കർണാടകത്തിൽ സസ്പെൻസ്: മുഖ്യമന്ത്രിയെ ഖാർഗെ തീരുമാനിക്കും; എംഎൽഎമാരുടെ മനസറിഞ്ഞ് നിരീക്ഷകർ

Authored by Deepu Divakaran | Samayam Malayalam | Updated: 15 May 2023, 7:51 am

കർണാടകത്തിലെ മുഖ്യമന്ത്രി ആരെന്നതിൽ തീരുമാനം നീളുന്നു. മുഖ്യമന്ത്രിയെ എഐസിസി അധ്യക്ഷൻ മല്ലികാർജുൻ ഖാർഗെ തീരുമാനിക്കണമെന്ന് നേതാക്കൾ ആവശ്യപ്പെട്ടു. കോൺഗ്രസ് നിരീക്ഷകർ എംഎൽഎമാരെ നേരിൽക്കണ്ടു.

കർണാടകത്തിൽ സസ്പെൻസ്: മുഖ്യമന്ത്രിയെ ഖാർഗെ തീരുമാനിക്കും; എംഎൽഎമാരുടെ മനസറിഞ്ഞ് നിരീക്ഷകർ

ഹൈലൈറ്റ്:

കർണാടക മുഖ്യമന്ത്രിയെ മല്ലികാർജുൻ ഖാർഗെ തീരുമാനിക്കും.
മുഖ്യമന്ത്രിയെ ഖാർഗെ തീരുമാനിക്കണമെന്ന് കോൺഗ്രസ്.
നിരീക്ഷകർ എല്ലാ എംഎൽഎമാരെയും നേരിൽക്കണ്ടു.

ബെംഗളൂരു: കർണാടകത്തിലെ മുഖ്യമന്ത്രിയെ എഐസിസി അധ്യക്ഷൻ മല്ലികാർജുൻ ഖാർഗെ തീരുമാനിക്കും. കർണാടക മുഖ്യമന്ത്രിയെ ഖാർഗെ തീരുമാനിക്കണമെന്ന് കോൺഗ്രസിലെ മുതിർന്ന നേതാക്കൾ ആവശ്യപ്പെട്ടു. ബെംഗളൂരുവിലെ പഞ്ചനക്ഷത്ര ഹോട്ടലിൽ ഞായറാഴ്ച നടന്ന നിയമസഭാ കക്ഷിയോഗത്തിൽ കോൺഗ്രസ് നിയോഗിച്ച നിരീക്ഷകർ എല്ലാ എംഎൽഎമാരെയും നേരിൽക്കണ്ടു. എംഎൽഎമാർ തങ്ങളുടെ പിന്തുണ ആർക്കെന്ന് നിരീക്ഷകരെ അറിയിച്ചു.

പുതിയ മുഖ്യമന്ത്രിയും മന്ത്രിമാരും വ്യാഴാഴ്ച സത്യപ്രതിജ്ഞ ചെയ്തേക്കുമെന്നാണ് ദേശീയമാധ്യമങ്ങളുടെ റിപ്പോർട്ട്. ഞായറാഴ്ച നടന്ന നിയമസഭാ കക്ഷിയോഗത്തിൽ മുഖ്യമന്ത്രി ആരെന്നു മല്ലികാർജുൻ ഖാർഗെ തീരുമാനിക്കണമെന്ന് ദേശീയ, സംസ്ഥാന കോൺഗ്രസ് നേതാക്കൾ ആവശ്യപ്പെട്ടു. മുഖ്യമന്ത്രിസ്ഥാനത്തേക്ക് പിസിസി അധ്യക്ഷൻ ഡി കെ ശിവകുമാറും മുൻ മുഖ്യമന്ത്രി സിദ്ധരാമ്മയ്യയും താൽപ്പര്യം പ്രകടിപ്പിച്ചുവെന്നാണ് സൂചന.

ജീവൻ തുടിക്കും ശിൽപ്പങ്ങളുമായി രാജേഷ് | Sculptor Rajesh | Kattappana |

കോൺഗ്രസ് ജനറൽ സെക്രട്ടറിമാരായ സുശീൽ കുമാർ ഷിൻഡെ, ദീപക് ബാബറിയ, ജിതേന്ദ്ര സിങ് അൽവാർ എന്നിവരുടെ നേതൃത്വത്തിലാണ് നിയമസഭാകക്ഷിയോഗം നടന്നത്. അതേസമയം മുഖ്യമന്ത്രിയുടെ സത്യപ്രതിജ്ഞയിൽ എഐസിസി അധ്യക്ഷൻ മല്ലികാർജുൻ ഖാർഗെ, മുൻ അധ്യക്ഷ സോണിയാ ഗാന്ധി, കോൺഗ്രസ് നേതാക്കളായ രാഹുൽ ഗാന്ധി, പ്രിയങ്ക ഗാന്ധി എന്നിവർ പങ്കെടുക്കും. കോൺഗ്രസിനെ പിന്തുണയ്ക്കുന്ന പ്രതിപക്ഷ കക്ഷികളെ സത്യപ്രതിജ്ഞാ ചടങ്ങിലേക്ക് ക്ഷണിച്ചേക്കും. സത്യപ്രതിജ്ഞാ ചടങ്ങ് പ്രതിപക്ഷ കക്ഷികളുടെ ശക്തിപ്രകടനം ആകാനും ഇടയുണ്ട്.

ഭാരത് ജോഡോ യാത്രയുടെ രണ്ടാം ഘട്ടം ഈ വർഷം; കേരളത്തിലോ തെലങ്കാനയിലോ സഖ്യത്തിനില്ല; കെ സി വേണുഗോപാൽ

അതിനിടെ, നിയമസഭാകക്ഷിയോഗം നടന്ന ഹോട്ടലിനു പുറത്തു ഡി കെ ശിവകുമാറിൻ്റെയും സിദ്ധരാമയ്യയുടെയും അനുയായികൾ ചേരിതിരിഞ്ഞു മുദ്രാവാക്യം വിളിച്ചു. അടുത്ത മുഖ്യമന്ത്രി സിദ്ധരാമയ്യ ആണെന്ന പോസ്റ്ററുകൾ അദ്ദേഹത്തിൻ്റെ ബെംഗളൂരുവിലെ വസതിക്കു പുറത്തു അനുയായികൾ പതിച്ചു. സമാന പോസ്റ്ററുകൾ ഡി കെ ശിവകുമാറിൻ്റെ വസതിക്കു മുന്നിലും പ്രത്യക്ഷപ്പെട്ടു. ‘കർണാടകത്തിൻ്റെ പുതിയ മുഖ്യമന്ത്രിക്ക് പിറന്നാൾ ആശംസകൾ’ എന്ന പോസ്റ്ററാണ് ശിവകുമാറിൻ്റെ ജന്മദിനമായ ഞായറാഴ്ച പ്രത്യക്ഷപ്പെട്ടത്. 224 അംഗ കർണാടക നിയമസഭയിൽ 135 സീറ്റുകൾ നേടിയാണ് കോൺഗ്രസ് ഭരണം പിടിച്ചത്. ഭരണകക്ഷിയായിരുന്ന ബിജെപി 66 സീറ്റുകളിലേക്ക് ഒതുങ്ങി.