ഭാരത് ജോഡോ യാത്രയുടെ രണ്ടാം ഘട്ടം ഈ വർഷം; കേരളത്തിലോ തെലങ്കാനയിലോ സഖ്യത്തിനില്ല; കെ സി വേണു​ഗോപാൽ

ഈ വർഷം അവസാനം നടക്കുന്ന നിയമസഭാ തെരഞ്ഞെടുപ്പിന് മുന്നോടിയായി രാജസ്ഥാനിലെ ഉന്നത നേതാക്കൾ തമ്മിലുള്ള തർക്കം പരിഹരിക്കാനാകുമെന്നും കെ സി വേണുഗോപാൽ വ്യക്തമാക്കി. അതിനായുള്ള പ്രവർത്തനങ്ങൾ തുടങ്ങിയതായും അദ്ദേഹം കൂട്ടിച്ചേർത്തു.

കർണാടക തെരഞ്ഞെടുപ്പിന്റെ ഫലം പ്രതിപക്ഷ ഐക്യത്തിനുള്ള സന്ദേശമാണ്, നമ്മൾ ദേശീയ തലത്തിൽ ഒരുമിച്ച് പ്രവർത്തിക്കണമെന്നും വേണുഗോപാൽ ദേശീയമാധ്യമമായ എൻഡിടിവിയോട് പറഞ്ഞു. പ്രത്യയ ശാസ്ത്രപരമായ വ്യത്യാസങ്ങളോ ചില സംസ്ഥാനങ്ങളിലെ എതിരാളികളോ അയ മറ്റ് പ്രാദേശിക പാർട്ടികളുമായി തെരഞ്ഞെടുപ്പിന് ശേഷം സഖ്യമുണ്ടാക്കൻ കോൺഗ്രസ് തയ്യാറാണെന്നും അദ്ദേഹം കൂട്ടിച്ചേർത്തു.

കേരളത്തിൽ സിപിഎമ്മുമായോ തെലങ്കാനയിൽ ബിആർഎസുമായോ മുന്നണി സാധ്യമാവില്ല. അതേസമയം, ലോക്സഭാ തെരഞ്ഞെടുപ്പിന് ശേഷം ഇതിൽ ധാരണയാവാമെന്നും അദ്ദേഹം പറഞ്ഞു.

കർണാടക മുഖ്യമന്ത്രിയെ തീരുമാനിക്കുന്നതിന് സമയമെടുക്കുമെന്നും അദ്ദേഹം പറഞ്ഞു. അതേസമയം, കർണാടക മുഖ്യമന്ത്രി സ്ഥാനത്തേക്ക് എഐസിസി അധ്യക്ഷൻ മല്ലികാർജ്ജുൻ ഖാർഗെയെ പരിഗണിക്കുന്നതായുള്ള വിഷയവും അദ്ദേഹം തള്ളിക്കളഞ്ഞു. ഖാർഗെയേക്കുറിച്ചുള്ള ചോദ്യമേ ഉയരുന്നില്ലെന്നും കേട്ടുകേൾവികളിൽ വിശ്വസിക്കരുതെന്നും അദ്ദേഹം പറഞ്ഞു.

Also Read : കർണാടക നിയമസഭയിൽ ഇത്തവണയും മൂന്ന് മലയാളികൾ; തകർപ്പൻ ജയവുമായി കോൺഗ്രസ് നേതാക്കൾ

അടുത്ത വർഷം നടക്കാനിരിക്കുന്ന ലോക്സഭാ തെരഞ്ഞെടുപ്പിന് മുന്നോടിയായി പാർട്ടിയുടെ അടിത്തറശക്തമാക്കുന്നതിന് മറ്റൊരു രാജ്യവ്യാപക പ്രചാരണവും ആസൂത്രണം ചെയ്യുന്നുണ്ടെന്ന് അദ്ദേഹം പറഞ്ഞു. കിഴക്ക് നിന്നും പടിഞ്ഞാറേക്ക് ഒരു ഭാരത് ജോഡോ യാത്രകൂടി തങ്ങൾ പദ്ധതിയിടുന്നുണ്ടെന്നും അദ്ദേഹം വ്യക്തമാക്കി.

Read Latest National News and Malayalam News