മദ്രസയിലെ മരണം: സോഷ്യല്‍ മീഡിയയിൽ പ്രതിഷേധം നിറയുന്നു

അതെസമയം സോഷ്യൽ മീഡിയയിൽ ശക്തമായ പ്രതിഷേധമാണ് ഉയരുന്നത്. എങ്ങനെയാണ് അസ്മിയ മരിച്ചത് എന്ന ചോദ്യമുന്നയിച്ച് മുഖ്യമന്ത്രിയെയും കേരളാ പൊലീസിനെയും ടാഗ് ചെയ്തിരിക്കുകയാണ് ഷബ്നം ഹാഷ്മി.

നിസ്സഹായായ ഒരു പെൺകുട്ടിയാണ് ദുരൂഹസാഹചര്യത്തിൽ മരണപ്പെട്ടിരിക്കുന്നതെന്നും അന്വേഷണം ഉണ്ടായേ തീരുവെന്നും അഡ്വ. ഷഹീൻ പിലാക്കൽ ഫേസ്ബുക്കിൽ എഴുതുന്നു. “ഏതെങ്കിലും പാവപ്പെട്ടവന്റെ വീട്ടിലെ കല്യാണത്തിന് തലേ ദിവസം നെയ്ച്ചോറ് വിളമ്പിയാലോ, ഗാനമേള നടത്തിയാലോ, ഒന്നു സന്തോഷിച്ച് നൃത്തം ചെയ്താലോ ഇടപെട്ടു അവരെ മഹല്ലിൽ നിന്നും പുറത്താക്കി മാപ്പു പറയിക്കുന്ന ഉസ്താദന്മാരും കമ്മറ്റിക്കാരും ഇത്തരം കാര്യത്തിലൊക്കെ നിശബ്ദരാണ്,” ഷഹീൻ പിലാക്കൽ പറയുന്നു.

“ഇസ്ലാമിക സ്ഥാപനമായത് കൊണ്ട് മാത്രം നീതി നിഷേധിപ്പിക്കപ്പെടാൻ പാടില്ല. ഇത് മതേതര കേരളമാണെന്ന് തള്ള് പറഞ്ഞാൽ മാത്രം പോരാ” എന്നെഴുതുന്നു എൻഷാദ് ചക്കനക്കൽ. #justiceforasmia എന്ന ഹാഷ്ടാഗ് വിവിധ ഓൺലൈൻ മാധ്യമങ്ങളിൽ വ്യാപകമായി ഉപയോഗിക്കപ്പെടുന്നുണ്ട്. “ആ പെൺകുട്ടിയുടെ ജീവിതം ഒരു തുണ്ട് കയറിൽ അവസാനിപ്പിച്ച ഉസ്താദ്, അദ്ധ്യാപകരെ അറസ്റ്റ് ചെയ്ത് കൊലക്കുറ്റത്തിന് കേസെടുക്കുക,” എന്നാവശ്യപ്പെടുന്നു എംകെ ഖരീം എന്ന പ്രഫൈൽ.

അതെസമയം അസ്വാഭാവിക മരണത്തിന് പൊലീസ് കേസെടുത്ത് അന്വേഷിക്കുന്നുണ്ട്. സ്ഥാപന അധികൃതര്‍ അതിശക്തമായ രാഷ്ട്രീയ പിൻബലമുള്ളവരായതിനാൽ കേസിൽ ഇടപെടൽ നടന്നേക്കാമെന്ന ആശങ്ക ഉയരുന്നുണ്ട്. സംഭവം നടന്ന് വളരെ സമയം പിന്നിട്ടതിനു ശേഷം സോഷ്യൽ മീഡിയയിൽ ചർച്ചകളുയർന്നതോടെയാണ് ഈ സംഭവം റിപ്പോർട്ടു ചെയ്യപ്പെട്ടു തുടങ്ങിയത്. ഇപ്പോഴും കാര്യമായ റിപ്പോർട്ടുകൾ എവിടെയും ലഭ്യമല്ലായെന്നത് സോഷ്യൽ മീഡിയ ചൂണ്ടിക്കാണിക്കുന്നു. മതസ്ഥാപനങ്ങളിലെ കൊലപാതകങ്ങളിലെ അന്വേഷണം എവിടെയുമെത്താറില്ലെന്ന് അടുത്തകാലത്തു വരെയുണ്ടായ അനുഭവങ്ങൾ ചൂണ്ടിക്കാട്ടി പലരും എഴുതുന്നുണ്ട്.

മതപഠന കേന്ദ്രത്തിലെ മാനസിക പീഡനമാണോ മരണത്തിനു പിന്നിലെന്നാണ് പൊലീസ് അന്വേഷിക്കുന്നത്. മരണത്തിൽ മറ്റ് ദുരൂഹതയൊന്നും പൊലീസ് കാണുന്നില്ല. പോസ്റ്റുമോർട്ടം റിപ്പോർട്ടും മറിച്ചൊരു സൂചന നൽകുന്നില്ല.