അപ്രതീക്ഷിത രാജി പ്രഖ്യാപനം; പൊട്ടിക്കരഞ്ഞ് നേതാക്കൾ; പ്രഖ്യാപനം പിൻവലിക്കണമെന്ന് അണികൾ; എൻസിപി തലപ്പത്തേക്ക് അജിത് പവാറോ?

എൻസിപി നേതാക്കൾക്കിടയിലും പ്രവർത്തകർക്കിടയിലും വലിയ ഞെട്ടലാണ് പ്രഖ്യാപനമുണ്ടാക്കിയത്. വളരെ വൈകാരികമായാണ് പവാറിന്റെ തീരുമാനം നേതാക്കൾ കേട്ടത്. മുതിർന്ന നേതാവ് ജയന്ത് പാട്ടീൽ പവാറിന്റെ മുന്നിൽ പൊട്ടിക്കരഞ്ഞു. പാർട്ടി അധ്യക്ഷൻ തീരുമാനം മാറ്റണമെന്ന് ആവശ്യപ്പെട്ട് പ്രമുഖർ രംഗത്തുവന്നിട്ടുണ്ട്.

മുതിർന്ന നേതാക്കളായ ഛഗൻ ഭുജ്ബൽ, ജിതേന്ദ്ര അവ്ഹാദ്, ദിലീപ് വാൽസെ എന്നിവർ പവാറിന്റെ തീരുമാനം അംഗീകരിക്കാൻ തയ്യാറല്ലെന്ന് പറഞ്ഞുകഴിഞ്ഞു. ഒരു വിഭാഗം പാർട്ടി പ്രവർത്തകർ പരിപാടി നടന്ന ഓഡിറ്റോറിയത്തിന് മുന്നിൽ കുത്തിയിരിപ്പ് സത്യാഗ്രഹം നടത്തി. ഇവർ പവാറിനെ പിന്തുണച്ച് മുദ്രാവാക്യം വിളിക്കുകയും ചെയ്തു.

അതേസമയം, ശരദ് പവാർ ഒഴിയുന്നതോടെ പാർട്ടി തലപ്പത്തേക്ക് ആര് എത്തുമെന്നുള്ള ചോദ്യങ്ങളും ഉയർന്നിട്ടുണ്ട്. ശരദ് പവാറിന്റെ മകൾ സുപ്രിയ സുലേയുടെ പേരും മരുമകനും മുൻ ഉപമുഖ്യമന്ത്രിയുമായ അജിത് പവാറിന്റെ പേരും ഉയർന്ന് കേൾക്കുന്നുണ്ട്. അതേസമയം, ഇത് സംബന്ധിച്ച് എപ്പോൾ തീരുമാനമുണ്ടാകുമെന്ന് വ്യക്തമല്ല.

പാർട്ടി അധ്യക്ഷ സ്ഥാനത്ത് പുറത്തുവന്നാലും സജ്ജീവ രാഷ്ട്രീയത്തിൽ തുടരുമെന്നും പാവപ്പെട്ട ജനങ്ങൾക്കൊപ്പം പ്രവർത്തിക്കുമെന്നും അദ്ദേഹം വ്യക്തമാക്കിക്കഴിഞ്ഞു. നമുക്ക് ഒന്നിച്ച് പ്രവർത്തിക്കാം പക്ഷെ എന്റെ രാജി സ്വീകരിക്കൂ എന്നായിരുന്നു ശരദ് പവാറിന്റെ വാക്കുകൾ.

സുപ്രിയയും അജിത് പവാറും ഉള്ള വേദിയിലാണ് പവാറിന്റെ രാജി പ്രഖ്യാപനമുണ്ടായിരിക്കുന്നത്. സുപ്രിയ ആണോ താനാണോ അധ്യക്ഷസ്ഥാനത്തേക്ക് എത്തുക എന്നത് കമ്മിറ്റി തീരുമാനിക്കും എന്ന പ്രതികരണവുമായി അജിത് പവാർ രംഗത്തുവന്നിട്ടുണ്ട്.

Also Read : പൂർത്തിയാക്കിയത് വെറും 11 മാസം കൊണ്ട്; നിൽക്കുന്നത് 96 കേബിളുകളിൽ; അൻജി ഖഡ് പാലത്തിന്റെ പ്രത്യേകതകൾ ഇങ്ങനെ

അജിത് പവാർ തലപ്പത്തേക്ക് എത്തിയാൽ നിലവിലെ സഖ്യത്തിൽ നിന്നും മാറി ബിജെപി പാളയത്തിലേക്ക് എത്തുമോ എന്നും കണ്ടറിയേണ്ടതാണ്. അടുത്തിടെ അദ്ദേഹം ബിജെപിയിൽ എത്തുമെന്ന തരത്തിൽ അഭ്യൂഹങ്ങൾ ഉയർന്നിരുന്നു.

Read Latest National News and Malayalam News