ഏതൊരു നാടിന്റെയും വികസനത്തിന്റെ ജീവനാഡികളിലൊന്ന് റോഡുകളാണ്. തൊഴിലാളികളെ തൊഴിലിടങ്ങളിലേക്കും ഉത്പാദകരെ വിപണിയിലേക്കും വിദ്യാര്‍ഥികളെ വിദ്യാലയങ്ങളിലേക്കും രോഗികളെ ആശുപത്രികളിലേക്കും എന്നുവേണ്ട ഒരുനാടിന്റെ നിലനില്‍പ്പിനും വളര്‍ച്ചയ്ക്കും അത്യാവശ്യമായ ഘടകമാണ് റോഡുകള്‍.
റോഡ് കൊണ്ടുവരുന്ന വികസനം ഇന്ത്യയുടെ കാര്യത്തിലും വ്യത്യസ്തമല്ല. രാജ്യത്തിന്റെ ജിഡിപിയുടെ 4.8 ശതമാനം വിഹിതവും ലഭിക്കുന്നത് റോഡുമാര്‍ഗമുള്ള ഗതാഗതത്തില്‍ നിന്നാണ്. അതുകൊണ്ട് തന്നെ രാജ്യത്ത് റോഡു സൗകര്യം കൂടുന്നുവെന്നത് അര്‍ഥമാക്കുന്നത് ഇന്ത്യ സാമ്പത്തികമായി മുന്നേറുന്നുവെന്നു കൂടിയാണ്. കണക്കുകള്‍ കൃത്യമാണെങ്കില്‍ 2025-ഓടെ രാജ്യത്തെ ദേശീയ പാതകളുടെ നീളം 1.8 ലക്ഷമായിരിക്കും. യാത്രയുടെ സമയം കുറയ്ക്കാന്‍ സഹായിക്കുകയും രാജ്യത്തെ സാമ്പത്തിക പുരോഗതിയിലേക്ക് നയിക്കുകയും ചെയ്യുന്ന ചില അതിവേഗപാതകള്‍.
ഡല്‍ഹി-മുംബൈ അതിവേഗപാത
ഡല്‍ഹി-മുംബൈ അതിവേഗപാതയിലൂടെ പ്രയോജനം ലഭിച്ചത് ഈ റൂട്ടിലൂടെയുള്ള യാത്രകാര്‍ക്ക് മാത്രമല്ല, ഡല്‍ഹിയില്‍ നിന്നും ഗോവയിലേക്കുള്ള യാത്ര ദൂരവും പകുതിയിലും കുറഞ്ഞു. പാതയുടെ ആദ്യഘട്ടം പ്രധാനമന്ത്രി നരേന്ദ്ര മോദി ഫെബ്രുവരി 12-ന് ഉദ്ഘാടനം ചെയ്തു. ഡല്‍ഹിയില്‍ നിന്നും മുംബൈയിലേക്കുള്ള യാത്രാസമയം 12 മണിക്കൂറായി കുറയ്ക്കാന്‍ അതിവേഗ പാത സഹായിക്കും. ഇതോടെ ഡല്‍ഹിയില്‍ നിന്നും ഗോവയിലേക്കുള്ള ദൂരവും കുറയും. ഡല്‍ഹിയില്‍ നിന്നും ഗോവയിലേക്ക് റോഡുമാര്‍ഗം യാത്ര ചെയ്യാന്‍ നിലവില്‍ 35 മണിക്കൂറെങ്കിലും എടുക്കും. പുതിയ അതിവേഗപാത വരുന്നതോടെ യാത്രാ സമയം 15 മണിക്കൂറായാണ് കുറയാന്‍ പോകുന്നത്.
മുംബൈ-നാഗ്പൂര്‍ അതിവേഗപാത
മുംബൈ – നാഗ്പൂര്‍ അതിവേഗപാത കഴിഞ്ഞ വര്‍ഷം ഡിസംബറിലാണ് പ്രധാനമന്ത്രി നരേന്ദ്ര മോദി ഉദ്ഘാടനം ചെയ്തത്. ഇതോടെ മുംബൈയില്‍ നിന്നും നാഗ്പൂരിലേക്കുള്ള ദൂരം വെറും എട്ടുമണിക്കൂറായി കുറഞ്ഞു. 701 കിലോമീറ്ററാണ് അതിവേഗപാതയുടെ ദൂരം. 10 ജില്ലകളിലൂടെ കടന്നുപോകുന്ന പാത 390 ഗ്രാമങ്ങളെയാണ് ബന്ധിപ്പിക്കുന്നത്. കല്യാണ്‍, നാഗ്പൂര്‍, നാസിക്, വര്‍ധ, ബിവന്തി, അനുരംഗാബാന്ദ്, ഷിര്‍ദി തുടങ്ങിയ പ്രശസ്തമായ ഇടങ്ങളെ ബന്ധിപ്പിച്ചു കൊണ്ടാണ് റോഡിന്റെ നിര്‍മാണം. 5 മേല്‍പ്പാലങ്ങള്‍, 33 പ്രധാന പാലങ്ങള്‍, 25 ഇന്റര്‍ ചെയ്ഞ്ച്, 189 അടിപ്പാതകള്‍, ആറു തുരങ്കപാത, ചെറിയ വാഹനങ്ങള്‍ക്ക് മാത്രമായിട്ടുള്ള 110 അടിപ്പാതകള്‍, കാല്‍നടയാത്രികര്‍ക്കും മറ്റുമായി 209 അടിപ്പാതകള്‍ എന്നിവ ഉള്‍പ്പെടുത്തിയാണ് നിര്‍മാണം.
ബെംഗളൂരു-ചെന്നൈ അതിവേഗപാത
തെക്കേ ഇന്ത്യയിലെ ഏറ്റവും വലിയ അതിവേഗ പാതയാണ് വരാന്‍ പോകുന്ന ബെംഗളൂരു-ചെന്നൈ അതിവേഗപാത. തമിഴ്‌നാടിന്റെയും കര്‍ണാടകയുടെയും തലസ്ഥാന നഗരികളെ ബന്ധിപ്പിക്കുന്നതാണ് ഈ നാലുവരി അതിവേഗപാത. കര്‍ണാടകയിലെ ഹൊസ്‌കോട്ടും ബംഗാരപേട്ടും ആന്ധ്രാപ്രദേശിലെ പലമണേരും ചിട്ടൂരും തമിഴ്‌നാട്ടിലെ ശ്രീപേരുംബുദുരും ബന്ധിപ്പിച്ചുകൊണ്ട് 260 കിലോമീറ്ററാണ് പാത കടന്നുപോകുന്നത്. 2024-ഓടെ നിര്‍മാണപ്രവര്‍ത്തനങ്ങള്‍ പൂര്‍ത്തിയാക്കി പാത തുറന്നുകൊടുക്കാനാണ് ലക്ഷ്യം വെക്കുന്നത്.
ഡല്‍ഹി-അമൃത്സര്‍-കത്ര അതിവേഗപാത
650 കിലോമീറ്റര്‍ നീളമുള്ള ഡല്‍ഹി-അമൃത്സര്‍-കത്ര അതിവേഗപാതയുടെ നിര്‍മാണം പൂര്‍ത്തിയാകുന്നതോടെ ജമ്മുവും ഡല്‍ഹിയും തമ്മിലുള്ള യാത്രാദൂരം കുറയും. ഡല്‍ഹിയുടെ അതിര്‍ത്തിയായ ബഹദുര്‍ഗര്‍ഹും ജമ്മുവിലെ കത്രയുമാണ് പാത ബന്ധിപ്പിക്കുന്നത്. പാത പൂര്‍ത്തിയായാല്‍ അമൃത്സര്‍, നോകദര്‍, ഗുര്‍ദാസ്പൂര്‍ തുടങ്ങിയ ഇടങ്ങളിലൂടെയാണ് പാത കടന്നുപോകുന്നത്. പ്രധാനമായും തീര്‍ഥാടന വിനോദസഞ്ചാരത്തെ ലക്ഷ്യംവെക്കുന്നത് കൊണ്ട് പാത സുവര്‍ണക്ഷേത്രവും വൈഷ്‌ണോ ദേവീ ക്ഷേത്രവും ബന്ധിപ്പിക്കുന്നു.
റായ്പൂര്‍-വിശാഖപട്ടണം അതിവേഗപാത
റായ്പൂര്‍-വിശാഖപട്ടണം സാമ്പത്തിക ഇടനാഴിയുടെ വളര്‍ച്ച ത്വരിതപ്പെടുത്താന്‍ സഹായിക്കുന്നതാണ് റായ്പൂര്‍-വിശാഖപട്ടണം അതിവേഗപാത. 464 കിലോമീറ്റര്‍ ദൂരം കടന്നുപോകുന്ന ആറുവരി പാതയാണിത്. ഒഡിഷ, ഛത്തീസ്ഘട്ട്, ആന്ധ്രാപ്രദേശ് തുടങ്ങിയ സംസ്ഥാനങ്ങളെ ബന്ധിപ്പിച്ചുകൊണ്ടാണ് പാത കടന്നുപോകുന്നത്. എല്ലാം കൃത്യമായി പോകുകയാണെങ്കില്‍ 2025-ഓടെ പാത ജനങ്ങള്‍ക്കായി തുറന്നുകൊടുക്കും.
ഗംഗ അതിവേഗപാത
ഡല്‍ഹി-മീററ്റ് അതിവേഗ പാത, പ്രയാഗ് രാജ്-വാരണാസി അതിവേഗ പാത, മീററ്റ്- ഹരിദ്വാര്‍ ഹൈവേ, ആഗ്ര അതിവേഗപാത, യമുന അതിവേഗ പാത തുടങ്ങിയ സുപ്രധാന റോഡുകളെ ബന്ധിപ്പിക്കുന്നതാണ് ഗംഗ അതിവേഗപാത. ആറുവരിയുള്ള ഈ അതിവേഗപാതയുടെ 94 കീലോമീറ്റര്‍ ദൂരവും ഇടനാഴിയാണ് കടന്നുപോകുന്നത്. ബുലന്ദ്ഷഹര്‍, ഹപുര്‍, സമ്പല്‍, അംറോഹ, ബദൗന്‍, ഷാജഹാന്‍പുര്‍, ഉന്നാവ്, ഹര്‍ദോയ്, റായ്ബറേലി, പ്രതാപ്ഘര്‍ഹ് തുടങ്ങിയ ഇടങ്ങളാണ് ഇടനാഴി കടന്നുപോകുന്നത്. 2025-ലെ മഹാകുംഭമേളയ്ക്ക് മുമ്പായി പാതയുടെ നിര്‍മാണം പൂര്‍ത്തിയാക്കാനാണ് തീരുമാനം.
