ഗ്രാമീണ മേഖലയിലെ കുട്ടികള്‍ക്ക് മികച്ച വിദ്യാഭ്യാസം ഉറപ്പാക്കാന്‍ മൊബൈല്‍ ഫോണ്‍…! വര്‍ഷങ്ങള്‍ക്ക് മുമ്പ് അഭിഷേക് ബച്ചന്‍ അഭിനയിച്ച ‘ഐഡിയ സെല്ലുലാര്‍’ പരസ്യം കണ്ടപ്പോള്‍ ചിരിക്കാത്തവര്‍ കുറവായിരിക്കും. വര്‍ഷങ്ങള്‍ക്കിപ്പുറം അത് യഥാര്‍ഥ്യമാകുമെന്ന് ആരും പ്രതീക്ഷിച്ചു കാണില്ല. ഇന്റര്‍നെറ്റും സ്മാര്‍ട്ട് ഫോണും എങ്ങനെയാണ് ഒരു ജനതയുടെ ജീവിതം സുഗമമാക്കുക എന്ന കോവിഡ് കാലത്ത് നമ്മള്‍ കണ്ടു. എന്നാല്‍ കോവിഡിനും മുമ്പേ ഇന്റര്‍നെറ്റിന്റെ പരിധിക്ക് പുറത്തായ സമൂഹത്തെ കൈപിടിച്ചുയര്‍ത്താന്‍ എല്ലാവരും ബാധ്യസ്ഥരാണ്. അതിനായി കേരള സര്‍ക്കാര്‍ നടപ്പിലാക്കുന്ന പദ്ധതിയാണ് കെ-ഫോണ്‍.
സംസ്ഥാന സര്‍ക്കാരിന്റെ സ്വപ്‌ന പദ്ധതിയായ കെ-ഫോണ്‍ പദ്ധതി യഥാര്‍ഥ്യമാവാന്‍ ഇനി കുറച്ച് ദിവസങ്ങള്‍ കൂടി കാത്തിരുന്നാല്‍ മതി. എല്ലാവര്‍ക്കും ഇന്റര്‍നെറ്റ് എന്ന ലക്ഷ്യത്തില്‍ നടപ്പിലാക്കുന്ന കെ-ഫോണ്‍ ജൂണ്‍ അഞ്ചിന് ഉദ്ഘാടനം ചെയ്യുമെന്നാണ് പുതിയ വാര്‍ത്ത. കെ-ഫോണ്‍ നടപ്പിലായാല്‍ സാമ്പത്തികമായി പിന്നാക്കം നില്‍ക്കുന്ന 20 ലക്ഷത്തോളം കുടുംബങ്ങള്‍ക്ക് ഇന്റര്‍നെറ്റ് സൗകര്യം സൗജന്യമായി ലഭിക്കും. മറ്റുള്ളവര്‍ക്ക് മിതമായ നിരക്കിലും ഇന്റര്‍നെറ്റ് ഉപയോഗപ്പെടുത്താന്‍ സാധിക്കും.
ആരും പരിധിക്ക് പുറത്താകാതിരിക്കാന്‍
കേരളത്തിന്റ ഉൾപ്രദേശങ്ങളില്‍ ഇന്റർനെറ്റ് സൗകര്യങ്ങളുടെ സ്ഥിതി എന്താണെന്ന് നമുക്കറിയാം. സാമ്പത്തികമായി പിന്നാക്കം നിൽക്കുന്ന ഇത്തരം പ്രദേശങ്ങളിൽ കാര്യമായ കച്ചവടം കണ്ടെത്താൻ ഇന്റർനെറ്റ് സേവനദാതാക്കൾക്ക് സാധിക്കില്ല. ഇക്കാരണത്താൽത്തന്നെ അവർ ഇത്തരം പ്രദേശങ്ങളിലേക്ക് തങ്ങളുടെ ശൃംഖല വ്യാപിപ്പിക്കാൻ മെനക്കെടില്ല. നഗരപ്രദേശങ്ങളും ഗ്രാമങ്ങളും തമ്മിലുള്ള വികസനപരമായ വലിയ അന്തരത്തിന് ഇത് കാരണമാകും. സാമ്പത്തികമായി പിന്നാക്കം നിൽക്കുന്ന ഗ്രാമങ്ങളിലേക്കും ഏറ്റവും മികച്ച ഇന്റർനെറ്റ് സേവനം എത്തിക്കുക എന്നതാണ് സർക്കാരിന്റെ ലക്ഷ്യം.
ഇന്റര്‍നെറ്റ് എന്നത് എല്ലാവരുടെയും അവകാശമായി പ്രഖ്യാപിച്ച കേരളത്തില്‍ ഡിജിറ്റല്‍ വിപ്ലവത്തിന് തുടക്കം കുറിക്കാന്‍ പോകുന്ന പദ്ധതിയെന്നായിരുന്നു കെ-ഫോണിന്റെ പ്രധാന വിശേഷണം. കെ. എസ്. ഐ. ടി. ഐ. എല്‍, കെ. എസ്. ഇ. ബി. എന്നിവര്‍ ചേര്‍ന്നുള്ള സംരംഭമായ കെ-ഫോണ്‍ ലിമിറ്റഡ് വഴിയാണ് പദ്ധതി നടപ്പാക്കുന്നത്. കൂടാതെ ഭാരത് ഇലക്ട്രോണിക്‌സ് ലിമിറ്റഡിന്റെ കണ്‍സോർഷ്യത്തിന് നടത്തിപ്പ് കരാര്‍ നല്‍കി. കണ്‍സോഷ്യത്തില്‍ ഭാരത് ഇലക്ട്രോണിക്‌സിനെ കൂടാതെ എല്‍. എസ്. കേബിള്‍, എസ്. ആര്‍. ഐ. ടി., റെയില്‍ടെല്‍ തുടങ്ങിയ സ്ഥാപനങ്ങളുമുണ്ട്. വീടുകളില്‍ മാത്രമല്ല, സ്‌കൂളുകളിലും സര്‍ക്കാര്‍ സ്ഥാപനങ്ങളിലും ആശുപത്രികളിലുമെല്ലാം കെ-ഫോണിന്റെ സേവനം ഉപയോഗപ്പെടുത്താനാണ് സര്‍ക്കാര്‍ ലക്ഷ്യം വെക്കുന്നത്.
ഡാറ്റാ ഹൈവേ സാങ്കേതിക വിദ്യയുടെ സഹായത്തോടെ ഉപഭോക്താക്കള്‍ക്ക് അതിവേഗ ഇന്റര്‍നെറ്റ് എത്തിക്കാനും അതിനായി ഒപ്റ്റിക്കല്‍ ഫൈബര്‍ കേബിള്‍ ശൃംഖല കേരളത്തിലുടനീളം സ്ഥാപിക്കാനുമാണ് ലക്ഷ്യമിടുന്നത്. കേരളാ വിഷനെയാണ് കണക്ഷന്‍ നല്‍കാന്‍ തിരഞ്ഞെടുത്തിരുന്നത്. 1516 കോടിയോളം രൂപ പദ്ധതി ചെലവില്‍ ഒരുങ്ങിയ കെ-ഫോണ്‍ പക്ഷേ പദ്ധതി പ്രഖ്യാപിച്ച് ആറുവര്‍ഷം കഴിഞ്ഞിട്ടും എവിടെയുമെത്താതെ ആയതോടെ സര്‍ക്കാറിന് നേരെ ആരോപണങ്ങള്‍ ഉയര്‍ന്നു. കെ-ഫോണിന് ലഭിച്ച ഐ.എസ്.പി. ലൈസന്‍സ് ഉപയോഗിച്ച് സര്‍ക്കാര്‍ വാഗ്ദാനം ചെയ്തത് പോലെ ഡാറ്റ നല്‍കാന്‍ കഴിയില്ലെന്ന വാദവും ഇതിനിടയില്‍ പൊന്തിവന്നു. ബി. എസ്. എന്‍. എല്ലിനെ ഡാറ്റാ വാങ്ങാന്‍ തിരഞ്ഞെടുത്തെങ്കിലും ചെലവെന്താണ്, എത്ര വാങ്ങണം തുടങ്ങിയ കാര്യങ്ങളില്‍ അവ്യക്തത തുടര്‍ന്നു. സംശയങ്ങളും അവ്യക്തതകളും പരിഹരിച്ചാണ് കെ-ഫോണ്‍ കേരളത്തിലെ വീടുകളിലേക്കും സ്ഥാപനങ്ങളിലേക്കും എത്താന്‍ പോകുന്നത്.
വളരുമോ നാട്?
ഇന്റര്‍നെറ്റ് സാധാരണക്കാരെ സാമ്പത്തികമായി വളരാന്‍ സഹായിക്കുമോ? പറ്റുമെന്നാണ് പഠനങ്ങള്‍ പറയുന്നത്. സാമ്പത്തികമായി പിന്നാക്കം നില്‍ക്കുന്നവരുടെ ജീവിതത്തില്‍ മാറ്റം കൊണ്ടുവരാനും അവരെ ശാക്തീകരിക്കാനും എങ്ങനെയാണ് ഇന്റര്‍നെറ്റിന് സാധിക്കുക എന്നല്ലേ? സാധാരണക്കാര്‍ക്ക് അഭിപ്രായ സ്വാതന്ത്ര്യത്തിനുള്ള വേദിയാകുന്നതിന് പുറമേ മികച്ച പാര്‍പ്പിടം, പോഷകാഹാരം എന്നിവ ലഭിക്കാനും ഇന്റര്‍നെറ്റ് വഴി മറ്റുള്ളവരുമായുള്ള സമ്പര്‍ക്കത്തിലൂടെ സാധിക്കും. സുരക്ഷിതരായി കഴിയാനും വിദ്യാഭ്യാസം നേടാനും ആശയവിനിമയത്തിനും ഇന്റര്‍നെറ്റ് സഹായിക്കും. മേഖലയില്‍ സൃഷ്ടിക്കപ്പെടുന്ന തൊഴിലുകള്‍ ലക്ഷകണക്കിന് ആളുകളെയാണ് സഹായിക്കുക.
വികസ്വര രാജ്യങ്ങളില്‍ കഴിയുന്ന ഏകദേശം നാല് ബില്യണ്‍ കോടി ജനങ്ങളെങ്കിലും ഇപ്പോഴും ഇന്റര്‍നെറ്റ് സേവനങ്ങള്‍ക്ക് വെളിയിലാണെന്നാണ് കണക്കുകള്‍ സൂചിപ്പിക്കുന്നത്.
ഇന്ത്യയിലും അവസ്ഥ വിഭിന്നമല്ല എന്ന് കോവിഡ് കാലം നമ്മളെ പഠിപ്പിച്ചു. കോവിഡ് വ്യാപനം ഭയന്ന് സ്‌കൂളുകള്‍ അടച്ചുപൂട്ടിയപ്പോള്‍ വിദ്യാഭ്യാസം നേടാതെ പുറത്ത് നില്‍ക്കേണ്ടി വന്നത് സാധാരണക്കാരായ വിദ്യാര്‍ഥികളാണ്. സ്മാര്‍ട്ട് ഫോണില്‍ വിദ്യാഭ്യാസം സ്മാര്‍ട്ടാക്കിയപ്പോള്‍ കുന്നിലും മരത്തിലും വയലിലും റോഡിലുമെല്ലാം മൊബൈല്‍ ഫോണുമായി ഇരുന്ന വിദ്യാര്‍ഥികളെ ആരും മറന്നിട്ടുണ്ടാകില്ല. കോവിഡിന് മുമ്പും ലോകത്തിനൊപ്പം അറിവ് നേടി മുന്നേറാന്‍ ഒരുവിഭാഗം ആളുകള്‍ ബുദ്ധിമുട്ടി. ഒരുവിഭാഗം ആളുകള്‍ ഡിജിറ്റല്‍ ലോകത്തും മറ്റൊരു വിഭാഗം അതിന് പുറത്തുമായി കഴിഞ്ഞുവന്നു. ജനങ്ങള്‍ക്കിടയിലെ ഈ ഡിജിറ്റല്‍ വിടവ് കുറയ്ക്കാന്‍ സര്‍ക്കാരുകളും സംഘടനകളും പലപ്പോഴായി ശ്രമിച്ചു വരികാണ്.
2020-ഓടെ വികസ്വര രാഷ്ട്രങ്ങളിലെ 1.5 ബില്യണ്‍ ആളുകളില്‍ ഇന്റര്‍നെറ്റ് സേവനം ലഭ്യമാക്കുക എന്ന ലക്ഷ്യത്തോടെ യു.എസ്. സര്‍ക്കാര്‍ 2017 ജനുവരി 24-ന് ഡിജിറ്റല്‍ ജി.എ.പി. നിയമം കൊണ്ടുവന്നു. ഡിജിറ്റല്‍ സമ്പദ് വ്യവസ്ഥയുടെ ഉയര്‍ച്ചയിലൂടെ സാമൂഹ്യമാറ്റം കൊണ്ടുവരാന്‍ ലോക സാമ്പത്തിക ഫോറം എല്ലാവര്‍ക്കും ഡാറ്റ എന്ന പദ്ധതി 2016-ല്‍ ആദ്യമായി ആഫ്രിക്കന്‍ രാഷ്ട്രങ്ങളില്‍ അവതരിപ്പിച്ചു.
കുറഞ്ഞ ചെലവില്‍ എല്ലാവര്‍ക്കും ഇന്റര്‍നെറ്റ് ലഭ്യമാക്കുകയായിരുന്നു ലക്ഷ്യം. വലിയ വില നല്‍കാതെ തന്നെ ഡാറ്റ ഉപയോഗിക്കാമെന്ന് വന്നതോടെ സാധാരണക്കാര്‍ ഇന്റര്‍നെറ്റ് ഉപയോഗിക്കുന്നത് വര്‍ധിച്ചു. ഇന്ന് ഇന്ത്യയില്‍ ആകെമൊത്തമുള്ള 646 മില്യണ്‍ ഇന്റര്‍നെറ്റ് ഉപഭോക്താക്കളില്‍ 352 മില്യണും ഗ്രാമീണ മേഖലകളില്‍ നിന്നാണ്. അതേസമയം ഗ്രാമീണ മേഖലയില്‍ 60 ശതമാനവും ഇന്റര്‍നെറ്റ് സേവനത്തില്‍ നിന്ന് പുറത്തു നില്‍ക്കുന്നവരാണെന്നും ഓര്‍ക്കണം.
ഈയവസരത്തിലാണ് കേരളത്തില്‍ ഇന്റര്‍നെറ്റ് എല്ലാവരുടെയും അവകാശമായി പ്രഖ്യാപിച്ച് സര്‍ക്കാര്‍ കെ-ഫോണ്‍ വഴി കുറഞ്ഞ ചെലവില്‍ ഇന്റര്‍നെറ്റ് സൗകര്യം ഏര്‍പ്പെടുത്തുന്നത്.
സാമ്പത്തികമായി പിന്നാക്കം നില്‍ക്കുന്ന 20 ലക്ഷത്തോളം വരുന്ന സാധാരണക്കാര്‍ക്ക് മാത്രമല്ല ഇതിന്റെ നേട്ടം കിട്ടാന്‍ പോകുന്നത്. 30,000-ഓളം സര്‍ക്കാര്‍- വിദ്യാഭ്യാസ സ്ഥാപനങ്ങളില്‍ 10 എം.ബി.പി.എസ്. മുതല്‍ 1 ജി.ബി.പി.എസ്. വേഗതയിലാണ് നെറ്റ് കണക്ഷന്‍ ലഭ്യമാക്കാന്‍ പോകുന്നത്. റോഡുകളില്‍ സ്ഥാപിക്കുന്ന നിരീക്ഷണ ക്യാമറകള്‍ ഉയര്‍ന്ന നിലവാരത്തിലാക്കാനും ഗതാഗത സംവിധാനങ്ങള്‍ കാര്യക്ഷമമാക്കാനും ഇതോടെ സാധിക്കും. നിര്‍മിതബുദ്ധി, സ്റ്റാര്‍ട്ട് അപ്പുകള്‍, സ്മാര്‍ട്ട് സിറ്റി, ബ്ലോക്ക് ചെയിന്‍ തുടങ്ങി എല്ലാ മേഖലകളിലും മെച്ചപ്പെട്ട പ്രവര്‍ത്തനം കാഴ്ചവെക്കാനും സാധിക്കും. ഇ-ഹെല്‍ത്ത്, ഇ-എജ്യുക്കേഷന്‍ തുടങ്ങി എല്ലാ ഇ-സേവനങ്ങളും വേഗതയില്‍ കാര്യക്ഷമമാക്കാനും സാധിക്കുമെന്നാണ് പ്രതീക്ഷിക്കുന്നത്.
