പ്രായമായവര്‍ തനിച്ചല്ല, സ്നേഹവും പരിഗണനയും നല്‍കി സര്‍ക്കാര്‍ അവരെ ചേര്‍ത്ത് പിടിക്കുമെന്ന് സമൂഹ്യ നീതി, ഉന്നത വിദ്യാഭ്യാസ വകുപ്പ് മന്ത്രി ഡോ. ആര്‍. ബിന്ദു. സംസ്ഥാനത്ത് വയോജന കമ്മീഷന്‍ ആരംഭിക്കുന്നതിനുള്ള നിയമ നിര്‍മാണം നടന്നുവരികയാണെന്നും കഞ്ഞിക്കുഴി ബ്ലോക്ക് പഞ്ചായത്ത് മായിത്തറ വൃദ്ധ വികലാംഗ സദനത്തിലെ അന്തേവാസികളുടെ കുടുംബ സംഗമം ‘സ്നേഹാദരം 2023’ ഉദ്ഘാടനം ചെയ്തുകൊണ്ട് മന്ത്രി പറഞ്ഞു.
അധ്വാനശേഷിയുടെ കാലം കഴിയുമ്പോള്‍ മനുഷ്യരെ വലിച്ചെറിയുന്ന പ്രവണത വര്‍ധിക്കുന്നുണ്ട്. ഇത് പാടില്ല. ഇത്തരം സന്ദര്‍ഭങ്ങളില്‍ പ്രായമായവരെ സ്നേഹപൂര്‍വം ഏറ്റെടുക്കാനുള്ള ഉത്തരവാദിത്തം സര്‍ക്കാരിനുണ്ട്. ഇതിനായാണ് സമൂഹിക നീതി വകുപ്പിന്റെ ആഭിമുഖ്യത്തില്‍ വയോജന സംരക്ഷണ കേന്ദ്രങ്ങള്‍ നടത്തുന്നത്. അത്യാധുനിക സൗര്യങ്ങളോടുകൂടി ഇത്തരം കേന്ദ്രങ്ങള്‍ സ്ഥാപിക്കാനാണ് സര്‍ക്കാര്‍ ആഗ്രഹിക്കുന്നത്. പ്രായമായവര്‍ക്ക് അവരുടെ പ്രശ്‌നങ്ങള്‍ ബോധിപ്പിക്കാനായി 27 റവന്യൂ സബ് ഡിവിഷനുകളിലും മെയിന്റനന്‍സ് ട്രൈബ്യൂണലുകള്‍ പ്രവര്‍ത്തിക്കുന്നുണ്ടെന്നും മന്ത്രി പറഞ്ഞു.
വയോജനങ്ങള്‍ക്ക് അടിയന്തരമായി മരുന്നും ആരോഗ്യ സംരക്ഷണവും സഹായവും നല്‍കുന്ന വയോരക്ഷ, പ്രമേഹ രോഗികള്‍ക്കായി വയോ മധുരം, കൃത്രിമ ദന്തം നല്‍കുന്ന മന്ദഹാസം, വൃദ്ധ സദനങ്ങളില്‍ താമസിക്കുന്നവര്‍ക്ക് ആയുര്‍വേദ ചികിത്സ നല്‍കുന്നതിന് വയോ അമൃതം തുടങ്ങി നിരവധി പദ്ധതികളാണ് സര്‍ക്കാര്‍ നടപ്പാക്കുന്നത്. കഞ്ഞിക്കുഴി പഞ്ചായത്തില്‍ വയോജനങ്ങള്‍ക്ക് മാനസിക ഉല്ലാസത്തിനായി വയോജന പാര്‍ക്ക് നിര്‍മിക്കുമെന്നും മന്ത്രി പറഞ്ഞു.
ചടങ്ങില്‍ സാമൂഹിക നീതി വകുപ്പ് മുഖാന്തരം അക്കോക്ക് ചേര്‍ത്തല മണ്ഡലം കമ്മിറ്റിയും ലൂയിസ് ഏബ്രഹാം കോട്ടയവും സംയുക്തമായി സ്പോണ്‍സര്‍ ചെയ്ത കൃത്രിമ കാല് നെവീന്‍ പ്രതീഷിന് മന്ത്രി കൈമാറി.
കഞ്ഞിക്കുഴി ബ്ലോക്ക് പഞ്ചായത്ത് പ്രസിഡന്റ് വി.ജി. മോഹനന്‍ അധ്യക്ഷത വഹിച്ചു. വൃദ്ധസദനത്തെ സഹായിക്കുന്ന സ്പോണ്‍സര്‍മാരെ ചടങ്ങില്‍ മുഖ്യാതിഥിയായ എ.എം. ആരിഫ് എം.പി. ആദരിച്ചു. ഗ്രാമപഞ്ചായത്ത് പ്രസിഡന്റുമാരായ സിനിമോള്‍ സാംസണ്‍, ജെയിംസ് ചിങ്കുത്തറ, ശശികല, ബ്ലോക്ക് പഞ്ചായത്ത് വൈസ് പ്രസിഡന്റ് ബിജി അനില്‍കുമാര്‍, ബ്ലോക്ക് സ്റ്റാന്‍ഡിങ് കമ്മിറ്റി അധ്യക്ഷരായ അനിത തിലകന്‍, സുധ സുരേഷ്, ചേര്‍ത്തല തെക്ക് ഗ്രാമപഞ്ചായത്ത് വൈസ് പ്രസിഡന്റ് നിബു എസ്. പത്മം, ബ്ലോക് പഞ്ചായത്ത് അംഗങ്ങളായ വി.കെ. മുകുന്ദന്‍, യു.എസ്. സജീവന്‍, മിനി ബിജു, രജനി ദാസപ്പന്‍, പി.എസ്. ശ്രീലത, എസ്.ഷിജി, റാണി ജോര്‍ജ്, ജില്ല സാമൂഹിക നീതി ഓഫീസര്‍ എ.ഒ. അബീന്‍, ജില്ല പ്രൊബേഷന്‍ ഓഫീസര്‍ ജി. സന്തോഷ്, വൃദ്ധ വികലാംഗ സദനം സൂപ്രണ്ട് എ.എസ്. സിന്ധു തുടങ്ങിയവര്‍ പങ്കെടുത്തു
