ലോകത്താദ്യം
ഈ ടെസ്റ്റിങ് ട്രാക്കിന്റെ പല പ്രത്യേകതകളിലൊന്ന് അതിന്റെ സാങ്കേതികമായ സമഗ്രതയായിരിക്കും. ഇത്തരത്തിൽ സമഗ്രതയുള്ള ഒരു ടെസ്റ്റിങ് ട്രാക്ക് ലോകത്തെവിടെയുമില്ലെന്നാണ് റിപ്പോർട്ടുകൾ പറയുന്നത്. ട്രെയിൻ ടെസ്റ്റിങ്ങിന്റെ അന്തർദ്ദേശീയ മാനദണ്ഡങ്ങളിലേക്ക് പൂര്‍ണമായി മാറുന്നതിനുള്ള നീക്കങ്ങൾ 2017ൽ തന്നെ ഇന്ത്യൻ റെയിൽവേ തുടങ്ങിവെച്ചിരുന്നു. ഇന്റർനാഷണൽ യൂണിയൻ ഓഫ് റെയിൽവേയ്സ്, ട്രെയിനുകളുടെ ടെസ്റ്റിങ്ങിനും അപ്രൂവലിനുമായി തയ്യാറാക്കിയിട്ടുള്ള മാർഗ്ഗനിർദ്ദേശങ്ങൾ അനുസരിക്കുന്നതായിരിക്കും ജോധ്പുരിലെ പുതിയ ടെസ്റ്റിങ് ട്രാക്ക്.
59 കിലോമീറ്റർ ദൈർഘ്യമുള്ള ഒരു ടെസ്റ്റിങ് ട്രാക്കാണ് ജോധ്പൂരിൽ തയ്യാറാകുന്നത്. ലഖ്നൗവിലെ റിസർച്ച് ഡിസൈൻ ആൻഡ് സ്റ്റാൻഡാർഡ്സ് ഓർഗനൈസേഷനാണ് ഈ ട്രാക്കിന്റെ സാങ്കേതിക സന്നാഹങ്ങൾ വികസിപ്പിക്കുന്നത്. ആദ്യഘട്ടത്തിൽ 25 കിലോമീറ്റർ ദൈർഘ്യമുള്ള ട്രാക്കാണ് തയ്യാറാക്കുക. രണ്ടാമത്തെ ഘട്ടത്തിൽ ദൈർഘ്യം ഇരട്ടിയായി വർധിപ്പിക്കും.
നിലവിൽ ഈ ട്രാക്കിന്റ ജോലികൾ വലിയൊരളവ് മുന്നേറിയിട്ടുണ്ട്. 2023 ഡിസംബർ മാസത്തോടെ ടെസ്റ്റ് ട്രാക്ക് പൂർത്തിയാകും. പരമാവധി 2024 മാർച്ച് മാസം വരെ നീണ്ടേക്കും. ഇത് സമയബന്ധിതമായി പൂർത്തിയായാൽ രണ്ടാംഘട്ടം ആരംഭിക്കും. 2024ൽ രണ്ടാംഘട്ട നിർമ്മാണം പൂർത്തിയാക്കാനാണ് പദ്ധതി.
രണ്ടാംഘട്ടത്തിലാണ് കർവുകളും എലിവേഷനുകളുമെല്ലാം ടെസ്റ്റ് ചെയ്യാൻ ഉതകുന്ന ട്രാക്ക് വരിക. ടെസ്റ്റ് ട്രാക്കിൽ 20 കിലോമീറ്റർ കർവ് (വളവ്) ടെസ്റ്റിങ് ലൂപ് ആയിരിക്കും. ആകെ 34 കിലോമീറ്ററാണ് രണ്ടാംഘട്ടത്തിൽ നിർമ്മിക്കുക.
മണിക്കൂറിൽ 220 കിലോമീറ്റർ വേഗതയിൽ ഡൈനമിക് ഓസിലേഷൻ ട്രയലുകൾ ഈ ട്രാക്കിൽ നടത്താനാകും. എല്ലാത്തരം സുരക്ഷാ മാനദണ്ഡങ്ങളും ഇവിടെ ടെസ്റ്റ് ചെയ്യാനുള്ള സൗകര്യമുണ്ടായിരിക്കും. ക്രാഷ് ടെസ്റ്റിങ്, സ്റ്റെബിലിറ്റി ടെസ്റ്റിങ്, ട്വിസ്റ്റ് ആൻഡ് യോ ടെസ്റ്റിങ്, വീൽ ഓഫ്‌സോഡിങ് ടെസ്റ്റ്, എക്സ് ഫാക്ടർ ടെസ്റ്റ്, ബോഗി റൊട്ടേഷണൽ റസിസ്റ്റൻസ് ടെസ്റ്റ്സ് തുടങ്ങിയ പരിശോധനകൾക്ക് ജോധ്പൂരിലെ ഈ സംവിധാനം സജ്ജമായിരിക്കും.
എല്ലാത്തരത്തിലുള്ള സിഗ്നലിങ് സംവിധാനങ്ങളും ഒരുക്കിയാണ് ടെസ്റ്റുകൾ നടക്കുക.
വന്ദേ ഭാരത് ട്രെയിനുകൾക്കു വേണ്ടി
സമീപഭാവിയിൽത്തന്നെ സെമി സ്പീഡ് ട്രെയിനുകളുടെ വലിയൊരുകൂട്ടം ട്രാക്കുകളിലേക്ക് ഇറങ്ങുകയാണ്. നൂറ് വന്ദേഭാരത് ട്രെയിനുകൾ നിർമ്മിക്കുന്നതിന് റെയിൽവേ ടെൻഡർ നടപടികൾ പൂർത്തീകരിച്ചു വരുന്നുണ്ട്. 30,000 കോടി രൂപയുടെ പ്രൊജക്ടാണിത്. ഫ്രാൻസിന്റെ ആല്‍സ്റ്റോം, മേധ എന്നീ കമ്പനികളും, സ്വിറ്റ്സർലാൻഡിൽ നിന്നുള്ള സ്റ്റഡ്‌ലറുമെല്ലാം രംഗത്തുണ്ട്. ഭൂരിഭാഗവും അലൂമിനിയം ഉപയോഗിച്ചുള്ള ട്രെയിനുകളാണ് നിർമ്മിക്കുക. അതിവേഗം ഗതിവേഗം പിടിക്കാൻ ഇവയ്ക്കാകും.
അതെസമയം നിലവിലെ ട്രാക്കുകളിൽ 220 കിലോമീറ്റർ ഗതിവേഗം പിടിക്കാൻ കഴിയില്ലെന്നതാണ് വസ്തുത. 220 കിലോമീറ്റർ ഗതിവേഗം പിടിക്കാൻ കഴിയുന്ന ടെസ്റ്റ് ട്രാക്ക് നിർമ്മിക്കുന്നു എന്നതിനർത്ഥം അത്രയും വേഗതയുള്ള ട്രെയിനുകൾ ടെസ്റ്റ് ചെയ്ത് പുറത്തിറക്കുമെന്നല്ല. നിലവിലെ സ്ഥിതി പ്രകാരം മണിക്കൂറിൽ 160 കിലോമീറ്റർ വരെ ഗതിവേഗം താങ്ങാനേ നമ്മുടെ ട്രാക്കുകൾക്ക് സാധിക്കൂ. കൂടിയ വേഗം ഭാവിയിൽ നമുക്ക് പിടിക്കാനാകും.
നിലവിൽ ഇന്ത്യക്ക് അതിവേഗ ട്രെയിനുകളില്ല. ഡല്‍ഹി-ഭോപ്പാൽ സെമി സ്പീഡ് വന്ദേഭാരത് ട്രെയിനാണ് ഏറ്റവും ഉയർന്ന വേഗതയിൽ സഞ്ചരിക്കുന്ന ട്രെയിൻ. ഈ ട്രെയിനിന് മണിക്കൂറിൽ 180 കിലോമീറ്റർ വേഗത പിടിക്കാൻ കഴിയുമെങ്കിലും, നിലവിൽ മണിക്കൂറിൽ 160 കിലോമീറ്റർ വേഗതയിലാണ് സഞ്ചരിക്കുന്നത്. കേരളത്തിലും വന്ദേഭാരത് ട്രെയിൻ ഓടിത്തുടങ്ങിയെങ്കിലും ഈ വേഗത സ്വപ്നങ്ങളിൽ മാത്രമാണ്. ഇതിന്റെ പകുതിയിലും താഴെ വേഗത മാത്രമേ നിലവിലെ ട്രാക്ക് സംവിധാനത്തിൽ സാധ്യമാകൂ.
