തമിഴ്നാട്ടിൽ വിഷമദ്യ ദുരന്തം; 10 പേർ മരിച്ചു, നിരവധി പേർ ആശുപത്രിയിൽ

Authored by Deepu Divakaran | Samayam Malayalam | Updated: 15 May 2023, 8:30 am

തമിഴ്നാട്ടിൽ വിഷമദ്യ ദുരന്തം. മൂന്നു സ്ത്രീകളടക്കം 10 പേർ മരിച്ചു. വില്ലുപുരം, ചെങ്കൽപ്പേട്ട് ജില്ലകളിലാണ് ദുരന്തം ഉണ്ടായത്. 24 ലധികം പേർ ആശുപത്രിയിൽ ചികിത്സയിലാണ്.

Tamilnadu Spurious Liquor Death — Photo: Tamil Samayam.

ഹൈലൈറ്റ്:

തമിഴ്നാട്ടിൽ വിഷമദ്യ ദുരന്തം.
മൂന്നു സ്ത്രീകളടക്കം 10 പേർ മരിച്ചു.
24 ലധികം പേർ ചികിത്സയിൽ.

വില്ലുപുരം: തമിഴ്നാട്ടിൽ വിഷമദ്യം കുടിച്ചു മൂന്നു സ്ത്രീകളടക്കം 10 പേർ മരിച്ചു. വില്ലുപുരം, ചെങ്കൽപ്പേട്ട് ജില്ലകളിൽ വെള്ളി, ഞായർ ദിവസങ്ങളിലാണ് ദുരന്തമുണ്ടായത്. വില്ലുപുരം ജില്ലയിലെ മാരക്കാനത്തിനു സമീപത്തുള്ള ഇക്കിയാർക്കുപ്പം സ്വദേശികളായ ഏഴുപേർ ഞായറാഴ്ച ആണ് മരിച്ചത്. ചെങ്കൽപ്പേട്ടിലെ മധുരാന്തകം സ്വദേശികളായ രണ്ടുപേർ വെള്ളിയാഴ്ചയും ദമ്പതികൾ ഞായറാഴ്ചയും ആണ് മരണപ്പെട്ടത്. വിഷമദ്യം കുടിച്ച 24 ലധികം പേർ വിവിധ ആശുപത്രികളിലായി ചികിത്സയിലാണ്.

രണ്ടു വ്യത്യസ്ത സംഭവങ്ങളിലായാണ് 10 പേർ മരിച്ചതെന്ന് ഉത്തരമേഖലാ ഐജി എൻ കണ്ണൻ വില്ലുപുരത്തു നടത്തിയ വാർത്താസമ്മേളനത്തിൽ അറിയിച്ചു. ഇരു സംഭവങ്ങൾ തമ്മിൽ ബന്ധമുണ്ടോയെന്നു വ്യക്തമായിട്ടില്ല. ഇതുമായി ബന്ധപ്പെട്ട് അന്വേഷണം നടക്കുകയാണെന്ന് ഐജി അറിയിച്ചു. ഛർദ്ദിയെയും തലകറക്കത്തെയും തുടർന്നു ആറുപേരെ ഞായറാഴ്ച ആശുപത്രിയിൽ പ്രവേശിപ്പിച്ചു. വിവരം അറിഞ്ഞു പോലീസ് എത്തിയപ്പോഴേക്കും നാലുപേർ മരിച്ചു. മറ്റു രണ്ടുപേരെ തീവ്ര പരിചരണ വിഭാഗത്തിൽ പ്രവേശിപ്പിച്ചതിനാൽ മൊഴി എടുക്കാനായില്ലെന്നും ഇവർ പിന്നീട് മരണപ്പെട്ടുവെന്നും അദ്ദേഹം വ്യക്തമാക്കി.

ജീവൻ തുടിക്കും ശിൽപ്പങ്ങളുമായി രാജേഷ് | Sculptor Rajesh | Kattappana |

ചെങ്കൽപ്പേട്ടിലെ ചിത്തമുരിലാണ് ഒരു കുടുംബത്തിലെ രണ്ടുപേർ മരിച്ചതെന്ന് ഐജി പറഞ്ഞു. മറ്റൊരാൾ ആശുപത്രിയിൽ ചികിത്സയിലാണ്. ഇത് കുടുംബപ്രശ്നത്തെ തുടർന്നു വിഷമദ്യം കുടിച്ചുള്ള ആത്മഹത്യാശ്രമം ആണെന്നാണ് പോലീസ് സംശയിക്കുന്നത്. സമാന ലക്ഷണങ്ങളുമായി രണ്ടുപേരെ കൂടി ആശുപത്രിയിൽ പ്രവേശിപ്പിച്ചു. ചെങ്കൽപ്പേട്ടിൽ നാലുപേർ മരിച്ചതായും ഒരാൾ ആശുപത്രിയിൽ ചികിത്സയിലുള്ളതായും അമ്മവാസൈ എന്നയാൾ അറസ്റ്റിലായതായും ഐജി വിശദമാക്കി.

കർണാടകത്തിൽ സസ്പെൻസ്: മുഖ്യമന്ത്രിയെ ഖാർഗെ തീരുമാനിക്കും; എംഎൽഎമാരുടെ മനസറിഞ്ഞ് നിരീക്ഷകർ

അതേസമയം വില്ലുപുരത്തെ സംഭവവുമായി ബന്ധപ്പെട്ടു അമരൻ എന്നയാളെ പോലീസ് അറസ്റ്റു ചെയ്തു. ഇയാളിൽനിന്ന് വ്യാജമദ്യ ശേഖരം പോലീസ് പിടിച്ചെടുത്തു. വ്യാജമദ്യത്തിൻ്റെ സാംപിൾ തുടർപരിശോധനയ്ക്കായി ലാബിലേക്ക് അയച്ചു. രണ്ടു സംഭവങ്ങളിലെയും പ്രതികൾ ഒളിവിലാണെന്നും പോലീസ് അറിയിച്ചു. ഇവരെ പിടികൂടാനായി പോലീസ് പ്രത്യക അന്വേഷണ സംഘത്തെ രൂപീകരിച്ചു. സംഭവത്തെ തുടർന്നു വില്ലുപുരത്തെയും ചെങ്കൽപ്പേട്ടിലെയും മൂന്നു പോലീസ് ഇൻസ്പെക്ടർമാരെയും നാലു സബ് ഇൻസ്പെക്ടർമാരെയും സസ്പെൻഡ് ചെയ്തു.