കോണ്‍ഗ്രസിന്റെ വിജയരഹസ്യം?
കര്‍ണാടകയിലെ വിജയത്തിനുപിന്നില്‍ കോണ്‍ഗ്രസിന്റെ പ്രചാരണ തന്ത്രത്തിന് വലിയ പങ്കുണ്ട് എന്നതില്‍ തര്‍ക്കമില്ല. വ്യക്തമായ ആസൂത്രണം, കൃത്യമായ നിര്‍വഹണം, പഴുതടച്ച പ്രചാരണം എന്നിവയാണ് കോണ്‍ഗ്രസിനെ വിജയത്തിലേക്ക് നയിച്ചത്. ബിജെപി സര്‍ക്കാരിന്റെ പാളിച്ചകള്‍ തുറന്നുകാണിക്കുക മാത്രമല്ല വിലവര്‍ധന പ്രധാന വിഷയമായി ഉയര്‍ത്തിക്കാണിക്കുകയും ചെയ്തു. വനിതകള്‍ക്ക് 2000 രൂപ നല്‍കുന്ന പദ്ധതി, സൗജന്യ ബസ് യാത്ര, യുവാക്കള്‍ക്ക് 3000 രൂപ സഹായം, ബിരുദധാരികളായ യുവാക്കള്‍ക്ക് 1500 രൂപയുടെ സഹായം, 10 കിലോ സൗജന്യ അരി നല്‍കുന്ന പദ്ധതി എന്നിവയാണ് കോണ്‍ഗ്രസിന്റെ വിജയ രഹസ്യങ്ങളില്‍ പ്രധാനം എന്ന് എഐസിസി ജനറല്‍ സെക്രട്ടറി കെ.സി. വേണുഗോപാല്‍ പറഞ്ഞു. അതേസമയം, കർണാടകയിലെ കോണ്‍ഗ്രസ് വിജയങ്ങള്‍ക്ക് ഈ ഘടകങ്ങള്‍ മാത്രമല്ല കാരണമെന്നതാണ് വസ്തുത.
എദ്ദേളു കർണാടകയും ബഹുത്വ കർണാടകയും
എദ്ദേളു കര്‍ണാടക (വേക്ക് അപ്പ് കര്‍ണാടക), ബഹുത്വ കര്‍ണാടക (Pluralistic Karnataka) എന്നീ സംഘടനകളുടെ പ്രവര്‍ത്തന ഫലം കൂടിയാണ് കര്‍ണാടകയിലെ കോണ്‍ഗ്രസ് വിജയം. ജനാധിപത്യം സംരക്ഷിക്കുന്നതിനും വര്‍ഗീയ, വിദ്വേഷ രാഷ്ട്രീയത്തിന് ഇരയാകുന്നതില്‍ നിന്ന് സംസ്ഥാനത്തെ രക്ഷിക്കുന്നതിനുവേണ്ടിയാണ് ഈ രണ്ട് സംഘടനകളും പ്രവര്‍ത്തനം ആരംഭിച്ചത്. കര്‍ണാടകയുടെ മതേതര ഘടനയ്ക്ക് ഒരു തരത്തിലുമുള്ള മാറ്റം സംഭവിക്കാതിരിക്കുന്നതിനുവേണ്ടിയാണ് എദ്ദേളു കര്‍ണാടക പ്രവര്‍ത്തനമാരംഭിച്ചതെന്ന് എഴുത്തുകാരിയും ആക്ടിവിസ്റ്റുമായ സരസ്വതി (Du Saraswathi) പറഞ്ഞു.
എന്താണ് എദ്ദേളു കര്‍ണാടക?
ഭരണഘടനയെ സംരക്ഷിക്കുക, സംസ്ഥാനത്തിന്റെ മതേതര സ്വഭാവം കാത്തുസൂക്ഷിക്കുക എന്നീ ലക്ഷ്യങ്ങള്‍ക്കായി പ്രവര്‍ത്തനം ആരംഭിച്ച സംഘടനയാണ് എദ്ദേളു കര്‍ണാടക. അഴിമതിയും വിദ്വേഷവും നിറഞ്ഞ ബിജെപി ഭരണത്തിനെതിരെയാണ് ഈ സംഘടന സന്ധിയില്ലാത്ത യുദ്ധം പ്രഖ്യാപിച്ചത്. മുന്‍ തൊഴില്‍മന്ത്രി എസ്.കെ. കാന്ത, എഴുത്തുകാരനും ആക്ടിവിസ്റ്റുമായ ദേവനുരു മഹാദേവ, എഴുത്തുകാരി റഹ്‌മത്ത് തരികെരെ, നഡോജ ഡോ. കമല ഹമ്പാന, സ്ട്രാറ്റജി ഹെഡ്ഡ ഗിഗാടോണ്‍ ചലഞ്ച്, ആംനസ്റ്റി ഇന്റര്‍നാഷണല്‍ ഇന്ത്യയുടെ മുന്‍ പ്രോഗ്രാം ഡയറക്ടറും ജെഎന്‍യു കന്നഡ പീഠത്തിന്റെ സ്ഥാപകനുമായ താര റാവു, പ്രൊഫ. പുരുഷോത്തം ബിലിമലെ, സാമൂഹിക നരവംശശാസ്ത്രജ്ഞന്‍ എ. ആര്‍. വാസവി എന്നിവര്‍ എദ്ദേളു കര്‍ണാടകയിലെ അംഗങ്ങളാണ്.
ഏകദേശം 5000 സന്നദ്ധപ്രവര്‍ത്തകരുടെ പിന്തുണയോടെയാണ് ഗ്രൂപ്പ് പ്രവര്‍ത്തിച്ചത്. മൂന്ന് മാസക്കാലം നീണ്ടുനിന്ന പ്രചാരണങ്ങള്‍ക്കൊടുവിലാണ് ഇവര്‍ കര്‍ണാടകയില്‍ ബിജെപിയുടെ പരാജയം ഉറപ്പിച്ചത്. ബിജെപിക്കെതിരെ ഒത്തുകൂടിയ സന്നദ്ധപ്രവര്‍ത്തകരാണ് എദ്ദേളു കര്‍ണാടകയിലെയും ബഹുത്വ കര്‍ണാടകയിലെയും അംഗങ്ങള്‍. പരമ്പരാഗത മാര്‍ഗ്ഗത്തിലൂടെയും സോഷ്യല്‍ മീഡിയയിലൂടെ ബിജെപി സര്‍ക്കാരിന്റെ അഴിമതിയെക്കുറിച്ചും വിദ്വേഷ രാഷ്ട്രീയത്തെക്കുറിച്ചും ജനങ്ങളെ ബോധവാന്മാരാക്കികൊണ്ടായിരുന്നു ഈ രണ്ട് സംഘടനകളും പ്രവര്‍ത്തിച്ചത്. ബിജെപിക്കെതിരെ വോട്ടുകള്‍ ഏകോപിപ്പിക്കാനുള്ള ശ്രമങ്ങള്‍ എദ്ദേളു കര്‍ണാടകത്തിന്റെ ഭാഗത്തുനിന്നുണ്ടായിരുന്നു. ബിജെപിക്കെതിരെ നില്‍ക്കുന്ന ശക്തരായ സ്ഥാനാര്‍ത്ഥിയെ വിജയിപ്പിക്കുക എന്ന തന്ത്രമാണ് അവര്‍ പയറ്റിയത്. ബിജെപിയുടെ വിജയസാധ്യത കുറക്കുന്നതിനായി 49ഓളം നോമിനേഷനുകള്‍ പിന്‍വലിപ്പിക്കുക കൂടി ചെയ്തിരുന്നു. ഇരുഭാഗത്തേക്കും മറിഞ്ഞേക്കാവുന്ന 103 മണ്ഡലങ്ങളെ കേന്ദ്രീകരിച്ച് മൂന്ന് മാസക്കാലമാണ് എദ്ദേളു കര്‍ണാടക പ്രവര്‍ത്തിച്ചത്. ഒറ്റ വോട്ടും പാഴാവരുത്, വോട്ടുകള്‍ വിഭജിച്ച് പോവരുത്, ബിജെപിയെ തോല്‍പ്പിക്കാന്‍ ഏറ്റവും സാധ്യതയുള്ള സ്ഥാനാര്‍ത്ഥിക്ക് മാത്രം വോട്ട് ചെയ്യണം എന്നീ കാര്യങ്ങള്‍ ഈ സംഘടന വോട്ടര്‍മാരെ നിരന്തരം ഓര്‍മ്മിപ്പിച്ചതിന്റെയും അതിനായി പ്രവര്‍ത്തിച്ചതിന്റെയും ഫലമാണ് ഈ വിജയം.
എദ്ദേളു കര്‍ണാടകയുടെ ഔട്ട്‌റീച്ച് പ്രോഗ്രാമുകള്‍ക്കിടയില്‍ 25 പേജുള്ള ബുക്കലെറ്റ് തയ്യാറാക്കി വിതരണം ചെയ്തിരുന്നു. ബിജെപി സര്‍ക്കാരിന്റെ ഭരണത്തെക്കുറിച്ചും അഴിമതിയെക്കുറിച്ചും പാലിക്കാത്ത വാഗ്ദാനങ്ങളെക്കുറിച്ചും ആ ബുക്ക്‌ലെറ്റിലൂടെ തുറന്നുകാട്ടി. ഇതിനുപുറമേ 75 സമ്മേളനങ്ങള്‍ നടത്തി നേരിട്ട് ആളുകളുമായി സംവദിക്കുകയും 80 വീഡിയോകളിലൂടെ ഇക്കാര്യങ്ങള്‍ ജനങ്ങളുമായി പങ്കുവെക്കുകയും ചെയ്തു. കൃഷി, പരിസ്ഥിതി, തൊഴില്‍, മതന്യൂനപക്ഷങ്ങള്‍, ഗ്രാമീണ വികസം, സ്ത്രീകളുടെ അവകാശങ്ങള്‍, ആരോഗ്യ സംരക്ഷണം, പോഷകാഹാരം എന്നിങ്ങനെ നിരവധി വിഷയങ്ങളില്‍ ബിജെപി സര്‍ക്കാര്‍ മോശം പ്രകടനമാണ് കാഴ്ചവെച്ചതെന്ന് ബഹുത്വ കര്‍ണാടകയും എദ്ദേളു കര്‍ണാടകയും ജനങ്ങളെ ബോധ്യപ്പെടുത്തി. അതിന്റെ കൂടി വിജയമാണിത്.
