ബിജെപിക്കെതിരെ ബജ്റംഗ്ദളുകാരന്റെ മത്സരം; ആരും ഗൗനിച്ചില്ല; വോട്ടെണ്ണിയപ്പോൾ ഞെട്ടിത്തരിച്ച് നേതാക്കൾ; അരുൺ കുമാർ പുതില ഒരു പാഠമാണ്

61336 വോട്ടാണ് അരുൺ കുമാർ പുത്തൂർ മണ്ഡലത്തിൽ നേടിയത്. തിരഞ്ഞെടുപ്പിൽ വിജയിച്ച സ്ഥാനാർത്ഥി അശോക് കുമാർ റൈ നേടിയത് 64,687 വോട്ട്. 3351 വോട്ടിന്റെ വ്യത്യാസം. വോട്ടെണ്ണലിന്റെ തുടക്കംമുതൽ അരുൺ കുമാറാണ് ലീഡ് ചെയ്തിരുന്നത്. മിക്ക സന്ദർഭങ്ങളിലും അരുൺ കുമാർ വിജയിക്കുമെന്ന തോന്നലുണ്ടായി. ബിജെപി സ്ഥാനാർത്ഥി ആശ തിമ്മപ്പ നേടിയത് 36256 വോട്ടാണ്. അരുൺ കുമാർ പുത്തൂരിന്റെയും ആശാ തിമ്മപ്പയുടെയും വോട്ടുകൾ ചേർത്താൽ 57 ശതമാനം വോട്ടായി.

ദക്ഷിണ കന്നഡ മേഖലയില്‍ ഏറ്റവും ശക്തമായ ഹിന്ദുത്വമേഖലയാണ് പുത്തൂർ മണ്ഡലം. വർഗ്ഗീയ വിഭജനം അതിശക്തമാണ് ഇവിടെ. ബിജെപിയുടെ സഞ്ജീവ് മറ്റന്ദൂർ ആണ് ഇവിടെനിന്ന് അവസാനം ജയിച്ച് നിയമസഭയിലെത്തിയത്. ഈ തിരഞ്ഞെടുപ്പിൽ ഇദ്ദേഹത്തെയും പാർട്ടി പരിഗണിച്ചില്ല. സീറ്റ് ലഭിക്കുമെന്ന വലിയ പ്രതീക്ഷയുണ്ടായിരുന്ന അരുൺകുമാർ പുതിലയെയും പാർട്ടി തള്ളി. മണ്ഡലത്തിൽ താരതമ്യേന അറിയപ്പെടാത്തയാളായ ആശാ തിമ്മപ്പയെയാണ് സ്ഥാനാർത്ഥിയാക്കിയത്. പാർട്ടിയുടെ ശക്തി കൊണ്ട് മണ്ഡലം പിടിച്ചെടുക്കാമെന്നാണ് ബിജെപി പ്രതീക്ഷിച്ചത്. അതിശക്തമായ വർഗ്ഗീയ ധ്രുവീകരണ പ്രചാരണം നടക്കുന്ന ഈ തിരഞ്ഞെടുപ്പിൽ പുത്തൂർ പോലൊരു മണ്ഡലത്തിൽ വിജയമല്ലാതെ മറ്റൊരു സാധ്യതയും ബിജെപി കണ്ടില്ല. യോഗി ആദിത്യനാഥി, ജെപി നദ്ദ തുടങ്ങിയ നേതാക്കളെ മണ്ഡലത്തിലെത്തിച്ചു ബിജെപി. പുത്തൂരിൽ നിന്നുള്ള ആർഎസ്എസ് നേതാവ് കല്ലഡ്ക്ക പ്രഭാകർ ഭട്ട്, ഡോ. എംകെ പ്രസാദ് ഭണ്ഡാരി എന്നിവർ സംഘടനാപരമായി നീങ്ങുകയും പ്രവർത്തകർക്ക് ശക്തമായ നിർദ്ദേശം നൽകുകയും ചെയ്തു. പക്ഷെ, ആർഎസ്എസ്സിന്റെ കേഡർ സംവിധാനത്തെയും മറികടക്കാൻ പോന്നതായിരുന്നു അരുൺ കുമാർ പുതിലയുടെ ജനകീയത്.

പുത്തൂർ മണ്ഡലത്തിന്റെ സ്വഭാവം മനസ്സിലാക്കാൻ മറ്റൊരു കാര്യം കൂടി അറിഞ്ഞിരിക്കുന്നത് ഉപകാരപ്പെടും. ഇത്തവണ മണ്ഡലത്തിൽ നിന്ന് വിജയിച്ച കോൺഗ്രസ് സ്ഥാനാർത്ഥി അശോക് കുമാർ റൈ ഒരു മുൻ ആർഎസ്എസ്സുകാരനാണ്.

ആരാണ് അരുൺ കുമാർ പുതില?‌



62 വയസ്സാണ് അരുൺ കുമാർ പുതിലയ്ക്ക്. പ്രീ യൂണിവേഴ്സിറ്റി വരെ പഠിച്ചു. പുത്തൂർ മണ്ഡലത്തിൽ നിരന്തരം പ്രവർത്തിച്ചു കൊണ്ടിരിക്കുന്ന ഒരു ആക്ടിവിസ്റ്റിന്റെ പ്രതിച്ഛായയാണ് അരുൺ കുമാർ പുതിലയ്ക്ക്. താൻ പാർട്ടിയോട് കലാപമുണ്ടാക്കുകയല്ലെന്നും, മറിച്ച് ഒരു പ്രതിരോധം തീർക്കുകയാണെന്നുമാണ് അരുൺ കുമാർ പുതില പ്രഖ്യാപിച്ചത്. വ്യക്തിപരമായ നേട്ടമല്ല, ഹിന്ദു മതത്തിന് നന്മ വരണമെന്നു മാത്രമാണ് തനിക്കുള്ളതെന്ന് പ്രചരിപ്പിക്കാൻ അദ്ദേഹത്തിനായി. അത് ഗൗരവത്തിലെടുക്കാൻ മണ്ഡലത്തിലെ വോട്ടർമാർ തയ്യാറായി. താൻ സ്വയമെടുത്ത തീരുമാനമല്ല, മറിച്ച് പാർട്ടി പ്രവര്‍ത്തകരാണ് തന്നെ മത്സരിപ്പിക്കുന്നതെന്നും അരുൺ കുമാർ ആവർത്തിച്ചു.

ഹൈന്ദവ സമുദായത്തിന് എന്ത് പ്രശ്നം നേരിട്ടാലും അതിനോട് പ്രതികരിക്കുന്ന ഒരു നേതാവെന്ന നിലയിലാണ് മണ്ഡലത്തിലെ വോട്ടർമാർ അരുൺ കുമാറിനെ കാണുന്നത്. മുമ്പ് പറഞ്ഞതുപോലെ വർഗ്ഗീയമായി വളരെ സെൻസിറ്റീവായ മണ്ഡലമാണ് പുത്തൂർ.

വളരെ ചെറുപ്പത്തിൽ തന്നെ ആർഎസ്എസ് ശാഖയിലൂടെ വളര്‍ന്നു വന്നയാളാണ് അരുൺ കുമർ‌ പുതില. പിന്നീട് എബിവിപിയിൽ സജീവമായി. മൂന്ന് ദശകത്തോളം ആർഎസ്എസ് പ്രവർത്തകനായി. ഇതിനിടയിൽ വിഎച്ച്പിയിലും ബജ്റംഗ്ദളിലും സജീവമായി. കേരളത്തിൽ കഴിഞ്ഞ ലോക്സഭാ തിരഞ്ഞെടുപ്പുകാലത്ത് ഇദ്ദേഹം സജീവമായി പ്രവർത്തിച്ചിരുന്നു.

ക്ഷേത്രങ്ങളുടെ പുനരുദ്ധാരണ പ്രവർത്തനങ്ങളിൽ സജീവമാണ് അരുൺ കുമാർ പുതില. 52 ക്ഷേത്രങ്ങൾ പുനരുദ്ധരിക്കുന്നതിന് ഇദ്ദേഹം നേതൃത്വം കൊടുത്തിട്ടുണ്ടെന്ന് കന്നഡ മാധ്യമങ്ങൾ റിപ്പോർട്ട് ചെയ്യുന്നു. നിരവധി ക്ഷേത്രങ്ങളിൽ ഭാരവാഹിയുമാണ് ഇദ്ദേഹം. പുത്തൂരിലെ ഉൾപ്രദേശങ്ങളിൽ അരുൺ കുമാറിനെ സേവന സന്നദ്ധനായി എപ്പോഴും കാണാവുന്നതാണ്. ജനങ്ങളോട് ആഴത്തിൽ ഇടപഴകി ജീവിക്കുന്നത് തന്നെയാണ് അദ്ദേഹത്തിന്റെ നേട്ടം.