Sumayya P | Samayam Malayalam | Updated: 13 Jul 2021, 09:35:41 AM
ആഗോള തലത്തില്‍ ഡിജിറ്റല്‍ മേഖലയിലുണ്ടായ മാറ്റങ്ങള്‍ ഉള്‍ക്കൊണ്ട് ആ രംഗത്തും വലിയ നേട്ടങ്ങള്‍ കൈവരിക്കുന്നതിലൂടെ രാജ്യത്തെ മികച്ച ഒരു ഡിജിറ്റല്‍ കമ്പോളമായി മാറ്റി എടുക്കാമെന്ന കണക്കുകൂട്ടലിലാണ് അധികൃതര്‍.
ഒരു ലക്ഷം കോഡര്‍മാര്‍ക്ക് ഗോള്‍ഡന്‍ വിസ
പദ്ധതിയുടെ ഭാഗമായി ഒരു ലക്ഷം മികച്ച കംപ്യൂട്ടര്‍ പ്രോഗ്രാമര്‍മാരെ രാജ്യത്തേക്ക് ആകര്‍ഷിക്കുവാനും അവര്‍ക്ക് ഗോള്‍ഡന്‍ വിസ നല്‍കുവാനുമാണ് യുഎഇ ഭരണകൂടം പദ്ധതിയിട്ടിരിക്കുന്നത്. കോഡിംഗ് മേഖലയില്‍ അതിവൈദഗ്ധ്യമുള്ളവരെയും ഈ രംഗത്ത് മികവ് പുലര്‍ത്തുന്ന വിദ്യാര്‍ഥികളെയും ബിരുദധാരികളെയുമാണ് പദ്ധതിയിലൂടെ അധികൃതര്‍ ലക്ഷ്യം വയ്ക്കുന്നത്. ഇതിലൂടെ അടുത്ത അഞ്ചു വര്‍ഷത്തിനുള്ളില്‍ രാജ്യത്ത് 1000 വന്‍കിട ഡിജിറ്റല്‍ കമ്പനികള്‍ തുടങ്ങാനും യുഎഇക്ക് പദ്ധതിയുണ്ട്. ആഗോള തലത്തില്‍ ഡിജിറ്റല്‍ മേഖലയിലുണ്ടായ മാറ്റങ്ങള്‍ ഉള്‍ക്കൊണ്ട് ആ രംഗത്തും വലിയ നേട്ടങ്ങള്‍ കൈവരിക്കുന്നതിലൂടെ രാജ്യത്തെ മികച്ച ഒരു ഡിജിറ്റല്‍ കമ്പോളമായി മാറ്റി എടുക്കാമെന്ന കണക്കുകൂട്ടലിലാണ് അധികൃതര്‍.
കോഡര്‍മാര്‍ക്ക് എല്ലാ സഹായങ്ങളും നല്‍കും
ലോകത്തിലെ മികച്ച കോഡര്‍മാരെ യുഎഇയിലേക്ക് ആകര്‍ഷിക്കുകയും അവര്‍ക്ക് മികച്ച സഹായങ്ങളും സൗകര്യങ്ങളും നല്‍കുന്നതിലൂടെ ഡിജിറ്റല്‍ മേഖലയില്‍ പുതിയ പരീക്ഷണങ്ങളും കണ്ടെത്തലുകളും നടത്താന്‍ അവരെ പ്രാപ്തരാക്കുകയും ചെയ്യുകയാണ് നാഷനല്‍ പ്രോഗ്രാം ഫോര്‍ കോഡേഴ്‌സ് എന്ന പദ്ധതി കൊണ്ട് ഉദ്ദേശിക്കുന്നതെന്ന് ആര്‍ട്ടിഫിഷ്യല്‍ ഇന്റലിജന്‍സ്, ഡിജിറ്റല്‍ ഇക്കോണമി സഹമന്ത്രി സുല്‍ത്താന്‍ അല്‍ ഉലമ പറഞ്ഞു. ഈ മേഖലയില്‍ മികച്ച സ്റ്റാര്‍ട്ടപ്പുകളും സ്ഥാപനങ്ങളും യുഎഇയില്‍ ഉണ്ടായിവരേണ്ടതുണ്ട്. ഇതിന്റെ ഭാഗമായാണ് കോഡര്‍മാര്‍ക്ക് ഗോള്‍ഡന്‍ വിസ വാഗ്ദാനം ചെയ്യുന്നതെന്നും മന്ത്രി പറഞ്ഞു. കോഡിംഗിന് വലിയ പ്രാധാന്യമുള്ള പദ്ധതികളില്‍ ഇവരുടെ സേവനം ഉപയോഗപ്പെടുത്തുമെന്നും അദ്ദേഹം അറിയിച്ചു.
പ്രായമോ രാജ്യമോ പ്രശ്‌നമല്ല
നാഷനല്‍ പ്രോഗ്രാം ഫോര്‍ കോഡേഴ്‌സ് പദ്ധയില്‍ ഉള്‍പ്പെടുത്തി നല്‍കുന്ന ഗോള്‍ഡന്‍ വിസയ്ക്ക് ഏത് പ്രായത്തിലുള്ളവര്‍ക്കും ഏത് രാജ്യക്കാര്‍ക്കും അപേക്ഷിക്കാം. കോഡിംഗിലുള്ള കഴിവാണ് മാനദണ്ഡം. അന്താരാഷ്ട്ര സോഫ്റ്റ് വെയര്‍ കമ്പനികളില്‍ ജോലി ചെയ്യുന്നവര്‍, പ്രോഗ്രാമിംഗ് മേഖലയില്‍ കഴിവ് തെളിയിച്ചവര്‍, സോഫ്റ്റ് വെയര്‍ എഞ്ചിനീയറിംഗ്, കംപ്യൂട്ടര്‍ സയന്‍സ്, ഹാര്‍ഡ് വെയര്‍ എഞ്ചിനീയറിംഗ്, ഇന്‍ഫര്‍മേഷന്‍ ടെക്‌നോളജി, ആര്‍ട്ടിഫിഷ്യല്‍ ഇന്റലിജന്‍സ്, ഡാറ്റ സയന്‍സ്, ബിഗ് ഡാറ്റ, ഇലക്ട്രിക്കല്‍ എഞ്ചിനീയറിംഗ് എന്നീ വിഷയങ്ങളില്‍ അക്കാദമിക മികവ് പുലര്‍ത്തിയ ബിരുദ ധാരികള്‍ തുടങ്ങിയവര്‍ക്കും അപേക്ഷിക്കാം. ഫെഡറല്‍ അതോറിറ്റി ഫോര്‍ ഐഡന്റിറ്റി ആന്റ് സിറ്റിസണ്‍ഷിപ്പിന് കീഴിലുള്ള ആര്‍ട്ടിഫിഷ്യല്‍ ഇന്റലിജന്‍സ് ഓഫീസ് വഴിയാണ് ഗോള്‍ഡന്‍ വിസയ്ക്കായി അപേക്ഷിക്കേണ്ടത്. 10 വര്‍ഷത്തേക്ക് പുതുക്കേണ്ടതില്ല എന്നതുള്‍പ്പെടെ വിവിധ ആനുകൂല്യങ്ങള്‍ ലഭിക്കുന്ന വിസയാണ് ഗോള്‍ഡന്‍ വിസ.
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : uae sets out plan to provide 100000 golden visas for worlds best coders
Malayalam News from malayalam.samayam.com, TIL Network
