സിനിമയെ എതിര്‍ത്ത കോണ്‍ഗ്രസിനും ബിജെപി നേതാക്കള്‍ ഭീകരയുടെ വക്താക്കള്‍ പദവി നല്‍കുന്നതില്‍ മടികാണിച്ചില്ല. പ്രധാനമന്ത്രിയുടെ തന്നെ വാക്കുകള്‍ കടമെടുത്താല്‍ സിനിമയെ പിന്തുണയ്ക്കുന്നതിലൂടെ കോണ്‍ഗ്രസ് ചെയ്തത് കേരളം പോലെയുള്ള സംസ്ഥാനത്തെ ഭീകരവാദത്തെ പിന്തുണയ്ക്കുകയാണ്. ചിത്രത്തെ പിന്തുണച്ച് ന്യൂനപക്ഷ വോട്ട് ബാങ്കിന് വേണ്ടി ഭീകരതയെ കുടയാക്കുകയാണ് കോണ്‍ഗ്രസ് ചെയ്തത്. സിനിമയ്ക്ക് നിരോധനം കൊണ്ടുവന്ന് രാജ്യദ്രോഹ നടപടികളെ പിന്തുണയ്ക്കാനാണ് പാര്‍ട്ടി ശ്രമിച്ചതെന്നും മോദി പറയുന്നു. ഒരു വെടിക്ക് രണ്ടു പക്ഷി എന്ന് പറയുംപോലെ കോണ്‍ഗ്രസിനൊപ്പം കേരളത്തെ കൂടി ദേശീയ തലത്തില്‍ ഇകഴ്ത്തികാട്ടാന്‍ നടത്തിയ പരാമര്‍ശങ്ങളായിരുന്നു ഇവയെല്ലാം. എന്നാല്‍ ഈ കാര്‍ഡുകളൊന്നും ഫലം കണ്ടില്ലെന്ന് മാത്രമല്ല, ന്യൂനപക്ഷ വോട്ടുകള്‍ പാര്‍ട്ടിക്കെതിരായി ഏകികരിക്കപ്പെടുന്നതിന് കാരണമായി തീരുകയും ചെയ്തു. ഫലത്തില്‍ ഇത്തവണ കോണ്‍ഗ്രസിന് ലഭിച്ച ന്യൂനപക്ഷ വോട്ടുകള്‍ക്ക് അവര്‍ നന്ദി പറയേണ്ടത് ബിജെപിയോടും അവരുടെ നയങ്ങളോടും തന്നെയാണ്.
കന്നഡകാര്‍ക്ക് കര്‍ണാടകം കഴിഞ്ഞല്ലേ കേരളമുള്ളു?
പറയുമ്പോള്‍ മതപരിവര്‍ത്തനം തടയല്‍ നിയമം പോലുള്ളവ കന്നഡ മണ്ണില്‍ ബിജെപിയ്ക്ക് സാധ്യതകള്‍ കല്‍പ്പിച്ചിരുന്നെങ്കിലും ഭരണകക്ഷിയോട് ജനത്തിനുണ്ടായിരുന്ന പ്രതിഷേധം ശക്തമായിരുന്നു. അഴിമതിയില്‍ മുങ്ങിക്കുളിച്ച ബൊമ്മെ സര്‍ക്കാരിനെ വെളുപ്പിച്ചെടുക്കാന്‍ പാര്‍ട്ടി കൊണ്ടുവന്ന മാര്‍ഗങ്ങളിലൊന്നായിരുന്നു അഴിമതിക്കറ പുരളത്താവരും പുതുമുഖങ്ങളും സ്ഥാനാര്‍ത്ഥികളാവുകയെന്നത്. എന്നാല്‍ അവസാന ഫലങ്ങള്‍ വരുമ്പോള്‍ മനസ്സിലാവുന്നത് നിലവിലെ അഴിമതിക്കാര്‍ക്കെതിരേ നടപടിയെടുക്കാത്ത പാര്‍ട്ടി കൊണ്ടുവന്ന പുതു സ്ഥാനാര്‍ത്ഥികളോടും കന്നഡകാര്‍ക്ക് പ്രിയമില്ലെന്നാണ്. ജാതീപ്രീണന നയങ്ങള്‍,ന്യൂനപക്ഷ അവഗണന എന്നിവയെല്ലാം കന്നഡയില്‍ ഭരണവിരുദ്ധ വികാരത്തിന്റെ ആക്കം കൂട്ടിയവയാണ്. പോരാത്തതിന് കഴിഞ്ഞ 5 വര്‍ഷത്തിനിടെ സംസ്ഥാനം നിരവധി അക്രമസംഭവങ്ങള്‍ക്കും സാക്ഷ്യം വഹിച്ചിരുന്നു. പ്രത്യേകിച്ച് മംഗലാപുരം, ഉഡുപ്പി, ഷിമോഗ മേഖലകളില്‍. പൊതുവേ സമാധാനത്തിന്റെ വക്താക്കളാണ് കന്നഡിഗർ. ഇത്രത്തോളം പ്രശ്‌നങ്ങള്‍ അതിശക്തമായി സംസ്ഥാന രാഷ്ട്രീയത്തില്‍ നിലനില്‍ക്കെ മറ്റൊരു സംസ്ഥാനത്തിന്റെ അവസ്ഥ നിങ്ങള്‍ക്കും വന്നേക്കും എന്ന് പറഞ്ഞ് അവരെ പേടിപ്പിച്ചിട്ട് കാര്യമുണ്ടോ? ഇല്ല, അതാണ് തിരഞ്ഞെടുപ്പ് ഫലത്തില്‍ പ്രതിഫലിക്കുന്നതും.
ആഭ്യന്തരകലഹവും നാഥനില്ലായ്മയും
തിരഞ്ഞെടുപ്പിന് മുന്നോടിയായി പ്രധാനമന്ത്രി കര്‍ണാടക സന്ദര്‍ശിച്ചത് ആറ് തവണയാണ്. റോഡുകള്‍ ഉള്‍പ്പെടെ നിരവധി വികസന പദ്ധതികള്‍ സംസ്ഥാനത്തിന് സമര്‍പ്പിക്കുകയും ചെയ്തു. എന്നാല്‍ വോട്ട് ലക്ഷ്യമിട്ട് നടത്തിയ ഈ പദ്ധതികളുടെ ഗുണം വോട്ടായി ജനം ആര്‍ക്ക് നല്‍കും? അത്തരത്തില്‍ ഉയര്‍ത്തികാട്ടാന്‍ ബിജെപിയ്ക്ക് കൃത്യമായ ഒരു നേതാവുണ്ടായിരുന്നില്ല. ജാതിസമവാക്യങ്ങളില്‍ മുഖ്യനെ തീരുമാനിക്കുന്ന സംസ്ഥാനം കൂടിയാണ് കര്‍ണാടകയെന്നതും ഓര്‍ക്കണം. അവിടെ കോണ്‍ഗ്രസിന് ശിവകുമാറും സിദ്ധരാമയ്യയും അടക്കം നിരവധി നേതാക്കളുണ്ട്. ഇതുവരെ ബിജെപി ഉയര്‍ത്തി കാട്ടിയിരുന്ന യെദ്യൂരപ്പയാവട്ടെ കുറെക്കാലമായി അസഹിഷ്ണതകളോടെയാണ് തുടരുന്നതും. മുഖ്യമന്ത്രി സ്ഥാനത്തേക്ക് വരാന്‍ സാധ്യതയുണ്ടായിരുന്ന ജഗദീഷ് ഷെട്ടാറാവട്ടെ പുറത്ത് പോവുകയും ചെയ്തു.
അഴിമതി ഉയര്‍ത്തിക്കാട്ടുന്നതില്‍ കോണ്‍ഗ്രസ് വിജയിച്ചു
വികസന പദ്ധതികള്‍ ഉയര്‍ത്തിക്കൊണ്ടായിരുന്നു ബിജെപി തിരഞ്ഞെടുപ്പിന് തുടക്കമിട്ടതെങ്കിലും ഒരു ഘട്ടത്തില്‍ ഹിന്ദു വോട്ടുകള്‍ ഏകീകരിക്കുന്നതിനായി പ്രീണന രാഷ്ട്രീയത്തിലേക്ക് പോവുകയും വര്‍ഗീയ കാര്‍ഡ് ഇറക്കുകയുമായിരുന്നു. അവിടംമുതല്‍ പാര്‍ട്ടിയ്ക്ക് അടിതെറ്റി. ഹനുമാന്‍ ചാലിസയും മതംമാറ്റവും ബിജെപി ഉയര്‍ത്തിയപ്പോള്‍ കോണ്‍ഗ്രസ് ഭരണകക്ഷിയുടെ അഴിമതിമുഖം വെളിപ്പെടുത്തുന്നതില്‍ ശ്രദ്ധിച്ചു. ഒപ്പം പ്രാദേശിക വികസനവും ജനകീയ പ്രഖ്യാപനങ്ങളുമായി കളം നിറഞ്ഞു. കൂടാതെ 21 ദിവസമാണ് കര്‍ണാടകയില്‍ രാഹുല്‍ ഗാന്ധി ഭാരത് ജോഡോ യാത്ര നടത്തിയത്. മണ്ണിലേക്ക് ഇറങ്ങി, ജനമനസ്സ് അറിഞ്ഞുള്ള യാത്രയുടെ ഫലം കൂടിയാണിതെന്ന് വ്യക്തം.
