കൊടകര കുഴൽപ്പണം: കെ സുരേന്ദ്രൻ്റെ പങ്കെന്ത്? ഇന്ന് ചോദ്യം ചെയ്യലിനു ഹാജരാകാൻ ബിജെപി അധ്യക്ഷൻ

കോഴിക്കോട്: കൊടകര കുഴൽപ്പണക്കേസിൽ ബിജെപി സംസ്ഥാന അധ്യക്ഷൻ കെ സുരേന്ദ്രൻ ഇന്ന് ചോദ്യം ചെയ്യലിനു ഹാജരാകും. രാവിലെ 10.30ന് തൃശൂര്‍ പോലീസ് ക്ലബിലാണ് ചോദ്യം ചെയ്യൽ. ജൂലൈ രണ്ടിന് ചോദ്യം ചെയ്യലിനു ഹാജരാകാൻ നിര്‍ദേശം നല്‍കിയിരുന്നെങ്കിലും സുരേന്ദ്രൻ ഒഴിഞ്ഞു മാറിയിരുന്നു. തുടര്‍ന്നാണ് ഇന്ന് ഹാജരാകാൻ നോട്ടീസ് നല്‍കിയത്.



കുഴൽപ്പക്കേസിലെ പ്രതികളായ ധര്‍മരാജൻ, ബിജെപി ആലപ്പുഴ ജില്ലാ ട്രഷറര്‍ കെ ജി കര്‍ത്ത എന്നിവരിൽ നിന്ന് കെ സുരേന്ദ്രനെതിരെ പോലീസിന് നിര്‍ണായക മൊഴികള്‍ ലഭിച്ചിട്ടുണ്ടെന്നാണ് റിപ്പോര്‍ട്ടുകള്‍. കേസിൽ പ്രത്യേക അന്വേഷണ സംഘം ഇതുവരെ പതിനഞ്ചോളം ബിജെപി നേതാക്കളെയും പ്രവര്‍ത്തകരെയും ചോദ്യം ചെയ്തിട്ടുണ്ട്. അതേസമയം, കുഴൽപ്പണമെന്നു കണ്ടെത്തി പോലീസ് പിടിച്ചെടുത്ത തുക വിട്ടുകിട്ടണമെന്ന് ആവശ്യപ്പെട്ട് പ്രതി ധര്‍മരാജൻ നല്‍കിയ ഹര്‍ജിയും ഇരിങ്ങാലക്കുട മജിസ്ട്രേറ്റ് കോടതിയുടെ പരിഗണനയിലുണ്ട്.

Also Read: എസ്എസ്എൽസി ഫലം ഇന്ന് പ്രഖ്യാപിക്കും; ഉച്ചയ്ക്ക് രണ്ട് മണിയ്ക്ക് റിസൾട്ട് അറിയാം

ഏപ്രിൽ മൂന്നിനാണ് കര്‍ണാടകയിൽ നിന്നെത്തിയ കാറിൽ നിന്ന് കൊടകരയിൽ വെച്ച് വൻതുക കവര്‍ന്നത്. ഇതു സംബന്ധിച്ച് കാര്‍ ഡ്രൈവര്‍ ഷംജീര്‍ 25 ലക്ഷം രൂപ കവര്‍ന്നെന്ന് ചൂണ്ടിക്കാട്ടി പോലീസിൽ പരാതി നല്‍കുകയായിരുന്നു. എന്നാൽ കാറിലുണ്ടായിരുന്നത് കുഴൽപ്പണമാണെന്ന് കണ്ടെത്തിയ പോലീസ് പറയുന്നത് മൂന്നരക്കോടിയോളം രൂപ കൊണ്ടുവന്നത് ബിജെപിയുടെ തെരഞ്ഞെടുപ്പ് പ്രചാരണത്തിനു വേണ്ടിയാണെന്നാണ്. പണം കൊണ്ടുവരുന്ന വിവരം അറിയാവുന്ന മറ്റൊരു സംഘമാണ് കവര്‍ച്ചയ്ക്ക് പിന്നിലെന്നും പോലീസ് കണ്ടെത്തിയിട്ടുണ്ട്.

Also Read: ജീവൻ അപകടത്തിലാവുന്ന അവസ്ഥ തടയാൻ നമ്മൾ ബാധ്യസ്ഥരാണ്; വ്യാപാരികളുടെ സമരത്തിൽ മുഖ്യമന്ത്രി

കേസുമായി ബന്ധപ്പെട്ട് ഒന്നരക്കോടി രൂപയും കുഴൽപ്പണം ഉപയോഗിച്ചു വാങ്ങിയ 347 ഗ്രാം സ്വര്‍ണവും പോലീസ് കണ്ടെത്തിയിട്ടുണ്ട്. കവര്‍ച്ച നടന്ന ഉടൻ പ്രതികള്‍ കെ സുരേന്ദ്രനെ ബന്ധപ്പെടാൻ ശ്രമിച്ചതായും റിപ്പോര്‍ട്ടുകള്‍ വന്നിരുന്നു. ഈ സാഹചര്യത്തിലാണ് ബിജെപി സംസ്ഥാന അധ്യക്ഷനെ ചോദ്യം ചെയ്യുന്നത്.