കുവൈറ്റില്‍ കുറ്റകൃത്യങ്ങള്‍ വര്‍ധിക്കുന്നു; പിന്നില്‍ മയക്കുമരുന്നെന്ന് കണ്ടെത്തല്‍

കുവൈറ്റ് സിറ്റി: കുവൈറ്റില്‍ അടുത്ത കാലത്തായി വര്‍ധിച്ചു വരുന്ന കുറ്റകൃത്യങ്ങള്‍ക്കു പിന്നില്‍ മയക്കു മരുന്നിന്റെ ഉപയോഗമാണെന്ന് കണ്ടെത്തല്‍. രാജ്യത്ത് റിപ്പോര്‍ട്ട് ചെയ്യപ്പെട്ട കുറ്റകൃത്യങ്ങളില്‍ 65 ശതമാനവും മയക്കുമരുന്നിന്റെ ഉപയോഗം മൂലമുള്ളതോ മയക്കുമരുന്നുമായി ബന്ധപ്പെട്ടതോ ആണെന്ന് ഇതുമായി ബന്ധപ്പെട്ട സ്ഥിതിവിവരക്കണക്കുകള്‍ വ്യക്തമാക്കുന്നു.



50 കേസുകളില്‍ ചുരുങ്ങിയത് 35 എണ്ണവത്തിന്റെയെങ്കിലും പിന്നില്‍ മയക്കുമരുന്നാണ്. മയക്കു മരുന്ന് വില്‍പ്പന, ഉപയോഗം, ഉല്‍പ്പാദനം എന്നിവയുമായി ബന്ധപ്പെട്ട കേസുകള്‍ ഉള്‍പ്പെടെയാണിത്. രാജ്യത്ത് ജയിലുകളില്‍ കഴിയുന്ന 60 ശതമാനത്തോളം പേരും മയക്കുമരുന്നുമായി ബന്ധപ്പെട്ട കേസുകളില്‍ ശിക്ഷിക്കപ്പെട്ടവരാണ്. ഇവരില്‍ 93 ശതമാനം പേരും പുരുഷന്‍മാരാണെന്നും കണക്കുകള്‍ വ്യക്തമാക്കുന്നു. കഴിഞ്ഞ 10 വര്‍ഷത്തിനിടയില്‍ രാജ്യത്തുണ്ടായ 25000 മയക്കുമരുന്ന് കേസുകളിലെയും പ്രതികള്‍ കുവൈറ്റ് സ്വദേശികളാണ്.

Also Read: 350 കോടി നിക്ഷേപമെത്തിയ ഇന്ത്യൻ സ്റ്റാർട്ടപ്പിന് യുഎഇ സർക്കാരിന്‍റെ അംഗീകാരം

കുവൈറ്റില്‍ നിലവില്‍ 40,000 പേര്‍ മയക്കുമരുന്നിന് അടിമപ്പെട്ടവര്‍ ആണെന്നാണ് കണക്ക്. ഇവരില്‍ കൂടുതലും യുവാക്കളും കൗമാരക്കാരുമാണ്. കുറഞ്ഞ ചെലവില്‍ മയക്കുമരുന്നുകള്‍ ലഭിക്കുന്നുവെന്നതാണ് ഇതിന്റെ ഉപയോഗത്തില്‍ ഉണ്ടായ വലിയ വര്‍ധനവിന് കാരണമെന്നാണ് വിലയിരുത്തപ്പെടുന്നത്. എളുപ്പത്തില്‍ അവ ആവശ്യക്കാര്‍ക്ക് എത്തിക്കാന്‍ കഴിയുന്നുവെന്നതാണ് മറ്റൊരു കാരണം. ഇറാന്‍, അഫ്ഗാനിസ്താന്‍, പാകിസ്താന്‍ എന്നിവിടങ്ങളില്‍ നിന്നാണ് കുവൈറ്റിലേക്ക് ഏറ്റവും കൂടുതല്‍ മയക്കുമരുന്നുകള്‍ എത്തുന്നതെന്നാണ് അധികൃതരുടെ കണ്ടെത്തല്‍.

2012നും 2020നും ഇടയില്‍ രാജ്യത്ത് സ്വദേശികളും പ്രവാസികളും ഉള്‍പ്പെടെ 650ഓളം പേര്‍ മയക്കുമരുന്നിന്റെ അമിത ഉപയോഗത്താല്‍ മരണപ്പെട്ടിട്ടുണ്ടെന്നും കണക്കുകള്‍ വ്യക്തമാക്കുന്നു. ഇവരില്‍ 61.5 ശതമാനം പേരും സ്വദേശികളാണ്. 2018ലായിരുന്നു മയക്കുമരുന്നിന്റെ അമിതഉപയോഗം കാരണം ഏറ്റവും കൂടുതല്‍ പേര്‍ മരണപ്പെട്ടത്- 116 പേര്‍.