Authored by Anit | Samayam Malayalam | Updated: 22 May 2023, 10:57 am
കഠിനമായ ചൂടിൽ ചർമ്മത്തിൽ ഉണ്ടാകാവുന്ന ഒന്നാണ് കരുവാളിപ്പ്. ഇത് അകറ്റാൻ സഹായിക്കുന്ന 10 പ്രകൃതിദത്ത മാർഗ്ഗങ്ങൾ പരിചയപ്പെടാം.
-
കരുവാളിപ്പ് മാറാൻ വീട്ടുവൈദ്യങ്ങൾ
വെയിലേറ്റ് ചർമ്മം ആകെ മൊത്തം കരുവാളിച്ചുപോയതോർത്ത് ഇനി ആകുലപ്പെടേണ്ട. ഇത് മാറ്റാൻ എളുപ്പത്തിൽ ചെയ്യാവുന്ന ചില പൊടിക്കൈകളുണ്ട്. വീട്ടിൽ പെട്ടന്ന് എടുക്കാവുന്ന ചേരുവകൾ ഉപയോഗിച്ച് വളരെ എളുപ്പത്തിൽ എങ്ങനെ ഇവ തയ്യാറാക്കാം എന്ന് പെട്ടന്നൊന്ന് നോക്കിയാലോ?
-
തൈര് + കടലപ്പൊടി
ഒരു സ്പൂൺ കടലപ്പൊടിയിലേയ്ക്ക് ആവശ്യത്തിന് തൈര് ചേർത്ത് നന്നായി ഇളക്കി കട്ടിയുള്ള ഒരു പേസ്റ്റ് തയ്യാറാക്കുക. ഇത് ചർമ്മത്തിൽ പുരട്ടി ഏകദേശം 20 മിനിറ്റ് എങ്കിലും അങ്ങനെ തന്നെ വെച്ച ശേഷം കഴുകി മാറ്റാവുന്നതാണ്. തൈരിൽ അടങ്ങിയിട്ടുള്ള ലാക്ടിക് ആസിഡ് ചർമ്മത്തെ തണുപ്പിക്കാനും കരുവാളിപ്പ് നീക്കാനും സഹായിക്കും. അതേസമയം കടലപ്പൊടി ചർമ്മത്തെ എക്സ്ഫോളിയേറ്റ് ചെയ്തത് സ്വാഭാവിക തിളക്കം നൽകുകയും ചെയ്യുന്നു.
-
തേൻ + നാരങ്ങാനീര്
നാരങ്ങാനീര് ഒരിക്കലും ചർമ്മത്തിൽ നേരിട്ട് പുരട്ടരുത്. ഒരല്പം നാരങ്ങാ നീരിലേയ്ക്ക് കുറച്ച് തേൻ ചേർത്ത് നന്നായി യോജിപ്പിച്ചെടുത്ത ശേഷം ചർമ്മത്തിൽ പുരട്ടുന്നത് കരുവാളിപ്പ് അകറ്റാനുള്ള മികച്ച പരിഹാരമാണ്. നാരങ്ങാനീരിലെ അസ്കോർബിക്, ഗ്ലൈക്കോളിക്, ആൽഫാ ഹൈഡ്രോക്സി ആസിഡുകൾ ചർമ്മത്തെ എക്സ്ഫോളിയേറ്റ് ചെയ്യാനും സൂര്യപ്രകാശമേറ്റ് ചർമ്മത്തിലുണ്ടാകുന്ന കേടുപാടുകൾ അകറ്റാനും സഹായിക്കും. തേൻ ചർമ്മത്തെ വരണ്ടുപോകാതെ സൂക്ഷിക്കുകയും ചെയ്യും.
-
തക്കാളി
ചർമ്മ സംരക്ഷണത്തിന് ഉപയോഗിക്കാവുന്ന അടുക്കള ചേരുവകളിൽ മികച്ച ഒന്നാണ് തക്കാളി. ഇതിൽ അടങ്ങിയിരിക്കുന്ന ലൈക്കോപീൻ പ്രകൃതിദത്ത സൺസ്‌ക്രീൻ ആയി പ്രവർത്തിക്കുന്നു. പുറത്ത് പോയി വന്ന ഉടനെ ചർമ്മം വൃത്തിയാക്കി ഒരു തക്കാളി കൊണ്ട് ചർമ്മം മുഴുവൻ ഉരസുക. അൽപ സമയത്തിന് ശേഷം നന്നായി കഴുകി വൃത്തിയാക്കുക. ചർമ്മത്തിലെ കരുവാളിച്ച ഇരുണ്ട നിറം അകറ്റാൻ തക്കാളി തന്നെ ബെസ്റ്റ്!
-
കറ്റാർവാഴ
ചർമ്മ സംരക്ഷണത്തിനുള്ള അമൃത് എന്ന് കറ്റാർവാഴയെ വിശേഷിപ്പിക്കുന്നതിൽ തെറ്റില്ല. കറ്റാർവാഴ ജെല്ലിലേയ്ക്ക് അല്പം വെള്ളം, നിങ്ങൾക്ക് ഇഷ്ടമുള്ള ഏതെങ്കിലും എസ്സെൻഷ്യൽ ഓയിൽ (ടീ ട്രീ ഓയിൽ അല്ലെങ്കിൽ ലാവണ്ടർ ഓയിൽ) എന്നിവ ചേർത്ത് നന്നായി യോജിപ്പിച്ച ശേഷം ചർമ്മത്തിൽ പുരട്ടി നോക്കൂ, ഇത് കരുവാളിപ്പ് പെട്ടന്ന് കുറയ്ക്കാൻ സഹായിക്കും. അതുപോലെ തന്നെ ചർമ്മത്തിൽ ഏതെങ്കിലും തരത്തിലുള്ള ചൊറിച്ചിലോ മറ്റോ ഉണ്ടെങ്കിൽ അതിനെതിരെ പ്രവർത്തിക്കാനും ഇത് സഹായിക്കും.
-
പപ്പായ
നല്ല പഴുത്ത പപ്പായ നല്ലതുപോലെ ഉടച്ചെടുത്ത ശേഷം ചർമ്മത്തിൽ പുരട്ടുക മാത്രമാണ് ചെയ്യേണ്ടത്. ആവശ്യമെങ്കിൽ ഇതിലേയ്ക്ക് ഒരല്പം തേൻ കൂടെ ചേർക്കാം, നിർബന്ധമില്ല. പപ്പായയിലെ പപ്പൈൻ എന്ന എൻസൈം ചർമ്മത്തെ എക്സ്ഫോളിയേറ്റ് ചെയ്യാൻ സഹായിക്കുന്നതോടൊപ്പം പിഗ്മെന്റേഷൻ പ്രശ്നങ്ങൾ അകറ്റാനും കരുവാളിപ്പ് കുറയ്ക്കാനും സഹായിക്കുന്നു.
-
തൈര് + മഞ്ഞൾ
മുഖത്ത് മാത്രമല്ല, കരുവാളിപ്പ് ഉണ്ടാകാൻ സാധ്യത കൂടുതലുള്ള സ്ഥലങ്ങളാണ് നമ്മുടെ കൈകാലുകൾ. തണുത്ത തൈരിലേയ്ക്ക് ഒരു നുള്ള് മഞ്ഞൾ പൊടി ചേർത്ത് പേസ്റ്റ് രൂപത്തിൽ തയ്യാറാക്കി കുളിക്കുന്നതിന് ഏകദേശം 20 മിനിറ്റ് മുമ്പ് കൈകാലുകളിൽ പുരട്ടാം. രണ്ടാഴ്ചയോളം എല്ലാ ദിവസവും ഇത് ചെയ്‌താൽ കരുവാളിപ്പ് പമ്പ കടക്കും!
-
കടലപ്പൊടി + മഞ്ഞൾ + പാൽ
കടലപ്പൊടിയിലേയ്ക്ക് ഒരല്പം മഞ്ഞൾ ചേർക്കുക, പേസ്റ്റ് രൂപത്തിൽ തയ്യാറാക്കാനായി ഒരല്പം പാലും. ഇവ ചേർത്ത് പേസ്റ്റ് തയ്യാറാക്കിയ ശേഷം കുറച്ച് റോസ് വാട്ടർ കൂടെ ചേർത്ത് ഇളക്കിയെടുക്കുക. ഇത് ചർമ്മത്തിൽ പുരട്ടി ഇരുപത് മിനിറ്റ് കഴിഞ്ഞ് കഴുകി കളയാം. എല്ലാ ദിവസവും ഇത് ചെയ്‌താൽ ഏതാനും ആഴ്ചകൾക്കുളളിൽ തന്നെ നിങ്ങൾക്ക് വ്യത്യാസം കാണാം.
-
തൈര് + തേൻ
തൈര് ഒരു സ്വാഭാവിക എക്സ്ഫോളിയേറ്റർ ആണ്. തേനിൽ ആന്റിഓക്സിഡന്റ് സവിശേഷതകൾ ധാരാളമടങ്ങിയിരിക്കുന്നു. ഇവ രണ്ടും ചേരുമ്പോൾ ചർമ്മത്തെ പോഷിപ്പിക്കാനുള്ള ഗുണങ്ങളാണ് ലഭിക്കുന്നത്. രണ്ടും ചേർത്ത് ചർമ്മത്തിൽ ആഴ്ചയിൽ കുറഞ്ഞത് മൂന്ന് തവണ എങ്കിലും പുരട്ടിയാൽ ഗുണം ഉറപ്പ്!
-
കുക്കുമ്പർ + നാരങ്ങാനീര്
കരുവാളിപ്പ് മാറ്റാൻ സഹായിക്കുന്ന മികച്ച കൂട്ടാണ് കുക്കുമ്പറും നാരങ്ങാനീരും ചേർത്ത മിശ്രിതം. ചെയ്യേണ്ടത് കുക്കുമ്പർ നീരിലേയ്ക്ക് അല്പം നാരങ്ങാനീരും റോസ് വാട്ടറും ചേർത്ത് യോജിപ്പിച്ച ശേഷം ചർമ്മത്തിൽ പുരട്ടുക എന്നതാണ്. അൽപനേരം കഴിഞ്ഞ് കഴുകി കളയുക. കുക്കുമ്പറിലെ കൂളിംഗ്, ബ്ലീച്ചിങ് സവിശേഷതകൾ ചർമ്മത്തെ പോഷിപ്പിക്കുന്നു.
