വഴക്കമുള്ള ശരീരത്തിന് ഈ യോഗാസനങ്ങൾ ശീലിക്കാം

കുനിഞ്ഞുകൊണ്ട് നിങ്ങൾക്ക് നിങ്ങളുടെ കാൽവിരലുകളിൽ സ്പർശിക്കാൻ കഴിയുന്നില്ലേ? ശരീരം സ്വന്തം ഇഷ്ടപ്രകാരം വഴങ്ങുന്നില്ലലോ എന്നോർത്ത് സ്വയം ശപിക്കുന്നതിന് പകരം, യോഗയ്ക്ക് നിങ്ങളുടെ ശരീരത്തെ മാറ്റാൻ കഴിയുമെന്ന കാര്യം തിരിച്ചറിയുക. പുരാതന പരിശീലരീതിയായ യോഗയിൽ നിരവധി ആസനങ്ങൾ ഉണ്ട്, അത് സുരക്ഷിതമായ രീതിയിൽ നിങ്ങളുടെ ശരീരത്തെ വഴക്കമുള്ളതാക്കും. യോഗ വഴക്കമുള്ള ആളുകൾക്ക് മാത്രമേ ചെയ്യാൻ സാധിക്കൂ എന്നാണ് നിങ്ങൾ വിശ്വസിക്കുന്നതെങ്കിൽ, നിങ്ങൾ വളരെ തെറ്റിദ്ധരിക്കപ്പെട്ടിരിക്കുന്നു!

വാസ്തവത്തിൽ, ശരീരത്തിന്റെ വഴക്കത്തിനായി യോഗ ചെയ്യുന്നത് ഒരു മികച്ച ആശയമാണ്. അതുകൊണ്ട് തന്നെ ആരോഗ്യ വിദഗ്ധർ ഇത് ചെയ്യണമെന്ന് പലപ്പോഴും ശുപാർശ ചെയ്യുന്നു. ശരീരത്തെ സജീവമായി നിലനിർത്തുക എന്നതാണ് യോഗയുടെ തത്വം, ഇത് നിങ്ങളുടെ ശരീരത്തിലെ മൊത്തത്തിലുള്ള വഴക്കം സാവധാനം വർദ്ധിപ്പിക്കുന്നു. ഒരു തുടക്കക്കാരനെന്ന നിലയിൽ നിങ്ങൾ ഓർമ്മിക്കേണ്ട ഒരേയൊരു കാര്യം നിങ്ങളുടെ ശരീരം മുഴുവൻ വലിച്ചുനീട്ടാൻ കഴിയുന്ന വേഗത കുറഞ്ഞ ആസനങ്ങൾ ചെയ്യുക എന്നതാണ്.

ചിട്ടയോട് കൂടിയുള്ള കൃത്യമായ പരിശീലനവും വ്യായാമവും ഉണ്ടെങ്കിൽ വഴക്കമുള്ള ശരീരം നിങ്ങൾക്ക് ലഭിക്കും. എന്നാൽ, നിങ്ങൾ ശരീരം ഇഷ്ടത്തിനനുസരിച്ച് വഴങ്ങാത്ത ആളുകളുടെ കൂട്ടത്തിൽ പെടുന്ന വ്യക്തിയാണെങ്കിൽ, ഈ 8 യോഗാസനങ്ങൾ ചെയ്യുന്നതിലൂടെ ശരീരത്തിന്റെ വഴക്കം നിങ്ങൾക്ക് തീർച്ചയായും മെച്ചപ്പെടുത്തുവാൻ സാധിക്കും.

അതിനായി, എല്ലാ തുടക്കക്കാർക്കും ശ്രമിക്കാവുന്ന വഴക്കം മെച്ചപ്പെടുത്തുവാൻ സഹായിക്കുന്ന ചില സൂപ്പർ ഈസി യോഗാസനങ്ങൾ ഇതാ:

1. ട്രീ പോസ് അഥവാ വൃക്ഷാസനം



ട്രീ പോസ് ചെയ്തുകൊണ്ട് നിങ്ങളുടെ യോഗ യാത്ര ആരംഭിക്കുക. ഒറ്റ കാലിൽ നിന്നുകൊണ്ട് ചെയ്യുന്ന യോഗാസനമാണ് ഇത്. ഈ യോഗാസനം ചെയ്യാൻ വഴക്കം ആവശ്യമില്ല; മറിച്ച്, അതിന് ബാലൻസ് ആവശ്യമാണ്. അതിനാൽ, വൃക്ഷാസനത്തിന്റെ പതിവ് പരിശീലനം ശരീരത്തിന്റെ സന്തുലിതാവസ്ഥ മെച്ചപ്പെടുത്താനും നിങ്ങളുടെ ഇടുപ്പിന്റെയും കാലുകളുടെയും അസ്ഥികളെ ശക്തിപ്പെടുത്താനും സഹായിക്കും. ഈ യോഗാസനത്തിലേക്ക് പ്രവേശിക്കാൻ നിങ്ങളുടെ ശരീരഭാരം കേന്ദ്രീകരിക്കാൻ ശ്രമിക്കുക, നിങ്ങളുടെ ഇടത് കാലിൽ നിൽക്കുക (നിങ്ങളുടെ വലതു കാൽ നിങ്ങളുടെ ഇടത് തുടയുടെ ഉള്ളിലേക്ക് വയ്ക്കുക), നിങ്ങളുടെ കൈകൾ നിങ്ങളുടെ മുൻപിൽ വയ്ക്കുക. ഈ ഭാവം പിടിച്ചുകൊണ്ട് ശ്വസിക്കുക, ശേഷം കാലുകൾ മാറി ചെയ്യുക.

2. ബ്രിഡ്ജ് പോസ് അഥവാ സേതു ബന്ധ സർവ്വാംഗാസനം



നെഞ്ച്, കഴുത്ത്, നട്ടെല്ല് എന്നിവ വലിച്ചുനീട്ടുന്നതിനാൽ ശരീരത്തിന് വഴക്കമില്ലാത്ത ആളുകൾക്ക് ചെയ്യാൻ ഇത് ഒരു നല്ല ആസനമാണ്. അതേസമയം, തളർച്ചയുള്ള കാലുകളെ പുനരുജ്ജീവിപ്പിക്കാനും ഇത് സഹായിക്കുന്നു. നിങ്ങൾ ഈ യോഗാസനം ചെയ്യുമ്പോൾ, വയറിലെ അവയവങ്ങളെ ഉത്തേജിപ്പിക്കുന്നതിനായി ഈ ഭാവം പിടിക്കാൻ ശ്രമിക്കുക. നിങ്ങൾ ഇത് ദിവസവും പരിശീലിക്കുകയാണെങ്കിൽ, നിങ്ങളുടെ വഴക്കം വർദ്ധിപ്പിക്കുവാൻ സാധിക്കുമെന്ന് മാത്രമല്ല കാൽമുട്ട് വേദന, നടുവേദന എന്നിവ കുറയ്ക്കുകയും ചെയ്യാം.

സന്ധിവാതമുള്ളവർക്കായി ചില സിംപിൾ വ്യായാമങ്ങൾ ഇതാ…

3. അർദ്ധ ഉത്താനാസനം



നിങ്ങൾക്ക് ഇറുകിയ പിൻതുട ഞെരമ്പുകളും ഇടുപ്പുകളും ഉണ്ടെങ്കിലോ അല്ലെങ്കിൽ നിങ്ങളുടെ നടുവിന് പിടുത്തമോ ഉണ്ടെങ്കിൽ മുന്നോട്ട് വളയുന്നതും കുനിയുന്നതും ബുദ്ധിമുട്ടാണ്. ഈ പ്രശ്നം പരിഹരിക്കുന്നതിന്, അർദ്ധ ഉത്താനാസനം പരിശീലിക്കേണ്ടതുണ്ട്. നിങ്ങളുടെ കാലുകൾ, പിൻതുട ഞെരമ്പുകൾ (ഹാംസ്ട്രിംഗുകൾ), നടുവ് എന്നിവ നീട്ടുന്നതിനാണ് ഈ യോഗാസനം. നിങ്ങളുടെ കാലുകളിൽ ഒരു വലിച്ചിൽ അനുഭവപ്പെടുന്നതുവരെ നിങ്ങളുടെ ശരീരം മുന്നോട്ട് വളയ്ക്കുക. നടുവിന്റെ ഭാഗത്ത് വളയുകയോ കൊളുത്തിപ്പിടിക്കുകയോ ചെയ്യുന്നില്ലെന്ന് ഉറപ്പാക്കുക.

4. ചക്രവാകാസനം



നട്ടെല്ലും കഴുത്തും അയവുള്ളതാക്കുകയും അടിവയറും ഇടുപ്പും തോളുകളും മൃദുവായി ശക്തിപ്പെടുത്തുകയും ചെയ്യുന്ന ലളിതമായ യോഗാസനമാണ് ചക്രവാകാസനം. ഇത് നെഞ്ച് വിരിക്കുകയും ആരോഗ്യകരമായ ശ്വസനരീതികളെ പ്രോത്സാഹിപ്പിക്കുകയും ചെയ്യുന്നു. ശരീരത്തിന്റെ വഴക്കം എത്രത്തോളമുണ്ടെന്നതിനെ കുറിച്ച് ഓർത്ത് ആകുലപ്പെടാതെ നിങ്ങൾക്ക് ഈ യോഗാസനം എളുപ്പത്തിൽ പരിശീലിക്കാൻ ആരംഭിക്കാം.

5. അധോ മുഖ ശ്വാനാസനം



അധോ മുഖ ശ്വാനാസനം ചെയ്യുമ്പോൾ മുട്ട് വളയ്ക്കാതെ നിൽക്കാൻ കഴിയുന്നില്ലേ? വിഷമിക്കേണ്ടതില്ല, കാരണം നിങ്ങൾ മുട്ടു വളച്ചാലും ഇല്ലെങ്കിലും ഈ ആസനത്തിന്റെ വഴക്കം വർദ്ധിപ്പിക്കുന്ന ആനുകൂല്യങ്ങൾ നിങ്ങൾക്ക് ലഭിക്കും. ഇതിനായി നിങ്ങളുടെ പുറം നേരെയാണെന്ന് ഉറപ്പാക്കേണ്ടതുണ്ട്.

ഈ യോഗാസനം നിങ്ങളുടെ പുറം, പിൻതുട ഞെരമ്പുകൾ, തോളുകൾ എന്നിവ വലിച്ചുനീട്ടുന്നു. അതോടൊപ്പം തന്നെ നിങ്ങളുടെ അരയ്ക്ക് മുകളിലോട്ടുള്ള ഭാഗത്തെ ശക്തിപ്പെടുത്താനും കഴിയും – അതിനാൽ ഇത് ചെയ്യാതിരിക്കരുത്.

6. ചെയർ പോസ് അഥവാ ഉത്കടാസനം



നിങ്ങളുടെ തുടകളെയും കണങ്കാലുകളെയും ശക്തിപ്പെടുത്തുകയും കാലിലെ പേശികളെ വഴക്കമുള്ളതാക്കുകയും ചെയ്യുന്ന ഒരു വെല്ലുവിളി നിറഞ്ഞ യോഗാസനമാണ് ഉത്‌കടാസനം. ഇത് താരതമ്യേന എളുപ്പമുള്ളതും മികച്ചതായി തോന്നുന്നതും ആയതിനാൽ ശരീരത്തിന് വഴക്കമില്ലാത്ത ആളുകൾക്ക് ചെയ്യാൻ ഇത് ഏറ്റവും മികച്ചതാണ്. കൂടാതെ, ശരീരത്തിന്റെ കാഠിന്യം കുറയ്ക്കുന്നതിനുള്ള മികച്ച യോഗാസനമാണ് ഇത്.

നല്ല ആരോഗ്യത്തിന്റെ സൂത്രവാക്യം പോഷകാഹാരം; ഇവ കഴിക്കാം

7. പ്ലാങ്ക് പോസ്



അതെ, പ്ലാങ്ക് യഥാർത്ഥത്തിൽ ഒരു യോഗാസനമാണ്. അത് വഴക്കം തീരെയില്ലാത്ത ആളുകൾക്ക് പോലും ചെയ്യാൻ കഴിയും! ഇതിനായി, നിങ്ങളുടെ ശരീരം നേരെയാക്കി കുറച്ച് നിമിഷങ്ങൾ ഈ പോസ് പിടിക്കുന്നതിൽ ശ്രദ്ധ കേന്ദ്രീകരിക്കേണ്ടതുണ്ട്, ഇത് നിങ്ങളുടെ വയറിലെ പേശികളിലും കാലുകളിലും കൈകളിലും പിരിമുറുക്കം സൃഷ്ടിക്കുന്നു – അങ്ങിനെ പേശികളെ വഴക്കമുള്ളതും മനോഹരവുമാക്കുകയും ചെയ്യുന്നു.

8. ബാലാസനം



ഏതെങ്കിലും യോഗാസനം ചെയ്യുമ്പോൾ നിങ്ങൾ ക്ഷീണിതനാവുകയാണെങ്കിൽ, നിങ്ങൾക്ക് ബാലാസനം ചെയ്യാം! ഇത് നിങ്ങളുടെ മനസ്സിനെ ശാന്തമാക്കുകയും പേശികളെ പിന്നോട്ട് നീട്ടുകയും ചെയ്യുന്നു. ഇത് ചെയ്യാൻ എളുപ്പമാണ് എന്ന കാര്യം പ്രത്യേകം പറയേണ്ടതില്ലല്ലോ.