യാത്ര തിരിച്ചത് അര്‍ധരാത്രിക്കു ശേഷം
യുഎസ് സംസ്ഥാനമായ ഫ്‌ളോറിഡയിലെ കേപ് കനാവറലിലുള്ള നാസയുടെ കെന്നഡി സ്പേസ് സെന്ററിലെ ലോഞ്ച് കോംപ്ലക്‌സ് 39 എയില്‍ നിന്ന് സ്പേസ് എക്സ് ഡ്രാഗണ്‍ ബഹിരാകാശ പേടകത്തിലായിരുന്നു യാത്ര. അന്താരാഷ്ട്ര ബഹിരാകാശ നിലയത്തിലേക്കുള്ള (ഐഎസ്എസ്) സ്വകാര്യ ദൗത്യത്തിന്റെ വിക്ഷേപണം ഇന്നലെ അര്‍ധ രാത്രിക്കു ശേഷം 12.37 ന് ആയിരുന്നു നടന്നത്. ഡ്രാഗണ്‍ ബഹിരാകാശ പേടകം 16 മണിക്കൂര്‍ ഐഎസ്എസിലേക്ക് യാത്ര ചെയ്യും. ഇന്ന് വൈകുന്നേരത്തോടെ ലക്ഷ്യത്തില്‍ എത്തിച്ചേരുമെന്നാണ് കണക്കുകൂട്ടല്‍.
20 ഗവേഷണങ്ങള്‍ക്ക് നേതൃത്വം നല്‍കും
ഡോക്ക് ചെയ്തുകഴിഞ്ഞാല്‍, സയന്‍സ്, ഔട്ട്റീച്ച്, കൊമേഴ്സ്യല്‍ ആക്റ്റിവിറ്റികള്‍ അടങ്ങുന്ന ഒരു സമ്പൂര്‍ണ ദൗത്യം നിര്‍വ്വഹിച്ച് പരിക്രമണ ലബോറട്ടറിയില്‍ 10 ദിവസം ചെലവഴിക്കാനാണ് ആക്സിയം സ്പേസ് ബഹിരാകാശയാത്രികര്‍ പദ്ധതിയിടുന്നത്. ദൗത്യത്തിനിടെ, ബര്‍നാവിയും അല്‍ ഖര്‍നിയും 20 പരീക്ഷണങ്ങള്‍ നടത്തും. അതില്‍ ക്യാന്‍സര്‍ പ്രവചിക്കുന്നതിനും തടയുന്നതിനുമുള്ള ഗവേഷണവും ചന്ദ്രനിലും ചൊവ്വയിലും ഭാവിയിലെ മനുഷ്യവാസ കേന്ദ്രങ്ങളില്‍ കൃത്രിമ മഴ എങ്ങനെ സൃഷ്ടിക്കാമെന്ന പഠനവും സീറോ ഗ്രാവിറ്റിയില്‍ സ്റ്റെം സെല്ലുകളുടെ സ്വഭാവത്തെ കുറിച്ചുള്ള പഠനവും ഉള്‍പ്പെടും.
പൊന്നമ്പലമേട്ടിലെ പൂജ; ഇടനിലക്കാരൻ പിടിയിൽ
പൊന്നമ്പലമേട്ടിലെ പൂജ; ഇടനിലക്കാരൻ പിടിയിൽ
ആശംസാ സന്ദേശവുമായി അല്‍ നെയാദി
ഐഎസ്എസില്‍ ഇറങ്ങിയ ശേഷം ബര്‍നാവിയും അല്‍ ഖര്‍നിയും യുഎഇയില്‍ നിന്നുള്ള ബഹിരാകാശ യാത്രികനായ സുല്‍ത്താന്‍ അല്‍ നെയാദിക്കൊപ്പം പങ്കു ചേരും. രണ്ട് അറബ് രാജ്യങ്ങളില്‍ നിന്നുള്ള ബഹിരാകാശയാത്രികര്‍ ഐഎസ്എസില്‍ ആദ്യമായി കണ്ടുമുട്ടുന്നത് ഇത് ആദ്യമാണെന്ന സവിശേഷതയുമുണ്ട്. യാത്ര തുടങ്ങുന്നതിന്റെ മണിക്കൂറുകള്‍ക്ക് മുമ്പ് അല്‍ നെയാദി ട്വിറ്ററില്‍ ബര്‍നാവിക്കും അല്‍ ഖര്‍നിക്കും ആശംസാ സന്ദേശം അയച്ചിരുന്നു. റയാന ബര്‍നാവി, ബ്രസ്റ്റ് കാന്‍സര്‍ ഗവേഷകയാണ്. അലി അല്‍ ഖര്‍നിയാവട്ടെ യുദ്ധവിമാനത്തിലെ പൈലറ്റും. നാസയുടെ മുന്‍ ആസ്ട്രൊനോട്ട് പെഗ്ഗി വിറ്റ്സണ്‍, അമേരിക്കയിലെ ടെന്നസ്സിയില്‍നിന്നുള്ള ബിസിനസുകാരനായ ജോണ്‍ ഷോഫ്നര്‍ എന്നിവരും സംഘത്തില്‍ ഉള്‍പ്പെടുന്നു. പെഗ്ഗി വിറ്റ്സന്റേത് ഇത് നാലാമത് ബഹിരാകാശ സഞ്ചാരമാണ്. പൈലറ്റ് എന്ന നിലയിലുള്ള ദൗത്യമാണ് ഷോഫ്നര്‍ക്ക്. സ്പെയ്സ് വാക് നടത്തിയ ആദ്യ അറബ് പൗരനായ യുഎഇയുടെ സുല്‍ത്താന്‍ അല്‍ നെയാദിയാണ് അതിലൊരാള്‍. കഴിഞ്ഞ മാസമാണ് സുല്‍ത്താന്‍ സ്പെയ്സ് വാക് നടത്തിയത്. അദ്ദേഹത്തെ കൂടാതെ മൂന്ന് റഷ്യക്കാരും മൂന്ന് അമേരിക്കക്കാരും ബഹിരാകാശ നിലയത്തിലുണ്ട്.
സൗദിയുടെ ആദ്യ ബഹിരാകാശ ദൗത്യം 1985ല്‍
1985ല്‍ സുല്‍ത്താന്‍ ബിന്‍ സല്‍മാന്‍ രാജകുമാരനാണ് ബഹിരാകാശ സഞ്ചാരം നടത്തിയ ആദ്യ സൗദി പൗരന്‍. വ്യോമസേന പൈലറ്റായിരുന്ന സുല്‍ത്താന്‍ രാജകുമാരന്‍, യു.എസ് ബഹിരാകാശ സംഘത്തോടൊപ്പമാണ് യാത്ര നടത്തിയത്. 2018ല്‍ സ്ഥാപിതമായ സൗദി സ്പെയ്സ് കമ്മീഷന്‍ കഴിഞ്ഞ വര്‍ഷമാണ് കൂടുതല്‍ പേരെ ബഹിരാകാശത്ത് അയക്കുന്നതിനുള്ള പദ്ധതി ആരംഭിച്ചത്. ഇതനുസരിച്ച് നാല് പേര്‍ അമേരിക്കയില്‍ പരിശീലനം നടത്തി. അതില്‍നിന്നാണ് റയാനയും, അലിയും ആദ്യ ദൗത്യത്തിന് പുറപ്പെടുന്നത്. നാസയും സ്വകാര്യ ബഹിരാകാശ കമ്പനിയായ ആക്സിയോം സ്പെയ്സും ചേര്‍ന്നുള്ള രണ്ടാത്തെ ദൗത്യമാണിത്. 2022 ഏപ്രിലില്‍ നടത്തിയ ആദ്യ ദൗത്യത്തില്‍ മുന്‍ നാസ ആസ്ട്രൊനോട്ട് മൈക്കിള്‍ ലോപസ് അലെഗ്രിയ അടക്കം നാല് പേരെ ബഹിരാകാശ നിലയത്തിലെത്തിച്ചു. 17 ദിവസമാണ് അവര്‍ അവിടെ കഴിഞ്ഞത്. ബഹിരാകാശത്ത് സ്വന്തമായി നിലയം സ്ഥാപിക്കാനുള്ള ഒരുക്കത്തലാണ് ആക്സിയോം സ്പെയ്സ്.
പിറന്നത് അഭിമാന നിമിഷം
ബഹിരാകാശത്തെത്തുന്ന ആദ്യത്തെ സൗദി, അറബ്, മുസ്ലിം വനിത എന്ന നിലയില്‍ ചരിത്രം കുറിച്ചിരിക്കുകയാണ് റയാന ബര്‍നാവി. ബഹിരാകാശ യാത്രയുടെ അവസാന വട്ട ഒരുക്കങ്ങളുടെ വീഡിയോറയാന ബര്‍നാവിയും അലി അല്‍ഖര്‍നിയും സാമൂഹിക മാധ്യമങ്ങളില്‍ പങ്കുവെച്ചു. ബഹിരാകാശത്തേക്കുള്ള സൗദി ദൗത്യം ആരംഭിക്കുന്നതില്‍ ആവേശവും അഭിമാനവുമുണ്ടെന്ന് യാത്ര തിരിക്കും മുമ്പ് ബഹിരാകാശ സഞ്ചാരികള്‍ പറഞ്ഞു. വിക്ഷേപണ വാഹനത്തില്‍ കയറുന്നതിന് മുമ്പ് ബര്‍ണവിയും അല്‍ ഖര്‍നിയും അവരുടെ കുടുംബാംഗങ്ങളെ കാണുകയും രാജ്യത്തെ അഭിവാദ്യം ചെയ്യുകയും ചെയ്തു. കെന്നഡി സ്പേസ് സെന്ററില്‍ നിന്നുള്ള ബഹിരാകാശ വാഹനത്തിന്റെ വിക്ഷേപണത്തിന് കമ്മ്യൂണിക്കേഷന്‍സ്, ഐടി മന്ത്രിയും സുപ്രീം സ്പേസ് കൗണ്‍സില്‍ ഡെപ്യൂട്ടി മേധാവിയുമായ അബ്ദുല്ല അല്‍ സവാഹ, യുഎസിലെ സൗദി അംബാസഡര്‍ റീമ ബിന്റ് ബന്ദര്‍ രാജകുമാരി തുടങ്ങിയവര്‍ സാക്ഷികളായി.
