ആരോഗ്യ ഇന്‍ഷുറന്‍സ് സംവിധാനം നടപ്പാക്കും
രാജ്യത്ത് ആരോഗ്യ ഇന്‍ഷുറന്‍സുമായി ബന്ധപ്പെട്ട നടപടിക്രമങ്ങള്‍ വലിയ തോതില്‍ പുരോഗമിക്കുകയാണൈന്നും പ്രധാനമന്ത്രി അറിയിച്ചു. ഈ സംവിധാനം നടപ്പിലാക്കുന്നത് സര്‍ക്കാര്‍ ആശുപത്രികള്‍ക്കു മേലുള്ള അധിക സമ്മര്‍ദ്ദം കുറയ്ക്കാന്‍ സഹായിക്കുമെന്ന് അദ്ദേഹം പറഞ്ഞു. നിലവില്‍ ബജറ്റിന്റെ 11 ശതമാനമാണ് ആരോഗ്യമേഖലയ്ക്കായി ചെലവഴിക്കുന്നത്. ആരോഗ്യമേഖലയുടെ ബജറ്റ് തുക 21 ബില്യണ്‍ റിയാലാണ്. രാജ്യത്തിലെ ജനങ്ങള്‍ക്ക് മികച്ച മെഡിക്കല്‍ സേവനങ്ങള്‍ ലഭ്യമാക്കുകയാണ് ആരോഗ്യ ഇന്‍ഷുറന്‍സ് സംവിധാനം നടപ്പാക്കുന്നതിലൂടെ ലക്ഷ്യമിടുന്നത്. നിലവിലെ നിയമം അനുസരിച്ച് ഒരു വിദേശിക്ക് ആരോഗ്യ ഇന്‍ഷുറന്‍സ് നിര്‍ബന്ധമാണ്. കൂടാതെ ആരോഗ്യ ഇന്‍ഷുറന്‍സ് നിയമവുമായി ബന്ധിപ്പിച്ചിട്ടുള്ള ഒരു കൂട്ടം നിയമങ്ങളും രാജ്യത്ത് നിലവിലുണ്ട്.
ലോകകപ്പിന് ശേഷം സാമ്പത്തിക മേഖലയിൽ ഉണർവ്
കഴിഞ്ഞ വര്‍ഷം നടന്ന ഫിഫ ലോകകപ്പ് ഖത്തര്‍ 2022, രാജ്യത്തിന്റെ സമ്പദ്വ്യവസ്ഥയിലും വിനോദസഞ്ചാര മേഖലയിലും വലിയ കുതിച്ചുചാട്ടത്തിന് വഴിവച്ചതായും പ്രധാനമന്ത്രി അഭിപ്രായപ്പെട്ടു. ലോകകപ്പിന് ശേഷം ഈ വര്‍ഷത്തെ ആദ്യ രണ്ട് മാസങ്ങളില്‍ ഏകദേശം 730,000 വിനോദസഞ്ചാരികളാണ് ഖത്തര്‍ സന്ദര്‍ശിച്ചത്. ലോകകപ്പിന് മുമ്പ് ഒരു വര്‍ഷം മുഴുവന്‍ രാജ്യത്തെത്തുന്ന വിനോദ സഞ്ചാരികളുടെ എണ്ണം ഇത്രയേ വരുമായിരുന്നുള്ളൂ. എന്നാല്‍ ലോകകപ്പിന് ശേഷം രണ്ട് മാസത്തിനുള്ളില്‍ ഇത് നേടിയെടുക്കാനായി. ലോകകപ്പ് കൊണ്ടുവന്ന പ്രധാന നേട്ടങ്ങളില്‍ ഒന്നാണിതെന്നും അദ്ദേഹം വിശദീകരിച്ചു. അടുത്ത ഘട്ടത്തില്‍ ഖത്തറിന്റെ വികസന പദ്ധതിയുടെ പ്രധാന സ്തംഭങ്ങളിലൊന്ന് ടൂറിസമായിരിക്കുമെന്നു പറഞ്ഞ അദ്ദേഹം, വരും മാസങ്ങളിലും വിനോദസഞ്ചാരികളുടെ എണ്ണത്തില്‍ വന്‍ വര്‍ദ്ധനവാണ് പ്രതീക്ഷിക്കുന്നതെന്നും അറിയിച്ചു.
ബിജെപി നേതാവിൻ്റെ വീടിന് മുന്നിൽ സമരം
ബിജെപി നേതാവിൻ്റെ വീടിന് മുന്നിൽ സമരം | bjp
ഖത്തര്‍ നാഷണല്‍ വിഷന്‍ 2030
ലോകകപ്പിനും മറ്റ് അന്താരാഷ്ട്ര കായിക മത്സരങ്ങള്‍ക്കും പുറമെ, നയതന്ത്ര വിഷയങ്ങളിലായാലും സാമ്പത്തിക മേഖലയിലായാലും ഖത്തര്‍ അന്താരാഷ്ട്ര തലത്തില്‍ ശ്രദ്ധേയമായി ചുവടുവയ്പ്പുകളാണ് നടത്തുന്നതെന്നും അദ്ദേഹം പറഞ്ഞു. ഏറ്റവും വലിയ കായിക ഇനമായ ലോകകപ്പിന് ആതിഥേയത്വം വഹിച്ചതിന്റെ വിജയം മറ്റ് ഇവന്റുകളും ടൂര്‍ണമെന്റുകളും വിജയകരമായി സംഘടിപ്പിക്കുന്നതിന് സഹായകമാവും. ലോകകപ്പിലൂടെ രാജ്യം കൈവരിച്ച അടിസ്ഥാന സൗകര്യങ്ങള്‍ ഉള്‍പ്പെടെയുള്ള വികസന പദ്ധതികള്‍ ഖത്തര്‍ നാഷണല്‍ വിഷന്‍ 2030-ന്റെ ഭാഗമായാണ് നടപ്പിലാക്കിയത്. ആ പദ്ധതിയുടെ വേഗവും അതിന്റെ നടത്തിപ്പും ത്വരിതപ്പെടുത്തുന്നതിന് ലോകകപ്പ് ഗണ്യമായ സംഭാവന നല്‍കി. ടൂര്‍ണമെന്റില്‍ നിന്നുള്ള സാമ്പത്തിക നേട്ടം എത്രയാണ് കണക്കാക്കി വരുന്നതേയുള്ളൂ എന്നും അദ്ദേഹം പറഞ്ഞു. ഇത്രയും വലിപ്പമുള്ള ഒരു ഇവന്റ് വിജയകരമായി കൈകാര്യം ചെയ്യാന്‍ കഴിഞ്ഞ ഒരു ചെറിയ അറബ്, മുസ്ലീം രാജ്യമെന്ന നിലയില്‍ ഖത്തറിന് ലഭിച്ച അംഗീകാരമാണിത്. ലോകത്തെ മുഴുവന്‍ അമ്പരപ്പിക്കുന്ന തരത്തില്‍ ദൈവത്തിന്റെ സഹായത്താലും പൗരന്മാരുടെയും താമസക്കാരുടെയും പിന്തുണയോടെയുമാണ് ഖത്തര്‍ ഈ നേട്ടം കൈവരിച്ചതെന്നും അദ്ദേഹം പറഞ്ഞു.
