‘ഇത് ഇന്ത്യയല്ല, പഞ്ചാബാണ്’: മുഖത്ത് ദേശീയ പതാകയുമായെത്തിയ യുവതിക്ക് സുവർണ ക്ഷേത്രത്തിലേക്കുള്ള പ്രവേശനം നിഷേധിച്ചു

സുവർണക്ഷേത്രത്തിൽ പ്രവേശിക്കാൻ അനുവദിക്കാത്ത ആരാധനാലയത്തിലെ ജീവനക്കാരനോട് യുവതിയുടെ ഒപ്പമുള്ളയാളും ചേർന്ന് വഴക്കിടുന്നത് ദൃശ്യങ്ങളിൽ കാണാം. എന്തുകൊണ്ടാണ് യുവതിയെ ഗുരുദ്വാരയിലേക്ക് പ്രവേശിക്കാൻ അനുവദിക്കാത്തതെന്ന് ചോദിക്കുമ്പോൾ കാരണമായി ജീവനക്കാരൻ പറയുന്നതാണ് കൂടുതൽ ആളുകളേയും ചോടിപ്പിച്ചിരിക്കുന്നത്. ഇത് പഞ്ചാബാണ്, ഇന്ത്യയല്ല എന്നായിരുന്നു യുവതിയോട് ജീവനക്കാരൻ പറഞ്ഞത്.

എന്നാൽ, സംഭവം വിവാദമായതോടെ മാപ്പ് പറഞ്ഞ് ക്ഷേത്രം കമ്മിറ്റിയും രംഗത്തുവന്നിട്ടുണ്ട്. സുവർണ ക്ഷേത്രത്തിലുണ്ടായ മോശം പെരുമാറ്റത്തിൽ ശിരോമണി ഗുരുദ്വാര പ്രബന്ധക് കമ്മിറ്റി ജനറൽ സെക്രട്ടറി ഗുരുചരൺ സിങ്ങ് ഗ്രീവാൾ ക്ഷമ ചോദിച്ച് രംഗത്തുവന്നിട്ടുണ്ട്. യുവതിയുടെ മുഖത്ത് പെയ്ന്റ് ചെയ്തിരുന്നത് തൃവർണപതാക ആയിരുന്നില്ലെന്നും അദ്ദേഹം വിശദീകരിച്ചു.

“ഇതൊരു സിഖ് ആരാധനാലയമാണ്. എല്ലാ മതസ്ഥാലങ്ങൾക്കും അതിന്റേതായ പ്രത്യേകതകളുണ്ട്. എല്ലാവരേയും ഞങ്ങൾ ഇവിടേക്ക് സ്വാഗതം ചെയ്യുന്നു. ഒരു ജീവനക്കാരൻ മോശമായി പെരുമാറിയെങ്കിൽ ഞങ്ങൾ ക്ഷമ ചോദിക്കുന്നു. അവരുടെ മുഖത്തുണ്ടായിരുന്നത് ദേശീയ പതാക ആയിരുന്നില്ല. അതിൽ അശോക ചക്രം താൻ കണ്ടില്ല. മിക്കവാറും ഇത് ഒരു രാഷ്ട്രീയ പാർട്ടിയുടെ പതാകയാകും” ഗ്രെവാൾ പറഞ്ഞു.

ഈ വിഷയത്തിൽ ആളുകൾ നടത്തുന്ന ട്വീറ്റ് വളരെ മോശമാണെന്നും ഗുർചരൺ സിംഗ് ഗ്രെവാൾ പറഞ്ഞു. ശ്രീ ഹർമന്ദിർ സാഹിബിലേക്ക് രാജ്യത്തിന്റെ വിവിധ ഭാഗങ്ങളിൽ നിന്നും വിദേശത്തു നിന്നും എത്തുന്ന എല്ലാ ഭക്തരേയും ബഹുമാനിക്കുന്നുവെന്നും ചൂണ്ടിക്കാണിക്കുന്നു.

രാജ്യത്തിന്റെ സ്വാതന്ത്ര്യത്തിന് വേണ്ടി സിഖ് വിഭാഗക്കാരും നിർണായകമായ പങ്ക് വഹിച്ചിട്ടുണ്ട്. പക്ഷെ എല്ലാക്കാലത്തും സിഖ് സമൂഹം ആക്രമിക്കപ്പെടുന്നുവെന്നും അദ്ദേഹം പറയുന്നു.

Also Read :ജഗദീഷ് ഷെട്ടാർ കോൺഗ്രസിൽ; ബിജെപിക്ക് കനത്ത തിരിച്ചടി, അപമാനിച്ച് ഇറക്കിവിട്ടെന്ന് ഷെട്ടാർ

അതേസമയം, ജീവനക്കാരൻ ഇത് ഇന്ത്യയല്ല എന്ന് പറഞ്ഞതിനേക്കുറിച്ച് മറുപടി പറയുവാൻ ഗ്രെവാൾ തയ്യാറായില്ല. ഇന്ത്യാ പാക് അതിർത്തിയായ വാഗ പ്രദേശത്ത് ബീറ്റിംഗ് റിട്രീറ്റ് ചടങ്ങിനായി എത്തുന്ന നിരവധി ആളുകൾ അവരുടെ മുഖം ത്രിവർണ്ണത്തിൽ ചായം പൂശുകയും തുടർന്ന് സുവർണ്ണ ക്ഷേത്രം സന്ദർശിക്കുകയും ചെയ്യാറുണ്ട്. ഇത്തരത്തിൽ സന്ദർശിച്ച സ്ത്രീയാകാം ഇവർ എന്നാണ് ദേശീയ മാധ്യമങ്ങൾ റിപ്പോർട്ട് ചെയ്യുന്നത്.

Read LatestNational NewsandMalayalam News