ഹിന്ദു-മുസ്ലിം-ക്രിസ്ത്യൻ വിഭാഗങ്ങളെ പ്രതിസന്ധിയിലാക്കിയ ഗോവധ നിരോധനം; ബീഫ് രാഷ്ട്രീയം കർണാടകത്തിന്റെ കാർഷിക സമ്പദ്‌വ്യവസ്ഥയെ തകർക്കുന്നത് ഇങ്ങനെ

ഗുജറാത്ത്, മഹാരാഷ്ട്ര, ഉത്തര്‍പ്രദേശ്, ഡല്‍ഹി, മധ്യപ്രദേശ് എന്നിവിടങ്ങളില്‍ നേരത്തെ തന്നെ എല്ലാതരം കന്നുകാലികളുടെയും കശാപ്പിന് നിരോധനമുണ്ട്. കര്‍ണാടകയില്‍ വര്‍ഷങ്ങളായി നിയന്ത്രണങ്ങളോടെയാണ് കന്നുകാലി കശാപ്പു നടത്തിയിരുന്നത്. 2021 ഫെബ്രുവരിയില്‍ നിലവില്‍ വന്ന കര്‍ണാടക കന്നുകാലി സംരക്ഷണം, കശാപ്പു നിരോധന നിയമം, 2020, പശുക്കളെ മാത്രമല്ല എല്ലാതരം കന്നുകാലികളുടെയും കശാപ്പു നിരോധിച്ചു. നിയമം നിലവില്‍ വന്നപ്പോള്‍ ഒറ്റദിവസം കൊണ്ട് തൊഴില്‍ നഷ്ടമായത് നിരവധി പേര്‍ക്കാണ്. കശാപ്പുശാലകള്‍, തുകല്‍ നിര്‍മാണ ശാല, ഹോട്ടലുകള്‍, ബീഫ് സ്റ്റാളുകള്‍ എന്നിവിടങ്ങളില്‍ പ്രവര്‍ത്തിച്ചിരുന്നവരുടെ ജോലി നഷ്ടമായി. ഗ്രാമീണ മേഖലയില്‍ കൃഷിക്കാര്‍ക്ക് മറ്റൊരു വരുമാന മാര്‍ഗമാണ് നഷ്ടമായത്.

പശു സംരക്ഷണവും തകരുന്ന സാമ്പത്തിക മേഖലയും



1964-ല്‍ നിലവില്‍ വന്ന കര്‍ണാടക പശു കശാപ്പു നിരോധനം, കന്നുകാലി സംരക്ഷണ നിയമത്തിന്റെ അടിസ്ഥാനത്തില്‍ 60 വര്‍ഷത്തോളമായി കര്‍ണാടകയില്‍ പശുക്കളെ കശാപ്പു ചെയ്യുന്നത് നിരോധനമുണ്ട്. 1966-ലും 1975-ലും നിയമത്തില്‍ ഭേദഗതികള്‍ കൊണ്ടുവന്നെങ്കിലും പശുക്കളല്ലാതെയുള്ള കന്നുകാലികളെ കശാപ്പു ചെയ്യുന്നതിന് വലിയ നിയന്ത്രണങ്ങളുണ്ടായിരുന്നില്ല. 12 വയസ്സു പൂര്‍ത്തിയായ പോത്ത്, എരുമ, കാള തുടങ്ങിയവയെയും ഉത്പാദനശേഷിയും പ്രത്യുത്പാദന ശേഷിയും കുറഞ്ഞവയോ കറവ വറ്റിയതോ എന്തെങ്കിലും വൈകല്യങ്ങളോ അപകടങ്ങളോ ഉള്ളവയോ ആയ പശുക്കളല്ലാത്ത കന്നുകാലികളെ കശാപ്പു ചെയ്യുന്നതിന് ഇത്രയും കാലം കര്‍ണാടകയില്‍ അനുമതിയുണ്ടായിരുന്നു. 2021 ഫെബ്രുവരിയില്‍ കര്‍ണാടകയില്‍ ഇതും നിര്‍ത്തലാക്കി. കന്നുകാലികളെ കൊണ്ടുപോകാന്‍ ഉപയോഗിക്കുന്ന വാഹനങ്ങളും കശാപ്പിന് ഉപയോഗിക്കുന്ന വലിയപാത്രങ്ങള്‍ പോലും പിടിച്ചെടുക്കാന്‍ പുതിയ നിയമം അധികാരം നല്‍കുന്നു. സംസ്‌കാര സംരക്ഷണമാണ് കന്നുകാലി കശാപ്പു നിരോധന നിയമത്തിന്റെ മുഖ്യലക്ഷ്യമെന്നും കന്നുകാലി വ്യാപാരത്തിന് പ്രാധാന്യം നല്‍കുന്നില്ലെന്നും കര്‍ണാടകയിലെ മുതിര്‍ന്ന ബിജെപി നേതാവ് പറഞ്ഞിരുന്നു. കന്നുകാലി കശാപ്പു നിരോധന നിയമം നിലവില്‍ വന്ന് രണ്ടുവര്‍ഷത്തോളമാകുമ്പോള്‍ കന്നുകാലി വ്യാപാരത്തിലൂടെ ഉപജീവനം കണ്ടെത്തിയവര്‍ക്ക് എന്ത് സംഭവിച്ചുവെന്ന് സര്‍ക്കാര്‍ പോലും ഗൗനിക്കുന്നില്ല.

കന്നുകാലി കശാപ്പു നിരോധന നിയമം ഏറ്റവും കൂടുതല്‍ പ്രത്യാഘാതമേല്‍പ്പിച്ച ഒരു വിഭാഗം കര്‍ഷകരാണ്. ഉത്പാദന ശേഷി കുറഞ്ഞതും വില്‍ക്കാന്‍ വളര്‍ത്തിയതുമായ കന്നുകാലികളെ കര്‍ഷകര്‍ക്ക് എന്തു ചെയ്യണമെന്നറിയില്ല. കാലിത്തീറ്റയ്ക്കും മറ്റും വിലകൂടിയതോടെ ഉത്പാദനം കുറഞ്ഞ മാടുകളെ വളര്‍ത്തുന്നത് കര്‍ഷകര്‍ക്ക് ലാഭമല്ല. ബിജെപി സര്‍ക്കാര്‍ 2021-ല്‍ നിയമം നടപ്പിലാക്കിയതോടെ കര്‍ണാടകയിലെ കാലി ചന്തകളില്‍ ആളൊഴിഞ്ഞ് തുടങ്ങി. 15,000 രൂപയെങ്കിലും വില പ്രതീക്ഷിക്കുന്ന മാടുകളെ 5000 രൂപയ്ക്ക് വില്‍ക്കാന്‍ കര്‍ഷകര്‍ നിര്‍ബന്ധിതരാകുകയാണ്. സര്‍ക്കാരിനെയും ഗോ സംരക്ഷകരെയും ഭയന്ന് കന്നുകാലി വ്യാപാരത്തില്‍ നിന്ന് വ്യാപാരികള്‍ പിന്‍മാറുകയാണ്. അയല്‍ സംസ്ഥാനങ്ങളായ കേരളത്തിലെയും തമിഴ്‌നാട്ടിലെയും കാലി ചന്തകളിലേക്കും കശാപ്പു ശാലകളിലേക്കും മാടുകളെ എത്തിക്കാനാണ് കര്‍ഷകര്‍ ശ്രമിക്കുന്നത്.

ഉടമകള്‍ക്ക് മാടുകളെ വില്‍ക്കാന്‍ ഇന്ന് കര്‍ണാടകയില്‍ ഗോ സംരക്ഷകരെ മാത്രം ഭയന്നാല്‍ പോരാ, സര്‍ക്കാരിനെയും ഭയക്കണം. അക്ഷരാര്‍ഥത്തില്‍ മാടുകളെ വലിയ കൂലി നല്‍കി അയല്‍ സംസ്ഥാനങ്ങളിലേക്ക് കടത്തിക്കൊണ്ടു പോകേണ്ട അവസ്ഥയിലാണ് ഉടമകള്‍. ഒരു പ്രത്യേക വിഭാഗത്തിനെ ലക്ഷ്യം വെച്ചാണ് ബിജെപി സര്‍ക്കാര്‍ നിയമം കൊണ്ടുവന്നതെങ്കിലും ഹിന്ദു, മുസ്ലിം, ക്രിസ്ത്യന്‍ എന്നിങ്ങനെ വിവിധ മതവിഭാഗങ്ങളില്‍ പെട്ടവര്‍ ഒരുപോലെ ബാധിക്കപ്പെട്ടു. നിയമം കൂട്ടുപിടിച്ച് കാലികളുമായി പോകുന്നവരെ ആക്രമിക്കുന്നതും സംസ്ഥാനത്ത് കുറവല്ല. ഇതേ പേരില്‍ 2020 മാര്‍ച്ചില്‍ ആള്‍ക്കൂട്ട ആക്രമണത്തില്‍ ഒരാള്‍ കൊല്ലപ്പെട്ടു. ഇത്തരം സംഭവങ്ങള്‍ കന്നുകാലികളെ വാങ്ങുന്നതില്‍ നിന്നും വില്‍ക്കുന്നതില്‍ നിന്നും വ്യാപാരികളെ പിന്തിരിപ്പിച്ചു. നിരവധി പാരമ്പര്യ വ്യാപാരികളും കശാപ്പുകാരും കന്നുകാലി വ്യാപാരത്തില്‍ നിന്ന് പിന്മാറാന്‍ തുടങ്ങി. അറുപതും എഴുപതും വര്‍ഷം കശാപ്പുമേഖലയില്‍ പ്രവര്‍ത്തിച്ചിരുന്നവര്‍ പുതിയ തൊഴില്‍ മേഖല തേടുകയാണ്.

പാരമ്പര്യമായി കശാപ്പു മേഖലയില്‍ പ്രവര്‍ത്തിച്ചിരുന്ന കര്‍ണാടകയിലെ ഖുറേഷി വിഭാഗത്തില്‍പ്പെട്ടവര്‍ അത്തരത്തില്‍ ജോലി അന്വേഷിച്ച് ജന്മനാട് വിട്ടുപോകാന്‍ നിര്‍ബന്ധിതരായവാണ്. നാട്ടില്‍ തന്നെ കഴിയേണ്ടി വന്നവര്‍ക്ക് മുമ്പത്തേക്കാള്‍ പകുതിയിലും കുറവ് വരുമാനത്തിന് ജോലി ചെയ്യേണ്ടി വന്നു. കര്‍ണാടകയിലെ 18 കോടി വരുന്ന മുസ്ലിം, ക്രിസ്ത്യന്‍, ദളിത്, മറ്റു പിന്നാക്ക വിഭാഗങ്ങളിലുള്ളവര്‍ക്ക് കുറഞ്ഞ ചെലവില്‍ ലഭിക്കുന്ന പോഷക സമ്പുഷ്ടമായ ആഹാരമാണ് ബീഫ്. കന്നുകാലി കശാപ്പിനേര്‍പ്പെടുത്തിയ നിരോധനം ഇവരെ ബദല്‍ തേടാന്‍ നിര്‍ബന്ധിക്കുന്നു. പോത്ത്, കാള തുടങ്ങിയ മാടുകളെ വളര്‍ത്തുന്നത് ലാഭകരമല്ലാത്തതിനാല്‍ കര്‍ഷകര്‍ കൂടുതല്‍ പശു വളര്‍ത്തലിലേക്ക് തിരിഞ്ഞത് സംസ്ഥാനത്തിന്റെ സാമ്പത്തിക മേഖലയെ ബാധിച്ചിട്ടുണ്ട്. കൂടുതല്‍ പേര്‍ ക്ഷീര മേഖലയിലേക്ക് തിരിഞ്ഞത് ഉത്പാദനം കൂടുന്നതിലേക്ക് വഴിവെച്ചു. ഉത്പാദനം കൂടിയതിനനുസരിച്ച് വിപണിയില്ലാത്തതിനാല്‍ പാലിന് വിലകുറയുന്നതും കര്‍ഷകരെ ബാധിക്കുന്നുണ്ട്. തുകല്‍ നിര്‍മാണ മേഖലയെ ആശ്രയിച്ച് ജീവിച്ചിരുന്നവരും സമാന രീതിയില്‍ ജോലിയും വരുമാനവും നഷ്ടപ്പെട്ടവരില്‍ ഉള്‍പ്പെടുന്നു. കേരളത്തിൽ മിൽ‌മ പാലിന് ഉയർന്ന വില നൽകേണ്ടി വരുമ്പോൾ കർണാടകത്തിന്റെ നന്ദിനി പാലിന് താരതമ്യേന കുറഞ്ഞ വിലയാണ്.

ഇത്രയധികം മേഖലകള്‍ ഇല്ലാതാകുമ്പോഴും ബാധിക്കപ്പെട്ടവര്‍ നിശബ്ദരാകാന്‍ നിര്‍ബന്ധിതരാകുകയാണ്. പ്രതിഷേധിക്കുന്നവരെ മതത്തിന്റെയും ജാതിയുടെയും പേരില്‍ ആക്രമിക്കുമോ എന്ന ഭയം തന്നെ പ്രധാന കാരണം. കര്‍ണാടകയിലെ ചുരുക്കം കര്‍ഷക-ദളിത് സംഘടനകള്‍ മാത്രമാണ് കന്നുകാലി കശാപ്പു നിരോധനത്തിനെ എതിര്‍ത്തു കൊണ്ട് മുന്നോട്ടു വന്നു. എന്നാല്‍ ഇത്തരം പ്രതിഷേധങ്ങള്‍കൊണ്ട് കാര്യമായ പുരോഗതിയുണ്ടായിട്ടില്ല.