യാത്രക്കാരെ ആകർഷിക്കുന്നത് രൂപഭംഗി, മെട്രോയ്ക്കും പുതിയ സ്ലീപ്പറിനും പുതിയ രൂപം; ഈ വ‍ർഷം തന്നെ നിർമാണം പൂർത്തിയാക്കാൻ റെയിൽവേ

നിലവിൽ ഈ ട്രെയിനുകൾ ഡിസൈൻ ഘട്ടത്തിലാണെന്നും ഉടൻ തന്നെ പുറത്തിറങ്ങുമെന്നും കേന്ദ്ര റെയിൽവേ മന്ത്രി അശ്വിനി വൈഷ്ണവ് പറഞ്ഞതായി ന്യൂസ് 18 റിപ്പോർട്ട് ചെയ്തു. ഡിസൈനും നിർമാണവും പൂർത്തിയാക്കി ടെസ്റ്റിങ് നടത്താൻ ആറു മാസം കൂടി വേണ്ടി വരുമെന്നും വരുന്ന പുതുവർഷത്തിൽ വന്ദേ മെട്രോ ട്രെയിനുകൾ പുറത്തിറങ്ങുമെന്നും റെയിൽവേ മന്ത്രി വ്യക്തമാക്കി.

വന്ദേ ഭാരത് ട്രെയിൻ പുറത്തിറങ്ങിയ സാഹചര്യത്തിലാണ് നിലവിൽ രാജ്യത്ത് സർവീസ് നടത്തുന്ന മറ്റു ട്രെയിനുകളും നവീകരിക്കണമെന്ന് റെയിൽവേയ്ക്ക് തോന്നുന്നത്. എമു ട്രെയിനുകളുടെ പരിഷ്കരിച്ച രൂപമായിരിക്കും വന്ദേ മെട്രോ. നിലവിൽ 500 മുതൽ 800 കിലോമീറ്റർ വരെ ദൂരത്തിലുള്ള റൂട്ടുകളിലാണ് വന്ദേ ഭാരത് ട്രെയിൻ ഓടുന്നത്. എന്നാൽ വന്ദേ മെട്രോ 100 കിലോമീറ്റർ മാത്രം വരുന്ന ചെറു റൂട്ടുകളിലായിരിക്കും സർവീസ് നടത്തുക. വലിയ നഗരങ്ങളുടെ പ്രാന്തപ്രദേശങ്ങളിലൂടെ സബർബൻ സർവീസ് ആയോ തൊട്ടടുത്തുള്ള നഗരങ്ങളെ തമ്മിൽ ബന്ധിപ്പിച്ച് ലോക്കൽ ട്രെയിനുകളായോ ഇവ സർവീസ് നടത്തും.

ഭാരതത്തിലെ കോടിക്കണക്കിന് ജനങ്ങളുടെ സ്വപ്നസാക്ഷാത്കാരം, ഭാരതം വളരുമ്പോൾ ലോകം വളരുന്നുവെന്ന് മോദി

രാജ്യത്തു തന്നെ ആദ്യമായി വന്ദേ മെട്രോ ട്രെയിനുകൾ പുറത്തിറങ്ങുക മുംബൈയിലായിരിക്കും. മുംബൈ നഗരത്തിൻ്റെ മുഖമായ സബർബൻ ട്രെയിനുകൾക്ക് പകരമായി വന്ദേ മെട്രോ ട്രെയിനുകൾ എത്തുമെന്ന് ഉറപ്പായിട്ടുണ്ട്. നിലവിലെ ലോക്കൽ ട്രെയിൻ ശൃംഖല അടിമുടി പരിഷ്കരിക്കുന്നതിൻ്റെ ഭാഗമായി 238 ട്രെയിനുകൾ വാങ്ങാനാണ് റെയിൽവേ ബോർഡ് അനുമതി നൽകിയിട്ടുള്ളത്. കൂടുതൽ സൗകര്യങ്ങൾക്കൊപ്പം മെട്രോ ട്രെയിനുകളെപ്പോലെ രൂപഭംഗിയുള്ള ട്രെയിനുകളായിരിക്കും മുംബൈയിലെത്തുക. ഇതിനു പുറമെ ലഖ്നൗ – കാൺപൂർ, ഡൽഹി – മീററ്റ്, മുംബൈ, ലോണാവാലാ, കൊൽക്കത്ത – ഹാൽദിയ, ചെന്നൈ – തിരുപ്പതി തുടങ്ങിയ റൂട്ടുകളും വന്ദേ മെട്രോയ്ക്ക് യോജിച്ചവയാണ്. ഇതിനു പുറമെ നിലവിൽ മെമു സർവീസുകൾ നടത്തുന്ന കേരളത്തിലടക്കമുള്ള റൂട്ടുകളിലും ഭാവിയിൽ വന്ദേ മെട്രോയ്ക്ക് സാധ്യതയുണ്ട്.

വന്ദേ മെട്രോ യാത്രക്കാരുടെ സൗകര്യങ്ങളും യാത്രാസുഖവും കാര്യമായി വർധിക്കുമെന്നാണ് റെയിൽവേ ഉദ്യോഗസ്ഥർ പറയുന്നത്. സമീപഭാവിയിൽ തന്നെ ജനറൽ ക്ലാസ് കോച്ചുകൾ അടക്കം എസിയായി ഉയർത്താനുള്ള പദ്ധതി റെയിൽവേയ്ക്കു മുന്നിലുണ്ട്. ഇതിനിടയിലാണ് പൂർണമായും ശീതീകരിച്ച വന്ദേ മെട്രോയുടെ വരവ്. ഡൽഹിയും മുംബൈയും അടക്കമുള്ള വലിയ നഗരങ്ങളിൽ ജോലി ചെയ്യാനായി മാത്രം ദീർഘദൂരം യാത്ര ചെയ്ത് ആളുകൾ എത്തുന്നുണ്ടെന്നും അവർ എമു ട്രെയിനുകളെയാണ് ആശ്രയിക്കുന്നതെന്നും ഉദ്യോഗസ്ഥർ ചൂണ്ടിക്കാണിക്കുന്നു. വന്ദേ മെട്രോ എത്തുന്നതോടെ ഇവരുടെ യാത്ര കൂടുതൽ സൗകര്യപ്രദമാകും.

‘കടമെടുപ്പ് പരിധി വെട്ടിക്കുറച്ച കേന്ദ്രസർക്കാർ നടപടി സാഡിസ്റ്റ് സമീപനം’; ആഞ്ഞടിച്ചു മുഖ്യമന്ത്രി

മെട്രോ ട്രെയിനുകളെപ്പോലെ കൃത്യമായ ഇടവേളകളിൽ ഷട്ടിൽ സർവീസുകളെന്ന നിലയിലാണ് വന്ദേ മെട്രോ എത്തുക. പൂർണമായും റിസർവേഷൻ ഇല്ലാത്ത കോച്ചുകളായതിനാൽ ആളുകൾക്ക് മുൻകൂട്ടി പ്ലാൻ ചെയ്യാതെ തന്നെ യാത്ര ചെയ്യാനാകും. ലോകോത്തര നിലവാരമുള്ള ട്രെയിനുകളായിരിക്കും ഇവയെന്നും രാജ്യത്തെ ടൂറിസം രംഗത്തിനടക്കം ഇവ വലിയ മുതൽക്കൂട്ടാകുമെന്നും റെയിൽവേ ഉദ്യോഗസ്ഥർ ചൂണ്ടിക്കാണിക്കുന്നു.

വന്ദേ ഭാരത് ട്രെയിൻ വികസിപ്പിച്ച ചെന്നൈ ഐസിഎഫും ലഖ്നൗവിലെ റിസർച്ച് ഡിസൈൻ ആൻ്റ് സ്റ്റാൻഡേഡ് ഓർഗനൈസേഷനും ചേർന്നാണ് വന്ദേ മെട്രോ ട്രെയിൻ തയ്യാറാക്കുന്നത്. ഹ്രസ്വദൂര ട്രെയിനുകളിൽ വലിയ ഗുണം ചെയ്യുന്ന സീൽഡ് ഗാങ് വേ അടക്കമുള്ള സവിശേഷതകൾ ഇതിനോടകം വന്ദേ ഭാരതിലുണ്ട്. ഒരു കോച്ചിൽ നിന്ന് അടുത്ത കോച്ചിലേയ്ക്ക് അനായാസം നീങ്ങാനും ട്രെയിൻ മൊത്തത്തിൽ ഒരു യൂണിറ്റായി കാണാനും ഇതു സഹായിക്കുന്നുണ്ട്. മെട്രോ കോച്ചുകളിലടക്കമുള്ള ഈ സംവിധാനം വന്ദേ മെട്രോയിലും തുടർന്നേക്കും. അതേസമയം, ചെറിയ റൂട്ടുകളിൽ അധികം വേഗം വേണ്ടി വന്നേക്കില്ല എന്നതിനാൽ വന്ദേ ഭാരതിനെപ്പോലെ എയ്റോഡൈനാമിക് രൂപത്തിനു പകരം മെട്രോ ട്രെയിനുകൾക്ക് സമാനമായ മുഖഭാവമായിരിക്കും വന്ദേ മെട്രോയ്ക്കും.

പ്രത്യേക ട്രാക്കോ അനുബന്ധ സൗകര്യങ്ങളോ ഇല്ലാതെ മെട്രോ നിലവാരത്തിലുള്ള ട്രെയിൻ സർവീസ് ചെറുനഗരങ്ങളിലടക്കം ലഭ്യമാക്കാൻ കഴിയുമെന്ന നേട്ടം റെയിൽവേയ്ക്കുണ്ട്.