ബിജെപി തുടരുമോ, കോൺഗ്രസ് വരുമോ?; കർണാടക ഇന്ന് വിധിയെഴുതും; അഞ്ചു കോടി വോട്ടർമാർ പോളിങ് ബൂത്തിലേക്ക്

Authored by Deepu Divakaran | Samayam Malayalam | Updated: 10 May 2023, 5:38 am

കർണാടക ഇന്ന് പോളിങ് ബൂത്തിലേക്ക്.

ബിജെപി തുടരുമോ, കോൺഗ്രസ് വരുമോ?; കർണാടക ഇന്ന് വിധിയെഴുതും; അഞ്ചു കോടി വോട്ടർമാർ പോളിങ് ബൂത്തിലേക്ക്

ബെംഗളൂരു: ഒരു മാസം നീണ്ടുനിന്ന പ്രചാരണങ്ങൾക്കു ശേഷം കർണാടക ഇന്ന് പോളിങ് ബൂത്തിലേക്ക്. നിയമസഭാ തെരഞ്ഞെടുപ്പിൻ്റെ വോട്ടെടുപ്പ് രാവിലെ ഏഴുമണിക്ക് ആരംഭിക്കും. കർണാടക നിലനിർത്താനുള്ള ശ്രമങ്ങളുമായി ബിജെപിയും ഭരണം പിടിക്കാനുള്ള തന്ത്രങ്ങളുമായി കോൺഗ്രസും പ്രചാരണം നയിച്ചു. വരാനിരിക്കുന്ന ലോക്സഭാ തെരഞ്ഞെടുപ്പിനു മുന്നോടിയായുള്ള കർണാടകത്തിലെ നിയമസഭാ തെരഞ്ഞെടുപ്പ് കോൺഗ്രസിന് ഏറെ നിർണായകമാണ്. ദക്ഷിണേന്ത്യയിൽ ബിജെപി ഭരിക്കുന്ന ഏക സംസ്ഥാനമെന്ന നിലയിൽ കർണാടക ബിജെപിക്ക് നിലനിർത്തേണ്ടതുണ്ട്.കർണാടകത്തിൽ ഇക്കുറി 5,31,33,054 വോട്ടർമാരാണ് വിധിയെഴുതുന്നത്. ഇതിൽ 2,67,28,053 പുരുഷന്മാരും 2,64,00,074 പേർ സ്ത്രീകളുമാണ്. 2,615 സ്ഥാനാർഥികളാണ് മത്സരരംഗത്തുള്ളത്. സംസ്ഥാനത്താകെ 58,545 പോളിങ് സ്റ്റേഷനുകളാണ് സജ്ജീകരിച്ചിട്ടുള്ളത്. ഇവിടങ്ങളിലേക്കായി നാലു ലക്ഷത്തോളം പോളിങ് ഉദ്യോഗസ്ഥരെ നിയോഗിച്ചു. 84,119 പോലീസ് ഉദ്യോഗസ്ഥരെയും 58,500 കേന്ദ്രസേനാ ഉദ്യോഗസ്ഥരെയും ക്രമസമാധാന പാലനത്തിനായി വിന്യസിച്ചിട്ടുണ്ട്. എല്ലാ പോളിങ് ബൂത്തുകളും സിസിടിവി ക്യാമറകളുടെ നിരീക്ഷണത്തിലാണ്.

യാത്ര പഴഞ്ചൻ ബോട്ടിൽ … ആശങ്കയിൽ യാത്രക്കാർ | kavvayi boat

1985 ന് ശേഷം കർണാടകത്തിൽ ഒരു പാർട്ടിക്കും ഭരണത്തുടർച്ച ലഭിച്ചിട്ടില്ല. ഭരണകക്ഷിയായ ബിജെപിക്ക് ഇക്കുറി അഭിമാനപോരാട്ടമാണ്. അഴിമതി അടക്കമുള്ള ആരോപണം നേരിട്ടിരുന്ന ബിജെപിക്കെതിരെ ഭരണവിരുദ്ധവികാരം പ്രകടമായിരുന്നു. പ്രധാനമന്ത്രി നരേന്ദ്ര മോദിയെ ഇറക്കിയുള്ള പ്രചാരണങ്ങളിലൂടെ ഭരണവിരുദ്ധവികാരം മറികടക്കാനായെന്നാണ് പാർട്ടിയുടെ വിലയിരുത്തൽ. സീറ്റ് നിഷേധിച്ചതിനെ ചൊല്ലി പ്രമുഖ നേതാക്കൾ പാർട്ടി വിട്ടതും ബിജെപിക്ക് തിരിച്ചടിയായി.

വിവിധ സർവേകൾ കോൺഗ്രസിന് മേൽക്കൈ പ്രവചിച്ചത് കോൺഗ്രസ് നേതാക്കളിൽ ആത്മവിശ്വാസം വർധിപ്പിച്ചു. ന്യൂനപക്ഷ വോട്ടുകൾ പാർട്ടിയുടെ പെട്ടിയിലേക്ക് എത്തുമെന്നാണ് കോൺഗ്രസിൻ്റെ പ്രതീക്ഷ. ഇതു കൂടാതെ, വീരശൈവലിംഗായത്ത് ഫോറം പിന്തുണ പ്രഖ്യാപിച്ചതും പാർട്ടിക്ക് നേട്ടമായി. കോൺഗ്രസിന് ഒറ്റക്ക് ഭരണം നടത്താനുള്ള ഭൂരിപക്ഷ നൽകണമെന്നാണ് നേതാക്കൾ വോട്ടർമാരോട് അഭ്യർഥിച്ചിരുന്നത്. അതേസമയം ഇക്കുറിയും തൂക്കുമന്ത്രിസഭ ആയാൽ ജെഡിഎസിൻ്റെ തീരുമാനം നിർണായകമാകും. 224 അംഗ നിയമസഭയിൽ 113 സീറ്റുകൾ നേടുന്ന പാർട്ടിക്ക് ഭരണം പിടിക്കാം.

Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക