​നല്ല ഒന്നാന്തരം ഹെര്‍ബല്‍ ടീ വീട്ടില്‍ തയ്യാറാക്കാം ഇതില്‍ ഒന്ന് ചേര്‍ത്താല്‍ മതി​

​തുളസി ചായ​

നല്ല തുളസി ഇട്ട ചായ കുടിച്ചിട്ടുണ്ടോ? അതും രാവിലെ തന്നെ നല്ല തുളസി ചായ കുടിച്ചാല്‍ ആരോഗ്യത്തിന് നിരവധി ഗുണങ്ങളാണ് ലഭിക്കുന്നത്. തുളസി നമ്മളുടെ രോഗപ്രതിരോധശേഷി വര്‍ദ്ധിപ്പിക്കാന്‍ സഹായിക്കുന്നുണ്ട്. അതുപോലെ തന്നെ നമ്മളുടെ ശരീരത്തിലെ മെറ്റബോളിസം വര്‍ദ്ധിപ്പിക്കുന്നതിനും തുളസി സഹായിക്കുന്നു. മെറ്റബോളിസം വര്‍ദ്ധിച്ചാല്‍ ശരീരത്തിലെ കൊഴുപ്പിനെ വേഗത്തില്‍ ദഹിപ്പിച്ച് കളയാന്‍ സാധിക്കുന്നതാണ്.

ഇത് തയ്യാറാക്കേണ്ടത് എങ്ങിനെയെന്ന് നോക്കാം. ആദ്യം തന്നെ ഒരു ഗ്ലാസ്സ് വെള്ളം തിളപ്പിക്കുക. ഇതിലേയ്ക്ക് ഉണക്കിയ തുളസി ഉണ്ടെങ്കില്‍ അത് അര ടീസ്പൂണ്‍ ഇടുക. അല്ലെങ്കില്‍ നല്ല ഫ്രഷ് തുളസി മൂന്ന് ഇതള്‍ ഇടുക. വെള്ളം ഒന്ന് തിളച്ച് വരുമ്പോള്‍ മാത്രം തുളസി ഇട്ടാല്‍ മതിയാകും. ഇതിലേയ്ക്ക് കരിപ്പെട്ടി ചേര്‍ത്ത്, അല്ലെങ്കില്‍ ശര്‍ക്കര ചേര്‍ത്ത് നിങ്ങള്‍ക്ക് കുളിക്കാവുന്നതാണ്.

പനിക്കൂര്‍ക്ക ചായ

കുറച്ചും കൂടെ ഹെല്‍ത്തിയാക്കുന്ന ഒരു ഹെര്‍ബല്‍ ടീ ആണ് പനിക്കൂര്‍ക്ക ചായ. ഇതില്‍ പനിക്കൂര്‍ക്ക മാത്രമല്ല, തുളസിയും അതുപോലെ, ഗ്രീന്‍ ടീ ലീവ്‌സും അടങ്ങിയിരിക്കുന്നുണ്ട്. ഇതെല്ലാം തന്നെ ആരോഗ്യത്തിന് നല്ലതാണ്. രോഗപ്രതിരോധശേഷി വര്‍ദ്ധിപ്പിക്കുന്നതിനും രാവിലെ തന്നെ നല്ലൊരു ഉന്മേഷം നല്‍കുന്നതിനും ഇത് സഹായിക്കുന്നുണ്ട്.

ഇത് എങ്ങിനെയാണ് തയ്യാറാക്കി എടുക്കുന്നത് എന്ന് നോക്കാം. ഇത് തയ്യാറാക്കാന്‍ തുളസി അതുപോലെ, പനിക്കൂര്‍ക്ക എന്നിവയും അതുപോലെ ഗ്രീന്‍ ടീയുടെ ഇലയുമാണ് ആവശ്യം. തുളസിയും പനിക്കൂര്‍ക്കയും ഉണക്കി അത്യാവശ്യം വലിയ പൊടിയായി സൂക്ഷിക്കുക. ഇത് വെള്ളം തിളയ്ക്കുമ്പോള്‍ ഇത് ചേര്‍ത്ത് നിങ്ങള്‍ക്ക് കുടിക്കാവുന്നതാണ്. ഗ്രീന്‍ ടീ ഇലയും ചേര്‍ക്കാന്‍ മറക്കരുത്.

പഴങ്കഞ്ഞിയുടെ ഗുണങ്ങള്‍

​കറുവാപ്പട്ട ചായ​

കറുവാപ്പട്ട ഇട്ട് ചായ വെക്കുന്നതും നല്ലതാണ്. ശരീരത്തിലെ മെറ്റബോളിസം വര്‍ദ്ധിപ്പിക്കുന്നതിനും ഹൃദയത്തിന്റെ ആരോഗ്യം നിലനിര്‍ത്തുന്നതിനും ഇത് സഹായിക്കുന്നുണ്ട്. ഈ ചായ രാവിലെ തന്നെ കുടിക്കുന്നത് നല്ലതാണ്. ഇത് തയ്യാറാക്കുന്നതിനായി ആദ്യം തന്നെ ഒരു ഗ്ലാസ്സ് വെള്ളം അടുപ്പില്‍ വെക്കുക.

വെള്ളം നന്നായി തിളച്ച് വരുമ്പോള്‍ ഇതിലേയ്ക്ക് ഒരു മീഡിയം സൈസ് കറുവാപ്പട്ടയും അതുപോലെ, ചായപ്പൊടിയും ചേര്‍ക്കുക. ഒന്ന് തിളക്കുമ്പോള്‍ തന്നെ തീ അണച്ച് അരിച്ച് മാറ്റി വെക്കേണ്ടത് അനിവാര്യമാണ്. ഇത് എന്നും രാവിലെ കുടിക്കുന്നത് നല്ലത് തന്നെ.

​ഇഞ്ചി ചായ​

ഇഞ്ചി ഇട്ട് ചായ കുടിക്കുന്നതും നല്ലതാണ്. ഇഞ്ചി ദഹനം കൃത്യമായി നടക്കുന്നതിനും അതുപോലെ, വയറ്റിലെ അസ്വസ്ഥതകള്‍ മാറ്റാനും, രോഗപ്രതിരോധശേഷി വര്‍ദ്ധിപ്പിക്കുന്നതിനും വളരെയധികം സഹായിക്കുന്നുണ്ട്. ഇത് തയ്യാറാക്കാന്‍ ഒരു കഷ്ണം ഇഞ്ചി ചതച്ചത് എടുക്കുക. വെള്ളം തിളയ്ക്കുമ്പോള്‍ അതിലേയ്ക്ക് ഇഞ്ചിയും അതുപോലെ, ഒരു ഏലക്കായും ചേര്‍ക്കണം.

ഇത് ഒന്ന് തിളച്ച് വരുമ്പോള്‍ ഇതിലേയ്ക്ക് ചായപ്പൊടി, അല്ലെങ്കില്‍ കാപ്പി പൊടി എന്നിവ ചേര്‍ത്ത് കുടിക്കാന്‍ എടുക്കാവുന്നതാണ്. ഇത് പാല്‍ ഒഴിച്ച് ചായ തയ്യാറാക്കുമ്പോഴും ചേര്‍ക്കാവുന്നതാണ്. രുചികരം തന്നെ.

Also read: മുള വന്ന സവാള ഉപയോഗിച്ചാല്‍ ഗുണമോ ദോഷമോ, അറിയാം…​

​ശ്രദ്ധിക്കേണ്ടത്​

ചായ ഒരിക്കലും അമിതമായാല്‍ നല്ലതല്ല. ചായ കുടിക്കുന്നത് സത്യത്തില്‍ നമ്മളുടെ പല്ലിന്റെ ആരോഗ്യം നശിപ്പിക്കുന്നുണ്ട്. പല്ലില്‍ കറ പിടിക്കുന്നതിനും അതുപോലെ, ശരീരത്തിലേയ്ക്ക് മധുരം അമിതമായി എത്തുന്നതിനും ഇത് കാരണമാകുന്നുണ്ട്. അതുപോലെ, ഇത് മുടിയുടെ ആരോഗ്യം നശിപ്പിക്കുന്നതിനും ചര്‍മ്മത്തിന്റെ ആരോഗ്യം നശിക്കുന്നതിനും ഒരു പരോക്ഷമായിട്ടുള്ള കാരണം കൂടിയാണ് ഇത്.

ചായ തയ്യാറാക്കുമ്പോള്‍ സാധാ പഞ്ചസ്സാര ഉപയോഗിക്കുകന്നതിനേക്കാള്‍ നല്ലത് കരിപ്പെട്ടി, അല്ലെങ്കില്‍ ശര്‍ക്കര, അല്ലെങ്കില്‍ ബ്രൗണ്‍ ഷുഗര്‍ എന്നിവ ഉപയോഗിക്കുന്നതാണ്. ഇവ പഞ്ചസ്സാരയുടെ അത്രയ്ക്കും വില്ലനാകുന്നില്ല എന്ന് തിരിച്ചറിയുക.

ശര്‍ക്കരയും കരിപ്പെട്ടിയുമെല്ലാം ഉപയോഗിച്ചാലും അതിനും ഒരു പരിധിയുണ്ട്. അമിതമായി ഉപയോഗിച്ചാല്‍ ഇതും പലതരത്തിലുള്ള ആരോഗ്യ പ്രശ്‌നങ്ങള്‍ ഉണ്ടാക്കുന്നുണ്ട്. അതിനാല്‍, ചായ മിതമായി മാത്രം ഉപയോഗിച്ചാല്‍ അമിതവണ്ണം വെക്കുമെന്ന ഭയം വേണ്ട, അതുപോലെ, പഞ്ചസ്സാരയുടെ അളവ് കൂടിയാലുള്ള ആരോഗ്യ പ്രശ്‌നങ്ങളെ അകറ്റി നിര്‍ത്താനും ഇത് സഹായിക്കും.

English Summary: Herbal Tea recipe