്‍ പോലും പാര്‍ട്ടിക്ക് ബുദ്ധിമുട്ടാണ്. 14 മണ്ഡലങ്ങളില്‍ നിന്ന് കുറച്ചെങ്കിലും സീറ്റുകള്‍ നേടാന്‍ കഴിഞ്ഞാല്‍ ആപ്പിന് കുറച്ചെങ്കിലും സമാധാനിക്കാം. അസമിലേക്ക് അരവിന്ദ് കെജ്രിവാളിനെ ആകര്‍ഷിച്ച മറ്റൊരു ഘടകം പ്രതിപക്ഷം ദുര്‍ബലമായിട്ടു കൂടി 50 ശതമാനം ലോകസഭാ സീറ്റുകളേ ബിജെപിക്ക് അസമില്‍ നേടാന്‍ കഴിഞ്ഞിട്ടുള്ളു. മാത്രമല്ല, 2016-ലെക്കാള്‍ നാലു സീറ്റുകള്‍ 2021-ല്‍ കുറയുകയും ചെയ്തു. 35 ശതമാനം മുസ്ലിമുകളുള്ള സംസ്ഥാനത്ത്, ഗോത്രങ്ങള്‍ക്ക് പ്രബല സ്ഥാനമുള്ള അസമില്‍ പ്രാദേശിക പാര്‍ട്ടികളുമായി സഖ്യമുണ്ടാക്കിയില്ലായിരുന്നെങ്കില്‍ ബിജെപിക്ക് ഭരണത്തില്‍ വരാന്‍ സാധിക്കുമായിരുന്നില്ല. ഇതെല്ലാം തിരിച്ചറിഞ്ഞ് കൊണ്ടാണ് അസമിലേക്കുള്ള കെജ്രിവാളിന്റെ വരവ്. ഗുജറാത്തിലേത് പോലെ വിദ്യാഭ്യാസ-ആരോഗ്യമേഖലയിലെ വിഷയങ്ങള്‍ തന്നെയാണ് ഇവിടെയും തിരഞ്ഞെടുപ്പ് ചര്‍ച്ചാ വിഷയമാക്കുന്നത്. കൂടെ സൗജന്യ വൈദ്യുതി പോലുള്ള വാഗ്ദാനങ്ങളുമുണ്ട്.
റാലിയില്‍ വിദ്യാഭ്യാസം, സ്‌കൂള്‍, റോഡ് നിര്‍മാണം തുടങ്ങിയ മേഖലകളില്‍ സംസ്ഥാനമുണ്ടാക്കിയ നേട്ടം തുറന്ന് പറയാന്‍ അസം മുഖ്യമന്ത്രി ഹിമന്ത ബിസ്വ ശര്‍മയെ വെല്ലുവിളിക്കാനും കെജ്രിവാള്‍ മറന്നില്ല. ശര്‍മയുടെ സര്‍ക്കാരിന്റെ അഴിമതികളും കെജ്രിവാള്‍ പൊതുചര്‍ച്ചകള്‍ക്ക് ഇട്ടുകൊടുക്കുന്നുണ്ട്. കെജ്രിവാളിന്റെ ആരോപണങ്ങള്‍ക്ക് മറുപടിയുമായി ശര്‍മ എത്തിയതോടെ തിരഞ്ഞെടുപ്പ് കഴിഞ്ഞിട്ടും അസമില്‍ രാഷ്ട്രീയ പോര്‍ക്കളം കൊഴുക്കുകയാണ്. കെജ്രിവാളിന്റെ രണ്ട് മന്ത്രിമാര്‍ അഴിമതിയില്‍ ജയിലിലായെന്ന് മാത്രമല്ല, മുഗള്‍ ഭരണാധികാരിയായ ഔറംഗസീബുമായി താരതമ്യം ചെയ്യാനും ശര്‍മ മറന്നില്ല.
കൃത്യമായ കണക്കു കൂട്ടലുകളുമായാണ് എത്തിയതെങ്കിലും ഗോവയിലെയും ഗുജറാത്തിലെയും അതേ അനുഭവമായിരിക്കുമോ അസമിലുമെന്ന് അരവിന്ദ് കെജ്രിവാളും പാര്‍ട്ടിയും ഭയക്കുന്നുണ്ട്. അസമില്‍ പാര്‍ട്ടിയെ നിലനിര്‍ത്തുക എന്നത് അത്ര എളുപ്പമുള്ള കാര്യമല്ല. ആം ആദ്മിയുടെ ദേശീയമുഖം കെജ്രിവാളിനെ കൂടാതെ അസമില്‍ മറ്റൊരു നേതാവിനെ അവതരിപ്പിക്കാന്‍ പാര്‍ട്ടിക്ക് കഴിഞ്ഞിട്ടില്ല. നിലവിലെ മുഖ്യമന്ത്രി ഹിമന്ത ബിസ്വ ശര്‍മയോട് അസമീസ് ജനതയ്ക്കുള്ള വിശ്വാസം തകര്‍ക്കാന്‍ കഴിയുന്ന ഒരു ബദല്‍ നേതാവിനെ സംസ്ഥാനത്ത് നിന്ന് കണ്ടെത്തിയിട്ടില്ലെങ്കില്‍ ആപ്പിന് ഇവിടെ വലിയ നേട്ടമുണ്ടാക്കാന്‍ കഴിയില്ല.
ബംഗ്ലാദേശില്‍ നിന്നുള്ള കുടിയേറ്റം അസമീസ് ജനത വികാരവിഷയമായാണ് ഏറ്റെടുത്തിരിക്കുന്നത്. കുടിയേറ്റക്കാരോടുള്ള ആപ്പിന്റെ നിലപാട് അതുകൊണ്ടു തന്നെ നിര്‍ണായകമാണ്. കൂട്ടത്തില്‍ ദേശീയ പൗരത്വ രജിസ്റ്റര്‍, പൗരത്വഭേദഗതി ബില്‍ തുടങ്ങിയ വിഷയങ്ങളില്‍ ആം ആദ്മിക്ക് നിലപാട് വ്യക്തമാക്കേണ്ടി വരും. കുടിയേറ്റക്കാരില്‍ ഭൂരിപക്ഷവും മുസ്ലീം വിശ്വാസികളായതിനാല്‍ ബിജെപി വിഷയത്തിന് മതപരിവേഷം നല്‍കി, ഹിന്ദു വോട്ടുകള്‍ തങ്ങളുടെ പക്ഷത്ത് ഉറപ്പിച്ചു. കുടിയേറ്റക്കാരെ പിന്തുണച്ചത് കൂടിയാണ് കോണ്‍ഗ്രസിനെയും ആള്‍ ഇന്ത്യാ യുണൈറ്റഡ് ഡെമോക്രാറ്റിക് ഫ്രോണ്ടിനെയും (എഐയുഡിഎഫ്) അസം പുറന്തള്ളാനുള്ള പ്രധാന കാരണങ്ങളിലൊന്ന്. ഇതോടെ അസമിലെ വോട്ടുകള്‍ ബിജെപിക്കും പ്രാദേശിക പാര്‍ട്ടികള്‍ക്കും വീതിക്കപ്പെട്ടു. ഹിമന്ത ശര്‍മ അവസരം പാഴാക്കാതെ പ്രാദേശിക കക്ഷികളായ ബോഡോ പാര്‍ട്ടിയും അസോം ഗണപരിഷത്തുമായി സഖ്യമുണ്ടാക്കുകയും ഭരണം ഉറപ്പിക്കുകയും ചെയ്തു. കോണ്‍ഗ്രസിനും ബിജെപിക്കും എഐയുഡിഎഫിനും വോട്ടു കൊടുക്കാന്‍ താത്പര്യമില്ലാത്ത ജനങ്ങളുടെ വോട്ടുകള്‍ നിലവില്‍ വീഴുമെന്ന് പ്രതീക്ഷിക്കുന്ന കക്ഷികളാണ് റായ്‌ജോര്‍ ദളും അസം ജാതിയ പരിഷത്തും. റായ്‌ജോര്‍ ദളിനെ നയിക്കുന്ന അഖില്‍ ഗോഗൊയ്ക്ക് മുമ്പ് കെജ്രിവാളുമായി ബന്ധമുണ്ടായിരുന്നു. ബന്ധം പുതുക്കാന്‍ ഇരുക്കൂട്ടരും തയ്യാറായാല്‍ നേട്ടം ആം ആദ്മിക്കാണ്. എല്ലാം കണക്കാക്കുമ്പോള്‍ ആപ്പ് കരുതുന്നത് പോലെ എളുപ്പമായിരിക്കില്ല അസമില്‍ വരാനിരിക്കുന്ന ദിവസങ്ങള്‍. ലോകസഭയില്‍ സീറ്റെന്ന ലക്ഷ്യം നടക്കണമെങ്കില്‍ പ്രാദേശിക കക്ഷികളുമായി സഖ്യത്തിലേര്‍പ്പെടാതെ ഇനി ആപ്പിന് വഴിയില്ല.
