ഗോപാലേട്ടൻ്റെ പശുവില്ല, ആമിനത്താത്തയുടെ പൂവൻ കോഴിയില്ല; ഞാനല്ലാത്തത് കൊണ്ട് ഇജ്ജാതി ട്രോളുകളൊന്നുമില്ല; വിജയ ശതമാനത്തിൽ പ്രതികരണവുമായി അബ്ദുറബ്ബ്

കൊച്ചി: എസ്എസ്എൽസി വിജയ ശതമാനം 99 കടന്നിട്ടും വിദ്യാഭ്യാസ വകുപ്പ് മന്ത്രി താനല്ലാത്തതുകൊണ്ട് പരിഹസിക്കാനോ ട്രോളാനോ ആരും തയ്യാറാകുന്നില്ലെന്ന് മുൻ വിദ്യാഭ്യാസ വകുപ്പ് മന്ത്രി പി കെ അബ്ദുറബ്ബ്.



യുഡിഎഫ് സർക്കാരിന്റെ കാലത്താണെങ്കിൽ വിജയശതമാനം ഉയരുമ്പോൾ വിദ്യാർത്ഥികളുടെ കഴിവിനെ വില കുറച്ചു കാണാനും മന്ത്രിയെ ട്രോളാനും കുറ്റപ്പെടുത്താനുമാണ് ഇടത് സൈബർ പോരാളികൾ സമയം ചെലവഴിച്ചിരുന്നതെന്നും അബ്ദുറബ്ബ് കുറ്റപ്പെടുത്തി.

2011 ൽ എം എ ബേബി വിദ്യാഭ്യാസ മന്ത്രിയായ സമയത്ത് 91.37 ആയിരുന്നു വിജയശതമാനം. പിന്നീട് താൻ മന്ത്രിയായിരുന്ന കാലത്തും എസ്എസ്എൽസി വിജയശതമാനം കൂടിക്കൂടി വന്നു. 2012 ൽ 93.64, 2013 ൽ 94.17, 2014 ൽ 95.47, 2015 ൽ 97.99, 2016 ൽ 96.59 എന്നിങ്ങനെയായിരുന്നു വിജയ ശതമാനം.

എസ്എസ്എൽസി ഫലം പ്രഖ്യാപിച്ചു; 99.47 % വിജയം

2016 മുതൽ പ്രൊഫസർ രവീന്ദ്രനാഥ് മന്ത്രിയായ ശേഷമുള്ള വിജയശതമാനവും ഉയരത്തിൽ തന്നെയായിരുന്നു. 2017 ൽ 95.98, 2018 ൽ 97.84, 2019 ൽ 98.11, 2020 ൽ 98.82 എന്നിങ്ങനെയായിരുന്നു വിജയം. ഇപ്പോഴിതാ 2021 ൽ 99.47 ശതമാനം പേരും എസ്എസ്എൽസിക്ക് ഉപരിപഠന യോഗ്യത നേടിയിരിക്കുന്നു.

വിജയശതമാനം കൂടിയത് മന്ത്രിയുടെ കഴിവു കേടല്ല, വിദ്യാർത്ഥികളെ, നിങ്ങളുടെ മിടുക്കു കൊണ്ടാണ്. നിങ്ങളുടെ വിജയത്തെ വില കുറച്ചു കാണുന്നില്ല, അബ്ദുറബ്ബ് ഫേസ്ബുക്ക് പോസ്റ്റിൽ പറഞ്ഞു.