ഹൈലൈറ്റ്:
- രജിസ്ട്രേഷന് നിര്‍ബന്ധമല്ലെന്നാണ് എംബസിയില്‍ നേരിട്ടന്വേഷിച്ചവര്‍ക്ക് ലഭിച്ച മറുപടി
- ലോകത്തിന്റെ വിവിധ ഭാഗങ്ങളിലുള്ള ഇന്ത്യന്‍ പ്രവാസികളുടെ വിവര ശേഖരണത്തിന് പ്രവാസി റിഷ്ത എന്ന പേരില്‍ ഇന്ത്യന്‍ വിദേശകാര്യമന്ത്രാലയം ഈയിടെ പ്രത്യേക വെബ്സൈറ്റ് ആരംഭിച്ചിരുന്നു.
ദോഹ: ഖത്തറിലെ മുഴുവന്‍ ഇന്ത്യക്കാരും എംബസി വെബ്സൈറ്റില്‍ രജിസ്റ്റര്‍ ചെയ്യണമെന്ന നിര്‍ദേശവുമായി ഖത്തര്‍ ഇന്ത്യന്‍ എംബസി. രജിസ്ട്രേഷന് ഫോര്‍ ഇന്ത്യന്‍ നാഷനല്‍സ് റെസിഡന്റ് ഇന്‍ ഖത്തര്‍ എന്ന (https://indianembassyqatar.gov.in/indian_national_reg) പ്രത്യേക ലിങ്ക് വഴിയാണ് രജിസ്ട്രേഷന്. പ്രവാസിയുടെ പേര്, ജനന തിയ്യതി, ലിംഗം, ബന്ധപ്പെടാനുള്ള നമ്പര്‍, പാസ്പോര്‍ട്ട് നമ്പര്‍ തുടങ്ങിയ വിവരങ്ങള്‍ ഫോമില്‍ നിര്‍ബന്ധമായും ചേര്‍ത്തിരിക്കണം. ഖത്തര്‍ ഐഡി നമ്പര്‍, കുടുംബാംഗങ്ങളുടെ എണ്ണം, ജോലി, സ്‌പോണ്‍സര്‍, നാട്ടിലെ അഡ്രസ്, നാട്ടില്‍ ബന്ധപ്പെടാവുന്ന ആളുടെ പേരും വിലാസവും ഫോണ്‍ നമ്പറും തുടങ്ങിയവ ചേര്‍ക്കാനുള്ള കോളങ്ങള്‍ ഉണ്ടെങ്കിലും അവ നിര്‍ബന്ധമല്ല.
മുഴുവന്‍ ഇന്ത്യക്കാരും തങ്ങളുടെ വിവരങ്ങള്‍ രജിസ്റ്റര്‍ ചെയ്യാന്‍ താല്‍പര്യപ്പെടുന്നു എന്ന് കാണിച്ച് ഇന്ത്യന്‍ എംബസി ട്വിറ്ററില്‍ അറിയിച്ചു. എന്നാല്‍ ഇത് എന്തിന് വേണ്ടിയാണെന്ന് ട്വീറ്റിനു ചുവടെ കമന്റായി ചോദിച്ചിട്ടുണ്ടെങ്കിലും എംബസി മറുപടിയൊന്നും നല്‍കിയിട്ടില്ല. അതേസമയം, രജിസ്ട്രേഷന് നിര്‍ബന്ധമല്ലെന്നാണ് എംബസിയില്‍ നേരിട്ടന്വേഷിച്ചവര്‍ക്ക് ലഭിച്ച മറുപടി. വിവരങ്ങള്‍ നല്‍കാന്‍ പ്രോല്‍സാഹിപ്പിക്കുക മാത്രമേ ചെയ്യുന്നുള്ളൂ എന്നാണ് അധികൃതരുടെ പക്ഷം.
കൊവിഡ് വ്യാപനത്തിന്റെ തുടക്കത്തില്‍ നാട്ടിലേക്ക് പോകുന്നവരുടെ വിവരങ്ങള്‍ ഇന്ത്യന്‍ എംബസി ശേഖരിച്ചിരുന്നു. എന്നാല്‍, മുഴുവന്‍ ഇന്ത്യക്കാരുടെയും വിവരങ്ങള്‍ ശേഖരിക്കുന്നത് ഇതാദ്യമായാണ്. ലോകത്തിന്റെ വിവിധ ഭാഗങ്ങളിലുള്ള ഇന്ത്യന്‍ പ്രവാസികളുടെ വിവര ശേഖരണത്തിന് പ്രവാസി റിഷ്ത എന്ന പേരില്‍ ഇന്ത്യന്‍ വിദേശകാര്യമന്ത്രാലയം ഈയിടെ പ്രത്യേക വെബ്സൈറ്റ് ആരംഭിച്ചിരുന്നു.
പ്രവാസി സമൂഹത്തെ പരസ്പരം ബന്ധപ്പെടുത്താനും അവര്‍ക്കാവശ്യമായ വിവരങ്ങള്‍ കൈമാറാനും ആശയ വിനിമയം സാധ്യമാക്കാനുമാണ് പുതിയ പോര്‍ട്ടലെന്ന് മന്ത്രാലയം അറിയിച്ചു. പ്രവാസി റിഷ്ത്ത പോര്‍ട്ടലില്‍ പ്രവാസികളുടെ രജിസ്ട്രേഷന് യുഎഇ കഴിഞ്ഞ മാസം ആരംഭിച്ചിരുന്നു.
ജീവിക്കണോ അതോ മരിക്കണോ? ഈ അമ്മയുടെ നൊമ്പരം സമൂഹത്തോടുള്ള ചോദ്യമാണ് !!
Malayalam News App: ഏറ്റവും പുതിയ മലയാളം വാര്‍ത്തകള്‍ അറിയാന്‍ ആപ്പ് ഡൗണ്‍ലോഡ് ചെയ്യുക
ഏറ്റവും പുതിയ വാർത്തകൾ അതിവേഗം അറിയാൻ Samayam Malayalam ഫേസ്ബുക്ക് പേജ് ലൈക്ക് ചെയ്യൂ
Web Title : indian nationals in the state of qatar are encouraged to register themselves with the embassy on its website
Malayalam News from malayalam.samayam.com, TIL Network
